ဆိုလာစွမ်းအင်သုံးကာ ဘက်ထရီအားသွင်းရာမှ ဓာတ်လိုက်သေဆုံး

ပို့စ်တင်ချိန် - 10/22/2013 04:42:00 PM



စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်၊ သံဘိုကျေးရွာတွင် နေရောင်ခြည်စွမ်းအင်သုံး ဆိုလာပြားမှ ဆိုလာစွမ်းအင် သုံးကာ ဘက်ထရီအိုး အားသွင်းရာမှ လူတစ်ဦး ဓာတ်လိုက်သေဆုံးခဲ့ကြောင်း ခင်ဦးမြို့နယ် ပြည်သူ့ဆေးရုံကြီးမှ တာဝန်ကျဝန်ထမ်းတစ်ဦးက အောက်တိုဘာလ ၂၁ ရက်က ပြောသည်။

သေဆုံးသူ၏ မိသားစုဝင်များ ပြောပြချက်များအရ အသက် ၂၆နှစ်အရွယ် ကိုမင်းသည် အောက်တိုဘာလ ၁၇ ရက်က ဆိုလာစွမ်းအင်ကိုသုံးကာ ဘက်ထရီအိုးအားသွင်းရန် ချိတ်ဆက်နေစဉ် ဓာတ်လိုက်ခဲ့ခြင်းဖြစ်သည်ဟု ဆိုသည်။

သက်ဆိုင်ရာ၏ စစ်ဆေးချက်များအရ ဓာတ်လိုက်သေဆုံးသူ၏ ဘယ်ဘက်လက်ညှိုးနှင့် လက်ခလယ်တို့အကြား နေရာ၌ အရေပြားဖူးယောင်ဒဏ်ရာများ ရရှိခဲ့သည်ဟု သိရသည်။

ထိုသို့ ဓာတ်လိုက် လူသေဆုံးခြင်းအား ခင်ဦးမြို့မရဲစခန်းက သေမှုသေခင်းအမှတ်စဉ် ၉/ ၂၀၁၃ အရ အမှုဖွင့် ဆောင်ရွက်နေသည်ဟု သိရသည်။

ယင်းကဲသို့ဖြစ်စဉ်များ ဒေသတွင်း၌ ထပ်မံပေါ်ပေါက်ခြင်း မရှိစေရန် နေရောင်ခြည်စွမ်းအင်သုံး ဆိုလာပြားများ သုံးစွဲရာတွင် ဓာတ်လိုက်မှု မရှိစေရန် ပညာပေး ဟောပြောမှုများလည်း ပြုလုပ်ခဲ့သည်။

လျှပ်စစ်မီးမရရှိသော နယ်မြို့များတွင် နေရောင်ခြည်စွမ်းအင်သုံး ဆိုလာပြားများကို အဓိက သုံးစွဲလျက်ရှိ နေသည်။
Mizzima - News in Burmese