အင်းလျားကန်ပေါင်အနီး လင်ခရူဇာယာဉ်နှင့် လက်ဝတ်ရွှေထည်များ လုယက်ခံရမှု တစ်လကျော်သည့်တိုင် ဖမ်းမမိသေး

ပို့စ်တင်ချိန် - 6/04/2014 08:13:00 PM


ရန်ကုန်၊ ဇွန် ၃

လှိုင်မြို့နယ် အင်းလျားကန်ပေါင်အနီး ပြည်လမ်း တံတားဖြူ မှတ်တိုင်တွင် အုပ်စုဖွဲ့ ဓားပြတိုက်၍ လင်ခရူဇာယာဉ်နှင့် လက်ဝတ်ရွှေထည်များ လုယက်ခဲ့မှု တစ်လကျော် ကြာသည့်တိုင်အောင် ကျူးလွန်သူများကို ဖမ်းဆီးရမိခြင်း မရှိသေးကြောင်း လုယက်ခံရသူ ကိုအောင်ငြိမ်းသန့်က ပြောကြားသည်။

ဧပြီလ ၂၄ ရက် နံနက် ၄ နာရီခွဲခန့်က ကမာရွတ်မြို့နယ် အမှတ် (၃) ရပ်ကွက်၊ လှည်းတန်း (၇) လမ်းတွင် နေထိုင်သူ ကိုအောင်ငြိမ်းသန့်မှာ ၎င်း၏ ကိုယ်ပိုင် လင်ခရူဇာယာဉ်ဖြင့် သူငယ်ချင်းများနှင့်အတူ ရှစ်မိုင် လမ်းဆုံဘက်မှ နေအိမ်သို့ ပြန်ရန် ပြည်လမ်းအတိုင်း မောင်းနှင်ခဲ့ကြောင်း၊ အင်းလျားကန်ပေါင်အနီး တံတားဖြူ မှတ်တိုင်တွင် ယာဉ်ကိုရပ်နားကာ အနားယူနေစဉ် သူငယ်ချင်းများ ကန်ပေါင်ပေါ် တက်သွားခဲ့ကြောင်း၊ ယင်းနောက် ယာဉ်အတွင်း ၎င်းနှင့် အမျိုးသမီး သူငယ်ချင်းတို့ ရှိနေချိန် အမျိုးသားငါးဦး ရောက်ရှိလာပြီး ၎င်းတို့နှစ်ဦးကို ထိုးကြိတ်ရိုက်နှက်ကာ ယာဉ်နှင့် လက်ဝတ်ရွှေထည်များ လုယက်ခံကြောင်း လှိုင်မြို့မ ရဲစခန်းထံမှ စုံစမ်းသိရှိရသည်။

“လုယက်မှုနဲ့ ပတ်သက်လို့ မသင်္ကာသူတွေကို ခေါ်ယူစစ်ဆေးနေဆဲပါ။ လုယက်ခံရသူက လုယက်ခဲ့တဲ့ ငါးယောက်အဖွဲ့က နှစ်ယောက်ကို မှတ်မိတယ် ဆိုပေမယ့် အခု ခေါ်ယူစစ်ဆေးတဲ့ သူတွေအထဲမှာ သူမှတ်မိတဲ့သူ မပါသေးဘူး။ အမှုအမြန် ဖော်ထုတ်နိုင်ဖို့ ခရိုင်ရဲတပ်ဖွဲ့နဲ့ ပူးပေါင်းပြီး စုံစမ်း စစ်ဆေးနေပါတယ်” ဟု လှိုင်မြို့မ ရဲစခန်းမှ ရဲအရာရှိတစ်ဦးက ပြောကြားသည်။

အုပ်စုဖွဲ့ လုယက်ခံရစဉ်က ယာဉ်ပိုင်ရှင် ကိုအောင်ငြိမ်းသန့်ကို ချွန်ထက်သော အရာဖြင့် အမျိုးသားတစ်ဦးက ထိုးခဲ့ပြီး ၎င်းက ပြန်လည် ခုခံသောကြောင့် ကျန်အမျိုးသားများက ၎င်းကို ဝိုင်းချုပ်ကာ ထိုးကြိတ် ရိုက်နှက်ခဲ့ကြောင်း၊ ယင်းနောက် ၎င်းနှင့် သူငယ်ချင်း အမျိုးသမီးကို ယာဉ်နှင့်အတူ ခေါ်ဆောင်သွားပြီး လက်ဝတ် ရွှေထည်များကို ချွတ်ယူကာ ရွာသာကြီးကျေးရွာ အမှတ် (၂) လမ်းမရှိ သပြေခြံ ကားမှတ်တိုင်အနီးတွင် ယာဉ်ပေါ်မှ ချထားပေးခဲ့ကြောင်း လုယက်ခံရသူ ကိုအောင်ငြိမ်းသန့် ပြောကြားသည်။

“ပြီးခဲ့တဲ့လက စခန်းမှာ မသင်္ကာသူငါးဦး ခေါ်စစ်နေချိန် စခန်းကခေါ်လို့ သွားကြည့်ခဲ့ပေမယ့် လုယက်တုန်းက ပါတဲ့သူတွေ မဟုတ်ဘူး။ နောက်ပိုင်း မသင်္ကာသူတွေ ထပ်ခေါ်စစ်နေတယ် ကြားပေမယ့် ကျွန်တော့်ဆီ ရဲစခန်းက မဆက်သွယ်တော့ဘူး။ ကျွန်တော်လည်း လုယက်ခံရတဲ့ကားနဲ့ ပတ်သက်ပြီး ဘာသတင်းများ ထူးမလဲလို့ စခန်းကို မကြာခဏ ဖုန်းဆက်မေးပေမယ့် ဒီနေ့အချိန်ထိ အမှုက ဘာမှထူးခြားမှု မရှိသေးဘူး” ဟု ၎င်းက ရှင်းပြသည်။

အဆိုပါ အုပ်စုဖွဲ့ လုယက်မှုကြောင့် ကိုအောင်ငြိမ်းသန့်၏ လင်ခရူဇာယာဉ်နှင့် ရွှေလက်စွပ်နှစ်ကွင်း၊ ရွှေဆွဲကြိုးတစ်ကုံး အပါအဝင် ၎င်း၏ သူငယ်ချင်း အမျိုးသမီး၏ ရွှေလက်စွပ်သုံးကွင်းနှင့် ရွှေဆွဲကြိုး တစ်ကုံးတို့ လုယက်ခံရသောကြောင့် လှိုင်မြို့မရဲစခန်းမှ (ပ) ၁၉၂/၁၄၊ ပုဒ်မ ၃၉၅ ဖြင့် လုယက်ခဲ့သူ အမျိုးသားငါးဦးကို အမှုဖွင့်ပြီး စုံစမ်းဆောင်ရွက်နေကြောင်း ယင်းရဲစခန်းထံမှ သိရှိရသည်။

The Voice