ငွေစက္ကူ အတုများ သစ်အရောင်းအဝယ်နှင့် နွားမှောင်ခို ဈေးကွက်မှ တစ်ဆင့် ပြည်တွင်းသို့ စီးဝင်

ပို့စ်တင်ချိန် - 2/17/2014 03:42:00 PM




မန္တလေး၊ ဖေဖော်ဝါရီ ၁၆

တရုတ်ပြည်သူ့ သမ္မတနိုင်ငံဘက်မှ သစ်အရောင်း အဝယ်နှင့် နွားမှောင်ခို ဈေးကွက်မှတစ်ဆင့် မြန်မာနိုင်ငံ ရှမ်းပြည်နယ်တွင်းသို့ ငွေစက္ကူ အတုများ ဝင်ရောက်မှု များပြားလျက် ရှိကြောင်း မန္တလေးတိုင်း ဒေသကြီး အတွင်းရှိ ရဲတပ်ဖွဲ့ဝင်များထံမှ စုံစမ်း သိရှိရသည်။

တရုတ်နိုင်ငံဘက်သို့ တရားမဝင် ကျွန်းသစ် အရောင်းအဝယ် ပြုလုပ်ရာမှ ငွေအတုများ ရောက်ရှိ လာတတ်ပြီး နွားမှောင်ခို အရောင်းအဝယ် ပြုလုပ်သည့် အခါတွင်လည်း ပေးချေသည့် ငွေများ နွားပွဲဈေးများသို့ ရောက်ရှိ လာကာ ပြည်သူများထံသို့ ရောက်လာတတ်ကြောင်း မန္တလေးမြို့တော် မဟာအောင်မြေမြို့နယ် အမှတ် (၂) နယ်မြေ ရဲတပ်ဖွဲ့မှ တာဝန်ရှိသူ တစ်ဦးက ပြောကြားသည်။

“ငွေအတုတွေ အများစုက ထိုင်း၊ တရုတ်ဘက်တွေကနေ လာတယ်။ နွားမှောင်ခိုဆိုရင် တရုတ်ပြည် ဘက်ကပဲ။ တရုတ်က ကျွန်းသစ်တွေကိုလည်း တရားမဝင် ဝယ်တယ်။ ငွေပေးချေတော့ ငွေပမာဏက အများကြီးပဲလေ။ အဲဒီတော့ အတုတွေ ပါလာတယ်။ အဲဒီ ငွေတွေနဲ့ နွားပွဲဈေးတွေကို နွားဝယ်တော့ အတုတွေပါ ရောပြီး ပါလာတယ်” ဟု အဆိုပါ တာဝန်ရှိသူက ရှင်းပြသည်။

ငွေစက္ကူ အတုများသည် ငွေစက္ကူ အစစ်ထက် အရောင်မှိန်ခြင်း၊ စက္ကူသား ပျော့ခြင်း၊ လုံခြုံရေးကြိုး သေသပ်မှု မရှိခြင်းတို့ကို စစ်ဆေး တွေ့ရှိခဲ့ကြောင်း မြင်းခြံခရိုင် ရဲတပ်ဖွဲ့မှူးရုံး မှတ်တမ်းအရ သိရသည်။

ရှမ်းပြည်နယ်မှတစ်ဆင့် တရုတ်နိုင်ငံဘက်သို့ နွားမှောင်ခို အများဆုံး တင်ပို့ ရောင်းချလျက်ရှိပြီး မန္တလေးတိုင်း ဒေသကြီး အတွင်းတွင် မတ္တရာ၊ သပိတ်ကျင်း၊ စစ်ကိုင်းတိုင်း ဒေသကြီးတို့မှ အများဆုံး တင်ပို့လေ့ ရှိကြောင်း မန္တလေးတိုင်း ဒေသကြီး ရဲတပ်ဖွဲ့မှူးရုံး မှတ်တမ်းများအရ သိရသည်။

ပြီးခဲ့သည့် ဖေဖော်ဝါရီလ ၆ ရက်နေ့က မြင်းခြံမြို့တွင် နေထိုင်သူ ဦးလှသူသည် ဝမ်းတွင်း နွားပွဲဈေးတွင် နွားအရောင်းအဝယ် ပြုလုပ်သူထံမှ ရလာသည့် ငွေများထဲမှ ၎င်း၏ ငွေစု စာအုပ်အတွက် ကမ္ဘောဇ ဘဏ်သို့ ငွေလာရောက် အပ်နှံခဲ့ရာ ငါးထောင်တန် ၈၄ ရွက်တွင် ၆၅ ရွက်မှာ အတုများ ဖြစ်သည်ကို တွေ့ရကြောင်း မြင်းခြံခရိုင် ရဲတပ်ဖွဲ့မှူးရုံးမှ ဒုရဲမှူး မောင်ဝင်းက ပြောကြားသည်။

ငွေစက္ကူ အတုများကို ဦးလှသူ၏ ဖခင် ဦးအောင်ဆွေက ဘဏ်သို့ အပ်ခိုင်းခြင်း ဖြစ်ပြီး ယင်းငွေများကို ဝမ်းတွင်းမြို့နယ် ရိုးကန်ရွာနေ ယောက်ဖဖြစ်သူ ဦးကောင်းမြင့်ထံမှ ရရှိခဲ့သည်ဟု စုံစမ်း စစ်ဆေးချက်များအရ သိရကြောင်း၊ ယင်းအမှုကို CID မှုခင်းတပ်ဖွဲ့က ဆက်လက် ဖော်ထုတ်သွားမည် ဖြစ်ကြောင်း မန္တလေးမြို့ရှိ မှုခင်း အထူးတပ်ဖွဲ့ (CID) မှ တာဝန်ရှိသူ တစ်ဦးက ပြောပြသည်။

“ဦးကောင်းမြင့်က သူ့နွားကို ရောင်းပြီး ဦးအောင်ဆွေဆီက နွားကို ပြန်ဝယ်ရာကနေ ဒီငွေတွေက မြို့ပေါ်ရောက်လာတာ။ ဦးကောင်းမြင့်ဆီက နွားကိုတော့ ကုလား လူမျိုးလို့ ယူဆရတဲ့ မျက်နှာစိမ်း နှစ်ယောက်က ဝယ်သွားပြီး ဒီငွေအတုတွေနဲ့ ပေးချေခဲ့တာ” ဟု ၎င်းက ရှင်းပြသည်။

နွားထိုးကြီးမြို့ မြန်မာ့လယ်ယာ ဖွံ့ဖြိုးရေးဘဏ် မြို့နယ် ဘဏ်ခွဲတွင် ဇန်နဝါရီ ၂၁ ရက်နေ့ နံနက် ၁၀ နာရီ အချိန်ခန့်၌ ၂၀၁၃ ခုနှစ် သီးနှံထုတ်လုပ်မှု ဘဏ်ချေးငွေ အရင်းငွေ ကျပ်သုံးသိန်းနှင့် အတိုး ၁၄,၀၀၀ တို့ကို ဘဏ်သို့ လာရောက် ပေးသွင်းရာ ဘဏ်ငွေကိုင်က စစ်ဆေးသည့်အခါ ငွေများ အနက် ၅၀၀၀ ကျပ်တန် ငွေစက္ကူအရွက်၂၀ မှာ အတုများ ဖြစ်နေကြောင်း၊ အဆိုပါ ငွေများကို နွားအရောင်းအဝယ် လုပ်သူထံမှ အဆင့်ဆင့် ရလာခြင်း ဖြစ်ကြောင်း မန္တလေးတိုင်း ဒေသကြီး ရဲတပ်ဖွဲ့မှူးရုံးမှ တာဝန်ရှိသူ တစ်ဦးက ပြောကြားသည်။

၂၀၁၃ ခုနှစ် စက်တင်ဘာလ ၆ ရက်နေ့ကလည်း မန္တလေးတိုင်း ဒေသကြီး အောင်မြေသာစံမြိုနယ် အိုးဘိုရွှေကျင် ရပ်ကွက် တာဘောင်ဘေးရှိ ကျူးကျော်တဲတွင် ငါးထောင်တန် ငွေစက္ကူအတု ၆၂ ရွက် နှင့် တစ်ထောင်တန် ငွေစက္ကူအသေး ၅၀၅ ရွက်ကို ရှာဖွေ တွေ့ရှိခဲ့ပြီး ၎င်းတို့ကို နွားပွဲစား၊ ဆိတ်ပွဲစားများက ပြုလုပ်ကြကြောင်း အောင်မြေသာစံ မြို့နယ်ရှိ အမှတ် (၂) ရဲစခန်းထံမှ စုံစမ်း သိရှိရသည်။

“ငွေအတုကတော့ ဒီအတိုင်းဆိုရင် မသိဘူး။ ဘဏ်မှာ သွားပြီး အပ်မှပဲ သိရတယ်” ဟု မတ္တရာ နွားပွဲဈေးမှ ဦးအောင်ကြီးက ဆိုသည်။

ဘဏ်များတွင် ငွေစက္ကူအတု၊ အစစ်ခွဲသည့် စက်များ တပ်ဆင်ထားသောကြောင့် ဘဏ်သို့ လာအပ်ပါက ချက်ချင်း သိရှိနိုင်သော်လည်း သာမန် ပြည်သူများ အနေနှင့် ခွဲခြားနိုင်ရန် ခက်ကြောင်း သမဝါယမဘဏ် အုပ်ချုပ်မှု ဒါရိုက်တာ ဦးဖေမြင့်က ပြောကြားသည်။

ပြည်တွင်းသို့ ငါးထောင်တန် ငွေစက္ကူ အတုများ နည်းမျိုးစုံဖြင့် ဝင်ရောက်နေရာ ၂၀၁၃ ခုနှစ် ဧပြီ တစ်လတည်းတွင် မြစ်ကြီးနား၊ မန္တလေး၊ မြဝတီ၊ မှော်ဘီ၊ အင်းစိန်စသည့် မြို့တို့တွင် ဖမ်းဆီးရမိခဲ့ သည်။

ကျပ် ၅၀၀၀ တန် ငွေစက္ကူများကို ၂၀၀၉ ခုနှစ် အောက်တိုဘာ ၁ ရက်နေ့က စတင် ထုတ်ဝေခဲ့ပြီး ယမန်နှစ် ဇန်နဝါရီ ၃၁ ရက်နေ့အထိ ထုတ်ဝေထားသော ငွေကြေးမှာ ကျပ် ၂၈၀၀ ဘီလံယံကျော် ရှိကြောင်း ယခင် ဘဏ္ဍာရေးနှင့် အခွန် ဝန်ကြီးဌာန ဒုတိယ ဝန်ကြီး ဒေါက်တာ လင်းအောင်က လွှတ်တော်တွင် ဖြေကြားခဲ့သည်။

The Voice Weekly