တရုတ် နို့မှုန့်အရေးနှင့် သောကမအေးသော မိခင်များ

ပို့စ်တင်ချိန် - 8/14/2013 08:59:00 AM


သြဂုတ်လ ၇ ရက်နေ့ တီဗီ သတင်း တစ်ပုဒ်တွင် ဘေဂျင်း၌ အစိုးရသည် ကလေး နို့မှုန့် ရောင်းသည့် ကုမ္ပဏီကြီး ခြောက်ခုကို ဒဏ်ငွေ စုစုပေါင်း ဒေါ်လာ ၁၀၉ သန်းခန့် ရိုက်လိုက်ကြောင်း သတင်း ပါလာသည်။ နို့မှုန့် ပြဿနာ မကြာခဏ တက်နေသော တရုတ်ပြည်၏ ဈေးကွက်ကလည်း စိတ်ဝင်စားစရာ ကောင်းလာသည်။ မည်သည့် ကုမ္ပဏီများ ပါနေသနည်းဟု နားစိုက် ကြည့်လိုက်သော အခါတွင် နိုင်ငံခြား ကုမ္ပဏီကြီး ငါးခုနှင့် ဟောင်ကောင် ကုမ္ပဏီ တစ်ခု ဖြစ်နေသည်။ နိုင်ငံခြား ကုမ္ပဏီများ ဆိုရာတွင် အမေရိကန်မှ Mead Johnson Nutrition၊ ပြင်သစ် Danone ကုမ္ပဏီ လက်အောက်ခံ Dumex Baby Food၊ နယူးဇီလန်နိုင်ငံမှ Fonterra Co-operative Group၊ အမေရိကန်မှ Abbott Laboratories နှင့် ဟောင်ကောင် ကုမ္ပဏီ တစ်ခု ဖြစ်သည်။

တရုတ် အစိုးရသည် အခြား ကုမ္ပဏီများဖြစ်သည့် ဆွစ်ဇာလန်နိုင်ငံ Nestle ကုမ္ပဏီခွဲ တစ်ခုဖြစ်သည့် Wyeth Nutrition နှင့် တရုတ် ကုမ္ပဏီ တစ်ခုဖြစ်သည့် Zhejiang Beingmate Technology Industry and Trade ကုမ္ပဏီအပြင် ဂျပန်နိုင်ငံမှ ကုမ္ပဏီတို့ကိုမူ အရေးယူခြင်း မရှိပေ။ ထိုကုမ္ပဏီများကို အရေးမယူရခြင်းမှာ ယင်းကုမ္ပဏီများသည် အစိုးရ၏ စုံစမ်း စစ်ဆေးမှုများကို ပူးပေါင်း ဆောင်ရွက်သည့်အပြင် အရေးကြီးသည့် အထောက်အထားများကို ထုတ်ပေးခြင်း၊ တိုင်းတာ စစ်ဆေးမှုများတွင် ပါဝင် ကူညီခြင်းကြောင့်ဟု သတင်းများက ထုတ်ပြန် ကြေညာခဲ့သည်။

နို့မှုန့်အစ

မွန်ဂိုမျိုးနွယ် တာတာ လူမျိုးတို့သည် ကူဘလိုင်ခန်း လက်ထက်ကတည်းက စစ်ထွက်လျှင် နို့ခဲများ ယူဆောင်သွားတတ်ကြောင်း ထိုစဉ်က စစ်သည်များသည် နွားနို့ကို နေလှမ်းပြီး အပေါ်ယံကိုကဲ့ကာ အနှစ်များအဖြစ် ပြုလုပ်၍ ခရီးကြမ်း ချီတက်ရာတွင် စားသောက်တတ်ကြောင်း မာကိုပိုလိုက ရေးသား ဖူးသည်။

နို့မှုန့်ကို ပထမဆုံး တီထွင်သူမှာ ရုရှား ရူပဗေဒ ပညာရှင် အော့ဆစ် ကရီချက်စကီ ဖြစ်ပြီး ၁၈၀၂ ခုနှစ် ကတည်းက တီထွင်နိုင်ခဲ့ခြင်း ဖြစ်သည်။ ပထမဦးဆုံး စီးပွားဖြစ် ထုတ်လုပ်ခြင်းကို ရုရှား ဓာတုဗေဒ ပညာရှင် အမ်ဒရီကော့ဖ်က ၁၈၃၂ ခုနှစ်တွင် စတင် ပြုလုပ်ခဲ့သည်။ ၁၈၅၅ ခုနှစ်တွင် တီအက်စ် ဂရင်းမ်ဝိတ်က နို့မှုန့်ကို တရားဝင် မှတ်ပုံတင်ပြီး မူပိုင်ခွင့် ရယူခဲ့သည်။ သို့သော် လေလုံခန်းအတွင်း နို့မှုန့် ထုတ်လုပ်ခြင်းကိုမူ ၁၈၃၇ ခုနှစ်တွင် ဝီလျံနယူတန်ဆိုသူက မူပိုင်ခွင့် ယူထားပြီး ဖြစ်သည်။

မယ်လမင်း

၂၀၀၈ ခုနှစ်ကတည်းက တရုတ်တွင် မယ်လမင်း ပြဿနာ စတင်ခဲ့သည်။ မယ်လမင်းသည် ပန်းကန် ခွက်ယောက်များနှင့် အိမ်သုံးပစ္စည်းများ ထုတ်လုပ်ရာတွင် ထည့်သွင်း အသုံးပြုရသည့် စက်မှု လုပ်ငန်းသုံး ဓာတုပစ္စည်း တစ်မျိုး ဖြစ်သည်။ မယ်လမင်းသည် နိုင်ထရိုဂျင် ကြွယ်ဝ ဓာတ်ပစ္စည်း တစ်မျိုးဖြစ်ပြီး၊ ယင်းဓာတ်သည် ပြိုကွဲမှုနှုန်းနှေးကာ ကိုယ်ခန္ဓာအတွင်း ဝင်ရောက်သွားပါကလည်း ပြိုကွဲမှုနှုန်း နည်းပြီး အဆိပ်အဖြစ် ကိုယ်ခန္ဓာကို ဒုက္ခပေးတတ်သည်။

၂၀၀၇ ခုနှစ် မတ်လ ၃၀ ရက်နေ့တွင် အမေရိကန် အစားအစာနှင့် ဆေးဝါး ကွပ်ကဲရေးအဖွဲ့ (FDA) က တရုတ်နိုင်ငံ Xuzhou ကထုတ်သည့် တိရစ္ဆာန် အစားအစာများတွင် မယ်လမင်းဓာတ်များ ပါဝင်နေကြောင်း ထုတ်ပြန် ကြေညာခဲ့သည်။ ယင်းအစားအစာများကို စားသုံးမိသည့် တိရစ္ဆာန်များ သည် ဆီးကျောက်တည်ခြင်း၊ ဆီးသွားလျှင် သွေးပါခြင်းများ ဖြစ်ကြောင်း FDA က ဆိုသည်။

တရုတ် ကွန်မြူနစ်ပါတီက ထုတ်ဝေသည့် ပြည်သူ့ နေ့စဉ်သတင်းစာတွင်လည်း ၂၀၀၈ ခုနှစ်ကတည်း က တရုတ် ပြည်တွင်းသို့ နိုင်ငံခြားမှ တင်သွင်းသော နို့မှုန့်များကို ၃၀ ရာခိုင်နှုန်းခန့် တိုးမြှင့်ခဲ့ကြောင်း ရေးသားထားသည်။ အဘယ်ကြောင့် တရုတ်တွေ နို့မှုန့် မထုတ်ဘဲ နိုင်ငံခြား တိုင်းပြည်များက တင်သွင်းနေရသနည်း ဆိုသည့် အကြောင်းကလည်း ရှိနေသည်။ ၂၀၀၈ ခုနှစ်လောက်က တရုတ်ပြည် ထွက် နို့မှုန့်များတွင် ပြဿနာ အကြီးအကျယ် ပေါ်ခဲ့ပြီး တရုတ် နို့မှုန့် သောက်သုံးခြင်းကြောင့် နာမကျန်းဖြစ်ခြင်း၊ သေဆုံးမှုများ ရှိခဲ့ခြင်းတို့ကြောင့် ဖြစ်သည်။

မယ်လမင်းဓာတ် ပါဝင်သည့် သက်တမ်းလွန် နို့မှုန့် ၂၆ တန်ခန့်ကို တရုတ်ပြည် အလယ်ပိုင်း ဟူနန်နှင့် ဟီနန် ပြည်နယ်များက ဖြန့်ဖြူးခဲ့ခြင်း ဖြစ်ပြီး နို့ထွက် လုပ်ငန်းတွင် တာဝန်ရှိသူ အထွေထွေ မန်နေဂျာ တစ်ဦး အပါအဝင် လူပေါင်း ၇ ဦးကို ဖမ်းဆီး အရေးယူခဲ့သည်။ မယ်လမင်းမှုန့်များကို နို့မှုန့်များ အထဲတွင် ရောစပ်ကာ ထုတ်လုပ်ခဲ့ခြင်းနှင့် ပတ်သက်ပြီး တာဝန်ရှိသူ ၂၀ ဦးခန့်ကို ဖမ်းဆီးခဲ့ကာ ၂ ဦးကို သေဒဏ် ချမှတ်ခဲ့သည်။

၂၀၀၈ ခုနှစ် တရုတ် နို့မှုန့် အရေးသည် ကမ္ဘာကို ရိုက်ခတ်သွားခဲ့သည့် မယ်လမင်း (Melamine) အရေး ဖြစ်ခဲ့သည်။ ၂၀၀၈ ခုနှစ် နိုဝင်ဘာလတွင် မယ်လမင်းကြောင့် ကလေး ခြောက်ဦးသည် ကျောက်ကပ်တွင် ကျောက်တည်ခြင်း၊ ကျောက်ကပ် ပျက်စီးခြင်းများဖြစ်ကာ သေဆုံးခဲ့သည်။ ကလေး ပေါင်း ၅၄,၀၀၀ ဦး ဆေးရုံတက်ရပြီး၊ မယ်လမင်းကြောင့် ဝေဒနာ ခံစားရသူပေါင်း ၃ သိန်းခန့် ရှိမည်ဟု ခန့်မှန်းရသည်။ ပြဿနာက ၂၀၀၈ ခုနှစ် ဇူလိုင် ၁၆ ရက်နေ့ လောက်ကတည်းက စတင်ခဲ့သည်။ ဂန်ဆုပြည်နယ်တွင် ကလေး ၁၆ ဦးခန့် ကျောက်ကပ်တွင် ကျောက်တည်သည့် ဝေဒနာများ ခံစားခဲ့ရ ပြီးမှ စုံစမ်း စစ်ဆေးမှုများကို စတင် လုပ်ဆောင်ခဲ့ရသည်။

နို့မှုန့် ပြဿနာအစ

နို့ထွက် ပစ္စည်းများကို ထုတ်လုပ် ရောင်းချနေသည့် နယူးဇီလန်နိုင်ငံမှ Fonterra ကုမ္ပဏီသည် သူတို့ ကုမ္ပဏီထုတ် နို့မှုန့်များကို စစ်ဆေး ကြည့်ရာတွင် Botulism ဟုခေါ်သည့် ဗက်တီးရီးယားများ စွဲကပ်နေကြောင်း တွေ့ရှိကြရသည်။ Botulism ဆိုသည်မှာ ရှားပါးသည့် ရောဂါပိုးမွှား တစ်မျိုး ဖြစ်ပြီး ယင်းကို Clostridium Botulinum ဟုလည်း ခေါ်သည်။ ထိုပိုးမွှားများ ကူးစက်ခံရသူသည် အဆိပ် မိသလို ဖြစ်ကာ၊ အသက်ရှူလမ်းကြောင်းနှင့် ကြွက်သားများတွင် ပြင်းထန်စွာ နာကျင်မှု ခံစားရတတ် သည်။ အထူးသဖြင့် လူကြီးများတွင် ဖြစ်ပြီး၊ ကလေးများတွင် အစာအိမ်နှင့် အူလမ်းကြောင်းဆိုင်ရာ ထိခိုက် ပျက်စီးမှုများ ဖြစ်ပေါ်စေနိုင်သည်။

ထိုရောဂါပိုးများ စွဲကပ်နေသည့် ဒိန်ချဉ်များကို Fonterra ကုမ္ပဏီသည် တစ်ဆင့်ခံ ပြန်ယူပြီး ကလေး နို့မှုန့်နှင့် အားကစားသမားများ သောက်သုံးရန် ပြုပြင်ကာ နိုင်ငံရပ်ခြား တိုင်းပြည်များသို့ တစ်ဆင့် ပြန်လည် ရောင်းချခဲ့သည်။ စုစုပေါင်း တန်ချိန် ၁၀၀၀ ခန့် ရောင်းချခဲ့ပြီးမှ ပြဿနာပေါ်သဖြင့် နိုင်ငံပေါင်း ၇ နိုင်ငံမှ တစ်ဆင့် ထိုနို့မှုန့်များနှင့် ဒိန်ချဉ်များကို ပြန်သိမ်းခဲ့ရသည်။ သို့သော် စားသုံးသူများ မည်မျှအထိ ပြဿနာတက်ခဲ့ကြောင်း၊ ဝေဒနာများ ခံစားခဲ့ရကြောင်းကိုမူ ဖော်ထုတ် ခဲ့ခြင်း မရှိပေ။ တရုတ်နိုင်ငံသည် နယူးဇီလန် Fonterra ကုမ္ပဏီထံမှ နို့မှုန့် အများဆုံးကို တင်သွင်း နေသော နိုင်ငံဖြစ်ပြီး လက်ရှိ အနေအထားတွင် နယူးဇီလန်နှင့် သြစတြေးလျနိုင်ငံများမှ နို့မှုန့်များ တင်သွင်းခြင်းကို တားမြစ်လိုက်ကြောင်း ကြေညာချက်များ ထုတ်ပြန်ထားသည်။

နယူးဇီလန်နိုင်ငံ Fonterra ကုမ္ပဏီသည် ကမ္ဘာ့ နို့ထွက်ပစ္စည်း ထုတ်လုပ်သည့် ကုမ္ပဏီများထဲတွင် စတုတ္ထလိုက်သည့် ကုမ္ပဏီကြီး တစ်ခု ဖြစ်သည်။ နှစ်စဉ် အမေရိကန် ဒေါ်လာ ၁၅ ဒသမ ၇ ဘီလီယံဖိုးခန့် နိုင်ငံခြားသို့ နို့မှုန့်နှင့် နို့ထွက်ပစ္စည်းများ တင်ပို့နေရပြီး၊ နယူးဇီလန်၏ စီးပွားရေးသည် လည်း ယင်းကုမ္ပဏီများနှင့် လုပ်ငန်းများ အပေါ်တွင် မီခိုနေရသည်။ နိုင်ငံ နို့ထွက်ပစ္စည်း ၉၅ ရာခိုင်နှုန်း (တန် ၁၅ သန်း) ခန့်ကို နိုင်ငံခြားသို့ တင်ပို့ပြီး ယင်းမှ ဝင်ငွေနှင့် အကျိုးအမြတ်များ ရရှိနေခဲ့သည်။

၂၀၁၃ ခုနှစ် သြဂုတ်လ ၃ ရက်နေ့တွင် နယူးဇီလန် စက်မှုဝန်ကြီးဌာနက Fonterra ကုမ္ပဏီထုတ် နို့ထွက် ပစ္စည်းများကို ပြန်သိမ်းကြောင်း တရားဝင် ထုတ်ပြန် ကြေညာခဲ့သည်။ ၂၀၁၂ ခုနှစ် မေလ ကတည်းက နိုင်ငံခြားသို့ တင်ပို့ထားသည့် နို့ထွက်ပစ္စည်း သုံးကြိမ်က မက်ထရစ်တန် ၃၈ (၄၂ တန်) ခန့်ရှိသည်။

မိမိတို့ တင်ပို့သည့် နို့မှုန့်များတွင် ဗက်တီးရီးယား ပိုးများ စွဲကပ်နေကြောင်းကို Fonterra က သတိထား မိသည်မှာ ယခုနှစ် မတ်လက ဖြစ်သည်။ နို့ထွက် ပစ္စည်းများတွင် Clostridium ပိုးတွေကို တွေ့ရှိကြ ရသည်။ သာမန် ပိုးမျိုးမဟုတ် အသက် အန္တရာယ်ကို ခြိမ်းခြောက်နိုင်သည့် ကြောက်စရာ ပိုးများ ဖြစ်သည်။

ဇူလိုင်လ ၃၁ ရက်နေ့တွင် Clostridium botulinum ရောဂါလက္ခဏာ ဖြစ်ကြောင်း တရားဝင် ထုတ်ပြန်ခဲ့သည်။ ထို့ကြောင့်လည်း နိုင်ငံခြားရောက် နို့မှုန့်အားလုံးကို ပြန်သိမ်းရန် ဆုံးဖြတ်လိုက် ရသည်။ ပြန်သိမ်းရန် ဆုံးဖြတ်လိုက်သည့် နိုင်ငံများထဲတွင် သြစတြေးလျ၊ တရုတ်၊ မလေးရှား၊ နယူးဇီလန်၊ ဆော်ဒီ အာရေဘီးယား၊ ထိုင်းနှင့် ဗီယက်နမ်နိုင်ငံများ ပါဝင်သည်။ သို့သော် မည်သည့် နို့မှုန့်များ၊ မည်သည့် ကုမ္ပဏီများ ဖြစ်ကြောင်းကိုမူ နယူးဇီလန် စက်မှုဝန်ကြီးဌာနက အသေးစိတ် ထုတ်ပြန်ခဲ့ခြင်း မရှိပေ။

တရုတ်နိုင်ငံ စားသုံးသူ စောင့်ကြည့်ရေး အဖွဲ့ကမူ မိမိတို့ ပြည်တွင်း၌ Dumex Baby Food ကုမ္ပဏီ၊ Wahaha Group ကုမ္ပဏီခွဲ နှစ်ခု၊ hanghai Sugar, Toba-cco and Alcohol ကုမ္ပဏီထုတ် နို့မှုန့် များသည် အန္တရာယ်ရှိသော နို့မှုန့်များ ဖြစ်ကြောင်း ကြေညာခဲ့သည်။ Fonterra ကုမ္ပဏီကမူ တရုတ်နိုင်ငံ ရုံးခွဲထုတ် Coca-Cola များတွင်လည်း ထိုပိုးများ ကူးစက်နေ ကြောင်း ထုတ်ပြန်ခဲ့သည်။ သို့သော် Coca-Cola ကုမ္ပဏီကမူ သူတို့ အချိုရည်ထဲတွင် ထည့်သွင်းသည့် နို့မှုန့် ကီလိုဂရမ် ၄၈၀၀ အနက်၊ ၄၇၇၅ ကီလိုဂရမ်ကို ရောဂါ ပိုးမွှားများ သေစေရန် ပိုးသတ်ထားပြီး ဖြစ်ကြောင်း ထုတ်ပြန် ကြေညာခဲ့သည်။

နိုင်ငံတကာ ထိတ်လန့်မှုများ

တရုတ်ပြည်အတွင်း သုံးလတစ်ကြိမ် အရည်အသွေး စစ်ဆေးရေး အဖွဲ့သည် နယူးဇီလန်ထုတ် နို့မှုန့်များနှင့် ပတ်သက်သမျှကို ပြန်လည် သိမ်းယူခဲ့သည်။ ၂၀၀၈ ခုနှစ်ကတည်းက နို့မှုန့်နှင့် ပတ်သက်ပြီး အထိနာခဲ့သဖြင့် တရုတ်တို့သည် ယခုတစ်ကြိမ်တွင် အလွန် သတိထားနေရသည်။

၂၀၁၃ ခုနှစ်၊ သြဂုတ်လ ၄ ရက်နေ့တွင် တရုတ်သည် သြစတြေးလျနှင့် နယူးဇီလန်နိုင်ငံ အတွင်းမှ တင်ပို့သမျှ နို့နှင့် နို့ထွက်ပစ္စည်း ထုတ်ကုန် အားလုံးကို တင်သွင်းမှုအား ရပ်ဆိုင်းလိုက်သည်။ နယူးဇီလန် ကုန်သွယ်ရေးဝန်ကြီး တင်မ်ဂရော့စ်ဆာက ထိုဆုံးဖြတ်ချက်ကို ထောက်ခံပြီး၊ Fonterra ကုမ္ပဏီကလည်း တရုတ်ကို တောင်းပန်ခဲ့သည်။ တရုတ်သည် နှစ်စဉ် နို့မှုန့်များကို နိုင်ငံခြား တိုင်းပြည် များမှ အမေရိကန် ၁ ဒသမ ၉ ဘီလီယံခန့် တင်သွင်းနေရသည့် နိုင်ငံဖြစ်ပြီး အထူးသဖြင့် ပြည်တွင်းသို့ တင်သွင်း နို့မှုန့် အရေအတွက်၏ ၉၀ ရာခိုင်နှုန်းမှာ နယူးဇီလန်က ဖြစ်သည်။ စီးပွားရေးပညာရှင်များက ယခုကဲ့သို တရုတ်က ဆုံးဖြတ်လိုက်ခြင်းသည် ပြည်တွင်း နို့မှုန့်များကို ပြတ်တောက်သွားစေနိုင် ကြောင်း သုံးသပ်ထားသည်။

ထိုင်းနိုင်ငံသည် Fonterra ကုမ္ပဏီထုတ် နို့မှုန့်များကို ပြည်တွင်းသို့ တင်သွင်းခြင်းအား ယခုနှစ် မေလကတည်းက ရပ်ဆိုင်းခဲ့သည်။ ရုရှားနိုင်ငံကမူ ယနေ့တိုင် ထိုနို့မှုန့်များကို တရားဝင် တင်သွင်းမှု ပိတ်ပင်ကြောင်းကို ကန့်သတ်ထားမှု မရှိသေးကြောင်း RIA Novosti သတင်းဌာနက ထုတ်ပြန် ကြေညာသည်။ သီရိလင်္ကာနိုင်ငံကလည်း နယူးဇီလန်နိုင်ငံ Anchor ကုမ္ပဏီကတစ်ဆင့် နို့မှုန့်များကို တင်သွင်းနေသဖြင့် လက်ရှိ ခေတ္တ ရပ်ဆိုင်းထားကြောင်း ထုတ်ပြန် ကြေညာသည်။ မြန်မာနိုင်ငံတွင်မူ လက်ရှိ အိမ်နီးချင်းနိုင်ငံများ ထိတ်လန့်နေသည့် ရောဂါပိုးပါ Fonterra နို့မှုန့်များနှင့် ပတ်သက်ပြီး မည်သို့ ဆောင်ရွက်နေကြောင်း ထုတ်ပြန်မှု မရှိသေးပေ။ ဗီယက်နမ် နိုင်ငံကလည်း သြဂုတ်လ ၉ ရက်နေ့ကတည်းက Fonterra ထုတ် နို့မှုန့်များကို သေချာစွာ စစ်ဆေးပြီး သိမ်းယူနေကြောင်း သတင်း ထုတ်ပြန်ခဲ့သည်။

လူနို့ ရောင်းနေရသော တရုတ်များ

တရုတ်နိုင်ငံတွင် နို့မှုန့်များကို ပိတ်လိုက်သောကြောင့် စိုးရိမ်သောက ရောက်နေကြရသည့် မိခင်နို့ မတိုက်သူများမှာ သောကရောက်ကြရသည်။

ယန်သည် မိခင်နို့ တိုက်ကျွေးနေသူ တစ်ဦးဖြစ်သည်။ အခြေအနေကို သူမက လေ့လာ သုံးသပ်ပြီး ငွေရှာရန် ဆုံးဖြတ်လိုက်သည်။ သူမတွင် ငါးလသားအရွယ် ကလေးတစ်ယောက် ရှိသည်။ နို့ရွှင်သော မိန်းကလေး တစ်ဦးဖြစ်သဖြင့် သူမက-
“ကျွန်မအနေနဲ့ ကျွန်မကလေး မသောက်နိုင်လို့ ပိုနေတဲ့ နို့တွေကို အလကားတော့ အဖြစ်မခံနိုင်ဘူး။ တချို့တွေ အွန်လိုင်းကနေ နို့ရောင်းနေကြတယ် ကြားတယ်။ ဒါကြောင့် ကျွန်မလည်း ရောင်းဖို့ ဆုံးဖြတ်လိုက်တာ။ ဒါကြောင့် Website တစ်ခု ဖန်တီးပြီး နို့ရောင်းရန် ရှိသည်လို့ ကြော်ငြာထားတယ်” ဟု CNN သတင်းဌာနသို့ ပြောကြားသည်။

လူနို့ ရောင်းချခြင်းကို 58.com တရုတ် အွန်လိုင်းပေါ်တွင် တွေ့နိုင်သည်။ ကလေးနို့ ပိုလျှံသည့် မိခင်တိုင်း လာရောက် ဆက်သွယ်နိုင်သည်။ ယခုအခါ လူနို့ရောင်းသည့် လုပ်ငန်းသည် တရုတ်တွင် ခေတ်စားစ ပြုနေပြီး တစ်လ နို့တိုက်ကျွေးခမှာ တရုတ် ဝမ်ငွေ ၅၀၀၀ (အမေရိကန် ၈၁၄ ဒေါ်လာ) ခန့် ဈေးပေါက်သည်။ တရုတ်တွင် နို့မှုန့် တိုက်ကျွေးနေရသည့် ကလေးတစ်ယောက် တစ်လ ကုန်ကျငွေမှာ ၀မ် ၂၀၀၀ (၃၂၅ ဒေါ်လာ) ခန့် ဖြစ်သဖြင့် ဒေါ်လာ ၅၀၀ ခန့် ကွာခြားချက်ကို မိဘများ စဉ်းစားပြီး ဘေးကင်းရန် နို့ အငှားခေါ်ခြင်းဖြင့် ဖြေရှင်းနေကြသည်။

အွန်လိုင်းပေါ်တွင် မိခင်နို့အစစ် ဝယ်ယူခြင်း ခေတ်စားလာပြီး အချို့လိုင်းများသည် နို့ရောင်းမည့် မိခင်နှင့် နို့စို့မည့် ကလေးရှင်တို့ကို ကြားခံ ပွဲစားလုပ်ပေးသည့် လုပ်ငန်းများကိုပင် လုပ်ဆောင်ပေး လာကြသည်။ အခြား လူမှုရေး Website များကလည်း မိခင်နို့ စစ်စစ်ကို စရိတ် မတတ်နိုင်သူများ အတွက် မျှဝေပေးရန် ယုံကြည်ရသော နေရာများအဖြစ် ဖန်တီးထားကြသည်။ သူတို့နှင့် ဆက်သွယ်လျှင် စိတ်ချရမည့် မိခင်နို့စစ်စစ်ကို ပေးမည်ဟုလည်း ကြေညာထားကြသည်။

တရုတ်တွင် မိခင်နို့ ရောင်းဝယ်ခြင်းသည် တရားမဝင်သည့် လုပ်ငန်းတစ်ခု ဖြစ်သလိုလိုနှင့် တရားဝင် ဆောင်ရွက်နေကြသော မီးခိုးရောင် ဈေးကွက်တစ်ခု ဖြစ်လာသည်။ အမှန်တော့ လူနို့ကို ရောင်းကုန် မဟုတ်ကြောင်း၊ မရောင်းရကြောင်း တရားဝင် ထုတ်ပြန်ထားသည့် ဥပဒေတော့ မရှိ။

ဘေဂျင်းက ဒေါက်တာ ဝမ်ယန်လူးကမူ ယခုကဲ့သို့ နို့ရောင်း နို့ဝယ် လုပ်နေခြင်းကို မကန့်ကွက်လို သော်လည်း သိမ်းဆည်းထားသည့် နို့များကို ကလေးများအား ပြန်လည် တိုက်ကျွေးရခြင်းမှာမူ အန္တရာယ် ရှိနိုင်ကြောင်း ပြောဆိုသည်။
“မိခင်ရဲ့နို့ကို သိမ်ဆည်းပြီးထားတယ် ဆိုတာကတော့ သိပ်မကောင်းဘူးဗျ။ ကျွန်တော့် အထင် ကတော့ ဥပဒေ တစ်ခုခု ထုတ်ပြန်သင့်ပြီ ထင်တယ်” ဟု ဝမ်ယန်က ဆိုသည်။

တရုတ်ပြည်တွင် ယခုကဲ့သို့ နို့မှုန့် ပြဿနာ ဖြစ်လာခြင်းသည် အဆိုးထဲက အကောင်း ဖြစ်သည်။ လူတိုင်းကို ကျန်းမာရေးသတိ ဖြစ်လာစေရုံမက မိခင်နို့ တိုက်ကျွေးခြင်းကသာ အကောင်းဆုံး ဖြစ်စေနိုင်ကြောင်း တပ်လှန့်ပေးလိုက်သလို ဖြစ်ခြင်းကြောင့် အမြတ်ထွက်သည်ဟု ဆိုရမည် ဖြစ်သည်။

“တစ်သက်လုံး နို့မတိုက်ချင်တဲ့ မိန်းမတွေ ခုမှ ပြူးပြူးပျာပျာ ဖြစ်လာကြတယ်။ နို့မှုန့် တိုက်ရင် ကလေး ဒုက္ခရောက်မယ်။ မတိုက်ပြန်ရင်လည်း သူတို့မှာ အခြား နည်းလမ်း ရှာမရတော့တာကြောင့် ခုမှ ကိုယ့်နို့လေး လှန်ပြီး ကလေးတွေကို တိုက်ရမှန်း သိလာတာ ကျွန်တော်တော့ ဝမ်းသာတယ်” ဟူသော ဝမ်ယန်၏ စကားကို ကလေးများလည်း ဝမ်းမြောက်ကြမည် ထင်သည်။

(အယ်ဒီတာ တစ်ဦး)
မှတ်ချက်။ ၂၀၁၃ ခုနှစ် သြဂုတ်လ ၁ ရက်နေ့မှ ၁၂ ရက်နေ့အထိ အင်တာနက်ရှိ သတင်း Website များ၏ သတင်းစုံကို ကိုးကား ရေးသားပါသည်။
The Voice Weekly