အခွန်ရုံးတွင် မည်သည့် စာရွက်စာတမ်းကြေးမှ မတောင်းခံဟုဆို
ပို့စ်တင်ချိန်
-
2/23/2014 01:56:00 PM
.jpg)
ကျိုင်းတုံ၊ ဖေဖော်ဝါရီ ၂၂
အခွန်ထမ်း ပြည်သူများထံမှ နှစ်စဉ် အခွန်ငွေများ ကောက်ခံကာ နိုင်ငံတော် အတွက် ဘဏ္ဍာငွေများ ရရှိစေရန် ရှာဖွေပေးနေသည့် ရှမ်းပြည်နယ် အရှေ့ပိုင်း ကျိုင်းတုံမြို့နယ် အခွန်ဦးစီးဌာန အနေနှင့် အခွန်ထမ်းဆောင်သူများထံမှ စာရွက်စာတမ်းကြေးအဖြစ် ငွေကြေး တောင်းခံခြင်းမျိုး မရှိကြောင်း ယင်းမြို့နယ် အခွန်ဦးစီးဌာနမှူး ဒေါ်ရွှေစင်ရီက ပြောကြားသည်။
ကျိုင်းတုံမြို့ စည်ပင်သာယာခန်းမ၌ ဖေဖော်ဝါရီလ ၂၀ ရက်၊ မွန်းလွဲ ၂ နာရီခန့်တွင် ပြုလုပ်သည့် မြို့နယ်အခွန် ကောက်ခံမှု စိစစ်ကြပ်မတ်ရေး ဘုတ်အဖွဲ့နှင့် နှစ်အဆက်ဆက် အခွန်ကြွေးကျန်ရှိသူများ တွေ့ဆုံ ဆွေးနွေးပွဲတွင် ဒေသခံ လုပ်ငန်းရှင် အမျိုးသမီးတစ်ဦးက အခွန်ရုံးသို့ စာရွက်စာတမ်းကြေး အဖြစ် ငွေသုံးသောင်းကျပ် နှစ်စဉ် ပေးဆောင်နေရသည့်အပြင် အခွန်ဆောင်ထားပြီး ဖြစ်သော်လည်း ထပ်မံတောင်းခံခြင်းနှင့် ပတ်သက်၍ မေးမြန်းမှုကို ၎င်းက အထက်ပါအတိုင်း ငြင်းဆိုခြင်း ဖြစ်သည်။
“ရုံးမှာ စာရွက်စာတမ်းကြေး ဘာအတွက်မှ မကောက်ခိုင်းထားပါဘူး။
အဲဒါကလည်း အရင်နှစ်က တာဝန်ထမ်းဆောင်ခဲ့တဲ့ သူတွေပါ။ ခေါင်းရှောင်တာတော့ မဟုတ်ပါဘူး။ ကျွန်မအပါအဝင် အရာရှိ အတော်များများက ဒီဘက်နှစ်မှ ပြောင်းလာကြတာပါ။ အခွန်ပေးဆောင်ပြီးကြောင်း မူရင်း ချလန်ဖြတ်ပိုင်း ပြနိုင်ရင်တော့ အခုကြွေး ကျန်စာရင်းကနေ ပယ်ဖျက်ပေးပါမယ်” ဟု ၎င်းကဆိုသည်။
မိမိသည် နိုင်ငံတော်သို့ ပေးဆောင်ရန်ရှိသော ကုန်သွယ် လုပ်ငန်းခွန်အတွက် နှစ်စဉ် အခွန်ငွေများ ပေးသွင်းခဲ့ကြောင်းနှင့် နှစ်စဉ်ရုံးသို့ အခွန်ငွေများ သွားရောက် ပေးဆောင်ရာတွင် စာရွက်စာတမ်းကြေးအဖြစ် သုံးသောင်းကျပ်ကိုပါ တောင်းဆိုသည့်အတွက် ပေးဆောင်နေရကြောင်း ကျိုင်းတုံ မြို့ အမှတ် (၅) ရပ်ကွက်နေ ဒေါ်နန်းထွေးက အဆိုပါ အခမ်းအနားတွင် ပြောကြားသည်။
“မနှစ်ကလည်း စာရွက်စာတမ်းကြေးအတွက် သုံးသောင်းတောင်းတယ်။ ဒီနှစ်လည်း သုံးသောင်း တောင်းတာကို တစ်သောင်းတော့ ပေးခဲ့တယ်။ မနှစ်က စာရွက်စာတမ်းကြေး သုံးသောင်းကို ရုံးမှာမပေးခဲ့တော့ လမ်းမှာတွေ့တိုင်း ရုံးဝန်ထမ်းက အကြွေးကျန်တယ်ဆိုပြီး အမျိုးသားဆီက တောင်းလို့ အမျိုးသားက ရှက်ပြီး သွားပေးတယ်။ ကျွန်မတို့လည်း နားလည်ပါတယ်။ စာရွက်စာတမ်းကြေး အဖြစ် ထောင်ဂဏန်းလောက်ပဲ ကောက်ပေါ့။ အခွန်ဆောင်ထား ပြီးတာတောင် ထပ်တောင်းခံနေရတုန်းပဲ” ဟု ၎င်းကဆိုသည်။
ကျိုင်းတုံမြို့နယ်တွင် ရပ်ကွက်ကြီး ငါးခုနှင့် မြို့မဈေးကြီး အတွင်းရှိ လုပ်ငန်းရှင်ပေါင်း ၈၂၇ ဦးထံမှ ၁၉၉၅ ခုနှစ်မှ လက်ရှိအချိန်ထိ နှစ်အဆက်ဆက် အခွန်ကြွေး ကျန်ငွေပေါင်း ကျပ် ၂၆၂ ဒသမ ၅၇၈ သန်း ရရန်ကျန်ရှိပြီး ရှမ်းပြည်နယ်အတွင်း အခွန်ကြွေး ကျန်ရှိသူများအနက် ဒုတိယ အများဆုံး ဖြစ်ကြောင်းနှင့် အဆိုပါ အခွန်ကြွေး ကျန်ရှိသူများအနေနှင့် ၂၀၁၄ ခုနှစ် မတ်လ ၁၅ ရက်နေ့ နောက်ဆုံးထားကာ လာရောက် ပေးဆောင်ရမည် ဖြစ်ကြောင်း ယင်းမြို့နယ် အခွန်ဦးစီးဌာနထံမှ သိရသည်။
The Voice Weekly Myanmar
