သရုပ်ဆောင် ရဲတိုက်ကို ဆေးခြောက်လက်ဝယ် တွေ့ရှိမှုဖြင့် ဖမ်းဆီး
ပို့စ်တင်ချိန်
-
7/05/2013 11:41:00 AM
တောင်ငူ၊ ဇူလိုင် ၄
သရုပ်ဆောင် ရဲတိုက်ကို ဆေးခြောက်များ လက်ဝယ်တွေ့ရှိမှုဖြင့် ပဲခူးတိုင်းဒေသကြီး ကျောက်တံခါး မြို့နယ် ရန်ကုန်-မန္တလေးလမ်းဟောင်းရှိ လက်ဖက်ရည်ဆိုင် တစ်ဆိုင်တွင် ဇူလိုင်လ ၄ ရက်နေ့ နံနက် ၃ နာရီက ဖမ်းဆီးခဲ့ကြောင်း ကျောက်တံခါးမြို့နယ် ရဲစခန်းမှ ရဲအရာရှိတစ်ဦးက ပြောကြားသည်။
လက်ဖက်ရည်ဆိုင် ထိုင်နေသည့် ရဲတိုက်ကို ရဲအရာရှိများက လာရောက်စစ်ဆေးခဲ့ရာ ၎င်း၏ ကျောပိုးအိတ် အတွင်းမှ ဆေးခြောက် တစ်ကျပ်သားခန့်ကို တွေ့ရှိခဲ့ကြောင်း အဆိုပါရဲ စခန်းတာဝန်ရှိသူတစ်ဦး၏ ပြောကြားချက်အရ သိရှိရသည်။
“ရဲတိုက်ကို ဆေးရုံမှာ သွေးစစ်နေတာကို တစ်မြို့လုံးက လူတွေသွားကြည့်ကြတယ်။ ရဲစခန်းဝင်းထဲမှာလည်း လူတွေအပြည့်ပဲ” ဟု ကျောက်တံခါးမြို့ခံ တစ်ဦးက ပြောကြားသည်။
ရဲတိုက်သည် တောင်ကြီးကို မော်တော်ဆိုင်ကယ်ဖြင့် သွားမည်ဟု ကြားသိရပြီး ကျောက်တံခါးမြို့နယ်ရှိ လက်ဖက်ရည်ဆိုင်တွင် အမူအရာများ မမှန်သဖြင့် နယ်ထိန်းရဲတပ်ဖွဲ့ဝင်များက စစ်ဆေးရာတွင် ဆေးခြောက်များ တွေ့ရှိခြင်းဖြစ်ကြောင်း ၎င်းကဆိုသည်။
ဆေးခြောက် လက်ဝယ်တွေ့ရှိမှုဖြင့် သရုပ်ဆောင်ရဲတိုက်ကို မ-ယ-ပ-၄/၂၀၁၃၊ မူးယစ်ဆေးဝါးနှင့် စိတ်ကိုပြောင်းလဲ စေတတ်သော ပြစ်မှုဆိုင်ရာ ဥပဒေပုဒ်မ ၁၅/၁၆(ဂ)/၂၁ ဖြင့် အမှုဖွင့်စစ်ဆေးလျက် ရှိကြောင်း အဆိုပါရဲစခန်းမှ စုံစမ်းသိရှိရသည်။
သရုပ်ဆောင်ရဲတိုက်သည် မေလ ၂၈ ရက်နေ့ မွန်းလွဲပိုင်းတွင် ဗိုလ်တထောင်မြို့နယ် စိန့်မေရီကာသီဒြယ် ဘုရားကျောင်းဝင်း အတွင်း ဝင်ရောက်ကာ ဆိုင်းဘုတ်ကိုင်ဆောင်၍ ဆန္ဒထုတ်ဖော်မှုများကြောင့် သာသနာ ညှိုးနွမ်းစေမှု (ပုဒ်မ၂၉၅ - က) ဖြင့် အမှုဖွင့်ခံရပြီး ရဲတိုက်က တောင်းပန်သဖြင့် တရားလိုအဖြစ် တိုင်ကြားခဲ့သူ စိန့်မေရီကာသီဒြယ် ဘုရားကျောင်း ဥက္ကဋ္ဌက အမှုကြေအေးပေးခဲ့ပြီး ဗိုလ်တထောင်မြို့နယ် တရားရုံးက ကျပ်ငါးသိန်းဖြင့် ခံဝန်ကတိထိုးကာ အာမခံပေးခဲ့သည်။
The Voice Weekly
