ကချင်ဒေသမှာ တိုက်ပွဲတွေ ဆက်လက်ဖြစ်ပွား

ပို့စ်တင်ချိန် - 4/19/2014 10:44:00 AM


ကချင်ပြည်နယ် ဗန်းမော်ခရိုင် ဗန်းမော်-မိုးမောက်-လွယ်ဂျယ် ကားလမ်းပေါ်မှာ အစိုးရတပ် တပ်မ ၉၉ လက်အောက်ခံ တပ်ဖွဲ့တွေနဲ့ KIA တပ်ဖွဲ့ တပ်မဟာ (၃) တပ်တွေ ပြီးခဲ့တဲ့ ဧပြီလ ၁၃ ရက်နေ့ကစလို့ တိုက်ပွဲတွေ ဆက်လက်ဖြစ်ပွားနေတယ်လို့ သိရပါတယ်။

ခုလိုတိုက်ပွဲဖြစ်ပွားရတာဟာ ဧပြီလ ၁၃ရက်နေ့က အစိုးရတပ် ခမရ ၂၇၆ ရဲ့ စစ်ကားတစ်စီးကို KIA ဘက်က မိုင်းခွဲတိုက်ခိုက်ခဲ့တဲ့နောက်ပိုင်း တိုက်ပွဲတွေ ဆက်တိုက်ဖြစ်လာတာလို့ မြစ်ကြီးနားမြို့အခြေစိုက် မြောက်ပိုင်းတိုင်းစစ်ဌာနချုပ် တပ်မတော်အရာရှိတစ်ဦးက RFA ကိုပြောပါတယ်။

" မိုးမောက်မှာ သင်္ကြန်အကြိုနေ့က တပ်ကို ကားမိုင်းခွဲလိုက်တယ် အဲ့ဟာလိုက်ရှင်းနေတာ၊ ရှင်းနေတုံးပဲ အဲ့ဖြစ်စဉ်ရဲ့ နောက်ဆက်တွဲပဲ၊ လွယ်ဂျယ်- ဗန်မော်လမ်းကြီးပေါ်မှာ မိုင်းခွဲလိုက်တာလေ ကားတစ်စီး မီးလောင်သွားတယ်လေ၊ တပ်သွားချိန်တာလေ၊ မိုးမိတ်ရွာတက် ၂၇၆ အဲ့တက်ကနေပြီးတော့ စိန်လုံမှာ သွားချိန်းမှာ သွားချိန်းမယ့်ဟာကို ဗန်မော်- လွယ်ဂျယ်လမ်းပေါ်မှာတင် မိုးမောက်အထွက်ပဲရှိသေးတယ် အဲ့ဒါကို မိုင်းခွဲလိုက်တာ မိုင်းခွဲတော့ အဲ့ဒါနယ်မြေကို ဝင်ရှင်းနေတာ၊ လမ်းပေါ်မှာ ကားမိုင်းခွဲတာနဲ့ ပတ်သက်ပြီးတော့ ရှင်းတဲ့ သဘောပါပဲ၊ အခြေအနေက ရှင်းတော့မရှိတော့ဘူးဆို ပြန်ထွက်လာမှာပါပဲ"

အဲ့ဒီလိုတိုက်ခိုက်မှုမှာ အစိုးရတပ်မတော်သားတွေ ထိခိုက်သေဆုံးမှုတွေရှိတယ်ဆိုတဲ့ သတင်းတွေ ထွက်ပေါ်ခဲ့ပေမယ့် အသေးစိတ်ကိုတော့ ထုတ်ဖော်ပြောဆိုခြင်း မရှိပါဘူး။

မိုးမောက်မြို့ရဲ့အရှေ့ဘက် ၅ မိုင်ကျော်အကွာ KIA တပ်မဟာ ၃ လက်အောင်ခံတပ်ရင်း ၁ နဲ့ တပ်မ ၉၉ လက်အောက်ခံတပ်တွေအကြား အခုရက်ပိုင်းအတွင်းဖြစ်ပွားနေတဲ့ တိုက်ပွဲတွေကြောင့် KIA ဘက်က နေရာယူထားတဲ့ နန်ဆိုင်းနဲ့ ကျရီကျေးရွာတွေကနေ တပ်ဖွဲ့တွေ ဆုတ်ခွာပေးထားရပါတယ်။ ဖြစ်ပွားနေတဲ့ တိုက်ပွဲအခြေအနေနဲ့ ပတ်သက်ပြီး KIO ပြောရေးဆိုခွင့်ရှိသူ ဦးလာနန်းက ခုလိုပြောပါတယ်။

" မနေ့ကတော့ နေ့လည်ပိုင်းအထိ KIO တပ်မဟာ ၃ ဒေသ တပ်မ ၉၉ ကနေပြီးတော့ လက်နက်ကြီးနဲ့ ပစ်တာမျိုး မနေ့က နေ့လည်ပိုင်းအထိ ပစ်ကျတယ်ခင်ဗျ၊ တစ်ပတ်ရှိသွားပြီပေ့ါဗျာ၊ အင်အားကတော့ တပ်ရင်း ၄ ရင်းရှိတယ်၊ နောက်တော့ လက်နက်ကြီးနဲ့ နေရာ ၃ နေရာကနေပြီးတော့ ၁၀၅ မမ ရယ် ၁၁၀ မမ ရယ်၊ နောက်ပြီးတော့ ၈၁ မမ တို့ အဲ့ဒီလို ပစ်ပေးတယ်ဆိုတော့၊ ကျွန်တော်တို့ဘက်က အချိန်ကြာကြာ ခုခံဖို့က မလွယ်ဘူးခင်ဗျ၊ အဲ့ဒါကြောင့်မို့ ဆုတ်ပေးတာ"

ဖြစ်ပွားနေတဲ့ တိုက်ပွဲတွေနဲ့ပတ်သက်ပြီး ဗန်းမော်ခရိုင်အုပ်ချုပ်ရေးမှူး ဦးတေဇာအောင်က နှစ်ဘက် တပ်တွေ ရင်ဆိုင်တိုက်ပွဲဖြစ်တယ်ဆိုတဲ့သတင်း မကြားရပေမယ့် အပြန်အလှန်ပစ်ခတ်မှုတွေရှိတာကို သိထားကြောင်း ပြောပါတယ်။

RFA Burmese