စကားများ ရန်ဖြစ် ဓားဖြင့် ခုတ်ရာမှ လူတစ်ဦး ခေါင်းပြတ် သေဆုံး
ပို့စ်တင်ချိန်
-
3/17/2014 08:25:00 PM
ရန်ကင်း မြို့နယ် (၁၂) ရပ်ကွက် အတွင်း ရှိ လူ နှစ်ဦး သည် မတ်လ (၁၅) ရက်နေ့၊ ည (၁၁) နာရီ၊ (၄၅) မိနစ် အချိန် က စကား များ ရန်ဖြစ် ခဲ့ပြီး ဓားဖြင့် ခုတ်မှု ဖြစ်ပွား ခဲ့၍ လူ တစ်ဦး ခေါင်းပြတ် သေဆုံး ခဲ့ ကြောင်း ရန်ကင်း မြို့မရဲစခန်းမှ တာဝန်ရှိ သူတစ်ဦး က The Messenger သတင်းစာ သို့ ပြော သည်။
သေသွားတဲ့လူက ကလေး သုံးယောက် ရှိတယ်။ မိန်းမကလည်း ကိုယ်ဝန်ကြီး နဲ့ ဟု ရန်ကင်း (၁၂) ရပ် ကွက် အတွင်းရှိ ပြည်သူ တစ်ဦးက ပြောသည်။ သေဆုံးသူမှာ ဓားဖြင့် ခုတ်ခံရခြင်း ကြောင်း လည်ပင်း၊ နောက် စေ့၊ ယာလက်ဖျံ တို့တွင် ဒဏ်ရာရရှိခဲ့ကြောင်း ရဲမှတ်တမ်းအရ သိရသည်။ လူသတ်မှု ကျူးလွန်သူကို မတ်လ (၁၆) ရက်နေ့၊ နံနက်ပိုင်းက ဖမ်းဆီးရမိခဲ့ပြီး စစ်ဆေး နေကြောင်း ရန်ကင်းမြို့မ ရဲစခန်းမှ သိရသည်။
ယင်းဖြစ်စဉ်တွင် ဓားဖြင့်ခုတ်ခဲ့သူကို အရေးယူပေးရန် သေဆုံးသူ၏ ယောက္ခမဖြစ် သူက တရားလို ပြု လုပ်တိုင်တန်းခဲ့ပြီး ရန်ကင်း မြို့မ ရဲစခန်း (ပ) ၄၅/၂၀၁၄၊ ပြစ်မှု ပုဒ်မ -၃၀၂ ဖြင့် မတ်လ (၁၆)ရက်နေ့၊ နံနက် (၁) နာရီအချိန်က အမှုဖွင့်ခဲ့ကြောင်း ပထမ သတင်းပေးချက်အရ သိရသည်။
Messenger News Journal
