ယခုနှစ်အတွင်း ဒလမြို့၏ အိမ်ခြံမြေဈေးကွက် အခြေအနေအား ကိုရီးယား နိုင်ငံသားများ အများဆုံး လာရောက်လေ့လာနေ

ပို့စ်တင်ချိန် - 10/27/2013 11:31:00 AM


(ဒလမြို့နယ်ဘက်သို့ လာရောက်လည်ပတ်နေသော ကိုရီးယား လူမျိုးများအား တွေ့ရစဉ် (ဓာတ်ပုံ-ကြည်နိုင်))

ယခုနှစ် ဒလမြို့၏ အိမ်ခြံမြေဈေးကွက် အခြေအနေအား ကိုရီးယား နိုင်ငံသားများ အများဆုံး လေ့လာနေကြောင်း ဒေသခံများ၏ ပြောကြားချက်အရ သိရသည်။

ပန်းဆိုးတန်း ဆိပ်ကမ်းဘက်မှ ဒလမြို့ တစ်ဖက်ကမ်းသို့ နိုင်ငံခြားသား ခရီးသွားဦးရေ နေ့စဉ်ပျမ်းမျှ ၈၀ ဦးခန့် လာရောက်နေပြီး အများစုမှာ ကိုရီးယား နိုင်ငံသားများဖြစ်ကြောင်း ပြည်တွင်းရေကြောင်း ပို့ဆောင်ရေး (မြစ်ဝကျွန်းပေါ် ဌာနခွဲ) ရုံးမှ မန်နေဂျာဖြစ်သူ ဦးအေးမြင့်မောင်က ဆိုသည်။

ကိုရီးယား နိုင်ငံသားများသည် ဒလမြို့နယ်တွင်းရှိ ရာဇသင်္ကြန်ရပ်ကွက်၊ ရွှေစာရံ စေတီနှင့် ဈေးကြီးအတွင်းသို့ ဆိုက်ကားများနှင့် လှည့်လည်ကာ လည်ပတ်လေ့ရှိကြောင်း ဒေသခံများ၏ ပြောကြားချက်အရ သိရသည်။

"ဒီရက်ပိုင်း အတွင်းမှာ ဒလမြို့ထဲကိုလာတဲ့ နိုင်ငံခြားသား ဧည့်သည်တွေထဲမှာ ကိုရီးယားနိုင်ငံသား တော်တော်များလာတယ်။ သူတို့ရောက်လာပြီဆိုရင် အဖွဲ့လိုက် ဆိုက်ကားတွေနဲ့ မြို့အနှံ့ခြံတွေကို လိုက်ကြည့်ကြတယ်။ တကယ်ဆိုရင် ကျွန်တော်တို့မြို့မှာ ဘာမှလည်ပတ်စရာ နေရာမရှိဘူး။ မြေတွေပဲ ရှိပါတယ်" ဟု ရာဇသင်္ကြန် ရပ်ကွက်တွင် နေထိုင်ပြီး ဆိုင်ကယ်ကယ်ရီမောင်းသည့် ဒေသခံတစ်ဦးက ဆိုသည်။

ဒလမြို့နယ် အထွေအထွေ အုပ်ချုပ်ရေး ဦးစီးဌာန အုပ်ချုပ်ရေးမှူး ဦးထွန်းထွန်းဝင်းက "မြို့ထဲကိုတော့ ကိုရီးယားမှ မဟုတ်ပါဘူး။ တခြားနိုင်ငံသားတွေလည်း လာရောက်လည်ပတ် ကြပါတယ်။ ဒါပေမဲ့ ကိုရီးယားတွေ အခုတလော အ၀င်အထွက် များလာတာကိုတော့ သတိထားမိတယ်။ ဘာကြောင့်လဲ ဆိုတာတော့ မပြောတတ်ပါဘူး" ဟု ပြောကြားသည်။

ဒလမြို့အား ယခုထက် ပိုမိုဖွံ့ဖြိုးစေရန် ရည်ရွယ်၍ ရန်ကုန်-ဒလ ဆက်သွယ်သည့် တံတားစီမံကိန်းအား ကိုရီးယားနိုင်ငံမှ ဆောက်လုပ်ပေးမည် ဖြစ်သောကြောင့် ယခုကဲ့သို့ ကိုရီးယား လူမျိုးများ ဒလအိမ်ခြံမြေ ဈေးကွက်ကို လာရောက်ကြည့်ရှုခြင်း ဖြစ်နိုင်သည်ဟုလည်း သုံးသပ်နေကြသည်။ ထို့ပြင် ကိုရီးယားနိုင်ငံမှ ဒလမြို့တွင် စက်မှုဇုန်တစ်ခု တည်ထောင်ရန် စိတ်ဝင်စားနေသည်ဟုလည်း သတင်းများ ထွက်ပေါ်နေကြောင်း သိရသည်။

မြေကွက်များကို အ၀ယ်လိုက်ရာတွင် မြေပွဲစားများနှင့် ငွေကြေးတတ်နိုင်သူများ၏ ကိုယ်စားလှယ်များက အဓိက ပါဝင်နေကြောင်း အိမ်ခြံမြေ ပွဲစားများထံမှ သိရသည်။

ဒလမြို့နယ်ရှိ အိမ်ခြံမြေ အကျိုးဆောင်လုပ်ငန်းမှ အမည်မဖော်လိုသူ ဒေသခံတစ်ဦးက "အခုတလော နိုင်ငံခြားသားတွေ အ၀င်များလာတာက ပွင့်လင်းရာသီ ရောက်လာတာနဲ့ ဆိုင်တယ်ထင်တယ်။ ဒါပေမဲ့ ကိုရီးယားလူမျိုး ၀င်ရောက်မှုကတော့ များလာတယ်။ အိမ်၊ ခြံ၊ မြေ လုပ်ငန်းမှာ လာပြီးစုံစမ်းတာတော့ မရှိသေးပါဘူး။ သူတို့အနေနဲ့ ရန်ကုန်နဲ့နီးတဲ့ ဒလကို ကျေးလက်အရသာ ခံစားချင်တဲ့ အနေနဲ့ ရောက်လာတာလည်း ဖြစ်နိုင်သလို မြေကွက်တွေကို စိတ်ဝင်စားလို့ လာလေ့တာလည်း ဖြစ်နိုင်တယ်" ဟု ပြောကြားသည်။

"ကျွန်တော် သိရသလောက်တော့ မြေကွက်တွေ လိုက်ဝယ်နေတဲ့ထဲမှာ တရုတ်လူမျိုးတွေလည်း ပါလာတယ်။ စကားပြန်တွေနဲ့ လာကြည့်ကြတာ။ ကျွန်တော့်ခြံဘေးက ခြံကိုတောင် တရုတ်ကြီးတစ်ယောက် ၀ယ်ထားပြီးပြီ။ သူတို့ ဘယ်ကလဲဆိုတာ ကျွန်တော်မသိဘူး။ ဒါပေမဲ့ မြေကွက်တွေရဲ့ဈေးက နည်းနည်းငြိမ်လာတယ်" ဟု ဒလမြို့နယ်၊ ပျော်ဘွယ်လေး ကျေးရွာတွင် နေထိုင်သော ဒေသခံ တစ်ဦးကဆိုသည်။

ရန်ကုန် ပန်းဆိုးတန်း ဆိပ်ကမ်းမှ ဒလမြို့ တစ်ဖက်ကမ်းသို့ နိုင်ငံခြားသား တစ်ဦးလျှင် ရေယာဉ်အသုံးပြု လက်မှတ်ခ နှစ်ဒေါ်လာ သတ်မှတ်ထားကြောင်း သတင်းရရှိသည်။

Eleven Media Group