သစ်ခုတ်တာ ရပ်တန့်ပါ၊ ရာသီဥတုဖောက်ပြန်မှု ကာကွယ်ပါ

ပို့စ်တင်ချိန် - 8/11/2013 03:18:00 AM


သို့

အယ်ဒီတာခင်ဗျား

ကျွန်တော်တို့ မကွေးတိုင်းဒေသကြီး ပခုက္ကူမြို့နယ်နှင့် ဆိပ်ဖြူမြို့နယ်တို့သည် မိုးနည်းရေရှားဒေသဖြစ်တာနဲ့အညီ သစ်ပင်တစ်ပင်ရဲ့ တန်ဖိုးကလည်း ကြီးမားလှပါသည်။

အဲဒီသစ်ပင်တွေကို မီးသွေးဖုတ်ရန်အတွက် ခုတ်လှဲနေကြသည့်အပြင် မြို့နယ်အတွင်းတွင်လည်းသစ်လုံးကားကြီးများ နေ့စဉ်များပြားစွာ ပြေးဆွဲနေသည်ကို ဒေသခံများ မြင်တွေ့နေရ ပါသည်။

ဒီလို သစ်ပင်တွေကို အထိန်းသိမ်းမဲ့ ခုတ်လှဲနေကြသဖြင့် သစ်တောများ ပြုန်းတီးလာပြီးရာသီဥတု ဖောက်ပြန်ပြောင်းလဲလာ
သောကြောင့် မိုးခေါင်ရေရှားမှုဒဏ်ကို ပခုက္ကူ မြို့နယ်နှင့် ဆိပ်ဖြူမြို့နယ်တို့လို မြန်မာနိုင်ငံ မိုးနည်းဒေသတစ်ခုလုံး ကြုံတွေ့နေရပါသည်။ ယခုနှစ်မှာ မိုးအနည်းငယ်သာ ရွာသွန်းပြီး နွေရာသီကနေ အခုအချိန်အထိ သောက်သုံး ရေရှားပါးမှု
ဒုက္ခတွေကို ရင်ဆိုင်နေရပါပြီ။

တချို့ ဝေးလံတဲ့နေရာတွေအထိ သောက်သုံး ရေကိုသွားရောက် ဝယ်သုံးနေရတဲ့ ရွာတွေ လည်း များစွာရှိနေပါပြီ။ ဒီလို မိုးခေါင်လို့ သောက်ရေရှားပါးပြီး ဒုက္ခရောက်နေချိန်မှာပဲ ဒေသအတွင်းမှာ သစ်လုံးကားကြီးများကို မြင်ရတိုင်း ပိုပြီး မိုးခေါင်လာသည်ဟု ခံစားရ ပါသည်။ ဒါ့ကြောင့် ရာသီဥတုတွေ ဒီ့ထက် ပိုဖောက်ပြန်လာစေတဲ့
သစ်ပင်ခုတ်လှဲမှုတွေ ကို သက်ဆိုင်ရာမှ အမြန်ဆုံးလျှော့ချပြီး ရာသီဥတုဖောက်ပြန်မှုကို ကာကွယ်ပေးပါရန် အယ်ဒီတာ့ထံပေးစာကဏ္ဍမှတစ်ဆင့် တင်ပြလိုက်ပါတယ်ခင်ဗျား။

မောင်ကိုကိုမင်း
Popular Myanmar News Journal