ရခိုင်ပြည်နယ် ဖွံ့ဖြိုးတိုးတက်ရေး လုပ်ဆောင်ပေးရန် တရုတ်အစိုးရကို တောင်းဆို

ပို့စ်တင်ချိန် - 11/07/2013 10:09:00 AM

ရန်ကုန်၊ နိုဝင်ဘာ ၅

တရုတ်-မြန်မာ ရေနံနှင့် သဘာဝဓာတ်ငွေ့ ပိုက်လိုင်း စီမံကိန်းမှ ရရှိသည့် အကျိုးအမြတ်များနှင့် ရခိုင်ပြည်နယ် ဖွံ့ဖြိုးတိုးတက်ရေးအတွက် လုပ်ဆောင်ပေးရန် တရုတ်အစိုးရက ဖွဲ့စည်းထားသည့် တရုတ် နိုင်ငံတကာ ချစ်ကြည်ရေးနှင့် ဆက်ဆံရေး အဖွဲ့ကို တရုတ်ပြည်နယ် ခရီးစဉ်တွင် တင်ပြခဲ့ကြောင်း ရခိုင်ပြည်နယ် မြေပုံမြို့နယ်မှ ပြည်သူ့လွှတ်တော် ကိုယ်စားလှယ် ဦးဖေသန်းက ပြောကြားသည်။

အာရှရေးရာ နိုင်ငံခြားရေးအရာရှိ (တရုတ်နိုင်ငံခြားရေး ဝန်ကြီးဟောင်း) ဦးဆောင်သည့် အဆိုပါအဖွဲ့၏ ဖိတ်ကြားမှုဖြင့် လွှတ်တော်ကိုယ်စားလှယ် ငါးဦးအဖွဲ့ အောက်တိုဘာလ ၂၇ ရက်နေ့ ကမှ စတင်ကာ ရက်သတ္တတစ်ပတ်ကြာ သွားရောက်ခဲ့သည့် ခရီးစဉ်တွင် ယင်းသို့ တင်ပြခဲ့ခြင်း ဖြစ်သည်။

ဖွံ့ဖြိုးတိုးတက်ရန် လုပ်ဆောင်ပေးရေး အပါအဝင် ရခိုင်ပြည်နယ်တွင် လာရောက် ရင်းနှီးမြှုပ်နှံသော စီမံကိန်းများကြောင့် ပတ်ဝန်းကျင် ပျက်စီးမှု မဖြစ်ပေါ်စေရန် သတိထား လုပ်ဆောင်ရန်၊ တရုတ် စီမံကိန်းများရှိ အုပ်ချုပ်ရေး နေရာများတွင် ဒေသခံ လူငယ်များကို သင်တန်းများပေးကာ အလုပ်ခန့်ရန်၊ ရခိုင်ပြည်နယ် လျှပ်စစ် ရရှိရေးအတွက် ရေအားလျှပ်စစ် စီမံကိန်းများကို လုပ်ဆောင်ပေးရန် စသည့် အချက်များကို တင်ပြခဲ့ကြောင်း ဦးဖေသန်းက ဆိုသည်။
“တရုတ်က ဓာတ်ငွေ့ ယူသွားတယ်။ အစိုးရက ပိုက်ဆံရတယ်။ ရခိုင်လူထုက လယ်တွေ သိမ်းဆည်း ခံရတယ်။ လယ်မြေ တွေ၊ သဘာဝ ပတ်ဝန်းကျင်တွေ ပျက်စီးတယ်။ ဘာအကျိုးအမြတ်မှ မရသေးဘူး” ဟု ၎င်းက ဆိုသည်။

ရခိုင်ပြည်နယ်တွင် လုပ်ဆောင်နေသည့် စီမံကိန်းများတွင် ပြည်သူလူထုအတွက် အကျိုးခံစားခွင့် မရှိပါက ရခိုင်လူထုက လက်ခံမည် မဟုတ်ကြောင်း၊ ရခိုင်လူထုက မကျေနပ်၍ ကန့်ကွက်မှုများ ပြုလုပ်ပါက စီမံကိန်းများ ဆုံးရှုံးနိုင်သဖြင့် တောင်းဆိုချက်များကို အလေးအနက်ထားရန် တင်ပြခဲ့ကြောင်း ဦးဖေသန်းက ထပ်မံ ပြောဆိုသည်။

ရခိုင်ပြည်နယ် ကျောက်ဖြူမြို့နယ်တွင် လုပ်ငန်း လုပ်ဆောင်နေသည့် တရုတ်-မြန်မာရေနံနှင့် သဘာဝ ဓာတ်ငွေ့ပိုက်လိုင်း စီမံကိန်းတွင် ကီလိုမီတာ ၂၅၀၀ ကျော် ရှည်သည့် သဘာဝ ဓာတ်ငွေ့ပိုက်လိုင်း စီမံကိန်းမှာ အောက်တိုဘာလ ၂၀ ရက်နေ့တွင် ရာနှုန်းပြည့် ပြီးစီးသွားပြီ ဖြစ်သဖြင့် ဓာတ်ငွေ့ အပြည့်အဝ ပို့နေပြီ ဖြစ်ကြောင်း အဆိုပါ ပိုက်လိုင်း စီမံကိန်းကို တာဝန်ယူ ဆောင်ရွက်သည့် SEAGP၊ SEAOP ကုမ္ပဏီတို့ ထံမှ သိရှိရသည်။

အဆိုပါ စီမံကိန်းမှ ရရှိသည့် သဘာဝ ဓာတ်ငွေ့ဖြင့် ကျောက်ဖြူမြို့နှင့် ကျေးရွာ အချို့ကို ၂၄ နာရီ လျှပ်စစ်မီး ပေးနေပြီ ဖြစ်သော်လည်း အခြားမြို့နယ်များတွင် ရရှိခြင်း မရှိသေးပေ။

ရခိုင်ပြည်နယ်တွင် ရင်းနှီးမြှုပ်နှံရန် စိတ်ဝင်စားသည့် တရုတ် လုပ်ငန်းရှင်များ ပါဝင်သော တရုတ်-မြန်မာ ချစ်ကြည်ရေး အဖွဲ့သည် အောက်တိုဘာလ ၁၇ ရက်နေ့က ရောက်ရှိခဲ့ပြီး ကျောက်ဖြူမြို့ အခြေစိုက် အရပ်ဘက် လူ့အဖွဲ့အစည်းများ၊ နိုင်ငံရေး ပါတီများ၊ စီးပွားရေး လုပ်ငန်းရှင်များနှင့် တွေ့ဆုံခဲ့သည်။