ကြီးမားသောငွေကြေးအထောက်အပံ့မရလျှင် တစ်နှစ်ကျော်အတွင်း မလေးရှားလေကြောင်းလိုင်း ရှင်သန်ဖို့ လမ်းမမြင်တော့ဟု ကျွမ်းကျင်သူများသုံးသပ်

ပို့စ်တင်ချိန် - 7/19/2014 02:59:00 PM



မလေးရှားလေကြောင်းလိုင်းအနေနဲ့ သိသိသာသာကြီးကြီးမားမားငွေကြေးအထောက်အပံ့မရဘူးဆိုပါက တစ်နှစ်ကျော်အတွင်းမှာ ရှင်သန်ဖို့လမ်းမမြင်တော့ကြောင်း ကွာလာလမ်ပူမှာရုံးစိုက်တဲ့ မေဘဏ်ရဲ့ ရင်းနှီးမြှပ်နှံမှုသုံးသပ်စိတ်ဖြာမှုကျွမ်းကျင်သူ မိုရှင်းအာဇစ်က ဘီဘီစီကမ္ဘာတစ်လွှားအစီအစဉ်ကိုပြောကြား လိုက်ပါတယ်။
ယူကရိန်းမှာ မလေးရှားလေကြောင်းပိုင် ခရီးစဉ်အမှတ် MH 17 လေယာဉ်ကို ယူကရိန်းခွဲထွက်ရေးသမားများ က ယမန်နေ့က မှားယွင်းပစ်ချခံရအပြီးမှာ မလေးရှားလေကြောင်းရဲ့ အစုရှယ်ယာတန်ဖိုးဟာ ဈေးကွက်မှာ ၁၁ရာခိုင်နှုန်းထပ်မံကျဆင်းသွားခဲ့ရပါတယ်။
မလေးရှားလေကြောင်းအနေနဲ့ မတ်လက MH370 လေယာဉ်အိန္ဒိယသမုန္ဒရာမှာ ထူးဆန်းစွာပျောက်ဆုံးပျက်ကျအပြီး ဒုတိယမြောက်အဖြစ်ဆိုးကြီးနဲ့ကြုံရတာဖြစ်ပါတယ်။လွန်ခဲ့တဲ့ကိုးလက
စပြီးရေတွက်မယ်ဆိုရင် မလေးရှားလေကြောင်းရဲ့ဈေးကွက်တန်ဖိုးဟာ ၄၀ရာခိုင်နှုန်းအထိကျဆင်းသွားရပြီဖြစ်ပါတယ်။
`ဒါဟာတကယ့်တိုက်ဆိုင်မှုပဲဆိုဆို၊ လေကြောင်းလိုင်းတစ်ခုတည်းကနေ လအနည်းငယ်အတွင်း ကြောက် မက်ဖွယ်ရာ မတော်တဆဖြစ်မှုကြီး နှစ်ကြိမ်တောင်ကြုံလိုက်ရတာကတော့ သမိုင်းမှာမရှိဘူးလေ`လို့ မလေးရှားလေကြောင်းလိုင်းကို အဓိကငွေကြေးထောက်မနေတဲ့ ဒီဗီဘီဘဏ်ရဲ့လေကြောင်းဌာနအကြီးအကဲ ဘာထရန်ဂရာဘိုစကီးက ပြောတယ်လို့ ဘီဘီစီကရေးပါတယ်။
ငွေကြေးကို လုံလုံလောက်လောက်ထောက်ပံ့မှုထပ်ရတယ်ထားဦး၊ရေရှည်မှာ ဒီလေကြောင်းရှင်သန်နိုင်ပါ့မလားဆိုတာကတော့ မေးခွန်းထုတ်စရာဖြစ်နေတယ်လို့ သုံးသပ်သူများကပြောကြပါတယ်။
`အခုနောက်ဆုံးဖြစ်ခဲ့တဲ့ကြေကွယ်ဖွယ်ဖြစ်ရပ်ဆိုးမှာ ဒီအမှတ်တံဆိပ်ဆက်လက်ရှင်သန်နိုင်ပါ့မလား မေးစရာပဲ`လို့ ဘတ်အင်န်ဘတ်က လေကြောင်းဆိုင်ရာမိတ်ဖက် လီရိုဖာတိုရီနီကပြောပါတယ်။
Source bbc.com

Yangon Media Group