ယာဉ်တိုက်မှု ဖြစ်ပွားပြီး ထွက်ပြေးမှုများနောက်ပိုင်း ယာဉ်ပိုင်ရှင်များပါ တရားစွဲဆိုခံရနိုင်

ပို့စ်တင်ချိန် - 5/05/2014 04:48:00 PM


ရန်ကုန် မေ ၄

ယာဉ်တိုက်မှု ဖြစ်ပွားပြီး ယာဉ်မောင်းများ ထွက်ပြေးတိမ်းရှောင်မှုများတွင် နောက်ပိုင်း၌ ယာဉ်ပိုင်ရှင်များပါ တရားစွဲဆို အရေးယူမှုများ ရှိလာနိုင်ကြောင်း အမှတ်(၂)ယာဉ်ထိန်းရဲတပ်ဖွဲ့ခွဲမှူးရုံး(ရန်ကုန်)တွင်မေ ၂ ရက်က ပြုလုပ်ခဲ့သည့် မီဒီယာတွေ့ဆုံပွဲတွင် ဒုတိယရဲမှူးကြီးလင်းထွဋ်က ပြောသည်။
“အုံနာခပေးပြီး ငှားရမ်းမောင်းတဲ့ ယာဉ်တော်တော်များများက ယာဉ်တိုက်မှုဖြစ်လာတဲ့အခါကျရင် လူသေတာနဲ့ ထွက်ပြေးတော့တာပဲ။ ဒါကြောင့် နောက်ပိုင်းကျရင် ယာဉ်ပိုင်ရှင်တွေရဲ့ အခန်းကဏ္ဍလည်း ပါလာမယ့် အနေအထားရှိတယ်။ ဥပဒေကြောင်းအရ ဆိုရင် ၁၉၆၄ ခုနှစ် မော်တော်ယာဉ်ဥပဒေမှာ ပါပြီးသား ယာဉ်ပိုင်ဆိုင်တဲ့သူလည်း တာဝန်ရှိရမယ်”ဟု ၎င်းက ပြောသည်။
၁၉၆၄ ခုနှစ် မော်တော်ယာဉ် ဥပဒေပုဒ်မ(၃)တွင် မည်သည့် မော်တော်ယာဉ်မဆို မှတ်ပုံတင်မထားသော မော်တော်ယာဉ် ဖြစ်လျှင်သော်လည်းကောင်း၊ မှတ်ပုံတင် သက်သေခံလက်မှတ် ခေတ္တရပ်စဲ ခံထားရသော သို့မဟုတ် ဖျက်သိမ်းထားသော၊ သို့မဟုတ် သက်တမ်း ကုန်ဆုံးပြီးသော မော်တော်ယာဉ်ကို ပြည်သူတို့နှင့် သက်ဆိုင်သော နေရာတစ်ခုခုတွင် မည်သူမျှ မမောင်းနှင်ရတို့အပြင် မော်တော်ယာဉ်ပိုင်ရှင် တစ်ဦးဦးကလည်း မမောင်းနှင်စေရ၊ သို့မဟုတ် မောင်းနှင်ခွင့်မပြုရဟု ဖော်ပြထားသည်။
ထို့ပြင် ပုဒ်မ(၁၅)တွင် မည်သူမှ သတ်မှတ်သည့် နည်းလမ်းအတိုင်း မိမိအား ထုတ်ပေးထားသည့် ယာဉ်မောင်းလိုင်စင် မထားလျှင် မော်တော်ယာဉ်ကို ပြည်သူတို့နှင့်ဆိုင်ရာ နေရာတစ်ခုခုတွင် မမောင်းနှင်ရ မော်တော်ယာဉ်ပိုင်ရှင်၊ သို့မဟုတ် ထိန်းသိမ်းသူမှ မော်တော်ယာဉ်ကို လိုင်စင်ထုတ်မပေးထားသူ တစ်ဦးအား မမောင်းနှင်စေရ၊ သို့မဟုတ် မောင်းနှင်ရန် ခွင့်မပြုဟု ပြဋ္ဌာန်းထားသည်။
အထက်ပါ ပုဒ်မနှစ်ခုအား ချိုးဖောက်ပါက ပုဒ်မ(၂၁)အရ အများဆုံး ထောင်ဒဏ်ခြောက်လအထိ ချမှတ် နိုင်သည့် အပြင် တစ်နှစ်အတွင်း ယခုလို ပြစ်မှုမျိုး ထပ်မံကျူးလွန်ပါကထောင်ဒဏ် တစ်နှစ်အထိ ချမှတ် နိုင်ကြောင်း အဆိုပါ ယာဉ်ထိန်းရဲတပ်ဖွဲ့ရုံးမှ ဒုတိယရဲမှူးတစ်ဦးက ပြောသည်။လက်ရှိအချိန်တွင် ၁၉၆၄ ခုနှစ် မော်တော်ယာဉ် တည်ဆဲဥပဒေများနှင့်အညီ အရေးယူဆောင်ရွက်သွားမည် ဖြစ်ကြောင်း သိရသည်။

MOI Webportal Myanmar