ကျောက်ဖြူ-ရွှေလီ ကားလမ်းမကြီးဖောက်လုပ်ရန် ဒေါ်လာနှစ်ဘီလျံ အတိုးဖြင့်ချေးမည်ဟု တရုတ်က မက်လုံးပေး ကမ်းလှမ်း၊ ဦးစားပေးဖောက်လုပ်မည့် လမ်းပိုင်းများကိုပင် တရုတ်တွင် ကျင်းပခဲ့သည့် ဆွေးနွေးပွဲ၌ သဘောတူသတ်မှတ်ပြီး ဖြစ်ကြောင်းသိရ

ပို့စ်တင်ချိန် - 2/25/2014 01:05:00 PM


့မြန်မာနိုင်ငံအား ဖြတ်သန်း၍ တရုတ်နိုင်ငံသို့ ဆက်သွယ် သွယ်တန်းထားသော ကျောက်ဖြူ-ကူမင်း ရေနံနှင့် သဘာဝဓာတ်ငွေ့ပိုက်လိုင်း ဖြတ်သန်းရာပြ ဒေသမြေပုံအား တွေ့ရစဉ်

တရုတ်-မြန်မာ စင်္ကြံလမ်းမကြီးအဖြစ် ရွှေလီ-ကျောက်ဖြူ လမ်းမကြီးကို ဖောက်လုပ်ရာတွင် အသုံးပြုရန် တရုတ်မှ အမေရိကန်ဒေါ်လာ နှစ်ဘီလျံကို ထုတ်ချေးမည်ဟု ကမ်းလှမ်းထားကြောင်း အစိုးရတာဝန်ရှိသူ အချို့ထံမှ စုံစမ်းသိရှိရသည်။

ကျောက်ဖြူ-ရွှေလီ စင်္ကြံလမ်းမကြီး ဖောက်လုပ်ခြင်းဆိုင်ရာ ဒုတိယအကြိမ်မြောက် ပူးတွဲလုပ်ငန်းအဖွဲ့ အစည်းအဝေးကို ဇန်နဝါရီအတွင်းက တရုတ်ပြည်သူ့ သမ္မတနိုင်ငံ၊ ရွှေလီမြို့၌ ကျင်းပခဲ့ပြီး တရုတ်-မြန်မာ နှစ်နိုင်ငံစလုံးမှ တာဝန်ရှိသူများ တက်ရောက်ခဲ့ကြသည်ဟု သိရသည်။

အဆိုပါအစည်းအဝေးတွင် ကျောက်ဖြူ -ရွှေလီလမ်းမကြီး ဖောက်လုပ်ရာ၌ ဦးစားပေး ဖောက်လုပ်မည့် လမ်းပိုင်းများကို နှစ်နိုင်ငံတာဝန်ရှိသူများက သဘောတူ သတ်မှတ်ခဲ့ပြီး ရွှေလီ-လားရှိုး လမ်းပိုင်းနှင့် မကွေး -ကျောက်ဖြူ လမ်းပိုင်းများကို ဦးစားပေး လမ်းပိုင်းများအဖြစ် သတ်မှတ်ခဲ့သည်ဟုလည်း သိရသည်။

ဦးစားပေးလမ်းပိုင်းများကို ယခု ၂ဝ၁၄ ခုနှစ်အတွင်း၌ပင် စတင်နိုင်ရန် တရုတ်နိုင်ငံဘက်က အဆိုပြုထားကြောင်းနှင့် ကျောက်ဖြူ-ရွှေလီ ကားလမ်းမကြီး စီမံကိန်းအတွက် ဒေါ်လာ နှစ်ဘီလျံကို ထုတ်ချေးပေးမည်ဟု ဆွေးနွေးပွဲ၌ပင် တရုတ်ဘက်က ကမ်းလှမ်းထားသည်ဟု သိရသည်။

တရုတ်နိုင်ငံ အနေဖြင့် မြန်မာနိုင်ငံသို့ ချေးငွေများ ထုတ်ချေးရာတွင် ယခင်က စီမံကိန်း အများအပြားအတွက် မြင့်မားလွန်းသည့် ၄ ဒသမ ၅ ရာခိုင်နှုန်းအတိုးဖြင့်သာ ထုတ်ချေးလေ့ရှိခဲ့သည်။

လမ်းပိုင်းများကို အကောင်အထည်ဖော် ဖောက်လုပ်ရာတွင် BOT စနစ်ဖြင့် လည်းကောင်း သို့တည်းမဟုတ် တရုတ်-မြန်မာ ကုမ္ပဏီများ ပူးပေါင်း၍ PPP စနစ်ဖြင့် လုပ်ကိုင်ရန် တရုတ်နိုင်ငံဘက်က အဆိုပြုထားသည်ဟုလည်း သိရသည်။

တရုတ်နိုင်ငံအနေဖြင့် မြန်မာနိုင်ငံ၌ လာရောက်၍ သတ္တုတူးဖော်ရေးကဏ္ဍ၊ ရေအားလျှပ်စစ်ကဏ္ဍစသည်ဖြင့် စီမံကိန်းပေါင်းများစွာ လာရောက်မြှုပ်နှံထားရာတွင် ယခု အဆိုပြုသည့် စနစ်များဖြစ်သော BOT, PPPစနစ်များဖြင့်သာ လုပ်ကိုင်ထားခြင်းဖြစ်ပြီး အချို့စီမံကိန်းများဆိုလျှင် တစ်ဖက်စောင်းနင်းဖြစ်နေသည့်အတွက် စာချုပ်များ ပြန်ပြင်ချုပ်ဆိုခဲ့ရသည်အထိ ရှိခဲ့ဖူးသည်။

ကျောက်ဖြူ အထူးစီးပွားရေးဇုန်နှင့် ကျောက်ဖြူရေနက်ဆိပ်ကမ်းအတွက် အထောက်အကူဖြစ်မည့် လမ်းမကြီးဟု သတ်မှတ်ထားသော်လည်း ချေးငွေဖြင့် ဆောက်ပါက မြန်မာနိုင်ငံအတွက်မူ မြင့်မားသည့် အတိုးနှုန်းကိုပြန်လည်ပေးဆပ်ရမည်ဟုဆောက်လုပ်ရေးလုပ်ငန်းရှင်အချို့က ဆိုသည်။

လမ်းမကြီးဖောက်လုပ်ရန်အတွက် ဒုတိယအကြိမ်မြောက် ဆွေးနွေးပြီးဖြစ်သော်လည်း ယခုအထိ ပြည်သူသို့ အသေးစိတ်ချပြခဲ့ခြင်း မရှိသေးချေ။

Eleven Media Group