အိမ်ခြေ လေးရာကျော်ရှိသောရွာကို ဖယ်ရှားခိုင်း၊ ရွာသားများက ဖယ်မပေးဘဲ ထိပ်တိုက်တွေ့ရန်ပြင်
ပို့စ်တင်ချိန်
-
2/02/2014 01:50:00 PM
ရန်ကုန်တိုင်းနှင့် ပဲခူးတိုင်း သတ်မှတ်ထားသည့် နယ်နိမိတ်အစပ်တွင်ရှိသော အိမ်ခြေ လေးရာကျော်ရှိသည့် သမီးကလေးကျေးရွာအား လှည်းကူးမြို့ နယ် အထွေထွေအုပ်ချုပ်ရေးမှူးက ထိုရွာသည် တပ်မတော် ကျောင်းကြီး (၃)ကျောင်း၏မြေဟုဆိုကာ ဖယ်ရှားမည်ဟု အမိန့်စာထုတ်ထားပြီး အဆိုပါရွာသူရွာသားများက ဖယ်မပေးဘဲ ထိပ်တိုက်တွေ့ဆုံရန်စီစဉ်နေသည်။
အဆိုပါရွာကို ဇန်န၀ါရီ ၂၈ ရက်တွင် နောက်ဆုံးဖယ်ရှားရမည်ဟု လှည်းကူးမြို့နယ် အထွေထွေအုပ်ချုပ်ရေးမှူး ဦးအောင်ကိုဦးက ဇန်န၀ါရီ ၂၇ရက်တွင် အမိန့်စာထုတ်ပြန်ခဲ့သည်။ ထိုသို့ အမိန့်စာထုတ်ပြန်မှုကြောင့် သမီးကလေးကျေးရွာရှိ ရွာသူရွာသားများက ၎င်းတို့ ဖယ်ရှားခံမည်မဟုတ်ဘဲ အသက်သေသည်အထိ တိုက်ပွဲဝင်သွားမည်ဟု ထိုကျေးရွာရှိ ရွာသူရွာသားများက တညီတညွတ်တည်း ပြောဆိုသည်။
““ကျွန်တော်တို့ရွာကို မြို့နယ် အထွေထွေအုပ်ချုပ်ရေးမှူးက ကျူးကျော်ရွာလို့ပြောထားတယ်။ ကျူးကျော်ရွာမဟုတ်ပါဘူး။ ဟိုအရင်တည်းက ရှိခဲ့တဲ့ရွာပါ။ ကျွန်တော်တို့က လုံးဝဖယ်မပေးနိုင်ဘူး။ အသက်သေတဲ့အထိ ကာကွယ်သွားမယ်””ဟု သမီးကလေး ကျေးရွာအုပ်ချုပ်ရေးမှူး ဦးမောင်တာကပြောသည်။
သမီးကလေးကျေးရွာ၌ နေထိုင်သူများမှာ ၎င်းတို့၏ ဘိုးဘွားအစဉ်အဆက်ကတည်းက နေထိုင်ခဲ့ကြသူများဖြစ်ပြီး ယခုလက်ရှိနေထိုင်သူများပင်လျှင် အသက် (၇၀)၀န်းကျင်အရွယ် ရောက်နေသူများပင်ရှိနေသည်ဟုဆိုသည်။
သမီးကလေးကျေးရွာတွင် လဂွမ်းပြင်ရေလှောင်တမံစီမံကိန်းတစ်ခုကို ၂၀၀၀ပြည့်နှစ်တွင် တည်ဆောက်ထားရာ ထိုရေလှောင်တမံစီမံကိန်းကမ္ပည်းတိုင်တွင် သမီးကလေးကျေးရွာ၌ ရေလှောင်တမံစီမံကိန်း တည်ဆောက်ထားသည်ဟု ဆည်မြောင်းဝန်ကြီးဌာနမှ ရေးထိုးထားသည်။ ကျေးရွာရှိအိမ်အများစုမှာ ကျူးကျော်တဲပုံစံမျိုး တည်ဆောက်ထားခြင်းမဟုတ်ဘဲ တိုက်အိမ်၊ ပျဉ်ထောင်အိမ်အမျိုးအစား အများစု တည်ဆောက်ထားသည်ကို တွေ့မြင်ခဲ့ရသည်။ ထိုရွာတွင် ဘုန်းတော်ကြီးသင် မူလတန်းစာသင်ကျောင်း၊ ဘုန်းတော်ကြီးကျောင်း၊ ရွာဓမ္မာရုံ စသည်တို့ တည်ဆောက်ထားသည်ကို တွေ့ခဲ့ရသည်။ ရွာဧကလေးရာဝန်းကျင်ကျယ်ဝန်းပြီး ထိုရွာတွင် ကရင်လူမျိုးများနှင့် ဗမာလူမျိုးများနေထိုင်သည်။
အမိန့်စာကို လိုက်နာခြင်း ပျက်ကွက်လျှင် အက်ဥပဒေပုဒ်မ ၂၁(၁)အရအရေးယူမည်ဟုရေး သားထားသည်။ ထိုအမိန့်စာထုတ်ပြန်မှုနှင့် ပတ်သက်ပြီး လှည်းကူးမြို့နယ် အထွေထွေအုပ်ချုပ်ရေးမှူးရုံးရှိ အုပ်ချုပ်ရေးမှူး ဦးအောင်ကိုထံသို့ ဇန်န၀ါရီ ၃၁ ရက် ညနေတွင် သွားရောက်မေးမြန်းရာ တွေ့ဆုံခွင့်မပေးခဲ့ပေ။ အုပ်ချုပ်ရေးမှူးရုံးသို့ သွားရောက်မေးမြန်းရာ ဦးအောင်ကိုဦးမရှိကြောင်းပြောဆိုပြီး ၎င်း၏ ဖုန်းနံပါတ်ပေးပိုင်ခွင့်မရှိကြောင်း အထွေထွေအုပ်ချုပ်ရေးမှူးရုံးမှ တာဝန်ရှိသူများကပြောဆိုသည်။ ထိုညနေတွင် ထွေအုပ်ရုံးသို့ အစည်းအဝေးလာတက်သော ကျေးရွာအုပ်ချုပ်ရေးမှူးတစ်ဦးအား မေးမြန်းရာ ဦးအောင်ကိုဦးသည် ထိုရုံးတွင်ရှိနေကြောင်း အတည်ပြုပြောဆိုသည်။
သမီးကလေးကျေးရွာအနီးတွင် စီးပွားရေးလုပ်ငန်းရှင်များက ရော်ဘာခြံလုပ်ငန်းများ လုပ်ကိုင်နေသောကြောင့် မြေဈေးမှာ တစ်ဧကလျှင် ကျပ်သိန်းရာကျော် ပေါက်ဈေးရှိ၍ ဖယ်ရှားခံရခြင်းဖြစ်သည်ဟု ဒေသခံများယူဆနေကြသည်။
Author: ငြိမ်းချမ်း / 7day Daily
သမီးကလေးကျေးရွာကို တွေ့ရစဉ် ဓာတ်ပုံ - ကျော်ဇင်သန်း / 7day Daily
