လူနေအိမ် ရေကူးကန်ထဲထိ ကျူးကျော်ဝင်လာသည့် မိကျောင်း အဖမ်းခံရ

ပို့စ်တင်ချိန် - 5/19/2014 10:37:00 PM


အမေရိကန် နိုင်ငံတွင် လူနေအိမ် ခြံဝင်းအတွင်းထဲထိ အလည်လွန် ကျူးကျော်လာသည့် မိကျောင်းတစ်ကောင်အား သက်ဆိုင်ရာ တာဝန်ရှိသူများက ဖမ်းဆီးခဲ့ရကြောင်း သိရှိရသည်။ ပြီးခဲ့သည့် သီတင်းပတ်ကုန်က ဖလော်ရီဒါမှ ဂျွန်ဘန်တေးနှင့် ရှရွန်ဘန်တေးတို့ ဇနီးမောင်နှံသည် နံနက် အရုဏ်မတက်မီတွင် ခြံထဲရှိ ရေကူးကန်အတွင်းမှ ဆူဆူညံညံ အသံများကို ကြားခဲ့ရသည်။ ထို့ကြောင့် ၎င်းတို့နှစ်ဦးသား ကြောက်ကြောက်လန့်လန့် သတိကြီးကြီးဖြင့် ထွက်ကြည့်ကြသည့်အခါ ဖိတ်ခေါ်မထားသည့် (၈)ပေ၊ (၃)လက်မ အရှည်ရှိ ဧည့်သည်တော်ကို တွေ့ခဲ့ရခြင်း ဖြစ်သည်။ မည်သည့်နေရာမှ ရောက်လာမှန်း အသေအချာ မသိရသေးသည့် သားစားသတ္တဝါကြီးမှာ ရေကူးကန်ထဲတွင် ဆော့ကစား ပျော်မြူးလျှက် ရှိသည်။


ထို့နောက် ရှရွန်တို့၏ ဖုန်းဆက် သတင်းပေးမှုကြောင့် ဖလော်ရီဒါ သားရိုင်းတိရစ္ဆာန် စောင့်ရှောက်ရေး ဌာနမှ တာဝန်ရှိသူ တစ်ဦးက ယင်းမိကျောင်းမကြီးကို လာရောက် ဖမ်းဆီးသွားခဲ့သည်။ ၎င်းသည် မိကျောင်းမွေးမြူရေး စခန်းတစ်ခုသို့ ပို့ဆောင်ခြင်း ခံရမည် ဖြစ်သည်။ “အိပ်ရာက ထကြည့်တော့ ရေကူးကန်ထဲမှာ ပုံမှန်မဟုတ်တဲ့ အရာတစ်ခုခု ပေါလောပေါ်နေတာ သတိထားမိတယ်”ဟု ရှရွန်က ဆိုသည်။ သူမက ထိုအရာသည် မိကျောင်းကြီးမှန်း သိလိုက်သည်နှင့် အိမ်ထဲပြန်မရောက်မီ မိမိ အကိုက်ခံရတော့မည်ဟု တွေးတော ကြောက်ရွံ့ခဲ့ကြောင်းလည်း ဖွင့်ဟခဲ့သည်။

ဂျွန်က “ပထမတော့ ရှရွန်ပဲ ထကြည့်တာ။ ပြီးတော့ ကျွန်တော့်ကို အသည်းအသန် လာနှိုးတယ်။ ရေကူးကန်ထဲ မိကျောင်းရောက်နေလို့တဲ့။ ကျွန်တော်လည်း အိပ်တစ်ဝက်၊ နိုးတစ်ဝက်နဲ့ ထလိုက်သွားပြီး အဲဒီကောင်ကြီးကိုတွေ့မှ မျက်လုံးပြူးသွားတာ”ဟု ပြောကြားခဲ့သည်။ မိကျောင်းကြီး ဖောက်ဝင်လာသည့်အတွက် ရေကူးကန်ဘေးမှ အကာအကွယ် ဖျင်စမှာမူ ပြန်ချုပ်ရတော့မည် ဖြစ်သည်။ “ဘာပဲဖြစ်ဖြစ် တန်ပါတယ်။ ဒါက ပြောစရာ ဇာတ်လမ်းကောင်းတစ်ပုဒ် ဖြစ်သွားပြီလေ။ လူတိုင်းဒါမျိုး ကြုံဖူးဖို့ လွယ်တာမှ မဟုတ်ဘဲ”ဟု ရှရွန်က ရယ်ရယ်မောမော မှတ်ချက်ပြုသွားသည်။