ဂျာမဏီက မြန်မာ့အကြွေး ၅၀% (ယူရို သန်းငါးရာ) လျှော်ပေး


ဂျာမဏီသမ္မတ Joachim Gauck အား သမ္မတဦးသိန်းစိန်နဲ့ ဇနီးတို့က နှုတ်ဆက်ကြိုဆိုနေစဉ်။ (ဖေဖော်ဝါရီ ၁၀၊ ၂၀၁၄)

10.02.2014

မြန်မာနိုင်ငံကိုသုံးရက်ကြာ ရောက်နေတဲ့ ဂျာမဏီသမ္မတ Joachim Gauck ဟာ သမ္မတဦးသိန်းစိန်နဲ့ အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်တို့ကို ဒီကနေ့နေပြည်တော်မှာ သီးခြားစီတွေ့ဆုံခဲ့ပါတယ်။ သမ္မတဦးသိန်းစိန်နဲ့ တွေ့ဆုံရာမှာ နှစ်နိုင်ငံဆက်ဆံရေး တိုးမြှင့်ဖို့အပါအ၀င် ဂျာမဏီက မြန်မာကို ချေးထားတဲ့ အကြွေးစုစုပေါင်းထဲက ၅၀%ကို လျှော်ပစ်ဖို့ သဘောတူ လက်မှတ်ရေးထိုးခဲ့တဲ့ အကြောင်း မြန်မာအစိုးရ ပြောခွင့်ရသူက ဗီအိုအေကိုပြောပါတယ်။ အကြောင်းစုံကို မအင်ကြင်းနိုင်ကတင်ပြပေးထားပါတယ်။

သမ္မတဦးသိန်းစိန်ရဲ့ ဖိတ်ကြားချက်နဲ့ မြန်မာနိုင်ငံကိုရောက်ရှိလာတဲ့ ဂျာမဏီ သမ္မတဟာ မြန်မာ့ ဒီမိုကရေစီ အသွင်ကူးပြောင်းရေးနဲ့ ပတ်သက်လို့ နှစ်ဘက်ခေါင်းဆောင်နှစ်ဦးတွေ့ဆုံချိန်မှာ အသိအမှတ်ပြု ထုတ်ဖေါ်ပြောဆိုခဲ့တဲ့ အပြင် မြန်မာနိုင်ငံက တင်ရှိနေတဲ့ အကြွေး ၅၀ % ကို လျှော်ပစ်ဖို့ သဘောတူ လက်မှတ် ရေးထိုးခဲ့တဲ့အကြောင်း ပြန်ကြားရေးဒုဝန်ကြီး ဦးရဲထွဋ်က ဗွီအိုအေကိုပြောပါတယ်။

“ကျနော်တို့နိုင်ငံရဲ့အသွင်ကူးပြောင်းရေး လုပ်ငန်းစဉ်တွေနဲ့ပတ်သက်ပြီးတော့မှ သူတို့ အသိအမှတ်ပြုတယ်၊ ချီးကျူးတယ်။ နောက်ပြီးတော့ သူတို့ သိချင်တဲ့အခြေအနေလေးတွေ မေးပါတယ်။ သမ္မတကြီးကလည်း ကျနော်တို့လုပ်နေတဲ့  ပြုပြင်ပြောင်းလဲရေးလုပ်ငန်းတွေရဲ့ ရလဒ်ကောင်းတွေကို ရှင်းပြသလို ကြုံရတဲ့စိန်ခေါ်မှုတွေအကြောင်းလည်း ကျနော်တို့ရှင်းပြပါတယ်။ နောက်တစ်ခုကတော့ ဂျာမဏီနိုင်ငံက ကျနော်တို့နိုင်ငံက တင်ရှိနေတဲ့ ကြွေးမြီထဲက ၅၀ % ကို လျှော်ပစ်ပြီးတော့မှ ကျန်တဲ့ ၅၀ % ကိုတော့ ပြန်လည်ပေးဆပ်မယ့်အစီအစဉ်ကို ပြန်လည်ပြင်ဆင်သတ်မှတ်တဲ့ စာချုပ်ကို ကျနော်တို့ လက်မှတ်ထိုးပါတယ်။”

ဒါ့အပြင် မြန်မာနိုင်ငံတွင်း အသေးစားနဲ့အလတ်စား စက်မှုလုပ်ငန်းတွေအတွက် ဂျာမဏီက တိုးမြှင့်ကူညီသွားမယ့်နည်းလမ်းတွေကို ဆွေးနွေး သဘော တူညီခဲ့ကြတယ်လို့ ဦးရဲထွဋ်က ဆိုပါတယ်။ အခုလို ဂျာမဏီသမ္မတရဲ့ ခရီးစဉ်ဟာ မြန်မာအတွက် အရေးပါတာကြောင့် အနာဂတ်မြန်မာနိုင်ငံရဲ့ ငြိမ်းချမ်းရေး လုပ်ငန်းစဉ်တွေမှာ ဂျာမဏီအပါအဝင် ဥရောပသမဂ္ဂရဲ့ကူညီပံ့ပိုးမှုကို ရနိုင်မယ်လို့ မြန်မာအစိုးရက မျှော်လင့်ကြောင်း ဦးရဲထွဋ်က ပြောပါတယ်။

“ကျနော်တို့ကတော့ ဒီခရီးစဉ်တွေပေါ့နော်၊ ဂျာမန်ဝန်ကြီးချုပ်ရော၊ ရှေ့မှာလာခဲ့တဲ့ ဥရောပသမဂ္ဂအဖွဲ့ဝင်နိုင်ငံတွေက ခေါင်းဆောင်တွေရောရဲ့ ခရီးစဉ်တွေကြောင့် ကျနော်တို့နဲ့ ဥရောပသမဂ္ဂရဲ့ ပူးပေါင်းဆောင်ရွက်မှုဟာ ပိုပြီးတော့ ကောင်းမွန်လာမယ်။ နောက်ပြီး ကျနော်တို့နိုင်ငံရဲ့ ဖွံ့ဖြိုးတိုးတက်မှုနဲ့ ငြိမ်းချမ်းရေးတည်ဆောက်ရေးလုပ်ငန်းစဉ်မှာ ပိုပြီးတော့မှ ဥရောပသမဂ္ဂက တက်တက်ကြွကြွပါဝင်လာနိုင်မယ်လို့ ကျနော်တို့ ယုံကြည်ပါတယ်။”

သမ္မတဦးသိန်းစိန်နဲ့တွေ့ဆုံပြီးတဲ့နောက်မှာ ဂျာမဏီသမ္မတ Joachim Gauck ဟာ အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်နဲ့လည်း နေပြည်တော်မှာ သီးခြားမှာ တွေ့ဆုံဆွေးနွေးခဲ့ပါတယ်။ မြန်မာနိုင်ငံပြုပြင်ပြောင်းလဲရေးမှာ ရင်ဆိုင်နေရတဲ့ စိန်ခေါ်ချက်တွေကို ပွင့်ပွင့်လင်းလင်းဆွေးနွေးခဲ့တယ်လို့ ပါဝင်တက်ရောက်ခဲ့တဲ့ အမျိုးသားဒီမိုကရေစီအဖွဲ့ချုပ် ပြည်သူ့ လွှတ်တော် ကိုယ်စားလှယ် ဦးနိုင်ငံလင်းက ပြောပါတယ်။

“ကျနော်တို့ ဒီနေ့ သမ္မတကြီးနဲ့တွေ့တဲ့အခါကျတော့ ကျနော်တို့ဆီက အခြေခံ ဥပဒေပြင်ဆင်ရေးနဲ့ပတ်သက်လို့ ဆွေးနွေးတာရှိတယ်။ သမ္မတကြီးကလည်း မြန်မာနိုင်ငံ ပြုပြင်ပြောင်းလဲရေးနဲ့ပတ်သက်လို့ သူ့ရဲ့သဘောထားတွေကို ဆွေးနွေးကြပါတယ်။ ကျနော်တို့ အန်တီစုစုလွင် သုံးခွ လွှတ်တော် ကိုယ်စားလှယ်ရယ်။ ဦးမင်းဦး၊ ကျနော်-နိုင်ငံလင်းတို့ သွားကြပါတယ်။ နွေးနွေးထွေးထွေးပါခင်ဗျ။ ပွင့်ပွင့်လင်းလင်းပဲ အမေ( ဒေါ်အောင်ဆန်းစုကြည်) နဲ့ဆွေးနွေးတာ ကျနော်တို့ တွေ့ရပါတယ်ခင်ဗျ။”

ဒါ့အပြင် ဂျာမဏီသမ္မတဟာ နေပြည်တော်က ပြည်ထောင်စုလွှတ်တော်ကို သွားရောက်ပြီး လွှတ်တော်ခေါင်းဆောင်တွေနဲ့လည်း တွေ့ဆုံခဲ့ပါတယ်။
တနင်္ဂနွေနေ့က ရောက်ရှိလာတဲ့ဂျာမဏီ သမ္မတနဲ့အတူ အစိုးရ၀န်ကြီး အဖွဲ့ဝင်တွေ၊ လွှတ်တော်အမတ်တွေနဲ့ စီးပွားရေးခေါင်းဆောင်တွေလည်း လိုက်ပါလာပြီး ဂျာမဏီ - မြန်မာ စီးပွားရေးဖိုရမ်ကိုလည်း တက်ရောက်ဖို့ ရှိတယ်လို့လည်း ဆိုပါတယ်။ ၁၉၈၆ ခုနှစ်ကနောက်ပိုင်းပြီးရင် ဂျာမဏီသမ္မတ Joachim Gauck ရဲ့ ခရီးစဉ်ဟာ ပထမဆုံး ဂျာမဏီနိုင်ငံ ထိပ်တန်းခေါင်းဆောင်တဦးရဲ့ မြန်မာနိုင်ငံချစ်ကြည်ရေးခရီးစဉ် ဖြစ်ပါတယ်ရှင်။

အင်ကြင်းနိုင်
VOA Burmese News

===================================================

မြန်မာ့ကြွေး ယူရိုသန်းငါးရာ ဂျာမန် မယူလို

ဂျာမန်သမ္မတနဲ့ ဒေါ်စု ပူးတွဲ သတင်းစာရှင်း

မြန်မာ နိုင်ငံက ဂျာမနီကို ပြန်ဆပ်ဖို့ ရှိနေတဲ့ အကြွေး ယူရို သန်း ၅ဝဝ ကို ဂျာမနီ နိုင်ငံက လျှော်ပစ်မယ်လို့ မြန်မာနိုင်ငံကို ရောက်နေတဲ့ ဂျာမန် သမ္မတက ပြောပါတယ်။

နှစ်ပေါင်း ၃ဝ နီးပါးမှာ မြန်မာ နိုင်ငံကို ပထမဆုံး ရောက်ရှိလာတဲ့ ဂျာမနီ နိုင်ငံ သမ္မတ ယိုကင်မ် ဂေါ့ခ် Joachim Gauck ရဲ့ ခရီးစဉ် အတွင်းမှာ မြန်မာ နိုင်ငံက တင်ရှိ နေတဲ့ ကြွေးမြီ ယူရို သန်းပေါင်း ၁ဝ၈၄ သန်း ထဲက ၅ဝ ရာခိုင်နှုန်းကို လျှော်ပစ် မယ့် အကြောင်း ထုတ်ဖော် ပြောလိုက်တာ ဖြစ်ပါတယ်။

အကြွေး ယူရိုသန်း တစ်ထောင် ကျော် ထဲက ကျန် တဝက်ကျော် ကိုတော့ အတိုး ၃ ရာခိုင်နှုန်းနဲ့ ၁၅ နှစ် အတွင်း ပြန်ဆပ်ရမှာ ဖြစ်ပါတယ်။

ဒီလို ကြွေးလျှော်ပစ်မှုဟာ ၂ဝ၁၅ ရွေးကောက်ပွဲ အကြို မြန်မာ့ ပြုပြင် ပြောင်းလဲမှုတွေ တည်ငြိမ် စိတ်ချ ရေး အားပေးတဲ့ သဘော ဖြစ်တယ်လို့ စီးပွားရေး ပညာရှင် ဒေါက်တာ အောင်ကိုကိုက ပြောပါတယ်။

တကယ် တိုင်းပြည် စီးပွားရေး ဖွံ့ဖြိုးလာဖို့ ဒီလို နိုင်ငံတကာ အကူအညီ တွေ အပြင် ပြည်တွင်း စီးပွားရေး ထုတ်လုပ်မှု တွေ တိုးတက်ဖို့ လိုတယ်၊ ငွေကြေး ထက် နည်းပညာ အကူ တွေ ပေးသင့်တယ် လို့လည်း သူက ဆိုပါတယ်။

ဂျာမန် သမ္မတ Joachim Gauck ဟာ ဖေဖော်ဝါရီလ ၁၀ ရက်နေ့ တနင်္လာ နေ့က နေပြည်တော်မှာ သမ္မတ ဦးသိန်းစိန်၊ ပြည်ထောင်စု လွှတ်တော် ဥက္ကဋ္ဌ ဦးရွှေမန်း၊ ဒေါ်အောင်ဆန်း စုကြည် တို့နဲ့ တွေ့ဆုံ ခဲ့ပါတယ်။

BBC Burmese

အပြည့်အစုံသို့ »

နေအိမ်ကနေ မဖယ်ရရေး အစိုးရဆီ စာတင်


ရန်ကုန်တိုင်း ယုဇနဥယျာဉ်မြို့တော်အနီးက နေထိုင်ကြသူတွေက သူတို့ လက်ရှိနေအိမ် တွေကနေ  မဖယ်ရရေး ရန်ကုန်တိုင်းဒေသကြီးအစိုးရဆီ သွားရောက်စာတင်ခဲ့ပါတယ်။

ရန်ကုန်တိုင်းဒေသကြီး ဒဂုံမြို့သစ် ဆိပ်ကမ်းမြို့နယ် ယုဇနဥယျာဉ်မြို့တော်အနီးက ၉၃ တိုးချဲ့ရပ်ကွက်မှာ ရှိတဲ့ အိမ်ခြေ ၁၄၀၀ ကျော်ကို လာမယ့် ဖေဖော်ဝါရီ ၁၂ ရက်နေ့ နောက်ဆုံးထားပြီး ဖျက်ပေးဖို့ ဒဂုံမြို့သစ် ဆိပ်ကမ်းမြို့နယ် အုပ်ချုပ်ရေးမှူးက ဖေဖော်ဝါရီ ၇ ရက်နေ့က စာပေးပို့ ထားခဲ့ပါတယ်။

ဒီကိစ္စနဲ့ ပတ်သက်ပြီး ၉၃ တိုးချဲရပ်ကွက်မှာ နေထိုင်သူတွေက  ဒီမြေကနေ မပြောင်းရရေး အပါအ၀င် အချက် ၃ ချက်ကို တိုင်းဒေသကြီး ၀န်ကြီးအဖွဲ့ဆီကို ဒီကနေ့ သွားရောက်တင်ပြခဲ့ တယ်လို့ ဒေသခံ ဦးသိန်းအောင်က ပြောပါတယ်။

“ကျနော်တို့ အဓိက တောင်းဆိုထားတာကတော့ ဒီမြေကြီးသည် အစိုးရပိုင် ပလပ် မြေကြီး ဖြစ်တဲ့အတွက် အစိုးရရဲ့ သတ်မှတ်သောငွေကြွေးများဖြင့် ပေးသွင်းပြီး ၀ယ်လိုတယ်၊ ကာလတခုဟာ ဖေဖော်ဝါရီ ၁၂ ရက်ဆိုတာ ဘယ်လိုမှ မဖြစ်သင့်ဘူး။ ပညာသင်နေတဲ့ မူလတန်း၊ အလယ်တန်းနဲ့ အထက်တန်းပညာရေးမှာ သင်ကြားနေတဲ့ သားနဲ့သမီးငယ်တွေရဲ့ စာမေးပွဲ ကာလလည်း ဖြစ်တဲ့အတွက် အထက်တန်းစာမေးပွဲပြီးဆုံးတဲ့ကာလအထိ အပြန်အလှန်ညှိနှိုင်း၊ နောက်တခုကတော့ တကယ်လို့ ဒီမြေကြီးသည် ပလပ်မြေကြီး အမျိုးအစားဖြစ်သော်လည်း ကြီးမားသော အကျိုးအမြတ်ရှိနိုင်တဲ့ စီမံကိန်းတွေရှိမယ်ဆိုခဲ့ရင် ကျနော်တို့ နေရမယ့် မြေနေရာ ကျနော်တို့ ပြန်လည်တောင်းဆိုပါတယ်။ ပြောင်းရွှေ့ရမယ့် နစ်နာမှုကို ကျနော်တို့ ပြန်လည်တောင်းဆိုပါတယ်။ ”

သွားရောက်တင်ပြတဲ့အခါမှာ မနက်ဖြန်မှာ ပြန်လည်ချိန်းဆိုပြီး ဒီကိစ္စပေါ် မစိုးရိမ်ဖို့ လည်း ပြောဆိုခဲ့တယ်လို့ ဦးသိန်းအောင်က ပြောပါတယ်။

၁၉၉၄ ခုနှစ်က သင်္ဃန်ကျွန်းမြို့နယ် ဘူတာရုံအနီးမှာ နေထိုင်ကြတဲ့ မိသားစုတွေကို အစိုးရက ရွှေ့ပြောင်းတဲ့အခါမှာ ယုဇနမြို့တော်အနီး ၉၃ ရပ်ကွက်မှာ နေထိုင်ခွင့်ပြုခဲ့တာ ဖြစ်ပါတယ်။

လက်ရှိနေတဲ့ မြေနေရာတွေဟာ ပြီးခဲ့တဲ့ ၂၀၁၁ ခုနှစ် မတိုင်ခင်က ခြုံထူထပ်တဲ့ မြေနေရာ တွေဖြစ်ပြီး ဒေသခံတွေက ခုတ်ထွင်ရှင်းလင်းပြီး နေထိုင်လာခဲ့တာလို့  ဦးသိန်းအောင်က ပြောပါ တယ်။

“ဒီလိုနေထိုင်ခွင့်ပြုတဲ့နေရာမှာ သင်္ဃန်းကျွန်းမြို့နယ် ဘူတာရုံအနီးက မိသားစုတွေရော ရန်ကုန် ၁ ရပ်ကွက်က မိသားစုတွေရော အခုလို ပြောင်းရွှေ့နေထိုင်တဲ့အခါမှာ ဒီမြေလေးက ပိုလျံမြေကြီးပေါ့၊ ၉၄ ခုကနေ အခုချိန်ထိဆိုတော့ တောကြီး ဖြစ်တာပေါ့။ တောကြီးဖြစ်ရာ ကနေ ၂၀၁၁ မှာတော့ အရပ်သားအစိုးရလည်း ပေါ်ပေါက်လာပြီဖြစ်လို့ ဒါဟာ နိုင်ငံတော်ရဲ့ ပလပ် မြေဆိုတာလည်း ဒေသခံပြည်သူတွေက သိထားတော့ နေစရာ အခက်အခဲရှိကြတဲ့ ပုဂ္ဂိုလ်တွေ တန်ဖိုကြီးကြီး ၀ယ်မယူနိုင်တဲ့ မိသားစုတွေက ခုတ်ထွင်ရှင်းလင်းပြီးတော့ နေထိုင်ခဲ့ကြတာ။ ၂၀၁၁ ခု နေထိုင်ချိန်ကာလကနေပြီ အခုစာထွက်တဲ့အထိလည်း ဘယ်ဌာနဆိုင်ရာကမှ တားဆီးဟန့်တား နှောင့်ယှက်ခြင်း ပယ်ဖျက်ခိုင်းချင်း မရှိခဲ့ဘူး။ အဲဒီအတွက် ကျနော်တို့က နိုင်ငံတော်ရဲ့ မြေပေါ်မှာ ဘယ်လိုဖြစ်ဖြစ် တချိန်တခါမှာတော့ တရားဝင်နေထိုင်ခွင့်ရလိမ့်မယ်လို့ မျှော်လင့်ချက်နဲ့ နေခဲ့ကြတာဖြစ်ပါတယ်။”

၉၃ တိုးချဲရပ်ကွက်နည်းတူ ဒဂုံမြို့သစ် ဆိပ်ကမ်းမြို့နယ် ၆၀၊ ၆၁ နဲ့ ၆၇ ရပ်ကွက်မှာ နေ ထိုင်သူတွေကိုလည်း ဖေဖော်ဝါရီ ၁၂ နေ့ နောက်ဆုံးထား ဖယ်ရှားခိုင်းထားပြီး အဲဒီရပ်ကွက် ၄ ခုမှာ လူဦးရေ ၈ သောင်းလောက် နေထိုင်ကြတယ်လို့  ပြောပါတယ်။

By နော်နိုရင်း (ဒီဗွီဘီ)

အပြည့်အစုံသို့ »

သန်လျင်ရှိ ကွမ်းခြံကုန်း ကျေးရွာကို နှစ်ပတ်အတွင်း ဖျက်သိမ်းရန် အမိန့်ထုတ်


ရန်ကုန်၊ ဖေဖော်ဝါရီ ၁၀

ရန်ကုန်တောင်ပိုင်းခရိုင် သန်လျင်မြို့နယ်၊ ဘုရားကုန်းကျေးရွာ အုပ်စုရှိ ကွမ်းခြံကုန်း ကျေးရွာကို ဖျက်သိမ်းပေးရန်နှင့် ယင်းကျေးရွာရှိ နေအိမ် ၁၄၀၀ ကျော်ကို နှစ်ပတ်အတွင်း ပြောင်းရွှေ့ပေးရန် လယ်ယာစိုက်ပျိုးရေးနှင့် ဆည်မြောင်း ဦးစီးဌာနက ဖေဖော်ဝါရီလ ၃ ရက်နေ့တွင် အမိန့် ကြော်ငြာစာ ထုတ်ပြန်ထားကြောင်း အဆိုပါ ကျေးရွာတွင် နေထိုင်သူများထံမှ စုံစမ်း သိရှိရသည်။

အဆိုပါ အမိန့်ကြော်ငြာစာတွင် ဖေဖော်ဝါရီလ ၃ ရက်နေ့မှ စတင်ကာ ဖေဖော်ဝါရီလ ၁၅ ရက်နေ့ထိ နှစ်ပတ်အတွင်း ကျေးရွာတစ်ရွာလုံး ပြောင်းရွှေ့ပေးရန် ညွှန်ကြားထားကြောင်း ကွမ်းခြံကုန်း ကျေးရွာတွင် နေထိုင်သူ အချို့က ဆိုသည်။

အဆိုပါ ကျေးရွာတွင် ၁၉၉၄ ခုနှစ်က ဇာမနီဆည် စီမံကိန်း ဆောင်ရွက်မည်ဟု ဆိုကာ မြေကွက်များ အစားထိုး ပြန်ပေးကာ ယင်းကျေးရွာကို ဖယ်ရှားခဲ့ပြီး ဖြစ်ခြင်းကြောင့် ယခုကဲ့သို့ ပြောင်းရွှေ့ရန် အမိန့် ထုတ်ပြန်ခြင်း ဖြစ်ကြောင်း ဒေသခံများ၏ အဆိုအရ သိရသည်။

အဆိုပါ ကျေးရွာတွင် လူဦးရေ လေးထောင်နီးပါး နေထိုင်ကြောင်း ၎င်းတို့က ဆိုသည်။

“ဒီရွာမှာ နေလာတာ ၁၉၆၄ ခုနှစ်ကတည်းကပဲ။ အခုထိတော့ ဘယ်သူမှ မဖျက်ကြဘူး။ တခြား သွားနေစရာလည်း ဘယ်မှ မရှိဘူး။ နေအိမ်တွေကို ဖျက်ဖို့ သူတို့ လူအင်အား စုနေတယ်လို့တော့ ကြားတယ်” ဟု ကွမ်းခြံကုန်း ကျေးရွာတွင် နေထိုင်သူ ဒေါ်သန်းစိန်က ပြောကြားသည်။

နေအိမ်များ ဖျက်သိမ်းပေးရန် အကြောင်းကြားစာတွင် အဆိုပါ ကျေးရွာ မြေများသည် လယ်ယာစိုက်ပျိုးရေးနှင့် ဆည်မြောင်း ဦးစီးဌာနပိုင် မြေဖြစ်ကြောင်း ဖော်ပြထားပြီး မဖယ်ရှားပါက တည်ဆဲ တာတမံ အက်ဥပဒေ ပုဒ်မ ၉ နှင့် ၉ (က) များဖြင့် အရေးယူမည်ဟု ကြေညာထားကြောင်း ဒေသခံများက ပြောဆိုသည်။

အဆိုပါ ကိစ္စနှင့် ပတ်သက်၍ သန်လျင်မြို့နယ် အထွေထွေ အုပ်ချုပ်ရေးမှူး ရုံးသို့ ဆက်သွယ် မေးမြန်းရာ အုပ်ချုပ်ရေးမှူးမှာ အစည်းအဝေး တက်ရောက်နေကြောင်း၊ ၎င်းတို့အနေနှင့် ယင်းကိစ္စကို မသိရှိရကြောင်း တာဝန်ရှိသူတစ်ဦးက ပြန်လည် ဖြေဆိုသည်။

အဆိုပါ ကိစ္စနှင့် ပတ်သက်၍ လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာနသို့ ဆက်သွယ် မေးမြန်းရန် ကြိုးစားသော်လည်း ဖြေကြားမည့်သူ မရှိပေ။

၁၉၉၄ ခုနှစ် တပ်မတော်အစိုးရ လက်ထက်က အဆိုပါ ကျေးရွာ မြေနေရာတွင် ဇာမနီဆည် စီမံကိန်း ဆောင်ရွက်မည်ဟုဆိုကာ ယင်းကျေးရွာကို ဖယ်ရှားခိုင်းခဲ့ပြီး တစ်အိမ်ထောင်လျှင် ပေ ၄၀၊ ပေ ၆၀ မြေကွက်များ ပြန်လည် အစားချပေးခဲ့သော်လည်း မြေကွက် အစားထိုး ပြန်လည် မရရှိခဲ့သည့် မိသားစု ၄၀ ဝန်းကျင်မှာ အဆိုပါ မြေနေရာများတွင် ဆက်လက် နေထိုင်ခဲ့ကြကြောင်း၊ ဆည်စီမံကိန်းမှာလည်း မအောင်မြင် ဖြစ်ခဲ့သဖြင့် နေအိမ်များ ပြန်လည် တိုးပွားလာခဲ့ရာမှ ယခု လက်ရှိ ၁၄၀၀ ကျော် ရှိကြောင်း ဒေသခံများထံမှ စုံစမ်း သိရှိရသည်။

The Voice Weekly

အပြည့်အစုံသို့ »

မတ်လ ၂၉ ရက်နေ့ သန်းခေါင်စာရင်း စကောက်မယ်

ပြည်လုံးကျွတ် သန်းခေါင်စာရင်း ကောက်ခံတော့မယ်

မြန်မာနိုင်ငံမှာ နှစ်ပေါင်း ၃၀ ကျော်အတွင်း ပထမဆုံးအကြိမ် ကောက်ခံမယ့် ပြည်လုံးကျွတ် သန်းခေါင်စာရင်း ကောက်ယူဖို့ ရက်ပေါင်း ၄၀ကျော် ဘဲ ကျန်ပါတော့တယ်။

တစ်နိုင်ငံလုံးအနှံ့ အကွတ်ပေါင်း တစ်သိန်းကျော် သတ်မှတ်ပြီး လာမဲ့ မတ်လ ၂၉ရက် နေ့ ညသန်းခေါင်ယံ အချိန် က စပြီး ၁၂ ရက် ကြာ ကောက်ခံမှာ ဖြစ်ပါတယ်။

ဒီကောက်ခံမှုကို အစိုးရအနေနဲ့ သတ်မှတ်ထားတဲ့ စနစ်တွေ အတိုင်း ကောက်ခံ သွားမယ်လို့ အစိုးရဖက်က ရန်ကုန်မှာ သတင်းစာ ရှင်းလင်းပွဲ ပြုလုပ်ကာ ကြေညာခဲ့ပါတယ်။

မြန်မာနိုင်ငံ အနှံ့ တိုင်းနဲ ပြည်နယ် ၁၅ ခု မြို့ နယ် ပေါင်း ၃၃၀ နဲ ကျေးရွာပေါင်း ၆ သောင်း ကျော်မှာ လာမယ့် မတ်လ၂၉ ရက် နေ့ ည သန်းခေါင်ယံအချိန်မှာ စတင် ကောက်ခံမှာ ဖြစ်ပါတယ်။

လူဝင်မှု ကြီးကြပ်ရေး နဲ ပြည်သူ့ အင်အား ဝန်ကြီးဌာနက ပြည်ထောင်စု ဝန်ကြီး ဦးခင်ရီ က ဒီသန်းခေါင်စာရင်းကို ဘယ်လိုကောက်ခံမယ် ဒီကောက်ခံမှုဟာ တိုင်းပြည် အတွက် အရေးပါတယ် အခု သန်ခေါင်း စာရင်း ကောက်ယူတဲ့ ပုံစံဟာ တကမ္ဘာလုံးမှာ သုံးတဲ နည်းပညာသာ ဖြစ်ပြီး စံချိန်စံညွန်း တွေနဲ့ ညီတယ် ဆိုတာကို သတင်းစာ ရှင်းလင်းပွဲမှာ ပြောသွားခဲ့ပါတယ်။

တိုင်းရင်းသားတွေဖက် ကတော့ ဒီ သန်းခေါင်စာရင်း ကောက်ယူမှုနဲ့ ပတ်သတ်လို့ ကန့်ကွက်တာတွေ ရှိနေသလို သီးခြား code နံပါတ် ပေးဖို့ တောင်းဆိုတာတွေအပေါ် အစိုးရဖက်က ညိနှိုင်းဖို့ရှိတယ်လို့ ပြောပေမဲ့ ဒီလို ယူ ဆတာ တွေဟာ လွဲမှား နေတယ်လို့ ဝန်ကြီး ဦး ခင်ရီ က ပြောပါတယ်။

အစိုးရဘက် ကတော့ ဒီလို ကောက်ခံမှုတွေနဲ့ ပတ်သတ်လို့ တိုင်းရင်းသားတွေ ဘက်က နားလည်အောင် ရှင်းပြဖို့ရှိတယ်လို့ ဝန်ကြီး ဦးခင်ရီက ပြောသွားခဲ့ပါတယ်။

ဒီ သန်းခေါင်စာရင်း ကောက်ယူမှု အတွက်လည်း အစိုးရက နိုင်ငံ အနှံ့မှာ ကောက်ယူမယ့် သင်တန်းသား တစ်သိန်းကျော်ကို သင်တန်းတွေ ပေးဖို့ ပြင်နေပြီ ဖြစ်ကြောင်း သိရပါတယ်။

ဒါ့အပြင် အစိုးရဘက်က ဒီနေ့ ရှင်းတာကို ကြည့်ရင် တိုင်းရင်းသားတွေ ဖက်က တောင်းဆိုတဲ့ ရက်ရွှေ့ဆိုင်းဖို့နဲ ပြင်ဆင်ဖို့တွေ မရှိဘဲ မူလအစီစဉ်အတိုင်း သန်းခေါင်စာရင်း ကောက်ယူ သွားဖို့ ရှိတာ ပေါ်လွင်နေတယ်လို့ သတင်းထောက်တွေက ပြောပါတယ်။

ဘီဘီစီ (မြန်မာပိုင်း)

အပြည့်အစုံသို့ »

အွန်လိုင်းမြားနတ်မောင်ဆိုဒ် ကမ္ဘာ့ပထမဆုံး တည်ထောင်သူ (ကိုယ်တိုင်ကတော့ အသဲကွဲကျန်ခဲ့)


ပုံမှာ မြင်တွေ့နေရတဲ့ ပုဂ္ဂိုလ်ဖြစ်ပြီး Gary Kremen လို့အမည်ရ ပါတယ်။ ၁၉၆၃ ခုနှစ်က မွေးဖွားတဲ့ အမေရိကန်နိုင်ငံသား ဖြစ်ပြီး လျှပ်စစ် အင်ဂျင် နီယာ ဘွဲ့၊ ကွန်ပြူတာ ဘွဲ့ နဲ့ MBA ဘွဲ့တို့ ရရှိထားသူ ဖြစ်ပါတယ်။ သူ့ကို စွန့်ဦး တီထွင်သူ အဖြစ် အားလုံး သတ်မှတ်ထားကြ ပါတယ်။ အကြောင်း ကတော့ သူဟာ ကမ္ဘာ့ ပထမဆုံး ဝဘ်ဆိုဒ် အမျိုးအစားတွေ တည်ထောင်ခဲ့ လို့ ဖြစ်ပါတယ်။

Jobs.com, Housing.com, sex.com နဲ့ match.com တို့လို ဒိုမိန်းကို ကမ္ဘာ့ပထမဆုံး ဝယ်ယူသူ ဖြစ်ခဲ့ပြီး အအောင်မြင်ဆုံးကတော့ match.com ဖြစ် ပါတယ်။ အွန်လိုင်း Dating ဝဘ်ဆိုဒ် တစ်ခု ဖြစ်ပြီး ၁၉၉၃ ခုနှစ်မှာ စတင် တည်ထောင်ခဲ့ခြင်း ဖြစ်ပါတယ်။ ယနေ့မှာတော့ နိုင်ငံပေါင်း ၂၅ နိုင်ငံ၊ တိုက်ကြီး ၅ တိုက်မှာ ဘာသာစကား ၈ မျိုးထက် မက နဲ့ လွင့်တင် ထားတဲ့ ဝဘ်ဆိုဒ် ဖြစပါတယ်။ ဝမ်းနည်းစရာ ဇာတ်လမ်းလေး တစ်ပုဒ်လည်း ဖြစ်ခဲ့ ပါတယ်။

သူဟာ Dating site ကို စတင် တည်ထောင်ပြီး သူ့ချစ်သူ မိန်းခလေး ကိုလည်း ဝဘ်ဆိုဒ် အသုံးပြုစေ ပါတယ်။ နောက်တော့ သူ့ချစ်သူ မိန်းကလေး လည်း Match.com ကနေ လူတစ်ဦးနဲ့ တွေ့ဆုံပြီး အပြင်မှာ တကယ် ချစ်ကြိုက်သွားပါတယ်။ Gary Kremen  ကတော့ အသဲကွဲ ကျန်ရစ် ခဲ့ကြောင်း သိရ ပါတယ်။
.
Ref: wiki
အောင်ခမ်း
International news for Myanmar

အပြည့်အစုံသို့ »

အာဏာရှင်များနှင့် မြန်မာ့တပ်မတော် အပိုင်း ၆ – မကျေနပ်မှုများ ကြီးထွားလာခြင်း


ဦးနေဝင်း အသက် ၉၀ ပြည့် မွေးနေ့ပွဲကို ရန်ကုန်ရှိ ဆီဒိုးနားဟိုတယ်တွင် ကျင်းပခဲ့စဉ် မိသားစုဝင်များနှင့်အတူ မြင်ရစဉ် (ဓာတ်ပုံ – ရွှေအင်းသား ခင်မောင်ဝင်း)

ကောလာဟလ တခုကတော့ လူငယ်အရာရှိတွေကို ရာထူးတိုးပေးတော့မယ်ဆိုရင် သူတို့ထဲက ဘယ်သူ့ကို ရာထူးပေးသင့်တယ် ထင်သလဲလို့ သူတို့ရဲ့ နက္ခတ်နဲ့ ဇာတာကို စစ်ဆေးတဲ့နေရာမှာ ဦးနေဝင်းကို ဦးစိန်လွင်က ကူညီပေးရတယ်လို့ဆိုတယ်။

ဗိုလ်မှူးချုပ်သန်းရွှေရဲ့ ဇာတာကို ဦးစိန်လွင် ကိုယ်တိုင် စစ်ဆေးခဲ့ရဲ့လားဆိုတာတော့ ဘယ်သူမှမသိပါဘူး။ ဗေဒင်ဆရာအချို့ရဲ့ အဆိုအရတော့ သူက ဘယ်သူ့ကိုခန့်ရမယ်၊ ဘယ်သူ့ကို ပယ်ရမယ်ဆိုတာကို အစိုးရ လက်စွဲ ဗေဒင်ဆရာ ရန်ကင်းဦးတင်အောင်နဲ့ တိုင်ပင်လေ့ရှိတယ်။ အာဏာရှင် အလောင်းအလျာ ဗိုလ်မှူးချုပ် သန်းရွှေကိစ္စမှာတော့ စစ်အစိုးရ ဗေဒင်ဆရာတွေရဲ့ ဟာကွက်ကနေတဆင့် ဖြစ်သွားပုံရတယ်။

တကယ်တမ်းတော့ ၁၉၈၆ ခုနှစ်အတွင်းမှာ မြန်မာပြည်သူ အများစုက ဗိုလ်ချုပ်သန်းရွှေနဲ့ သူ့ရဲ့ မိသားစု အကြောင်းကို ကောင်းကောင်း မသိကြဘူး။ မြန်မာနိုင်ငံက တက္ကသိုလ် နယ်မြေတွေကတော့ အစိုးရကို အာခံမယ့်သူတွေကို မွေးထုတ်ပေးတဲ့နေရာ ဖြစ်တယ်။ အဲဒီအချိန်က တော်လှန်ရေး (၈၈ အရေး အခင်း) ပေါ်ပေါက်လာဖို့ကလည်း ၂ နှစ်လောက် လိုနေသေးတဲ့ အချိန်ပါ။ ဗိုလ်ချုပ်သန်းရွှေရဲ့ သမီးဖြစ်သူ ကြည်ကြည် ရွှေလည်း အာရ်စီတူးလို့ခေါ်တဲ့ ရန်ကုန်တက္ကသိုလ် (လှိုင်နယ်မြေ) မှာ ကျောင်းတက်နေတုန်းပဲ ရှိသေးတယ်။ နေစဉ်နေ့တိုင်း အဲဒီခေတ်က အဆင့်မြင့် အစိုးရအရာရှိတွေအတွက် အစိုးရက ထုတ်ပေးတဲ့ မာဇဒါ ၃၂၃ ကားလေးနဲ့ ကျောင်းကိုလာတတ်တာကိုလည်း ဘယ်သူမှ သိပ်သတိမထားမိကြဘူး။

ကြိုင်ကြိုင်ရွှေလိုပဲ အစိုးရ အရာရှိကြီးတွေရဲ့ သားသမီးတွေဟာ ကားကို ကိုယ်တိုင်မောင်းလို့ ဖြစ်စေ၊ ဒရိုင်ဘာနဲ့ ဖြစ်စေ ကျောင်းကို လာကြတယ်။ ကျောင်းမှာ သူတို့နဲ့ ပေါင်းတဲ့သူတွေကို ဘယ်လို သတိထား ရမယ်၊ ဘယ်လို နေထိုင်ပြုမူရမယ်ဆိုတာ သူတို့ကို မိဘတွေက သင်ကြားပေးထားကြတယ်။ ဒါပေမယ့် အများစု ကတော့ သူငယ်ချင်းတွေနဲ့ ခင်ခင်မင်မင် ရင်းရင်းနှီးနှီးရှိပြီးတော့ စားသောက် ဆိုင်တန်းတွေဘက်ကို မှန်မှန်လာ တတ်ကြတယ်။

သူတို့ ဒီလိုနေပေမယ့် တက်ကြွလှုပ်ရှားတဲ့ ကျောင်းသားတွေကတော့ သူတို့နဲ့ နိုင်ငံရေး မဆွေးနွေးဘူး။ သူတို့ရှေ့မှာ လွယ်အိတ်ကိုတောင် မဖွင့်ဘူး။ ၁၉၈၆ နဲ့ ၁၉၈၇ ခုနှစ်တွေတုန်းက လွယ်အိတ်တွေထဲမှာ အစိုးရဆန့်ကျင်ရေး လက်ကမ်းစာစောင်တွေလိုမျိုး ပစ္စည်းတွေ ရှိနေတတ်လို့ပါ။ မုန်တိုင်း ရောက်မလာခင် ငြိမ်သက်နေတဲ့ အခြေအနေမျိုးမှာ ကြည်ကြည်ရွှေနဲ့ သူ့ရဲ့ ကျောင်းနေဖက်တွေဟာ ဘယ်သူက ရန်သူဖြစ်ပြီး ဘယ်သူက မိတ်ဆွေဖြစ်တယ်ဆိုတာကို ၁၉၈၈ ခုနှစ်ရောက်တဲ့အထိ မသိခဲ့ကြဘူး။

အဲဒီတုန်းက ကြည်ကြည်ရွှေက အိမ်ကိုအလည်လာဖို့ ဖိတ်ခေါ်တဲ့အတွက် ရောက်သွားတဲ့ သူငယ်ချင်းတွေက မြက်ခင်းပေါ်မှာ လမ်းလျှောက်နေတဲ့ ဗိုလ်ချုပ်သန်းရွှေနဲ့ မီးဖိုချောင်ကို စီမံခန့်ခွဲနေတဲ့ ဒေါ်ကြိုင်ကြိုင်ကို မြင်ခဲ့ ရတဲ့ အကြောင်းပြန်ပြောပြကြတယ်။ သူတို့ မိသားစုရဲ့ နေထိုင်မှုဟာ အလွန်ပျင်းရိ ငြီးငွေ့ဖို့ကောင်းပြီး သူတို့ အိမ်ရဲ့အပြင်ဘက်မှာ ဘာတွေဖြစ်နေသလဲ ဆိုတာကိုတောင် မသိကြတဲ့အထိ ရိုးစင်းလွန်းတယ်လို့လည်း ဆိုပါတယ်။

“သူတို့ အချစ်ဝတ္ထုတွေ ဖတ်တယ်။ ကြည့်ရတာ အချိန်တွေ ပိုနေကြသလိုပဲ။ ဘာမှမလုပ်ကြဘဲ ပျင်းစရာ ကောင်းတယ်လို့ ပြောတယ်။ သူတို့ပတ်ဝန်းကျင်က ဘဝတွေ ဘယ်လိုဆိုတာကိုလည်း မသိကြဘူး။ သူတို့ ကံကောင်းတယ်၊ အတိတ်ဘဝက ကောင်းမှုကုသိုလ်တွေလုပ်ခဲ့လို့ သူတို့ ဒီဘဝရတယ်၊ ဆင်းရဲတဲ့ သူတွေက တော့ အတိတ်ဘဝတုန်းက မကောင်းမှု အကုသိုလ်တွေ လုပ်ခဲ့ကြလို့ ကံမကောင်းကြဘူးလို့ သူတို့က ယူဆကြ တယ်” လို့ ဗိုလ်ချုပ်သန်းရွှေရဲ့ အိမ်ကို ရောက်ခဲ့ဖူးတဲ့ ကျောင်းသူတယောက်က ပြန်ပြောပြတယ်။

မြန်မာနိုင်ငံမှာ ကံမကောင်းတဲ့ ပြည်သူတွေ အမြောက်အမြားရှိနေတယ်။ စီးပွားရေးအခြေအနေက ဆိုးဝါးပြီး တိုင်းပြည်ကလည်း အိမ်နီးချင်းနိုင်ငံတွေ ထက်ခေတ်နောက်ကျ ကျန်နေတယ်။ သူ့ရဲ့မအောင်မြင်တဲ့ စီးပွားရေး မူဝါဒနဲ့ ပတ်သက်ပြီး “ကျားမြီး ဆွဲထားရသလိုပဲ” လို့ ဦးနေဝင်း တခါတုန်းကပြောဖူးတယ်။ ဆိုလိုချင်တာက တော့ မြန်မာ့ဆိုရှယ်လမ်းစဉ် ကို ပြဋ္ဌာန်းသတ်မှတ်ပြီးသားဖြစ်လို့ သူဘာမှ မလုပ်နိုင်တော့ဘူး။ မအောင်မြင် ပေမယ့်လည်းဆက်သွားရ မယ့်သဘောပါ။ ဦးနေဝင်း ဒီလိုဆက်လုပ်ခဲ့လို့လည်း မြန်မာနိုင်ငံက ကမ္ဘာ့အဆင်းရဲ ဆုံးနိုင်ငံ ဖြစ်လာပါ တော့တယ်။

ဦးနေဝင်းရဲ့ ဘက်မလိုက် နိုင်ငံခြားရေးဝါဒကြောင့် မြန်မာနိုင်ငံဟာ မိတ်ဆွေများများစားစားမရှိခဲ့ဘူး။ သူ့ရဲ့ စစ်အစိုးရနဲ့ နီးစပ်တဲ့ မဟာမိတ်နိုင်ငံ အချို့ကတော့ အကြံကောင်းတွေပေးခဲ့ပေမယ့်လည်း ပြန်မပြော နားမ ထောင် အဖြစ်မျိုးနဲ့သာ တိုးခဲ့ကြရတယ်။ စင်ကာပူရဲ့ဝါရင့်ခေါင်းဆောင်ကြီး လီကွမ်ယုက စီးပွားရေး ပြုပြင် ပြောင်းလဲရေးအတွက် မျိုးဆက် သစ် အရာရှိတွေ မွေးထုတ်ဖို့ တိုက်တွန်းခဲ့ပေမယ့် ဘာမှဖြစ်မလာခဲ့ဘူး။

ဒါ့အပြင် မြန်မာနိုင်ငံမှာ ခရီးသွားလုပ်ငန်းကို တံခါးဖွင့်ဖို့ ဝန်ကြီးချုပ် ဦးမောင်မောင်ခကို သူက အကြံပေးခဲ့ တယ်။ အမှန်တကယ် လုပ်ပိုင်ခွင့် မရှိရှာတဲ့ ဦးမောင်မောင်ခက ဦးနေဝင်းကို ပြန်လည်တင်ပြ လိုက်ပါမယ်လို့ လီကွမ်ယုကို ယဉ်ယဉ်ကျေးကျေးပြန် ဖြေခဲ့ပေမယ့် သူဒီအကြောင်းကိုတင်ပြဖို့ သတ္တိရှိပါ့ မလားဆိုတာက သံသယရှိစရာပါ။

၁၉၈၇ ခုနှစ် ဩဂုတ်လ၊ တိတိကျကျပြောရရင် ၁၉၈၈ အရေးတော်ပုံကြီး ပေါ်ပေါက်မလာခင် တနှစ် အလိုမှာ ပြည်သူကို ထုတ်လွှင့်ခဲ့တဲ့ မိန့်ခွန်းတခုမှာ မြန်မာနိုင်ငံမှာ အဆင်မပြေဖြစ်နေတာ အားလုံးဟာ သူ့ရဲ့ အုပ်ချုပ် ရေးက အမှားအယွင်းတွေ လုပ်မိခဲ့တာကြောင့်လို့ ဦးနေဝင်းက ပြောတယ်။ သူ့ရဲ့အမှား တွေကို ရဲရဲဝံ့ဝံ့ ဝန်ခံခဲ့ပေမယ့် ပြန်လည်ပြင်ဆင်ဖို့ အတွက်တော့ အချိန်က အရမ်းနှောင်းသွားခဲ့ပါပြီ။ အာဏာရှင်ဟာ အင်အား ကောင်းပြီး ရက်စက်တဲ့ လက်နက်ကိုင် စစ်တပ်တခုနဲ့ ကျွမ်းကျင်တဲ့ လျှို့ဝှက်ရဲအဖွဲ့တခုကို တည်ထောင်ခဲ့ပြီး ဖြစ်တယ်။ သူတို့တွေဟာ အာဏာကို စွန့်လွှတ်ဖို့ ဘယ်တော့မှ စိတ်မကူးတဲ့ အာဏာရှင်တွေရဲ့ လက်ကိုင် တုတ်သဖွယ်ဖြစ်လာ ပါတော့တယ်။

တကယ်လို့သာ ဦးနေဝင်းက ၁၉၈၀ ပြည့်နှစ် အစောပိုင်းတွေလောက်ကတည်းက သူ့ရဲ့ အမှားတွေကို ထုတ်ဖော်ဝန်ခံပြီး ပြုပြင်ပြောင်းလဲရေးကို အားစိုက်ခွန်စိုက်လုပ်ခဲ့မယ်၊ တိုင်းပြည်ကို တံခါးဖွင့်ခဲ့မယ်ဆိုရင် မြန်မာနိုင်ငံရဲ့ သမိုင်းဟာ အများကြီး ကွဲပြားခြားနားသွားခဲ့မှာဖြစ်တယ်။ ၁၉၈၈ အရေး အခင်းလိုမျိုးတွေလည်း မလိုအပ်တော့တဲ့အတွက် ပေါ်ပေါက်လာမှာမဟုတ်သလို သစ္စာရှိပြီး ရိုးသားတဲ့ ဗိုလ်ချုပ်မှူးကြီးစောမောင်လို စစ်သားကြီးဟာ လည်း အသက်ပြည့်တဲ့အထိ တာဝန်ကို ထမ်းဆောင်ရပြီးတော့မှ ရာထူးက အနားယူသွားတာ မျိုးတွေ ဖြစ်လာမှာပါ။

ဗိုလ်ချုပ်မှူးကြီး သန်းရွှေဟာလည်း သူ့ရှေ့က ဗိုလ်ချုပ်မှူးကြီး စောမောင်ရဲ့ လမ်းစဉ်နောက်ကိုလိုက်ပြီး ပြည်သူ့မြင်ကွင်းကနေ မသိမသာ ပျောက်ကွယ်သွားမှာ ဖြစ်ပါတယ်။ ဗိုလ်ချုပ်ကြီး ခင်ညွန့်လည်း သူ့ရဲ့ စစ်မှုထမ်းဘဝကို ထောက်လှမ်းရေး ညွှန်ကြားရေးမှူးဘဝနဲ့ပဲ အဆုံးသတ်သွားပြီးတော့ နိုင်ငံတခုခုမှာ သံအမတ်ကြီးဘဝနဲ့ မြင်ရတာမျိုးတွေတောင်ဖြစ်လာနိုင်တယ်။

ဒါပေမယ့် ဖြစ်လာတာတွေက အဲဒီလို မဟုတ်ဘူး။ ၁၉၈၈ ခုနှစ် မတ်လမှာ ဆန္ဒပြပွဲတွေ စတင်လာတဲ့အချိန်မှာ အစိုးရပိုင်းက အဆင့်မြင့်ပုဂ္ဂိုလ်တွေ နဲ့ စစ်ဗိုလ်ချုပ်တွေရဲ့ မိသားစုတွေဟာ ကိုယ့်အိမ်မှာပဲကိုယ်နေခဲ့ကြရ တယ်။ ကြည်ကြည်ရွှေလည်း ကျောင်းကို မသွားရတော့ဘူး။ ဒုဗိုလ်ချုပ်ကြီးသန်းရွှေရဲ့ မိသားစုဟာ စစ်တပ် အာဏာသိမ်းတဲ့အချိန်အထိ သော့ခတ်ထားတဲ့ တံခါးနောက်မှာ ရက်သတ္တပတ် အတော်များများနေထိုင်ခဲ့ရ တယ်လို့လည်း ကောလာ ဟလတွေ ကြားရတယ်။ ထွက်ပြေးစရာရှိရင် မြန်မြန်ဆန်ဆန်  ထွက်ပြေးနိုင်ဖို့ အတွက်  အင်းလျားကန်ထဲမှာ စပိဘုတ်တစီး အသင့်ထားရှိတယ်လို့လည်းဆိုကြပါတယ်။

ခံတပ်တခုလို ခိုင်ခိုင်ခံ့ခံ့ ဆောက်လုပ်ထားတဲ့ သူတို့အိမ်ဟာ လမ်းအဆုံးက တောင်ကုန်းလေးတခု ပေါ်မှာ ရှိတယ်။ စစ်ရေးသဘောအရ နေရာကောင်းမှာ ရှိနေတဲ့အတွက် အိမ်သူအိမ်သားတွေနဲ့ လုံခြုံရေးအစောင့် တွေက ဝင်လာတဲ့ဧည့်သည်တွေ၊ လူစိမ်းတွေကို သေသေချာချာ အပေါ်စီးကနေမြင်တွေ့နိုင်တယ်။

ဒုဗိုလ်ချုပ်ကြီးသန်းရွှေရဲ့ ရန်ကုန်တက္ကသိုလ်မှာ ကျောင်းတက်နေတဲ့ နောက်ထပ်သမီးတယောက်ကတော့ အရေးအခင်းကာလတုန်းက သူတို့အိမ်ကို ချဉ်းကပ်လာမယ့် ဘယ်ကျောင်းသားကိုမဆို စောင့်ကြပ်နေတဲ့ အရာရှိတွေနဲ့ စစ်သားတွေက သေနတ်နဲ့ပစ်ချဖို့ အသင့်ပြင်ထားတယ်လို့ပြောတယ်။ “ငါတို့ က တောင်ကုန်းထိပ် မှာဆိုတော့ ကျောင်းသားတွေ လာရင် ပစ်လို့ရတယ်”လို့ တုန်လှုပ်နေတဲ့သူငယ်ချင်းတွေကို သူကဘာခံစားချက် မှ မရှိတဲ့ပုံစံနဲ့ ပြောခဲ့တယ်။

၁၉၈၈ ခုနှစ် စက်တင်ဘာလမှာတော့ ဦးနေဝင်းက ဗိုလ်ချုပ်ကြီးစောမောင်၊ ဒု ဗိုလ်ချုပ်ကြီးသန်းရွှေ၊ ဗိုလ်မှူးကြီး ခင်ညွန့်နဲ့ ထိပ်တန်း စစ်အရာရှိကြီးတွေကို သူ့အိမ်လာဖို့ဆင့်ခေါ်ပြီး စစ်တပ်ကအာဏာသိမ်းယူဖို့ အမိန့်ပေး လိုက်တယ်။ သူတို့ကလည်း အမိန့်ကို လျင်လျင်မြန်မြန် ထိထိရောက်ရောက်နဲ့ ရက်ရက်စက်စက် အကောင် အထည်ဖော်ကြတယ်။

အာဏာသိမ်းယူလိုက်ပြီးတဲ့နောက် စစ်အစိုးရက တက္ကသိုလ်နဲ့ ကောလိပ်အမြောက်အမြားကို ရည်ရွယ်ချက် ရှိရှိနဲ့ နေရာရွှေ့ပြောင်းခဲ့တယ်။ မြေအောက် ကျောင်းသားနိုင်ငံရေးလှုပ်ရှားသူတွေ ပေါက်ဖွားရာလို့ယူဆတဲ့ ပုဂ္ဂလိကနဲ့ အစိုးရကျောင်းဆောင်တွေကိုလည်း ပိတ်သိမ်းပစ်လိုက်တယ်။ ဝေးလံတဲ့ဒေသတွေမှာ ကောလိပ် အမြောက်အမြား ဖွင့်လှစ်ပြီးတော့ ကျောင်းသားအရေးလှုပ်ရှားတဲ့ အဖွဲ့တွေမှာ လူအင်အား လျော့နည်းသွား စေဖို့ ရည်ရွယ်ပြီး အဝေးသင် ပညာရေးစနစ်ကိုလည်း အင်တိုက်အားတိုက် အကောင်အထည်ဖော်တယ်။

ကျောင်းတွေပြန်ဖွင့်လို့ ကြည်ကြည်ရွှေ ကျောင်းကိုပြန်ရောက်လာတဲ့အခါ သူရဲ့ ကျောင်းနေဖက်သူငယ်ချင်း တချို့ဟာ NLD ပါတီဝင်တွေ ဖြစ်နေကြပြီး သူနဲ့ ဝေးဝေးနေကြတယ်။ တချိန်တုန်းက သူငယ်ချင်း ဖြစ်ခဲ့ဖူးသူ တွေကြား မမြင်ရတဲ့ တံတိုင်းတခု ရုတ်ခြည်းပေါ်လာပြီး တိုင်းတာလို့လည်းမလွယ်ကူပါဘူး။ အိမ်မှာလည်း ကြည်ကြည်ရွှေရဲ့ မိဘတွေက မိသားစုဝင်တွေကို လုံခြုံရေးအတွက် အနေအထိုင် ဆင်ခြင်ကြဖို့ ဆုံးမပါတယ်။

လုံခြုံရေးကို အကြောင်းပြုပြီး ကျောင်းစာသင်ချိန်တွေ ပျက်ကွက်စပြုလာပေမယ့် ကြည်ကြည်ရွှေဟာ သူရဲ့ ညီအစ်မတွေနဲ့ ဗိုလ်ချုပ်ဈေးလို့သိကြတဲ့ စကော့ဈေးကိုတော့ ဈေးဝယ်ထွက်တုန်းပဲ။ အဲဒီအချိန်တုန်းက ဒုဗိုလ်ချုပ်ကြီး သန်းရွှေရဲ့ သမီးတွေဟာ နာမည်ဆိုးနဲ့ လူသိမများကြသေးဘူး။ ရွှေဆိုင်တွေထဲကို ဝင်သွားပြီး ဆိုင်ရှင်တွေကို သူတို့ရောင်းတဲ့ ပစ္စည်းတွေကို လက်ဆောင်အဖြစ်ပေးဖို့ တောင်းဆိုတာမျိုး မလုပ်ကြသေးဘူး။

အရေးအခင်းက ကြည်ကြည်ရွှေရဲ့ ကျောင်းသူဘဝကို ကန့်သတ်ခဲ့ပေမယ့် အိမ်ကဘဝကတော့ ငြီးငွေ့စရာ မဖြစ်ခဲ့ဘူး။ အိမ်ထောင်စုရဲ့အုပ်ထိန်းသူဖြစ်တဲ့ ဒေါ်ကြိုင်ကြိုင်က သူ့အတွက် ခင်ပွန်းသည်ဖြစ်ဖို့ အလား အလာရှိတဲ့ လူပျိုယောကျာ်းလေး ၅ ယောက်ကို အဆိုပြုတယ်။ အားလုံးက တပ်နဲ့ ဆက်သွယ်ပတ်သက်မှု ရှိတဲ့သူတွေပါ။ ၁၉၉၀ အစောပိုင်း နှစ်တွေအတွင်းမှာ ကြည်ကြည်ရွှေဟာ ဒေါက်တာ နေစိုးမောင်လို့ အမည်ရ တဲ့ ငယ်ရွယ်ချောမောတဲ့ ဆေးတပ်အရာရှိ တယောက်နဲ့ လက်ထပ်ခဲ့တယ်။ သူက ရန်ကုန်ဆေးတက္ကသိုလ်က နေ ဘွဲ့ရရှိခဲ့ပြီး ဩစတြေးလျနိုင်ငံ ကွင်းစ်လန်းမှာ ပညာသင်ကြားဖူးတယ်။ သူ့အဖေကတော့ ဦးနေဝင်း လက်အောက်မှာ  တာဝန်ထမ်းဆောင်ဖူးတဲ့  ဗိုလ်ချုပ်တင်စိန် (ငြိမ်း) ပါ။

ကြည်ကြည်ရွှေနဲ့ ဒေါက်တာနေစိုးမောင်တို့က နေရွှေသွေးအောင်လို့ အမည်ရတဲ့ သားတယောက် မွေးဖွား ခဲ့တယ်။ ဖိုးလပြည့်လို့သိကြတဲ့ သူတို့ရဲ့ သားဟာ ဗိုလ်ချုပ်ကြီးသန်းရွှေရဲ့ အချစ်ဆုံးမြေးဖြစ်တယ်။ ဒါပေမယ့် ဒေါက်တာနေစိုးမောင်နဲ့ မကြာခင် အာဏာရှင်ဖြစ်မယ့် သူရဲ့သမီးဖြစ်သူ ကြည်ကြည်ရွှေတို့ဟာ  လာရာ လမ်းကြောင်းတွေ မတူညီကြတဲ့အတွက် သူတို့ရဲ့ အိမ်ထောင်ရေးဟာ ကြာရှည်မမြဲခဲ့ဘူး။

သူတို့အိမ်ထောင်ရေး ပြိုကွဲခဲ့ပြီးတဲ့နောက်ပိုင်းမှာ ဒေါက်တာနေစိုးမောင်ဟာ ဒုတိယဗိုလ်မှူးကြီး ဖြစ်လာပြီး ပြည်သူ့ကျန်းမာရေး တက္ကသိုလ်မှာ ကထိကအဖြစ် တာဝန်ထမ်းဆောင်ပါတယ်။ သူဟာ စာရေးဆရာ တယောက်လည်း ဖြစ်လာပြီးတော့ ရန်ကုန်က အနုပညာသမားတွေ၊ စာရေးဆရာတွေနဲ့ တရင်းတနှီးရှိတယ်။ ဒေါက်တာ နေစိုးမောင်က သူ့ရဲ့ လုပ်ဖော်ကိုင်ဖက်တွေကို အမြဲကူညီတတ်ပြီး တချို့ကတော့ သူဟာ မြန်မာ နိုင်ငံရဲ့ ထိပ်သီးမိသားစုနဲ့ ကွာခြားကြောင်း ပြချင်ပုံရတယ်လို့ ယူဆကြတယ်။

ဧရာဝတီ

အပြည့်အစုံသို့ »

အစာအဆိပ်သင့်မှုကြောင့် ဟုမ္မလင်းတွင် လူငါးဦးဆေးရုံရောက်


စစ်ကိုင်းတိုင်း၊ ခန်္တီးခရိုင်၊ ဟုမ္မလင်းမြို့နယ်၊ ယက်ဖကျေးရွာတွင် ဖေဖော်ဝါရီ ၉ က အစာအဆိပ်သင့်မှု ကြောင့် ထမံသီတိုက်နယ်ပြည်သူ့ဆေးရုံတွင် လူငါးဦး အရေးပေါ်တင်ကုသထားရကြောင်း ထမံသီနယ် မြေရဲစခန်းရှိ တာဝန်ကျရဲတပ်ဖွဲ့ဝင်တစ်ဦးက ပြောသည်။

ဖြစ်စဉ်မှာ ဖေဖော်ဝါရီ ၉ ရက်က ဦးကျော်မင်းစိုးသည် သစ်ပါးလွှာစက်ရုံဟောင်းတစ်ခုမှ ဟင်းချက်ဆား များ ယူဆောင်လာကာ ညနေပိုင်းတွင် ဇနီးဖြစ်သူ မတူးသည် ကြိမ်ဖူးထောင်းဟင်းချက်ပြုတ်ရာ၌ အဆို ပါဆားကို ထည့်သွင်းချက်ပြုတ်ကာ ကလေးများနှင့်အတူ စားသောက်ရာ ထမင်းစားပြီး မိနစ်ပိုင်းအတွင်း အော့အန်မူးဝေလာသဖြင့် ဆေးရုံသို့ အမြန်ဆုံးသွားရောက်ခဲ့သည်ဟု ထမံသီနယ်မြေရဲစခန်း ရဲမှတ်တမ်း တွင် ပါရှိသည်။

ဆေးရုံသို့ အစာအဆိပ်သင့်၍ ဆေးကုသမှုခံယူနေသူများမှာ မတူး အသက် (၃၂)နှစ်၊ မောင်ကျော်သူရ အသက် (၁၁)နှစ်၊ မသီသီခိုင် အသက်(၈)နှစ်၊ မောင်ဖိုးအောင်ရင် အသက်(၅)နှစ်နှင့် မောင်ဖိုးဇော်နိုင် အသက်(၄)နှစ်ဆိုသူ လူငါးယောက်ဖြစ်ကြောင်း ထမံသီတိုက်နယ်ဆေးရုံ၏ အရေးပေါ်လူနာဌာန၏ လူ နာမှတ်တမ်းများတွင် ဖော်ပြထားသည်။

အဆိုပါလူနာများ၏ အခြေအနေနှင့်ပတ်သက်၍လည်း တိုက်နယ်ဆရာဝန်ကြီး ဒေါက်တာမေဦးပုံကပြော ဆိုရာတွင် အသက်အန္တရာယ်စိုးရိမ်ဖွယ်ရာ အခြေအနေမရှိဟု ဆိုသည်။

ပြီးခဲ့သည့် ၂၀၁၃ ခုနှစ်က အဆိုပါထမံသီဒေသရှိ သစ်ပါးလွှာစက်ရုံလုပ်သားများသည် အစာအဆိပ်သင့် မှုနှစ်ကြိမ်ခန့်ဖြစ်ပွားခဲ့ပြီး လူလေးဦးခန့် သေဆုံးခဲ့ရသော ဖြစ်စဉ်များရှိခဲ့ကြောင်း ရဲဌာန၏သေမှုသေခင်း ဆိုင်ရာ မှတ်တမ်းဟောင်းအရ ရဲတပ်ဖွဲ့ဝင်တစ်ဦးက ပြောကြားထားသည်။

ကိုတိုးကြီး
Mizzima - News in Burmese

အပြည့်အစုံသို့ »