မြန်မာနိုင်ငံ အထက်ပိုင်းဒေသတချို့ ဆင်းရဲနွမ်းပါးမှုနှင့် စားနပ်ရိက္ခာ မလုံလောက်မှု ကြုံတွေ့နေ

ပို့စ်တင်ချိန် - 1/20/2014 09:00:00 PM


မကွေးတိုင်း ပေါက်မြို့နယ်ရှိ သဲချောင်းများတွင် ရေဖြန်း လမ်းပြင်ပေးရင်း စားဝတ်နေရေး ဖြေရှင်းနေသည့် ဒေသခံတချို့ကို ပြီးခဲ့သည့် ၂၀၁၃ သင်္ကြန် ကာလအတွင်း တွေ့ရစဉ်(ဓာတ်ပုံ – မြတ်စုမွန် / ဧရာဝတီ)

မြန်မာနိုင်ငံ အထက်ပိုင်း အပူပိုင်းဇုန် သတ်မှတ် ဧရိယာအတွင်း ပါဝင်သည့် မန္တလေးတိုင်းနှင့် မကွေးတိုင်းရှိ အိမ်ထောင်စု တချို့သည် လွန်စွာ ဆင်းရဲနွမ်းပါးသည့် လူနေမှု ဘ၀တွင် ရှိနေပြီး စားနပ်ရိက္ခာ မလုံလောက်မှုနှင့်လည်း ကြုံတွေ့နေရကြောင်း သုတေသန စစ်တမ်း တခုအရ သိရသည်။

မြန်မာနိုင်ငံ အပူပိုင်းဇုန် ဒေသ ၁၆ ခုရှိ အိမ်ထောင်စု ၂၆ ဒသမ ၁ ရာခိုင်နှုန်းသည် ဆင်းရဲနွမ်းပါးမှု မျဉ်းအောက် ရောက်နေပြီး  ၁၈ ဒသမ ၅ ရာခိုင်နှုန်းသည် စားနပ်ရိက္ခာ မလုံလောက်မှုနှင့် ကြုံတွေ့နေရကြောင်း ကမ္ဘာ့ စားနပ်ရိက္ခာ အစီအစဉ်(WFP)၊ ကလေး သူငယ် စောင့်ရှောက်ရေးအဖွဲ့ (Save the Children)၊ နယ်စပ်ရေးရာ ဝန်ကြီးဌာန၊ မွေးမြူရေး၊ ရေလုပ်ငန်း နှင့် ကျေးလက် ဒေသ ဖွံ့ဖြိုး တိုးတက်ရေး ဦးစီးဌာနတို့ ပူးပေါင်းလေ့လာသည့် စစ်တမ်း၌ ဖော်ပြထားသည်။

စစ်တမ်း လေ့လာမှုများအား ၂၀၁၃ ခုနှစ် ဇွန်လမှ ဇူလိုင်လအတွင်း အပူပိုင်းဇုန် ဒေသများတွင် စတင် ပြုလုပ်ခဲ့ခြင်း ဖြစ်ပြီး မကွေး၊ မင်းဘူး၊ ကျောက်ပန်းတောင်း၊ ရေနံချောင်း၊ ညောင်ဦး၊ နတ်မောက် ကဲ့သို့သော ဒေသ ၁၆ ခုမှ အိမ်ထောင်စုပေါင်း ၂ ထောင်ကျော်ကို ပထမ ဦးစားပေးအဖြစ် ထည့်သွင်း လေ့လာခဲ့ကြောင်း သိရသည်။

မြန်မာနိုင်ငံ အပူပိုင်းဇုန်ဒေသ စားနပ်ရိက္ခာ ဖူလုံမှုနှင့် ဆင်းရဲနွမ်းပါးမှု အခြေအနေတို့ကို သိရှိနိုင်ရန် ပညာရှင်များက လေ့လာ ဆန်းစစ်ခဲ့ခြင်း ဖြစ်ကြောင်း အထက်ပါ အဖွဲ့များက ဆိုသည်။

“အဓိက ကတော့ ဒီဒေသတွေမှာ နေထိုင်တဲ့ အိမ်ထောင်စုတွေမှာ စားနပ်ရိက္ခာ ဖူလုံမှု အခြေအနေနဲ့ အာဟာရ ဖွံ့ဖြိုးမှုတွေကို လေ့ လာ ခဲ့တာပါ။ ဘာကြောင့် ဖြစ်ရတာလဲ ဆိုတာကိုတော့ မလေ့လာခဲ့ဘူး။ ဇုန်တွေ ခွဲခြား သတ်မှတ်ပြီး လေ့လာမှုတွေ လုပ်ခဲ့တာကြောင့် ဒေသတွေရဲ့ ပထဝီ အနေအထားအရ တွေ့ရှိချက်တွေက တနေရာနဲ့ တနေရာ တူချင်မှ တူပါလိမ့်မယ်”ဟု ယင်းစစ်တမ်းကို ကောက်ယူခဲ့သည့် WFP ဝန်ထမ်းတဦးဖြစ်သူ Mr.Nicolas Guilltut က ရှင်းပြသည်။

လေ့လာမှုများ ပြုရာတွင် ပထဝီ အနေအထားအရ ကုန်းမြင့်၊ တောင်ကုန်း၊ တောင်တန်း၊ မြေပြန့်ဒေသများဟူ၍ ခွဲခြားခြင်း၊ ဒေသ၏ မိုးရွာသွန်းမှု မိုးရေချိန် အနည်းအများအပေါ် မူတည်ခြင်းတို့ကြောင့် အဆိုပါ ဒေသများသည် ဆင်းရဲနွမ်းပါးမှုနှင့် စားနပ်ရိက္ခာ မလုံလောက်မှု ဖြစ်ပေါ်လာရခြင်းများ မတူညီရခြင်း ဖြစ်သည်ဟုလည်း သူက ဆိုသည်။

စစ်တမ်း ကောက်ယူခဲ့သည့် လေ့လာတွေ့ရှိချက်များအား ကျေးလက်ဒေသ ဖွံ့ဖြိုးတိုးတက်ရေး ဦးစီး ဌာန မှ ဦးစားပေး အဆင့်များ ခွဲခြားကာ နိုင်ငံတကာ အဖွဲ့အစည်းများနှင့် ပူးပေါင်း၍ ကူညီဆောင်ရွက်မှုများ ပြုလုပ်သွားမည် ဖြစ်ကြောင်း သိရသည်။

နယ်စပ်ရေးရာ ဝန်ကြီးဌာန၊ ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ ညွှန်ကြားရေးမှုး ဦးကျော်မိုးလှိုင်က“နိုင်ငံတော်က မြစိမ်းရောင် စီမံကိန်းဆိုတာ ချမှတ်ပြီး ကျေးလက်ဒေသ ဖွံ့ဖြိုးရေး အတွက် ဆောင်ရွက် နေတာတွေ ရှိပါတယ်။ အခု ထွက်လာတဲ့ လေ့လာမှု စစ်တမ်းတွေပေါ် မူတည်ပြီး ဘယ်ဒေသက ဘယ်ကျေးရွာတွေမှာ အကူအညီတွေ အရင်ဆုံးပေးသင့်လဲဆိုတာ စီစဉ်မှုတွေပြုလုပ်ပြီး နိုင်ငံတကာ အဖွဲ့အစည်းတွေနဲ့ ပူးပေါင်း ဆောင်ရွက်သွားပါမယ်”ဟု ပြောသည်။

ဝန်ကြီးဌာနသည် ကမ္ဘာ့ဘဏ်၊ ကုလသမဂ္ဂ ကလေးများ ရန်ပုံငွေအဖွဲ့(UNICEF) ၊ United Nation Population Fund(UNFPA)နှင့် International Fund for Agricultural Development(IFAD)စသည့် နိုင်ငံတကာ အဖွဲ့အစည်းများနှင့် ပူးပေါင်းကာ လမ်းများ ဖောက်လုပ်ခြင်း၊ ရေရရှိရေး စီမံကိန်းများ ဆောင်ရွက်ခြင်း၊ အိမ်ရာများ ဆောက်လုပ်ခြင်း၊ အလုပ်အကိုင် ရှာဖွေပေးခြင်းများကို ဆောင် ရွက်ပေးလျက် ရှိကြောင်း သူက ဆက်လက်၍ ပြောသည်။

ယခု လေ့လာတွေ့ရှိသော စစ်တမ်းများအရ အပူပိုင်းဇုန်ဒေသ၏ ဆင်းရဲနွမ်းပါးမှု၊ စားနပ်ရိက္ခာ မဖူလုံမှုနှင့် အာဟာရ ချို့တဲ့မှု အခြေ အနေများသည် ဒေသတခုစီ၏ ပထဝီ အနေအထားအရ လေ့လာမှု ပြုလုပ်ထား ခြင်းကြောင့် နိုင်ငံတကာ စံနှုန်းနှင့် နှိုင်းယှဉ်သတ်မှတ် ထုတ်ပြန်၍ မရကြောင်းလည်း Mr.Nicolas Guilltut က ပြောဆိုသည်။

သူက“ဒီအချက်အလက်တွေကို နိုင်ငံတကာ စံနှုန်းနဲ့ ပြောပါဆိုရင် ခက်ခဲပါတယ်။ ဥပမာ စားနပ်ရိက္ခာ ရရှိတဲ့ ပုံစံ၊ ခွဲဝေ အသုံးချနိုင် မှုတွေက ဒေသအပေါ်လိုက်ပြီး ကွာခြားနေတာတွေ ရှိပါတယ်။ ကျနော့်ရဲ့ ကိုယ်ပိုင်အမြင်နဲ့ ပြောရင်တော့ ထိုင်း၊ ဗီယက်နမ်လို နိုင်ငံ ထက်တော့ နိမ့်နိုင်ပါတယ်”ဟု Mr.Nicolas Guilltut က ဆိုသည်။

ရှမ်း၊ ကချင်၊ ချင်း၊ စစ်ကိုင်း စသည့် ပြည်နယ်နှင့် တိုင်းဒေသကြီးများတွင်လည်း ယခုနှစ် ဖေဖော်ဝါရီနှင့် မတ်လအတွင်း စစ်တမ်း ကောက် ယူ လေ့လာမှုများ ဆက်လက် ပြုလုပ်သွားမည် ဖြစ်ကြောင်း Mr.Nicolas Guilltut က ဆက်ပြောသည်။

ထိုကဲ့သို့ အပူပိုင်းဇုန် ဒေသ၏ စားနပ်ရိက္ခာ ဖူလုံမှု၊ ဆင်းရဲ နွမ်းပါးမှုနှင့် အာဟာရချို့တဲ့မှု အခြေအနေများကို စစ်တမ်း ကောက်ယူ လေ့လာမှုများ ပြုခြင်းအပြင် ရန်ကုန်၊ ပဲခူး၊ ဧရာဝတီ တိုင်းဒေသကြီး စသည့် မြစ်ဝကျွန်းပေါ် ဒေသများတွင်လည်း ၂၀၁၃ ခုနှစ် နှစ် ကုန်ပိုင်းက လေ့လာခဲ့သေးကြောင်း သိရသည်။
Irrawaddy ဧရာဝတီ သတင်း