နိုင်ငံရေးအကျဉ်းသားစာရင်း ဒီဇင်ဘာလကုန် အမီပေးရန် အစိုးရပြောဆို

ပို့စ်တင်ချိန် - 11/10/2013 08:26:00 PM


နန်းလွင်နှင်းပွင့်| တနင်္ဂနွေနေ့၊ နိုဝင်ဘာလ ၁၀ ရက် ၂၀၁၃ ခုနှစ်

သမ္မတဦးသိန်းစိန် ကတိပေးထားသည့်အတိုင်း ယခုနှစ်ကုန်တွင် နိုင်ငံရေးအကျဉ်းသား အားလုံးကို လွှတ်ပေးနိုင်ရန် လက်ကျန်နိုင်/ကျဉ်း စိစစ်ရေးကော်မတီအနေဖြင့် ဒီဇင်ဘာလ ၃၁ ရက်အမီ စာရင်းပေးအကြောင်းကြားရန် လိုအပ်သည်ဟု သမ္မတရုံးဝန်ကြီး ဦးအောင်မင်းက နိုဝင်ဘာလ ၁၀ရက်တွင် ပြောသည်။

မြန်မာငြိမ်းချမ်းရေးစင်တာတွင် နိုဝင်ဘာလ ၁၀ရက်က ပြည်ထောင်စုဝန်ကြီးများနှင့် ပါတီများ၊ နိုင်ငံရေးအင်အားစုများ၊ အရပ်ဖက်လူမှုအဖွဲ့အစည်းများ တွေ့ဆုံစဉ် ယင်းကဲ့သို့ ပြောကြားခြင်းဖြစ်သည်။

"ကျွန်တော်တို့ရဲ့ ငြိမ်းချမ်းရေး လုပ်ငန်းစဉ်၊ အမျိုးသားပြန်လည်ရင်ကြားစေ့ရေး အစီအစဉ်တစ်ခုဖြစ်တဲ့ နိုင်ငံတော်သမ္မတကြီးကလည်း ကတိပေးထားတဲ့ နှစ်ကုန်မှာ နိုင်ငံရေးအကျဉ်းသားတွေအကုန်လုံးကို လွှတ်ပေးဖို့ အတွက်ကိုလည်း အခုရက်ပိုင်းတွေမှာပိုမို လုပ်ဆောင်နေပါတယ်၊ အဲ့တော့ နှစ်ကုန်မှာ အကုန်လွှတ်နိုင်ဖို့ အတွက်လည်း စာရင်းတွေကို မကျန်အောင် အမှီပေးဖို့လိုပါတယ်၊ အဲ့ဒါကြောင့် ဒီဇင်ဘာ ၃၁ရက်နေ့ကို အမှီပေးဖို့ ပြောချင်ပါတယ်"ဟု ဦးအောင်မင်းက ဆိုသည်။

အစိုးရအနေဖြင့် နိုင်/ကျဉ်းများကို လွှတ်ပေးရာတွင် နိုင်ငံရေးအကျဉ်းသားမှန်သော်လည်း နိုင်ငံရေးပုဒ်မများဖြင့် အပြစ်ပေးခံရခြင်း မဟုတ်သူများကို လွှတ်ပေးရန် ကျန်ရစ်ခဲ့မည်ကို စိုးရိမ်ကြောင်း လက်ကျန်နိုင်/ကျဉ်း စိစစ်ရေးကော်မတီဝင် နိုင်ငံရေးအကျဉ်းသား ဟောင်းအဖွဲ့ချုပ်မှ ဦးရဲအောင်က ပြောသည်။

"လက်ရှိ ကျွန်တော်တို့ဆီမှာ စာရင်းရှိနေတာက ၁၄၇ ဦးပါ။ ကျန်တာတွေလည်း ကျန်ဦးမယ်လို့ ထင်တယ်၊ အရင်က နိုင်ငံရေး အကျဉ်းသားတွေက နိုင်ငံရေး အမှုတွေနဲ့မကျတဲ့ သူတွေရှိတယ်။ အဲ့သူတွေ ကျန်ခဲ့မှာကို ကျွန်တော်တို့ စိုးရိမ်နေတယ်”ဟု ၄င်းက ရှင်းပြသည်။

အစိုးရကဖွဲ့စည်းထားသည့် အဆိုပါ ကော်မတီတွင် နိုင်ငံရေးအကျဉ်းသားဟောင်းအဖွဲ့ချုပ် ၊ နိုင်ငံရေးအကျဉ်းသားဟောင်းများ ကူညီစောင့်ရှောက်ရေးအဖွဲ့(AAPP) ၊ တိုင်းရင်းသားလက်နက်ကိုင်အဖွဲ့များ၊ အခြားနိုင်ငံရေးအင်အားစုများကလည်း နိုင်ငံရေးအကျဉ်းသားများ လွတ်မြောက်ရေးကို ပူးပေါင်း ဆောင်ရွက်နေပြီး နှစ်ပတ်လျှင်တစ်ကြိမ် ဆွေးနွေးစိစစ်နေသည်ဟု ဦးအောင်မင်း ကဆိုသည်။

အစိုးရသစ်တက်ပြီးနောက်ပိုင်းတွင် နိုင်ငံရေးအကျဉ်းသားများကို ၁၂ကြိမ်တိုင်တိုင် လွှတ်ပေးခဲ့ပြီး ဖြစ်သည်။

(မဇ္ဈိမသတင်းဌာန)
Mizzima - News in Burmese