မိကျောင်းကန် သပိတ်စခန်း ဒုတိယအကြိမ် ဖြိုခွဲခံရမှု လူ ၃၀ ခန့် ဒဏ်ရာရ

ပို့စ်တင်ချိန် - 4/01/2014 07:04:00 PM


ရန်ကုန်၊ မတ် ၃၁

ရန်ကုန်မြို့လယ် မြို့တော်ခန်းမအနီး မဟာဗန္ဓုလပန်းခြံဘေးတွင် လူ ၂၅၀ ခန့်ဖြင့် ဆန္ဒထုတ်ဖော်နေသည့် မိကျောင်းကန် သပိတ်စခန်းကို မတ်လ ၃၁ ရက်နေ့ နံနက် ၃ နာရီခန့်က (လူအများ နှစ်ခြိုက်စွာ အိပ်မောကျနေချိန်) စည်ပင်ဝန်ထမ်းနှင့် အရပ်ဝတ်ဖြင့် လက်မောင်းတွင် တာဝန် အမှတ်တံဆိပ်ပါ လက်မောင်းပတ် တပ်ဆင်ထားသူ အပါအဝင် စုစုပေါင်း လူအင်အား ၄၀၀ ခန့်က သပိတ်စခန်းကို ဒုတိယအကြိမ် ဖြိုခွဲခဲ့ရာ ဆန္ဒထုတ်ဖော်နေသူ လူ ၃၀ ခန့် ဒဏ်ရာရရှိခဲ့ကြောင်း သပိတ်စခန်းမှ ဆန္ဒထုတ်ဖော်သူများက The Voice သို့ ပြောကြားသည်။

သပိတ်စခန်း ဖြိုခွဲသူများမှာ သစ်သားတုတ်၊ ဝါးရင်းတုတ်၊ အုတ်ခဲများ ကိုင်ဆောင်ပြီး ရှေ့နောက်ပိတ်ကာ သပိတ်စခန်း ဖွင့်ထားသော ယာယီမြေစိုက် အမိုးအကာ ဝါးလုံးများကို ဆွဲဖြုတ်ခြင်း၊ ဆန္ဒထုတ်ဖော်သူ များကို နှစ်ဖက်ဝါးလုံးဖြင့် ညှပ်ကာ တရကြမ်းဆွဲခြင်းများ ပြုလုပ်ခဲ့ကြောင်း၊ ယင်းကဲ့သို့ သပိတ်စခန်း ဖြိုခွင်းမှုကြောင့် ဝါးလုံးဖြင့် ရိုက်မိခြင်း၊ ဝါးရှခြင်း၊ ချော်လဲခဲ့သဖြင့် ဒဏ်ရာရခဲ့သူ ၃၀ ခန့်အနက် လက်ကျိုးသူ၊ နှလုံးရောဂါအခံကြောင့် မေ့လဲသူ ကိုးဦးမှာ ဒဏ်ရာပြင်းထန်ကြောင်း ဆန္ဒပြသူများထံမှ သိရှိရသည်။

“နောက်ကတွန်း ရှေ့ကဆွဲဆိုတော့ ဝါးတွေ ပိုက်တွေနဲ့ ရှုပ်ပြီး လူတွေ ဝုန်းခနဲဆိုပြီး ပါသွားတာ ငါးတွေ ပိုက်ထဲ ပါသွားသလိုပဲ။ ပလက်ဖောင်းပေါ်ကနေ ဟိုဘက်ကားလမ်းထိ ပါသွားတာ။ ဝါးလုံးတွေကို ကောက်ယူသလိုမျိုး ပုံစံနဲ့ ဝါးနဲ့ လူတွေကို ညှပ်ပြီး မသိမသာနဲ့ သပိတ်စခန်းက လူတွေကို အသားနာအောင် တမင်လုပ်တယ်” ဟု မိကျောင်းကန် သပိတ်စခန်းမှ ဆန္ဒထုတ်ဖော်သူ အသက် ၅၀ အရွယ် ဒေါ်ခင်ဆွေက ဆိုသည်။

နိုင်ငံတော်အစိုးရသည် ပြည်သူက ရွေးချယ်တင်မြှောက်ထားခြင်း ဖြစ်သည့် အတွက် လက်နက်၊ အင်အားအသုံးပြု၍ ပြည်သူကို အကြမ်းဖက်နည်းဖြင့် မဖြေရှင်းသင့်ကြောင်း၊ အကြမ်းဖက်နည်း အသုံးမပြုဘဲ ပြည်သူများကို ရင်ဝယ်သားကဲ့သို့ သဘောထား စောင့်ရှောက် ညှိနှိုင်းဆွေးနွေးသင့်ကြောင်း ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါက်တာညိုညိုသင်းက ပြောကြားသည်။

“ရန်ကုန်မှာ စည်ပင်ဥပဒေနဲ့ မညီတဲ့နေရာတွေ လက်ညှိုးထိုးမလွဲ ရှိနေတာကို ဘာ့ကြောင့် သပိတ်စခန်းကိုမှ ရွေးပြီး လုပ်ရသလဲဆိုတာ မေးခွန်းထုတ်စရာ ဖြစ်နေတယ်။ လူအများ အိပ်မောကျချိန်ကြီးမှာ ဒီလို မလုပ်သင့်ပါဘူး။ ဥပဒေမှာလည်း မရှိပါဘူး” ဟု ရန်ကုန်တိုင်းဒေသကြီး လွှတ်တော်ကိုယ်စားလှယ် ဒေါက်တာညိုညိုသင်းက ဆိုသည်။

သပိတ်စခန်းကို အမိုးအကာများ ဆောက်လုပ်ရာတွင် ကျပ်ခုနစ်သောင်းခန့် ကုန်ကျပြီး နှစ်ကြိမ်တိုင်တိုင် အမိုးအကာများ အဖျက်ခံရသောကြောင့် လည်းကောင်း၊ အမိုးပြုလုပ်၍ ငွေအင်အား မတတ်နိုင်သဖြင့် လည်းကောင်း သက်ကြီးရွယ်အိုများ၏ ကျန်းမာရေးအတွက် ဝါးလုံးတိုင်ထောင်၍ ယာယီအမိုးသာ မိုးထားပြီး ညပိုင်းတွင် အမိုးများ ပြန်ဖြုတ်မည် ဖြစ်ကြောင်း သပိတ်စခန်း ဦးဆောင်သူ ဦးစိန်သန်းက ပြောကြားသည်။

မတ်လ ၂၄ ရက်နေ့တွင် စတင်ဖွင့်လှစ်သော ကျောက်တံတားမြို့နယ် မဟာဗန္ဓုလပန်းခြံလမ်း မဟာဗန္ဓုလပန်းခြံဘေးရှိ သပိတ်စခန်း၏ အမိုးအကာများကို စည်ပင်ဥပဒေနှင့် မညီညွတ်သောကြောင့် ရဲတပ်ဖွဲ့၊ စည်ပင်ဝန်ထမ်း၊ အရပ်ဝတ်ပြည်သူများ အင်အား ရာနှင့်ချီကာ မတ်လ ၃၀ ရက်နေ့ နံနက် ၃ နာရီတွင် ပထမဆုံးအကြိမ် ဖြိုခွဲခဲ့ပြီး မတ်လ ၃၁ ရက်နေ့ နံနက်၃ နာရီခန့်ကလည်း ဒုတိယအကြိမ် အင်အားသုံးကာ မိကျောင်းကန် သပိတ်စခန်းကို ထပ်မံဖြိုခွဲခဲ့ကြောင်း အဆိုပါ သပိတ်စခန်းထံမှ စုံစမ်းသိရှိရသည်။

သပိတ်စခန်းမှာ ရန်ကုန်စည်ပင် နယ်နိမိတ်အတွင်း ခွင့်ပြုချက် မရှိဘဲ ဆောင်ရွက်ခြင်းကြောင့် ရန်ကုန်မြို့တော် စည်ပင်သာယာရေး ဥပဒေနှင့်အညီ ဖျက်သိမ်းခြင်း ဖြစ်ပြီး ဥပဒေကို ဖောက်ဖျက်ပါက ငွေဒဏ်နှင့် ထောင်ဒဏ် တို့ဖြင့်ပါ အရေးယူနိုင်ကြောင်း၊ စည်ပင်ဥပဒေသည် တရားဝင် ဖြစ်သောကြောင့် ဥပဒေနှင့် မညီပါက အချိန်မရွေး ဖျက်သိမ်းခွင့် ရှိကြောင်း ရန်ကုန်မြို့တော် စည်ပင်သာယာရေး ကော်မတီ စီမံရေးရာ ဌာနမှ တာဝန်ရှိသူတစ်ဦးက ပြောကြားသည်။

အစိုးရက ၁၉၉၁ ခုနှစ် ဧပြီလတွင် အိမ်ထောင်စု ၁၀၀၀ ကျော် နေထိုင်သော သင်္ဃန်းကျွန်းမြို့နယ် မိကျောင်းကန် အပိုင်း ၁၊ အပိုင်း ၂၊ အပိုင်း ၃ မြေများကို သိမ်းယူခဲ့ပြီး ၂၀၁၀ အစိုးရသစ် လက်ထက်တွင် မြေယာသိမ်းခံ ပြည်သူများက သိမ်းဆည်းခံမြေများ ပြန်ရရေးအတွက် ၁၀ ကြိမ်ခန့် ဆန္ဒဖော်ထုတ်ခဲ့သည်။

ရန်ကုန်တိုင်းဒေသကြီး အစိုးရက မိကျောင်းကန်နှင့် ဝါဝါဝင်း သပိတ်စခန်း များကို အရေးယူ ဆောင်ရွက်မှု အခြေအနေနှင့် ပတ်သက်၍ သတင်းစာရှင်းလင်းပွဲ တစ်ရပ်ကို ဧပြီလ ၁ ရက်နေ့ ယနေ့နံနက် ၉ နာရီတွင် ရန်ကုန်မြို့တော်ခန်းမ၌ ပြုလုပ်မည် ဖြစ်သည်။

The Voice Weekly