မြို့နယ် ထွေ/အုပ်များ ရပ်ကွက်၊ ကျေးရွာ အုပ်ချုပ်ရေးမှူး ရွေးချယ်ရာတွင် ဥပဒေချိုးဖောက်

ပို့စ်တင်ချိန် - 8/14/2013 09:08:00 AM

ရန်ကုန်- ရပ်ကွက်နှင့်ကျေးရွာ အုပ်ချုပ်ရေးမှူးရွေးချယ်ရာတွင် တာဝန်ရှိသော မြို့နယ်အထွေထွေအုပ်ချုပ်ရေးမှူးများသည် ဥပဒေနှင့်အညီရွေးချယ်ပေးခြင်းမရှိဘဲ ဥပဒေချိုးဖောက်မှုများရှိနေကြောင်း ပြည်သူ့လွှတ်တော် တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မတီက ပြည်သူ့လွှတ်တော်သို့ တင်သွင်းသော အစီရင်ခံစာတွင် ဖော်ပြထားသည်။

ပြည်သူလူထုက ယုံကြည်ထောက်ခံမှုဖြင့် ဥပဒေနှင့်အညီ ရွေးချယ်ပြီးသူများကိုလည်း ၎င်းတို့လိုလားသူများမဟုတ်သည့်အတွက် ခန့်အပ်မှုမရှိကြောင်း ပြည်သူ့လွှတ်တော် တရားဥပဒေစိုးမိုးရေးနှင့် တည်ငြိမ်အေးချမ်းရေး ကော်မတီက လွှတ်တော်သို့တင်ပြခဲ့သည်။

အုပ်ချုပ်ရေးမှူးများသည် ၀န်ထမ်းများဖြစ်၍ ပြည်သူလုထုကို ဗဟိုမပြုဘဲ အထက်လူကြီးများကိုသာ ဗဟိုပြုနေသည်ဟုလည်း အစီရင်ခံစာက ထောက်ပြထားသည်။

ထို့အပြင် ရပ်ကွက်အုပ်ချုပ် ရေးမှူးအချို့သည် လုပ်ပိုင်ခွင့်ကို အလွဲသုံးစားပြုခြင်း၊ လူငယ်လူရွယ်များ၏ အကျင့်စာရိတ္တပျက်ပြားမှုကိုဖြစ်စေသော ကေတီဗီဆိုင်များကို အုပ်ချုပ်ရေးပိုင်းမှ ရဲနှင့် စည်ပင်တို့က သိလျက်နှင့် လျစ်လျူရှုထားခြင်း၊ လောင်းကစားမှုများကို မသိကျိုးကျွံပြုမှုများကို ဒေါ်အောင်ဆန်းစုကြည် ဦးဆောင်သော ပြည်သူ့ လွှတ်တော် တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မတီက အစီရင်ခံစာတွင် ထည့်သွင်းဖော်ပြလိုက်သည်။

“ကော်မတီဝင်တွေရဲ့တွေ့ရှိချက်ရော၊ ကျွန်တော့်ဆီလာတဲ့ တိုင်စာတွေအရရော ကျွန်တော်တို့ ကွင်းဆင်းတဲ့အခါမှာတွေ့တဲ့ အချက်တွေပါ။ ဒါတွေက တကယ်ရှိနေတာပဲ” ဟု ပြည်သူ့လွှတ်တော် တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မတီ အတွင်းရေးမှူးဦးဝင်းမြင့်က ပြောကြားသည်။

သြဂုတ် ၁၁ ရက် ပြည်သူ့လွှတ်တော်အစည်းအဝေးသို့ တင်သွင်းသော ယင်းအစီရင်ခံစာကို ပြည်ထဲရေးဝန်ကြီးဌာနဒုဝန်ကြီး ဗိုလ်မှူးချုပ် ကျော်ကျော်ထွန်း လာရောက်နားထောင်သွားကြောင်းသိရသည်။
7Day News Journal