အလုပ်ဖြုတ်ခံရသော ထိုင်းရောက် မြန်မာလုပ်သား တစ်ထောင်ကျော် ကန်ဒေါ်လာ တစ်သန်းကျော် လျော်ကြေးရ

ပို့စ်တင်ချိန် - 3/27/2014 03:38:00 PM


ရန်ကုန်၊ မတ် ၂၆

ထိုင်းနိုင်ငံ မဟာချိုင်ဒေသရှိ CPF ပုစွန်စက်ရုံတွင် အလုပ်လုပ်ကိုင်နေသည့် မြန်မာအလုပ်သမား ၁၂၀၀ ဝန်းကျင်ကို နစ်နာကြေး ဘတ်သန်း ၅၀ (အမေရိကန်ဒေါ်လာ ၁ ဒဿမ ၆သန်း) ပေး၍ အလုပ်ထုတ်လိုက်ကြောင်း ထိုင်းနိုင်ငံအခြေစိုက် ရွှေ့ပြောင်း အလုပ်သမားများ အတွက် အခွင့်အရေးကွန်ရက် (MWRN) ဥက္ကဋ္ဌ ဦးအောင်ကျော်က ပြောကြားသည်။

ပုစွန်လုပ်ငန်း အဆင်မပြေသဖြင့် လုပ်သားအင်အား လျှော့ချရာတွင် ပြီးခဲ့သည့် ဇန်နဝါရီလတွင် မြန်မာလုပ်သား ၆၀ ကျော်နှင့် ဖေဖော်ဝါရီတို့တွင် ၇၅ ဦးတို့မှာ နစ်နာကြေး မရရှိဘဲ အလုပ်ထုတ်ခံခဲ့ရကြောင်း ၎င်းကဆိုသည်။

နစ်နားကြေး ပေးလျော်မှုအရ လုပ်သားများသည် အနည်းဆုံး ဘတ် ၃၀၀၀၀ မှ အများဆုံး ဘတ် ၉၀၀၀၀ အထိ ရရှိကြမည် ဖြစ်ကြောင်း MWRN ထံမှ သိရှိရသည်။

“ကုမ္ပဏီတစ်ခုကနေ ရွှေ့ပြောင်း အလုပ်သမားတွေ အပေါ်မှာ ဥပဒေအရ နစ်နာကြေး အပြည့်အဝ ပေးရတာ ထိုင်းနိုင်ငံမှာ ဒါပထမဆုံးပဲ” ဟု ဦးအောင်ကျော်က ရှင်းပြသည်။

လုပ်သားများကို နစ်နာကြေး မပေးဘဲ အလုပ်ဖြုတ်ပါက ထိုင်းနိုင်ငံတွင် ပြဋ္ဌာန်းထားသည့် အလုပ်ရှင်၊ အလုပ်သမား ကာကွယ်စောင့်ရှောက်ရေး ဥပဒေ ပုဒ်မ ၁၁၈ အရ တရားစွဲဆိုမည်ဟု အလုပ်ရှင်ကို ပြောဆိုခဲ့သဖြင့် အလုပ်ရှင်က MWRN နှင့် ညှိနှိုင်းခဲ့ကာ နစ်နာကြေးပေးရန် သဘောတူခဲ့ခြင်း ဖြစ်ကြောင်း MWRN ထံမှ သိရှိရသည်။

နစ်နာကြေးပေးမည့် ကိစ္စကို မတ်လ ၂၆ ရက်နေ့တွင် အလုပ်ရှင်၊ လုပ်သား၊ ထိုင်းအစိုးရ၊ MWRN တို့ လေးပွင့်ဆိုင် တွေ့ဆုံကာ သဘောတူ လက်မှတ်ရေးထိုးခဲ့ခြင်း ဖြစ်ပြီး နစ်နာကြေးကို လုပ်သားများ၏ ဘဏ်အကောင့်ထဲသို့ ဧပြီလ ၁၀ ရက်နေ့တွင် ထည့်ပေးမည် ဖြစ်ကာ ယင်းနေ့တွင် အလုပ်ဖြုတ်ကြောင်း တရားဝင် ကြေညာမည် ဖြစ်ကြောင်း ဦးအောင်ကျော်က ဆိုသည်။

လုပ်ထုတ်ခံရသည့် လုပ်သားများကို ထိုင်းဥပဒေအရ နစ်နာကြေး ခံစားခွင့် ရရှိမည်ဖြစ်ပြီး လုပ်သက်အလိုက် လျော်ကြေးရရှိမှု နှုန်းထားများ ကွဲပြားမည် ဖြစ်သည်။ ဥပမာ- လုပ်သက် လေးလမှ တစ်နှစ်အတွင်း ရှိသူများသည် လုပ်အားခ တစ်လစာ (ဘတ် ၉၀၀၀)၊ တစ်နှစ်မှ သုံးနှစ်အတွင်း ဆိုလျှင် သုံးလစာ၊ သုံးနှစ်မှ ခြောက်နှစ်အတွင်း ဆိုလျှင် ခြောက်လစာ၊ ခြောက်လမှ ဆယ်နှစ်ဆိုလျှင် ရှစ်လစာ၊ ဆယ်နှစ်အထက် ဆိုလျှင် ဆယ်လစာ နစ်နာကြေးရမည် ဖြစ်သည်။

CPF ပုစွန်စက်ရုံသည် သစ်သား စက်ရုံအဖြစ် ပြောင်းလဲ ဖွင့်လှစ်ရန် စီစဉ်နေပြီး ယင်းစက်ရုံတွင် မြန်မာလုပ်သား ၂၀၀၀ ခန့် ကျန်ရှိနေသေး ကြောင်း MWRN ထံမှ သိရှိရသည်။
ထိုင်းနိုင်ငံတွင် မြန်မာလုပ်သား သုံးသန်းကျော် ရှိသည်။

The Voice Weekly