ရင်းနှီးမြှုပ်နှံမှုကော်မရှင်နှင့် ပတ်သက်၍ အသေးစိတ် ဆက်သွယ်မေးမြန်းနိုင်ရန် ဖုန်းနံပါတ်များ ထုတ်ပြန်
ပို့စ်တင်ချိန်
-
1/22/2014 01:59:00 PM
မြန်မာနိုင်ငံ ရင်းနှီးမြှုပ်နှံမှုကော်မရှင်သို့ အဆိုပြုလွှာတင်ပြသည့် လုပ်ငန်းရှင်များသိသာရန် အချက်များကို ဇန်န၀ါရီလ ၁၆ ရက်နေ့ ရက်စွဲဖြင့်ထုတ်ပြန်လိုက်ပြီး အသေးစိတ်သိရှိလိုပါက ဆက်သွယ်မေးမြန်းနိုင်ရန် ဖုန်းနံပါတ်များ ပါဝင်သည်။
ရင်းနှီးမြှုပ်နှံမှု အဆိုပြုလွှာ တင်ပြခြင်း၊ စိစစ်ခြင်း၊ ခွင့်ပြုမိန့်ထုတ်ခြင်းတို့နှင့် မြန်မာနိုင်ငံရင်းနှီး မြှုပ်နှံမှုကော်မရှင်သို့ ရင်းနှီးမြှုပ်နှံသူမှ ၀န်ဆောင်ခနှင့် အခြား အခကြေးငွေများ ပေးဆောင်ရန် မလိုကြောင်း၊ အသေးစိတ်ကို သတ်မှတ်ဖုန်းနံပါတ်များသို့ ဆက်သွယ်နိုင်ကြောင်း ထုတ်ပြန်ချက်တွင် ဖော်ပြထားသည်။ ညွှန်ကြားရေးမှူး ချုပ် ၀၆၇-၄၀၆၁၂၂၊ ဒုတိယညွှန်ကြားရေးမှူးချုပ် ၀၆၇-၄၀၆၃၄၂၊ ညွှန်ကြားရေးမှူး (နိုင်ငံခြား ရင်းနှီးမြှုပ်နှံမှုဌာန) ၀၆၇-၄၀၆၃၃၄၊ ညွှန်ကြားရေးမှူး (မြန်မာနိုင်ငံသား ရင်းနှီးမြှုပ်နှံမှုဌာန) ၀၆၇-၄၀၆၁၃၉၊ ရင်းနှီးမြှုပ်နှံမှုဌာနဆိုင်ရာ ပူးပေါင်း လုပ်ငန်းအဖွဲ့ရုံး ၀၁-၆၅၇၈၉၂ တို့သို့ ဆက်သွယ်မေးမြန်းနိုင်ကြောင်း သိရသည်။
မြန်မာနိုင်ငံ ရင်းနှီးမြှုပ်နှံမှု ကော်မရှင်မှ ခွင့်ပြုမိန့်ရရှိရေးအတွက် ဆောင်ရွက်ရသည့် လုပ်ငန်းစဉ်များအနေဖြင့် ပထမဦးစွာ သတ်မှတ်ထားသည့် အဆိုပြုလွှာပုံစံတွင် ရင်းနှီးမြှုပ်နှံသူ (သို့) ကမကထပြုသူမှ ရေးသားဖြည့်သွင်း အဆိုပြုလွှာ ပြုစုခြင်းကို ဆောင်ရွက်ရမည်ဖြစ်သည်။ ယင်းအဆိုပြုလွှာကို နေပြည်တော်ရှိ မြန်မာနိုင်ငံ ရင်းနှီးမြှုပ်နှံမှုကော်မရှင် ရုံးအဖွဲ့သို့လည်းကောင်း၊ ရန်ကုန် (ရုံးခွဲ) သို့လည်းကောင်း သွားရောက် တင်ပြရမည်ဖြစ်ကြောင်း၊ တင်ပြလာသော အဆိုပြုလွှာကို ကော်မရှင်အဖွဲ့ ၀န်ထမ်းများက စာရွက်စာတမ်းပြည့်စုံမှုရှိမရှိ စိစစ်၍ လက်ခံမည်ဖြစ်ကြောင်း သိရသည်။ ပြည့်စုံသော အဆိုပြုလွှာကို နေပြည်တော်၌ အပတ်စဉ် ကျင်းပသည့် အဆိုပြုလွှာ စိစစ်ရေး အဖွဲ့အစည်းအဝေးသို့ တင်ပြဆွေးနွေးကြောင်း သိရသည်။
အဆိုပြုချက် စိစစ်ရေးအဖွဲ့ အစည်းအဝေးမှ အတည်ပြုလျှင် အဆိုပြုချက်ကို လက်ခံကြောင်း၊ ငြင်းပယ်ကြောင်း အဆိုပြုလွှာ တင်သွင်းသူထံ အကြောင်းပြန်မည်ဖြစ်သည်။ လက်ခံပြီးသည့် အဆိုပြုလွှာနှင့် ပတ်သက်၍ ကော်မရှင်ရုံးအဖွဲ့က သက်ဆိုင်ရာ တိုင်းဒေသကြီး၊ ပြည်နယ်အစိုးရအဖွဲ့ သဘောထား၊ သက်ဆိုင်ရာ ၀န်ကြီးဌာန သဘောထားများ တောင်းခံကြောင်း၊ သဘောထား မှတ်ချက်များ ပြည့်စုံပါက မြန်မာနိုင်ငံ ရင်းနှီးမြှုပ်နှံမှုကော်မရှင် အစည်းအဝေးသို့ အဆိုပြုချက်ကို တင်ပြဆွေးနွေးကြောင်း၊ အဆိုပါ အစည်းအဝေးသို့ ရင်းနှီးမြှုပ်နှံသူ (သို့) ကမကထပြုသူကို ဖိတ်ကြား၍ တက်ရောက် ဆွေးနွေးတင်ပြခွင့်ပြုကြောင်း သိရသည်။ မြန်မာနိုင်ငံ ရင်းနှီးမြှုပ်နှံမှုကော်မရှင် အစည်းအဝေးမှ ခွင့်ပြုကြောင်း ဆုံးဖြတ်ပါက ရင်းနှီးမြှုပ်နှံသူထံ ခွင့်ပြုမိန့်ထုတ်ပေးကြောင်း၊ ယင်းလုပ်ငန်းများ ဆောင်ရွက်ရာတွင် နိုင်ငံခြားရင်းနှီးမြှုပ်နှံမှု ဥပဒေပုဒ်မ ၂၀ (ခ)၊ မြန်မာနိုင်ငံသားများ ရင်းနှီးမြှုပ်နှံမှု ဥပဒေပုဒ်မ ၁၈ (ခ) တို့ အရ အဆိုပြုချက်ကို လက်ခံပြီးချိန်ကျမှ ရက်ပေါင်း (၉၀) အတွင်း ကော်မရှင်မှ ခွင့်ပြုမိန့်ထုတ်ပေးကြောင်း ကြေညာထားချက်အရ သိရသည်။
ထွန်းထွန်း
Internet Journal
