ရန်ကုန်မြို့၏ အဆမတန် များပြားလာသည့်လူဦးရေနှင့် ကျောချစရာ တစ်နေရာ

ပို့စ်တင်ချိန် - 6/11/2014 09:36:00 AM


ရန်ကုန်မြို့၌ နေထိုင်သော လူဦးရေမှာ တစ်နိုင်ငံလုံးနှင့် စာလျှင် အဆမတန် များပြားမြင့်တက် လာသည့်အတွက် လူဦးရေ ၁ဝ သန်း ဝန်းကျင် နေထိုင်ရန် အိမ်ခြံမြေ အခက်အခဲများ ဖြစ်ပေါ်လျက် ရှိသည်။

လူဦးရေ မြင့်တက်လာရခြင်း၏ ပင်မအဓိက ကျသော အကြောင်းအရင်းမှာ မြန်မာနိုင်ငံ၏ နိုင်ငံရေး လမ်းကြောင်း ပြောင်းလဲခြင်းနှင့် အတူ ဖွံ့ဖြိုး တိုးတက်လာသော စီးပွားရေး လုပ်ငန်းများကြောင့် ဖြစ်လေသည်။

မြန်မာနိုင်ငံ၌ ဒီမိုကရေစီ စနစ် စတင် ကျင့်သုံးလာသော အခါ နိုင်ငံတကာမှ စီးပွားရေး ပိတ်ဆို့မှုများ လျှော့ချ လာခဲ့ခြင်းနှင့် အတူ နိုင်ငံခြား ရင်းနှီးမြှုပ်နှံမှု များလည်း အများအပြား ဝင်ရောက်လာခဲ့သည်။ ထိုအခါ စက်ရုံ၊အလုပ်ရုံ၊ ကုမ္ပဏီ စသည့် လုပ်ငန်းကြီး များ ပေါ်ပေါက်လာပြီး ထိုစက်ရုံ၊ အလုပ်ရုံ၊ ကုမ္ပဏီတို့၌ လိုအပ်လျက် ရှိသော အလုပ်အကိုင် နေရာများသို့ အလုပ်လုပ်ကိုင်ရန် မြန်မာနိုင်ငံ ဒေသ အသီးသီးမှ လူငယ်၊ လူရွယ် စသည့် လူပေါင်း မြောက်မြားစွာတို့က ရန်ကုန် မြို့ဆီသို့ ဦးတည် ရောက်ရှိ လာခဲ့ကြပါတော့ သည်။

သူတို့သည် စက်မှုဇုန်ကြီးများ ရှိရာ၌ စက်ရုံလုပ်သားများ အဖြစ် ပြောင်းလဲသွားကြကာ ရန်ကုန်မြို့၌ နေထိုင်သူများ ဖြစ်လာခဲ့ကြ သည်။

''ကျွန်တော်က စစ်ကိုင်းတိုင်း ဒေသကြီးက ရွာကလေး တစ်ရွာကပါ။ သာကေတ စက်မှုဇုန်က အထည်ချုပ် စက်ရုံမှာ QC လုပ်ပါတယ်။ခုခေတ်လို ကုမ္ပဏီတို့၊ စက်ရုံတို့ ဖြစ်ပေါ်လာတော့ အညာက လူအများစုဟာ တစ်နှစ်မှာ တစ်ခါလောက်သာ ငွေမြင်ရတဲ့ လယ်ထဲ၊ ယာထဲ မဆင်းကြတော့ဘဲ စက်ရုံမှာ အလုပ်လုပ်ဖို့ ရန်ကုန်ကို ဆင်းလာကြတယ်'' ဟု လူငယ်တစ်ဦးက ပြောပြသည်။

မြန်မာပြည် အနှံ့အပြားမှ လူအများစုသည် ရန်ကုန်သို့ ဆင်းလာကာ အလုပ်အကိုင် လာရောက် လုပ်ကိုင်ကြသောကြောင့် အိမ်ငှား နေထိုင်ကြရသဖြင့် ရန်ကုန်မြို့ ဝန်းကျင်၌ အိမ်ငှားစရာ အလွတ်အလပ်ပင် မရှိဖြစ်ကာ စက်ရုံအနီး၌ တဲတန်းလျားများ ဆောက်လုပ်လျက် ကျူးကျော် နေထိုင်မှုများ ရှိလာခဲ့သည်။

''ဘော်ဒါဆောင်လို အိမ်မျိုးမှာ ငှားနေရင်းက အိမ်လခ မြင့်လာတယ်။ နောက်ထပ် တောင်းတဲ့ အိမ်လခ များများကို မပေးနိုင်တော့ လို့ အိမ်ခန်းအသစ် ရှာတော့လည်း အိမ်တွေ အားလုံး လူတွေနဲ့ ပြည့်နေတယ်'' ဟု သူတို့က ဆိုသည်။

အိမ်ငှားလိုအား တိုးမြင့်လာသောကြောင့် အိမ်ရှင်များမှာ လောဘများ ကျောကပ်လာကြပြီး အိမ်ခန်းငှားခ၊ လုံးချင်း အိမ်ငှားခများ၊ အိမ်စပေါ် ငွေများကို မတန်တဆ တိုးမြှင့် တောင်းယူလေ့ ရှိကြသည်။ သာကေတ မြို့နယ်၌ နေထိုင်သူ တစ်ဦးက အခန်းငှားရာ၌ လုံးချင်းအိမ် ပေ ၂ဝ တစ်လုံးလျှင် စပေါ် ငွေသိန်း နှစ်ဆယ်နှင့် အိမ်လခ တစ်သိန်းပေး ရသည်ဟု ဆိုသည်။ တိုက်ခန်းငှားရမ်း နေထိုင်ပါက တစ်လလျှင် တစ်သိန်းနှစ်သောင်း ပေါက်သည် ဟုလည်း ဆိုသည်။

''ကျွန်မကျောက်မြောင်း------လမ်းက ခြောက်ထပ်တိုက် အပေါ်ဆုံးထပ်မှာ ငှားနေတာပါ။ စပေါ်ငွေက သိန်းကိုးဆယ်၊ အိမ်လခက သုံးသောင်း ပေးရပါတယ်'' ဟု အိမ်လခ နည်းနည်း စပေါ်များများ တင်ရသည့် အိမ်ကို ငှားရမ်းနေထိုင်သော ကျောက်မြောင်းမှ အမျိုးသမီး တစ်ဦးက ဆိုသည်။

ယခင်က ရန်ကုန်မြို့ကြီးသို့ ရောက်လာ ကြသူများမှာ မလေးရှား၊ ထိုင်း၊ စင်ကာပူ အစရှိသည့် နိုင်ငံများသို့ ဆက်လက် ထွက်ခွာ သွားကြသည်။ ယခု အကုန်အကျ များ သော နိုင်ငံရပ်ခြား အလုပ်များထက် ဒေသ ရပ်ရွာသုိ့ အချိန်မရွေး၊ လေယာဉ်ပျံ လက်မှတ်မလို ဗီဇာ၊ ပတ်စ်ပို့မလို ပြန်နိုင်သော ရန်ကုန်မြို့ရှိ စက်မှုဇုန်များတွင် လုပ်ကိုင် ကျင်လည်ကြသဖြင့် အိမ်ငှားနေထိုင်ကြသော ကြောင့် ရန်ကုန်မြို့လူဦးရေမှာ အဆမတန် များပြားလာလျက် ရှိသည်။

ယခုအခါ နိုင်ငံခြား ကုမ္ပဏီများကြောင့် မြို့လယ်၊ မြို့ပတ်စသည့် ရပ်ကွက်များရှိ အိမ်ခန်း၊ တိုက်ခန်း၊ တိုက်လုံးချင်းငှားခ များမှာ မကြုံဘူး၊ မကြားဘူးသော ဈေးသို့တိုင် မြင့်တက်သွားခဲ့သည်။ ထိုအခါ မြို့နယ်၊ ရပ်ကွက်ထဲရှိ အိမ်ခန်းငှားစားသူ အိမ်ပိုင်ရှင်များ အနေဖြင့်လည်း မြို့လယ်ကောင် သို့မဟုတ် ဆိတ်ငြိမ်ရပ်ကွက်များရှိ အဆင့်မြင့် လုံးချင်းတိုက်များကို ဒေါ်လာ သောင်းဂဏန်းဖြင့် လည်းကောင်း၊ တိုက်ခန်းများကို တစ်လ သိန်းသုံးလေးဆယ်ဖြင့် လည်းကောင်း အငှားအရမ်း ဖြစ်ကြသည်ကို အားကျကာ မိမိတို့၏ အိမ်ခန်း ငှားခများကို ဈေးမြှင့်တင် လာကြသည်။ အိမ်ခန်း ငှားစားရန် အိမ်ကြီး၊ အိမ်ကောင်း သို့တည်းမဟုတ် အိမ်ဆိုရုံ အိမ်နှင့် မြေကို ပိုင်ဆိုင်သူများမှာ ပွဲစားများ၏ အလှော်ကောင်းမှုကြောင့် မိမိမြေကို ကန်ထရိုက်ပေးကာ တိုက်ခန်း ထဆောက်ကြ သည်။ ပေ၂ဝ x ၆ဝ မြေတစ်ကွက်လျှင် ပြောင်းရွှေ့စရိတ် ဆယ်သိန်းမှ သိန်းနှစ်ဆယ် အထိပေးကာ RC ငါးထပ်ဆောက်သည့် မြေညီထပ်နှင့် အပေါ်ဆုံး နှစ်ထပ်ကို ကန်ထရိုက်မှ ယူကာ ကျန်နှစ်ထပ်ကို မြေပိုင်ရှင်အား ပေးသည်။ အချို့ လမ်းမတန်း စီးပွားရေး ဈေးကွက်ရှိသော မြေများဆိုလျှင် ပြောင်းရွှေ့စရိတ် သိန်းရာနှင့် ထောင်နှင့်ချီ၍ ပင်ပေးသည်။

ယခင်က အိမ်မိုး၊ အိမ်ပြင်ရန် ပိုက်ဆံ မရှိရှာသော အိမ်ပိုင်ရှင်လေးများမှာ ငွေဆယ်သိန်း၊ သိန်းနှစ်ဆယ်ကို မက်ကြသည်။အိမ်မပြင်ရဘဲ တိုက်ခန်းနှစ်ခန်း ပြန်ရသဖြင့် တိုက်နှင့်နေသည့် အရသာကို ခံစား ကြည့်ချင်ကြသည်။ မနေချင်၍ တိုက်ခန်း ပြန်ရောင်းစားလျှင် မိမိ၏မြေကို ရောင်း သည့် တန်ဖိုးထက် ပိုရပြီး ရောင်းရတာလည်း လွယ်သည်။ ထို့ကြောင့် ရပ်ကွက်အတွင်း၌ ပွဲစားများနှင့် ဆက်သွယ်ကာ ကန်ထရိုက်တိုက် ဆောက်လုပ်လာသူများ အလျှိုအလျှို ပေါ်လာကြသည်။

အချို့ကလည်း ''ကန်ထရိုက်တိုက် ဆောက်ရတာ အရှုပ်အရှင်းများလို့ မဆောက်ချင်ဘူး။ကန်ထရိုက်တွေက တရားဝင် လိုင်စင် ရှိ၊မရှိ ဆိုတာလည်း ယုံလို့မရဘူး။ ပြောင်းရွှေ့စရိတ် ပေးပြီဆိုကတည်းက ကိုယ်ရဲ့မူရင်း ဂရန်ကို စာချုပ်နဲ့ လွှဲပေးလိုက်ရတာ။ အချို့ကန်ထရိုက် တွေက သူတို့ရဲ့ ကုမ္ပဏီ ဆိုင်းဘုတ်ကို ကိုယ့်အိမ်မှာ လာတပ် ကြိုပွိုင့်ခေါ်ရောင်းပြီး တိုက်ကိုမဆောက်ဘဲ ဒီအတိုင်းထားတယ်။ နောက်ထပ် တစ်နေရာမှာ သွားပြီး ပြောင်းရွှေ့စရိတ်ပေး ကြိုပွိုင့်ခေါ် ငွေယူနဲ့ ကိုယ့်ဆီ ပြန်မလာတော့ဘူး။ နင့်နင့်ပိုးပိုး အမြတ်ရရင် ကိုယ့် ဂရန်နဲ့ စာချုပ်ကို နောက်ကန်ထရိုက်ကို လက်လွှဲကြတယ်လို့လည်း ကြားရတယ်။ အချို့ဆို ရုံးတွေတောင် ရောက်ရှိကြတယ်''ဟု ဆို သည်။

ယနေ့ မြန်မာနိုင်ငံသည် နိုင်ငံတကာမှ ရင်းနှီးမြှုပ်နှံမှု ပြုရန် မျက်စိ အကျဆုံးသော နိုင်ငံတစ်နိုင်ငံ ဖြစ်လျက်ရှိရာ ရင်းနှီးမြှုပ်နှံမှုများ အလုံးအရင်းနှင့် ပြုလာကြသော အခါ လုပ်သားအင်အား အများအပြား လိုလာမည် ဖြစ်ပြီး စက်ရုံ၊ အလုပ်ရုံ၊ ကုမ္ပဏီများ စုဝေး တည်ရှိရာ ရန်ကုန်မြို့ကြီးသို့ အနယ်နယ် အရပ်ရပ်မှ လူများ အလုပ်လုပ်ရန် တဖွဲဖွဲ ရွှေ့ပြောင်း ရောက်ရှိလာကြမည် ဖြစ်သည်။ထို့ကြောင့် ရန်ကုန်မြို့နေ လူအများစုနှင့် ပြောင်းရွှေ့ လုပ်သားများ အတွက် ကျောချစရာ တစ်နေရာသည် အလွန်ပင် အရေးကြီးသော ကဏ္ဍတစ်ရပ် ဖြစ်လာပေမည်။ နိုင်ငံရပ်ခြား ရှိ ဟောင်ကောင်ကဲ့သို့ စက်မှုဖွံ့ဖြိုးသော မြို့ ကြီးများ၌ လူဦးရေသည် သန်းပေါင်းရာနှင့် ချီကာ နေထိုင်၍ လူတစ်ယောက် ကျောချစရာ တစ်နေရာအတွက် ခန်းမကြီးများထဲ၌ စီတန်း အိပ်စက်ရခြင်းမျိုး၊ စီးကရက် ဘူးခွံများထပ် ဆင့်ထားသော ပုံစံလို အထပ်ထပ် ပါသော ခုတင်ပေါ်၌ လူတစ်ယောက် အထပ်တစ်ထပ် နှုန်းဖြင့် အိပ်စက် ရသလိုမျိုး၊ နောင်အနာဂတ် ရန်ကုန်မြို့၌ လူတစ်ယောက် ကျောချစရာ နေရာတစ်နေရာမှာ ခက်ခဲမှုများ ရှိလာ နိုင်လေသည်။

ထိုပြဿနာကို ဖြေရှင်းနိုင်ရန်မှာ ပဲခူး၊ ကော့မှူး၊ သံလျင် အစရှိသည့် မြို့နှင့် အနည်းဆုံး မိုင် ၅ဝ မှ ၁ဝဝ အတွင်း ဝေးသောနေရာ များ၌ မြို့သစ်တည်ခြင်း၊ ကန်ထရိုက် အိမ်ရာများ ဖော်ထုတ်ခြင်းတို့ကို ပြုလုပ်၍ တစ်နာရီမိုင် ၅ဝ မှ ၁ဝဝ နှုန်း မြန်သော မြန်နှုန်းဖြင့် ရထားလမ်းနှင့် ရထားတို့ကို နိုင်ငံခြား ကုမ္ပဏီများမှ တင်ဒါခေါ်၍ ပြေးဆွဲစေခြင်းဖြင့် မြို့တွင်း ယာဉ်ကျပ်တည်း မှု ပြဿနာ၊ ကျောတစ်နေရာ ချစရာပြဿနာများ အထိုက်အလျောက် ပြေလည် သွားနိုင်ပါကြောင်း ရေးသား တင်ပြလိုက်ရပါသည်။ ။

မြ၀တီ