အရက်မူးနေသော တပ်မတော်သားတစ်ဦး၏ ရိုက်နှက်မှုကြောင့် အမျိုးသမီးတစ်ဦး ဒဏ်ရာပြင်းထန်စွာရရှိ

ပို့စ်တင်ချိန် - 7/04/2014 07:49:00 PM



တနင်္သာရီတိုင်းဒေသကြီး၊ မြိတ်မြို့နယ်တွင် ဇူလိုင် ၂ရက်နေ့က အရက်မူးနေသော တပ်မတော်သား တစ်ဦး၏ ရိုက်နှက်မှုကြောင့်အသက် ၂၁နှစ်အရွယ် ဒေသခံ အမျိုးသမီးငယ်တစ်ဦး ဒဏ်ရာပြင်းထန်စွာရရှိသွားကြောင်း သတင်းရရှိသည်။ဇူလိုင် ၂ရက်က မြိတ်မြို့၊
တောထွက်ကြီးကျေးရွာမှ ကုန်းဖောက်ရွာသို့ပြန်လာသော မထွေးငယ်နှင့် အဘွားအိုတစ်ဦးအား ကုန်းဖောက်ကျေးရွာအနီးလေတပ်စခန်းဂိတ်ပေါက်အနီးတွင် လေတပ်စခန်းဌာနမှ အရက်မူးနေသည့် တပ်မတော်သားတစ်ဦးက အကြောင်းမဲ့ဝင်ရောက်ရိုက်နှက်ခဲ့ကြောင်း ဆေးရုံသို့လာရောက်ပို့ဆောင်ခဲ့သော မိန်းကလေး၏ ဆွေမျိုးများက ပြောသည်။မထွေးငယ်၏ အစ်မတော်စပ်သူက “လေတပ်စခန်းနဲ့ ဘာပြဿနာမှမရှိခဲ့ပါဘူး၊ ကုန်းဖောက်ဂိတ်ပေါက်နားမှာ ရိုက်ခံထိတာပါ၊အဘွားကိုလည်းရိုက်ပါတယ်၊ အဘွားအိုက လက်မှာနည်းနည်းထိသွားပြီး ထွက်ပြေးသွားပါတယ်၊ မထွေးငယ်မှာတော့ ဦးခေါင်းတွေ
မျက်ခုံးတွေမှာ တုတ်နဲ့ အရိုက်ခံရတယ်လို့ သိရတယ်၊ အခုလောလောဆယ်မှာ ဓာတ်မှန် ရိုက်ထားလို့ အဖြေမသိရသေးပါဘူး၊မိန်းကလေးက ကယောင်ကတန်းဖြစ်နေလို့ ဘာမှလည်း မေးလို့မရဘူးဖြစ်နေတယ်” ဟု ပြောသည်။

အရိုက်ခံရသူ မထွေးငယ် (ခ) မအိမိုး (ဘ) ဦးလှဆွေမှာ လေတပ်စခန်းတွင် လုပ်ကိုင်လျက်ရှိသည့် စီမံကိန်းများ၌ အလုပ်ကြမ်းလုပ်ကိုင်နေသူတစ်ဦးဖြစ်ကြောင်း၊ လေတပ်စခန်းမှ တပ်သားများနှင့် မည်သို့မျှ ပတ်သက်မှုမရှိကြောင်း ဆွေမျိုးများ၏ပြောကြားချက်အရ သိရသည်။

“ပြဿနာဖြစ်ပွားပြီးတဲ့နောက်မှာ တပ်သားနှစ်ဦးနဲ့ တာဝန်ရှိသူတစ်ဦးဆိုတဲ့သူတွေ ရောက်လာပါတယ်၊ လူနာရှင်ရဲ့မိသားစုတွေကိုဖိအားပေးပြီး ပြင်ပဆေးရုံဖြစ်တဲ့ တော်ဝင်ဆေးရုံကိုတင်ခိုင်းပါတယ်။ နိုင်ငံရေးပါတီတွေနှင့်အင်အားစုတွေရောက်လာတော့ မှအစိုးရဆေးရုံကိုပို့လိုက်တာဖြစ်ပါတယ်။ ဒီကိစ္စကို ကျွန်တော်တို့ သေချာစောင့် ကြည့်နေမှာပါ”ဟု မြိတ်ခရိုင် ၈၈ မျိုးဆက်မှ ကိုပိုအင်
က ပြောကြားခဲ့သည်။

ပြည်သူ့ဆေးရုံကြီးသို့ ရောက်ရှိလာပြီးနောက်ပိုင်း လေတပ်စခန်းမှ ဗိုလ်မှူးအဆင့်ရှိသူနှင့် တာဝန်ရှိသူများရောက်ရှိလာကာ ပြစ်မှုကျူးလွန်သူအား စုံစမ်းဖော်ထုတ်ကာ အရေးယူသွားမည်ဖြစ်ကြောင်း ပြောကြားခဲ့သည်။

အဆိုပါဖြစ်စဉ်နှင့်ပါက်သက်၍ အရိုက်နှက်ခံရသူ အမျိုးသမီးဘက်မှ ဆွေမျိုးများက ရဲစခန်းသို့ အမှုဖွင့် တိုင်ကြားထားကြောင်းသိရသည်။

မြတ်ထွဋ် ( မြိတ် )
မြန်မာ့ခေတ်