ကမ္ဘာ့ခရီးသွား ကုမ္ပဏီကြီးက ကျိုက်ထီးရိုးဘုရား အပါအဝင် ခရီးသွားလာရန် အကောင်းဆုံး နေရာများကို ဗြိတိန် လူမျိုးများအား ထပ်မံ အသိအမှတ်ပြု ဖော်ပြ

ပို့စ်တင်ချိန် - 9/15/2013 11:29:00 AM




မြန်မာနိုင်ငံ၏ ရှေးကျသော အံ့ဖွယ် ကိုးကွယ်ရာတစ်ခုဖြစ်သည့် မွန်ပြည်နယ် အတွင်းရှိ ကျိုက်ထီးရိုး ဘုရားကို မြန်မာနိုင်ငံတွင်း ခရီးသွားရောက်ရန် အကောင်းဆုံး နေရာ အဖြစ် ဗြိတိန် နိုင်ငံအခြေစိုက် နှစ်ပေါင်းနှစ်ရာ့ငါး ဆယ်သက်တမ်းရှိ ခရီးသွားကုမ္ပဏီကြီး တစ်ခုဖြစ်သော ကမ္ဘာကျော် Cox @ Kingလုပ်ငန်းပိုင် ဝက်ဘ်ဆိုက် တွင် ဖော်ပြထားသည်။ ကမ္ဘာလှည့် ခရီးသွား များအနေဖြင့် မြန်မာနိုင်ငံတွင် ခရီးသွားရောက်ရန် အကောင်းဆုံးနေရာ အပြင် နောက်ထပ်နေရာ ခြောက်ခုကို လည်း ထပ်မံဖော်ပြထားကြောင်း သိရသည်။

ယခင်က မြန်မာနိုင်ငံသို့ လာရောက်မည့် ခရီးသွားများ အနေဖြင့် ခရီးသွား လုပ်ငန်း၏ အဓိက သွားရောက်ရာ ရန်ကုန်၊ ပုဂံ၊ အင်းလေးဒေသများနှင့် တောင်ကြီးအပြင် ယခုအချိန်တွင် နောက်ထပ်တိုးလာသော ခရီးသွား နေရာများကို ထည့်သွင်းလာခြင်းဖြစ် ကြောင်း ပြည်တွင်း ခရီးသွားကုမ္ပဏီများက ပြောကြားခဲ့သည်။

မြန်မာနိုင်ငံသည် ယဉ်ကျေးမှုအမွေ အနှစ်များကို အဓိကထားပြီး ခရီးသွားလုပ်ငန်းကို မြှင့်တင်နေသည် ဖြစ်ရာ ပထမဦးစားပေး သွားရောက်ရမည့် နေရာမှာ ပုဂံဒေသ၊ ဒုတိယ သွားရောက် ရမည့်နေရာမှာ ဗြိတိန်နိုင်ငံ ကဲ့သို့ရှိနေသော မော်လမြိုင်ဒေသနှင့် တတိယ သွားရောက်ရမည့် နေရာမှာ ကလောမြို့ ဖြစ်ကြောင်း ဗြိတိန်ခရီးသွားများအား လမ်းညွှန် ဖော်ပြထားသည်။

ထိုခရီးသွား လုပ်ငန်းများတွင် မြန်မာနိုင်ငံ၏ ကျေးလက်လူနေမှု ဘဝများကို ကြည့်နိုင်သော ဧရာဝတီမြစ်ကြောင်း ခရီးသွားလုပ်ငန်းကိုလည်း ထည့်သွင်း ဖော်ပြထားပြီး ငပလီ ကမ်းခြေနှင့် မြန်မာနိုင်ငံ၏ ပြည်တွင်းခရီးသွား အများအပြား သွားရောက်လေ့လာရာ ကျိုက်ထီးရိုး စေတီတော်ကိုလည်း ထည့်သွင်းထားကြောင်း၊မြန်မာနိုင်ငံ၏ ခရီးသွားလုပ်ငန်းကို ကမ္ဘာ့ နိုင်ငံများက အားပေး ထောက်ခံလာသည်နှင့်အညီ လမ်းပန်းဆက်သွယ်ရေး ခက်ခဲသော ချင်းပြည်နယ်ရှိ နေရာ သုံးခုနှင့် အခြားသော တိုင်းရင်းသား ဒေသများသို့ပါ ခရီးသွား လုပ်ငန်း တိုးမြှင့်ဆောင်ရွက်နေကြောင်း သိရသည်။

မြန်မာနိုင်ငံတွင် ယဉ်ကျေးမှုအမွေ အနှစ်များကို ခရီးသွားလုပ်ငန်း အတွက် အဓိက ဆောင်ရွက် နေကာ ပျူမြို့ပြသုံး မြို့ကို ကမ္ဘာ့အမွေအနှစ်အဖြစ် စာရင်းဝင် ရန် ဆောင်ရွက်လျက် ရှိသည်။

မြန်မာနိုင်ငံတွင် ကမ္ဘာက စိတ်ဝင်စားသော ရှေးဟောင်း လူ့ယဉ်ကျေးမှုများ အပြင် သဘာဝမပျက် ရှိနေသော အရာများက အိမ်နီးချင်းနိုင်ငံများ၏ ခရီးသွား လုပ်ငန်းများမှ ဝင်ငွေရရှိမှုများကို ယှဉ်နိုင်သော အချက်ဖြစ်သည့်အပြင် မြန်မာနိုင်ငံသည် ရင်းနှီးမြှုပ်နှံသူများ အတွက် ဈေးကွက်ကြီးမားသောနေရာ တစ်ခုဖြစ်ကြောင်း ကမ္ဘာ့စီးပွားရေး အတွေ့အကြုံရှိ ပညာရှင်များက သုံးသပ်ပြောကြားထားသည်။
မြ၀တီ