လာမည့် ပညာသင်နှစ်တွင် အခြေခံပညာသင်ရိုး ၄၀ ရာခိုင်နှုန်းကျော် လျှော့ချမည်

ပို့စ်တင်ချိန် - 2/06/2014 12:34:00 PM

06-02-2014

ကျောင်းသား၊ ကျောင်းသူများ လေ့လာသင့်သည့် ပမာဏထက် များပြားနေသောကြောင့် ၂၀၁၄-၂၀၁၅ ပညာသင်နှစ် အခြေခံပညာအဆင့် သင်ရိုး မာတိကာများကို ၄၀ ရာခိုင်နှုန်းကျော် လျှော့ချမည် ဖြစ်ကြောင်း ပညာရေး ဝန်ကြီးဌာန ဒုတိယဝန်ကြီး ဒေါက်တာ ဇော်မြင့်အောင်က ပြောကြားသည်။

ဖေဖော်ဝါရီလ ၃ရက်နေ့တွင် ပြုလုပ်သော ပြည်ထောင်စုလွှတ်တော် အစည်းအဝေးတွင် ရန်ကုန်တိုင်း ဒေသကြီး မဲဆန္ဒနယ် အမှတ် (၈) အမျိုးသားလွှတ်တော် ကိုယ်စားလှယ် ဒေါက်တာမြင့်ကြည်၏ အခြေခံပညာအဆင့် ကျောင်းများတွင် သင်ရိုးပြောင်းလဲရန် ရှိမရှိ မေးခွန်းနှင့် ပတ်သက်၍ ၎င်းက အထက်ပါအတိုင်း ပြောဆိုခြင်း ဖြစ်သည်။

လက်ရှိ သင်ရိုးညွန်းတမ်းများသည် အခြေခံပညာ ကျောင်းသားများ အတွက် လေ့လာသင့်သည့် ပမာဏထက် ကျော်လွန်နေသောကြောင့် သင်ရိုးများကို မူလတန်း အဆင့်တွင် ၂၀ ရာခိုင်နှုန်း၊ အလယ်တန်း အဆင့်တွင် ၁၁ ရာခိုင်နှုန်း၊ အထက်တန်း အဆင့်တွင် ၁၁ ရာခိုင်နှုန်း လျှော့ချမည်ဖြစ်ကြောင်း ဒေါက်တာ ဇော်မြင့်အောင်က ပြောကြားသည်။

“နည်းနည်းသင်၊ များများလေ့လာ သဘောတရား အခြေခံပြီး ကျောင်းသားများ ကိုယ်တိုင် လေ့လာ သင်ယူနိုင်တဲ့ နိုင်ငံတကာ အဆင့်မီ အရည်အသွေးရှိတဲ့ သင်ခန်းစာများ ပါဝင်နိုင်မှာ ဖြစ်ပါတယ်” ဟု ၎င်းက ဆိုသည်။

ဥရောပနိုင်ငံများနှင့် အာရှနိုင်ငံ အများစုမှာ သင်ကြားရေးထက် လေ့လာရေးကို ပိုမိုအားပေးပြီး ကျောင်းသား၊ ကျောင်းသူများ၏ ကိုယ်ပိုင်တွေးခေါ်မှု စွမ်းရည်ကို မြှင့်တင်ပေးလျက် ရှိသောကြောင့် မြန်မာနိုင်ငံတွင်လည်း ၂၁ ရာစု ပညာရေးတွင် ပြောင်းလဲရန် လိုအပ်နေကြောင်း အမျိုးသားလွှတ်တော် ကိုယ်စားလှယ် ဒေါက်တာမြင့်ကြည်က သုံးသပ် ပြောကြားသည်။

“လေ့လာမှုကို အားပေးမယ်ဆိုရင် သင်ထောက်ကူ ပစ္စည်းတွေ များများသုံးဖို့ အတွက် လိုအပ်နေပါတယ်။ ပုဂ္ဂလိက ကျောင်းတွေမှာတောင် လုပ်နိုင်သေးတာပဲ၊ ပြောင်းလဲမှုကို တကယ်လုပ်ချင်ရင် အစိုးရ ကျောင်းတွေမှာလည်း လုပ်နိုင်ပါတယ်” ဟု ၎င်းက ထောက်ပြသည်။

အခြေခံပညာ အဆင့်တွင် ဘာသာရပ်အလိုက် သင်ရိုး မာတိကာများနှင့် သင်ခန်းစာများကို အဆင့်မြှင့်တင် ရေးဆွဲထားသော ကျောင်းသုံး စာအုပ်များ ရိုက်နှိပ်ကာ ၂၀၀၈-၂၀၀၉ ပညာသင်နှစ်တွင် ပြောင်းလဲ သင်ကြားခဲ့ပြီး ၂၀၁၃-၂၀၁၄ ပညာသင်နှစ်မှ စတင်ကာ မူလတန်းမှ အထက်တန်းအထိ စိုက်ပျိုးရေး ဘာသာရပ်ကို ထည့်သွင်း သင်ကြားပေးလျက် ရှိကြောင်း ပညာရေး ဝန်ကြီးဌာနထံမှ သိရသည်။

The Voice Daily, 4.2.2014