ငပလီကမ်းခြေ နိုင်ငံတကာ အဆင့်မီ ပြုပြင်မည်
ပို့စ်တင်ချိန်
-
11/22/2013 05:31:00 PM
ငပလီကမ်းခြေ၌ လာရောက်အပန်းဖြေသူ ဧည့်သည်အချို့ကို အောက်တိုဘာလ အစောပိုင်းက တွေ့ရစဉ်။ ဓာတ်ပုံ – အေအက်ဖ်ပီ
ရခိုင်ပြည်နယ်၊ သံတွဲမြို့နယ်ရှိ ငပလီအပန်းဖြေ ကမ်းခြေအား နိုင်ငံတကာအဆင့်မီ ကမ်းခြေ အဖြစ်
ပြုပြင်တည်ဆောက်မှုများဆောင်ရွက် နိုင်ရန် ရခိုင်ပြည်နယ်အစိုးရအဖွဲ့က အသုံးပြု ဘတ်ဂျက်
ကျပ်ငါးဘီလျံ သတ်မှတ်ချထားပေးခဲ့ကြောင်း သိရသည်။
ယခုလ ၁၉ ရက်က ကျင်းပခဲ့သည့် ပြည်နယ် လွှတ်တော်အစည်းအဝေးတွင် ယင်းဘတ်ဂျက် ချထား
ပေးမှုကို အတည်ပြုသတ်မှတ်ခဲ့ခြင်းဖြစ် ပြီး ဆောင်ရွက်သွားမည့် လုပ်ငန်းစဉ် အသေးစိတ် နှင့် ပတ်
သက်ပြီး တိကျသည့်အခြေအနေမရှိသေးကြောင်း ရခိုင်ပြည်နယ်လွှတ်တော်အမတ်
ဦးအောင်မရကျော်က ပြောသည်။
“ချထားပေးတာကတော့ အစိုးရအဖွဲ့ဘတ် ဂျက်အောက်မှာ ချထားပေးတာပါ။ ဆိုတော့ အစိုးရအဖွဲ့
ကပဲ သီးသန့်အနေနဲ့ဆောင်ရွက် သွားရမှာပါ။ ဘယ်လိုဆောင်ရွက်မယ်ဆိုတာ တော့ အစိုးရအဖွဲ့
ဘက်က အတိအကျထုတ်ပြန် တာမရှိသေးပါဘူး” ဟု ၎င်းက ပြောသည်။ ယခုလ ၆ ရက်က စတင်
ကျင်းပခဲ့သည့် ရခိုင်ပြည်နယ် လွှတ်တော်အစည်းအဝေးတွင် ယင်းဘတ်ဂျက်လျာထားမှုကို တင်ပြ
ဆွေးနွေးခဲ့ကြခြင်းဖြစ်ပြီး အပြီးသတ်အတည်ပြုမှုကို ယခု လ ၁၉ ရက်က ကျင်းပခဲ့သည့် လွှတ်တော်
အစည်း အဝေးတွင် ဆောင်ရွက်ခဲ့ခြင်းဖြစ်ကြောင်း ရခိုင် ပြည်နယ်အစိုးရအဖွဲ့ အမျိုးသားစီမံကိန်းနှင့်
စီးပွားရေးဖွံ့ဖြိုးတိုးတက်မှုဝန်ကြီးဌာန၀န်ကြီး ဦးမောင်စံရွှေက ပြောသည်။
“လောလောဆယ် စီမံကိန်းနဲ့ ပတ်သက်ပြီး အတိအကျ ရေးဆွဲထားတာ မရှိသေးပါဘူး။ အဓိက
တည်ငြိမ်အေးချမ်းရေးအတွက် ဦးဆုံး လုပ်ဆောင်နေတာပဲရှိပါတယ်” ဟု ၀န်ကြီးက မြန်မာတိုင်း(မ်)
ကို ပြောသည်။
ငပလီအပန်းဖြေကမ်းခြေအား နိုင်ငံတကာ အဆင့်မီ ပြုပြင်တည်ဆောက်ခြင်း၊ လိုအပ်သည့် အခြေခံ
အဆောက်အအုံများ ဖြည့်စွက်ခြင်းအပိုင်းကို အစိုးရအဖွဲ့အနေဖြင့် လုပ်ဆောင် သွားမည်ဖြစ်ပြီး တင်ဒါခေါ်ယူသည့်စနစ် ဖြင့် ကော်မတီဖွဲ့စည်း ဆောင်ရွက်သွားမည် ဖြစ်ကြောင်း ၎င်းက ဆိုသည်။
ယင်းသို့ ဘတ်ဂျက်ချထားပေးမှုမတိုင်မီ ရခိုင်ပြည်နယ်ရှိ စီးပွားရေးလုပ်ငန်းဆိုင်ရာ အထူးစီမံကိန်း
များအပါအ၀င် စိုက်ပျိုးရေး လုပ်ငန်း၊ သစ်တောလုပ်ငန်း၊ ဆောက်လုပ်ရေး လုပ်ငန်း၊ သတ္တုတူးဖော်
ရေးလုပ်ငန်းများ၌ နိုင်ငံတကာ ရင်းနှီးမြှုပ်နှံမှုတွင် ပူးပေါင်း လုပ်ဆောင်ရန်နှင့် ဒေသတွင်းအကျိုးစီးပွား
ကာကွယ်ရန်အတွက် ရခိုင်ပြည်နယ်ရှိ နာမည် ကြီး စီးပွားရေးလုပ်ငန်း ကုမ္ပဏီ ၁၂ ခုတို့ ပူးပေါင်း ၍
အများပိုင်ကုမ္ပဏီတစ်ခုထူထောင်ခဲ့ကြောင်း ရခိုင်ပြည်နယ်ရှိ စီးပွားရေးလုပ်ငန်းပိုင်ရှင်အချို့ထံမှ
သိရသည်။
” ဟုတ်ပါတယ်။ ရခိုင်ပြည်နယ်က စီးပွားရေးလုပ်ငန်းကုမ္ပဏီ ၁၂ ခုပူးပေါင်းပြီး တစ်ဦးကို ကျပ်သိန်း
တစ်သောင်းစီ ရှယ်ယာထည့်ဝင်ဖွဲ့ စည်းထားကြတာပါ။ အခုထိတော့ လုပ်ဆောင် မယ့် လုပ်ငန်းစီမံ
ကိန်းတွေနဲ့ပတ်သက်ပြီး စဉ်းစား ဆွေးနွေးဆဲပဲရှိပါသေးတယ်။ ဒီလုပ်ငန်း (ငပလီ အပန်းဖြေစခန်း
ပြန်လည်ပြုပြင်ခြင်း) မှာ ၀င်ပါ ဖြစ်မလား၊ မဖြစ်ဘူးလားဆိုတာ မပြောနိုင်သေးပါဘူး” ဟု အဆိုပါ
အများပိုင် ကုမ္ပဏီ၏ စီးပွား ရေးဆိုင်ရာ အကြံပေးအဖွဲ့ဝင်တစ်ဦးဖြစ်သူ ဦးစိုးပိုင်က ပြောသည်။
ငပလီအပန်းဖြေကမ်းခြေသည် ရခိုင်ပြည်နယ် ၏ အထင်ကရ ပင်လယ်ကမ်းခြေတစ်ခုဖြစ်ပြီး
သံတွဲမြို့မှ လေးမိုင်ခန့် (ခုနစ်ကီလိုမီတာ) အကွာ တွင် တည်ရှိပြီး နိုင်ငံတကာခရီးသွားဧည့်သည်
များ မြန်မာပြည်ခရီးစဉ်အတွင်း အထူးစိတ်ဝင် စားသည့် နေရာတစ်ခုလည်းဖြစ်ကြောင်း ခရီး သွား
ဧည့်လမ်းညွှန်အချို့က ဆိုသည်။
“တကယ်သာ ဒီလိုပြုပြင်လိုက်မယ်ဆိုရင် ရွာအဆင့်ကနေ မြို့အဆင့်လိုဖြစ်သွားတာကောင်းတာ
ပေါ့။ ဒေသခံပြည်သူတွေအတွက်လည်း ပိုကောင်းသွားတာပေါ့” ဟု မြန်မာနိုင်ငံ ဟိုတယ်ဆိုင်ရာ
လုပ်ငန်းရှင်များအသင်းမှ ဦးကျော်မင်းလှိုင်က ပြောသည်။
ဥာဏ်လင်းအောင်
Myanmar Times
