စစ်ဘေးဒဏ်ခံ တိုင်းရင်းသားများအတွက် ဂျပန်က ယန်း ၁၀ ဘီလီယံ ကူညီ
ပို့စ်တင်ချိန်
-
1/06/2014 06:50:00 PM
ပြည်တွင်း စစ်ဘေးဒဏ်ကို ခံစားရတဲ့ တိုင်းရင်းသားလူနည်းစုတွရဲ့ လူနေမှု အဆင့်အတန်း မြင့်မားလာစေဖို့အတွက် ဂျပန်က ထောက်ပံ့ကြေး ယန်းငွေ ၁၀ ဘီလီယံ ပံ့ပိုး ကူညီသွားဖို့ စီစဉ်နေတယ်လို့ အစိုးရသတင်းရင်းမြစ်ကို ကိုးကားပြီး ကျိုဒိုသတင်းဌာနမှာ ဒီနေ့ ရေးသားထားပါတယ်။
အစိုးရနဲ့ တိုင်းရင်းသားလက်နက်ကိုင်တွေအကြား ဆွေးနွေးနေတဲ့ ငြိမ်းချမ်းရေးကို ပိုမို အားကောင်းအောင် ကူညီဖို့အတွက် ရည်ရွယ်ပြီး ပေးတာလို့လည်း ဆိုပါတယ်။
စီးပွားရေး ပူးပေါင်းဆောင်ရွက်မှုတွေ ပိုမို အားကောင်းလာစေဖို့နဲ့ တိုးတက် ဖွံ့ဖြိုးရေးအတွက် မြန်မာကို ဂျပန်ယန်းငွေ ၁၅၀ ဘီလီယံကျော် ချေးငွေနဲ့ ထောက်ပံ့ငွေတွေကို ကူညီဖို့ ဂျပန်ဝန်ကြီးချုပ် ရှင်ဇိုအဘေးက အာမခံထားပါတယ်။
အမျိုးသား ပြန်လည်ရင်ကြားစေ့ရေး ဖြစ်စဉ်အတွက် ဂျပန်က တိုင်းရင်းသားအဖွဲ့တွေကို အကူအညီတွေ ပေးဖို့လည်း ရည်ရွယ်ချက်ရှိနေပါတယ်။
အစိုးရမဟုတ်တဲ့ လူမှုရေးအဖွဲ့အစည်းတွေနဲ့ အကူအညီပေးရေးအတွက် ဂျပန်အစိုးရက လုပ်ဆောင်ဖို့ စီစဉ်နေပါတယ်။
အကူအညီတွေမှာ အစားအစာနဲ့ ဆေးဝါး ထောက်ပံ့တာတွေ၊ အခြေခံအဆောက်အဦတွေ ပိုအားကောင်းအောင် လုပ်ဆောင်တာတွေနဲ့ ထွက်ပြေး ရတဲ့သူတွေ ပြန်လည် အခြေချ နေထိုင်ရေးတွေမှာ ကူညီမှာ ဖြစ်ပါတယ်။
အကူအညီပေးရေး အစီအစဉ် အသေးစိတ်ကို အစိုးရနဲ့ တိုင်းရင်းသားတွေအကြား သဘောတူညီချက် ရရှိသွားရင် ကြေညာသွားမှာ ဖြစ်ပါတယ်။
အစိုးရစစ်တပ်နဲ့ တိုင်းရင်းသားလက်နက်ကိုင်တပ်တွေအကြားက ကာလကြာရှည် တိုက်ပွဲတွေကြောင့် ဒေသခံတွေအများစုဟာ တရုတ်နဲ့ ထိုင်း-မြန်မာနယ်စပ်တွေမှာ ခိုလှုံနေကြရပါတယ်။
လက်ရှိချိန်မှာတော့ တိုင်းရင်းသားလက်နက်ကိုင်တွေနဲ့ အစိုးရတို့အကြား ငြိမ်းချမ်းရေး အတွက် ညှိနှိုင်းဆွေးနွေးမှုတွေ လုပ်ဆောင်နေပါတယ်။
DVB Burmese
