လတ်တလော အခြေအနေတွင် PR (အချိုးကျကိုယ်စားပြု) စနစ်အား ကျင့်သုံးရန် မသင့်သေးကြောင်းနှင့် ဆိုင်းငံ့ထားသင့်ကြောင်း တပ်မတော်သား လွှတ်တော်ကိုယ်စားလှယ်များ ဆွေးနွေး

ပို့စ်တင်ချိန် - 6/10/2014 10:04:00 PM



လတ်တလော အခြေအနေတွင် PR (အချိုးကျကိုယ်စားပြု) စနစ်အား ကျင့်သုံးရန် မသင့်သေးကြောင်းနှင့် ဆိုင်းငံ့ထားသင့်ကြောင်း တပ်မတော်သား လွှတ်တော်ကိုယ်စားလှယ်များနှင့် အမျိုးသားလွှတ်တော် ကိုယ်စားလှယ်များက ဆွေးနွေးခဲ့ကြသည်။

ဇွန် ၉ ရက်က ပြုလုပ်သည့် အမျိုးသားလွှတ်တော် အစည်းအဝေးတွင် တပ်မတော်သား လွှတ်တော်ကိုယ်စားလှယ် ဒုတိယဗိုလ်မှူးကြီးရဲနိုင်ဦး၊ ဗိုလ်မှူးတိုးမင်းထွန်း၊ ဗိုလ်မှူးကျော်နိုင်ဌေး၊ ဦးအုန်းတင်၊ ဦးဇုန်လှယ်ထန်း၊ ဒေါက်တာဗညားအောင်မိုး စသည့်ကိုယ်စားလှယ်များက ဆိုင်းငံ့ထားသင့်ကြောင်း ဆွေးနွေးခဲ့ကြပြီး ဦးစောထွန်းမြအောင်၊ ဒေါ်နန်းနီနီအေးတို့က ထောက်ခံဆွေးနွေး ခဲ့ကြသည်။

ဒုတိယဗိုလ်မှူးကြီး ရဲနိုင်ဦးက “မိမိတို့နိုင်ငံတွင် ပီအာရ်စနစ် ကျင့်သုံးတဲ့ အလေ့အကျင့် မရှိသေးပါဘူး။ မိမိနိုင်ငံနှင့် သင့်တော်တဲ့ ပီအာရ်စနစ်ကို သုံးသပ်ရွေးချယ်ဖို့ လိုအပ်ပါတယ်။ ဒါကြောင့် လတ်တလော အခြေအနေမှာ ပီအာရ်စနစ်ကို ကျင့်သုံးဖို့အတွက် အလွယ်တကူဆုံးဖြတ်ဖို့ မသင့်သေးပါဘူး” ဟု ဆွေးနွေးသည်။

ရွေးကောက်ပွဲစနစ်တွင် အများဆုံးရသူ အနိုင်ယူစနစ်သည် အများစု၏ဆန္ဒကို အလွယ်ကူဆုံး ထုတ်ဖော်သည့် နည်းဖြစ်ပြီး နိုင်ငံပေါင်းများစွာ ကျင့်သုံးနေသည့် စနစ်ဖြစ်ကြောင်း၊ မြန်မာနိုင်ငံ အနေဖြင့် ပါလီမန်ခေတ် ၁၉၅၂၊ ၁၉၅၆၊ ၁၉၆၀ နှင့် ယနေ့တိုင် ကျင့်သုံးနေဆဲဖြစ်ကြောင်း၊ အိန္ဒိယနိုင်ငံသည် တိုင်းရင်းသားပေါင်းစုံ နေထိုင်သည့်အတွက် တည်ငြိမ်သည့် အစိုးရဖွဲ့စည်းရန်နှင့် လွှတ်တော်တွင်း အမျိုးမျိုးကွဲပြားခြင်းမှ ရှောင်ရှားရန်အတွက် အများဆုံးနိုင်သူယူစနစ်သာ ကျင့်သုံးလျက်ရှိကြောင်း ဆွေးနွေးသည်။

ထိုင်းနိုင်ငံသည် ပီအာရ်စနစ်နှင့် နိုင်သူယူစနစ် နှစ်မျိုးလုံးကျင့်သုံးခဲ့ကြောင်း၊ စည်းမျဉ်းခံဘုရင်စနစ် ညွန့်ပေါင်းအစိုးရများ ဖြစ်ပေါ်ပြီး ဥပဒေပြုရေးများတွင် အကျပ်အတည်းများ ဖြစ်ပေါ်ခဲ့ကြောင်း၊ အရေးကြီးသည့် ဆုံးဖြတ်ချက်များ ချမှတ်ရာတွင် ခက်ခဲကြောင်း၊ လူထု၏ မျှော်လင့်ချက်များကို ဖြည့်ဆည်းမပေးနိုင်ဘဲ အုပ်စုကွဲများ များပြားမှုကြောင့် ဆုံးဖြတ်ချက်များ မချမှတ်နိုင်ကြောင်း၊ လူထုနှစ်သက်သည့် ခေါင်းဆောင်ထက် ပါတီခေါင်းဆောင်များ လိုလားသည့် ကိုယ်စားလှယ်များသာ လွှတ်တော်အတွင်း ရောက်ရှိရန် အခွင့်အလမ်းများကြောင်း သုံးသပ်ပြောကြားသည်။

ဒုတိယဗိုလ်မှူးကြီး ရဲနိုင်ဦးက “အများဆုံးနိုင်သူယူစနစ်က အများစုရဲ့ဆန္ဒကို အလွယ်ကူဆုံး ဖော်ထုတ်တဲ့နည်းလမ်း ဖြစ်ပါတယ်။ ကျွန်တော်တို့နိုင်ငံနဲ့ အကျွမ်းဝင်တဲ့ စနစ်လည်းဖြစ်ပါတယ်။ အချိုးကျကိုယ်စားပြု စနစ်ကတော့ ပိုမိုရှုပ်ထွေးပါတယ်။ မဲဆန္ဒရှင်တွေ မဆိုထားနဲ့ နိုင်ငံရေးသမားတွေ၊ ဥပဒေပညာရှင်တွေပင် နားလည်အောင် လေ့လာနေရဆဲ ဖြစ်တယ်လို့ ယူဆပါတယ်” ဟု ပြောကြားသည်။

ပီအာရ်အချိုးကျ ကိုယ်စားပြုစနစ်သည် သိမ်မွေ့နက်နဲသည့်အတွက် နိုင်ငံများသည် ၎င်းတို့ဖွဲ့စည်းပုံနှင့် ကိုက်ညီသည့် ပီအာရ်စနစ်ကိုသာ ရွေးချယ်အသုံးပြုကြကြောင်း၊ မြန်မာနိုင်ငံတွင် ကျင့်သုံးမည်ဆိုပါက နိုင်ငံရေး သမိုင်းကြောင်းနှင့် ဖွဲ့စည်းပုံ အခြေခံဥပဒေများနှင့် ကိုက်ညီသည့် စနစ်တစ်ရပ်ကိုသာ ရွေးချယ်ကျင့်သုံး ရမည်ဖြစ်ကြောင်း၊ ပီအာရ်စနစ်သည် ရွေးချယ်ခံကိုယ်စားလှယ်များနှင့် မဲဆန္ဒရှင်ပြည်သူများ ကျယ်ကျယ်ပြန့်ပြန့် နားလည်ရန်လိုအပ်ကြောင်း၊ သို့မှသာပြည်သူများက ကိုယ်စားလှယ်များကို မှန်ကန်စွာ ရွေးချယ်နိုင်မည်ဖြစ်ကြောင်း၊ ကိုယ်စားလှယ်များကလည်း မှန်ကန်စွာစည်းရုံး နိုင်မည်ဖြစ်ကြောင်း ကိုယ်စားလှယ်များက ဆွေးနွေးကြသည်။

လက်ရှိတွင် အမျိုးသားလွှတ်တော်၌ တိုင်းနှင့်ပြည်နယ် ၁၄ ခုမှ ကိုယ်စားလှယ် ၁၂ ဦးစီဖြင့် ၁၆၈ ဦး၊ တပ်မတော်သား ကိုယ်စားလှယ် ၅၆ ဦးဖြင့် ဖွဲ့စည်းထားခြင်းဖြစ်ကြောင်း၊ တိုင်းဒေသကြီး၊ ပြည်နယ်များတွင် ၀ ဒသမ ၁ ရာခိုင်နှုန်းဖြင့် တိုင်းရင်းသားရေးရာ ၀န်ကြီးများ ခန့်အပ်ထားခြင်းနှင့် ကိုယ်ပိုင်အုပ်ချုပ်ခွင့်ရ တိုင်းများတွင် ဦးစီးအဖွဲ့များ ဆောင်ရွက်ခဲ့ကြောင်း၊ ပီအာရ်အချိုးကျ ကိုယ်စားပြုစနစ်ဖြင့် ဆောင်ရွက်ပါက အထက်ပါ အခွင့်အရေးများကို မည်သို့ဆောင်ရွက်မည်ကို ပြန်လည်သုံးသပ်ရမည်ဟု ထင်မြင်မိကြောင်း တပ်မတော်သားလွှတ်တော် ကိုယ်စားလှယ်များက ဆွေးနွေးခဲ့ကြသည်။

အမျိုးသားလွှတ်တော် ကိုယ်စားလှယ် ဒေါက်တာဗညားအောင်မိုးက “ပီအာရ်စနစ်အတွက် စဉ်းစားစရာ နှစ်ခုရှိတယ်လို့ မြင်ပါတယ်။ တစ်ခုကပါတီတွေ ပေါများလာမယ်။ နောက်တစ်ခုက ပါတီငယ်တွေ ဖျောက်ပစ်ဖို့အတွက် ဒီစနစ်ကို ကျင့်သုံးတယ်လို့ ယူဆနိုင်တယ်။ ပီအာရ်စနစ်က အနာဂတ်မှာတော့ အကျိုးရှိနိုင်ပါတယ်။ လက်ရှိမှာတော့ အသုံးမပြုသင့်သေးဘူးလို့ ယူဆပါတယ်” ဟု ဆွေးနွေးခဲ့သည်။

တပ်မတော်သား ကိုယ်စားလှယ် ဗိုလ်မှူးတိုးမင်းထွန်းက “ပီအာရ်စနစ်ကျင့်သုံးဖို့က အချိန်ယူပြီး ကျယ်ကျယ်ပြန့်ပြန့် ဆောင်ရွက်ရမယ်လို့ ယူဆပါတယ်။ ဒီမိုကရေစီ လျှောက်လှမ်းစအချိန် ဖြစ်တဲ့အတွက် ကျင့်သုံးရန် မသင့်သေးပါဘူး။ အခုအဆိုကို ဆိုင်းငံ့ထားသင့်ပါတယ်။ သင့်တော်တဲ့အချိန်ရောက်မှ ပြန်စဉ်းစားသင့်ပါတယ်” ဟု ဆွေးနွေးသည်။

“ဒီအဆိုကတော့ ဆိုင်းငံ့ထားသင့်ပါတယ်။ ဖွဲ့စည်းပုံအခြေခံ ဥပဒေနဲ့လည်း ဆန့်ကျင်နေတဲ့အတွက် အဆိုအောင်ရင်တောင် လုပ်လို့မရနိုင်ပါဘူး။ ဖွဲ့စည်းပုံကိုပါ လိုက်ပြင်ရမှာဖြစ်ပါတယ်။ ပီအာရ်စနစ်သုံးမယ်ဆိုရင် လူနည်းစုတွေအတွက် ပါတီရှင်သန်ဖို့ မဖြစ်နိုင်ပါဘူး။ ကိုယ်စားလှယ်တွေ များလာတဲ့အတွက် မဲဆန္ဒရှင် ပြည်သူတွေအတွက် တာဝန်ခံမှု၊ တာဝန်ယူမှုတွေမှာ အခက်အခဲတွေ ရှိလာနိုင်တယ်။ နိုင်သူယူ စနစ်ကတော့ ရိုးရှင်းပါတယ်။ မဲဆန္ဒရှင်တွေအတွက် လွယ်ကူစွာ ရွေးချယ်နိုင်ပါတယ်။ ပီအာရ်စနစ်ကတော့ ရှုပ်ထွေးလွန်းလှပါတယ်။ နားလည်ဖို့မလွယ်သလို ကျင့်သုံးဖို့ မလွယ်ကူတဲ့ စနစ်ဖြစ်ပါတယ်” ဟု အမျိုးသားလွှတ်တော် ကိုယ်စားလှယ် ဦးဇုန်လှယ်ထန်းက ဆွေးနွေးသည်။

တပ်မတော်သား ကိုယ်စားလှယ် ဗိုလ်မှူးကျော်နိုင်ဌေးက နိုင်ငံနှင့် ကိုက်ညီသည့် ရွေးကောက်ပွဲစနစ်ရှိရန် အရေးကြီးကြောင်း၊ မဲဆန္ဒနယ်တစ်ခု ကိုယ်စားလှယ်တစ်ဦး ဖြစ်သည့်အတွက် ရိုးရှင်းလွယ်ကူကြောင်း၊ အချိုးကျစနစ်နှင့်ဆိုပါက ပါတီပေါင်းစုံ ဖြစ်သည့်အတွက် အခက်အခဲများစွာ ရှိလာနိုင်ကြောင်း၊ အရေးကြီးဆုံးဖြတ်ချက်များ ချမှတ်ရာတွင် အခက်အခဲများ ဖြစ်ပေါ်လာနိုင်ကြောင်း၊ အချိန်ကြန့်ကြာမှုများ ဖြစ်ပေါ်နိုင်ကြောင်း၊ တိုင်းရင်းသား ကိုယ်စားလှယ်များ နည်းပါးနိုင်ကြောင်း၊ ပီအာရ်စနစ်အတွက် အချိန်များစွာယူရန် လိုအပ်ကြောင်း၊ လက်ရှိစနစ် အတိုင်းသာ ကျင့်သုံးသင့်ကြောင်း ဆွေးနွေးသည်။

ဒေါ်ခင်ဝိုင်းကြည် တင်သွင်းခဲ့သည့် လာမည့်ပါတီစုံမည်သည့် ရွေးကောက်ပွဲများတွင်မဆို အမျိုးသား လွှတ်တော်အတွက် ကိုယ်စားလှယ်များ ရွေးချယ်ရာ၌ အချိုးကျကိုယ်စားပြုစနစ်ကို ကျင့်သုံးရန် လွှတ်တော်က အဆုံးအဖြတ်ပေးပါရန်နှင့် ဥပဒေပြင်ဆင်ရေး လုပ်ငန်းများကို လိုအပ်သလို ဆက်လက်ဆောင်ရွက်ပေးပါရန် အဆိုအား ဆွေးနွေးရန် ကိုယ်စားလှယ် ၂၅ ဦးစာရင်း ပေးသွင်းထားပြီး ဇွန် ၁၀ ရက် ပြုလုပ်မည့် အမျိုးသားလွှတ်တော် အစည်းအဝေးတွင် ဆက်လက်ဆွေးနွေး သွားမည်ဖြစ်ကြောင်း သိရသည်။

အမျိုးသားလွှတ်တော်ဥက္ကဋ္ဌ ဦးခင်အောင်မြင့်က “စနစ်နှစ်ခုကို နှိုင်းယှဉ်ဆွေးနွေးရမှာဖြစ်လို့ လေးနက်ပါတယ်။ ဆွေးနွေးတဲ့ နေရာမှာ ပါတီအကျိုးထက်၊ နိုင်ငံတော်နှင့် နိုင်ငံသားတွေ အကျိုးအတွက် စဉ်းစားရမှာဖြစ်ပါတယ်။ လွှတ်တော်ကိုယ်စားလှယ်တွေ အနေနဲ့ နိုင်ငံတော်အတွက် အမှန်တရားကို ရှာဖွေဆွေးနွေးရမှာ ဖြစ်ပါတယ်။ ဒါကြောင့် စနစ်ကိုသာ ဦးစားပေးဆွေးနွေးဖို့နဲ့ တစ်ပါးသူကို ပုတ်ခတ်ဆွေးနွေးခြင်းမပြုဖို့၊ နည်းဥပဒေနဲ့အညီ ဆွေးနွေးကြဖို့ မှာကြားလိုပါတယ်” ဟု ပြောကြားသည်။


Eleven Media Group