မနက်ဖြန်

ပို့စ်တင်ချိန် - 11/22/2013 12:19:00 PM


(ဆောင်းပါးရှင် - မောင်ကြည်)

(၁)
ကျွန်တော်တို့ ငယ်ငယ်တုန်းက သင်ခဲ့ရသည့် ပုံပြင်တစ်ပုဒ် ရှိပါသည်။ အဘိုးအို တစ်ယောက်က ပျိုးပင်ပေါက်လေးတွေကို စိုက်ပျိုးနေသည်။ နန်းတော်ထဲမှ တောကစား ထွက်လာသည့် မင်းသားလေး တစ်ပါးက အဘိုးအိုကို မြင်သွားသောအခါ မြင်းပေါ်မှ ဆင်းကာ "အဘိုး ဘာတွေစိုက်နေတာလဲ" ဟု မေးလေသည်။ အဘိုးအိုက "ပျိုးပင်လေးတွေ စိုက်နေတာပါ" ဟု ပြန်ဖြေသည်။

"အဘိုးရယ် ဒီအပင်တွေ ကြီးလာတဲ့အထိ အဘိုးအသက်ရှည် နိုင်ပါ့မလား။"

"အဘိုးက ဒီအပင်တွေကို အဘိုးအတွက် စိုက်နေတာ မဟုတ်ပါဘူး။ နောင်လာ နောက်သားတွေအတွက် စိုက်နေတာပါ" နောင်မျိုးဆက်တွေ အရိပ်ခိုဖို့ အသီးစားဖို့ ရည်ရွယ်ချက်ဖြင့် အနာဂတ်ကို မျှော်တွေးကာ အဘိုးအိုက ထိုကဲ့သို့ ပြန်ဖြေလိုက်ခြင်း ဖြစ်ပါသည်။ အဘိုးအိုရဲ့ ခေါင်းထဲမှာ မနက်ဖြန်ဆိုတဲ့ အတွေးတစ်ခု ရှိနေပုံပါပဲ။

(၂)
တစ်ခါတုန်းက ကဗျာဆရာ မောင်ချောနွယ်က ဟောဒီလို ပြောခဲ့ဖူးပါသည်။ "တစ်နေ့ ဟုတ်ပါတယ်။ ကျွန်တော့်ဘက်မှာ တစ်နေ့ဆိုတာပဲ ရှိပါတယ်။ တစ်နေ့ဆိုတာကိုပဲ ကျွန်တော် အပြင်းအထန် ယုံကြည်ပါတယ်" တဲ့။ တကယ်တော့ ကဗျာဆရာ ယုံကြည်တဲ့ တစ်နေ့ဆိုတာ "မနက်ဖြန်" ကို ပြောတာပါပဲ။

ထီဆိုင်မှာ ထီထိုးနေတဲ့ လူတစ်ယောက်ရဲ့ ခေါင်းထဲမှာ "မနက်ဖြန်" ရှိသည်။ သမီးလက်ကိုဆွဲကာ ကျောင်းလိုက်ပို့နေသော ဖခင်တစ်ယောက်ရဲ့ ရင်ထဲမှာ "မနက်ဖြန်" ရှိသည်။ တပည့်တို့ကို စာသင်ပေးနေသော ကျောင်းဆရာ တစ်ယောက်ရဲ့ စိတ်ကူးထဲမှာ "မနက်ဖြန်" ရှိသည်။ မင်္ဂလာဧည့်ခံပွဲ ကျင်းပနေသော ဇနီးမောင်နှံရဲ့ အတွေးထဲမှာ "မနက်ဖြန်" ရှိသည်။ သားငယ်ကို နို့ချိုတိုက်ကျွေးနေသော မိခင်တစ်ယောက်ရဲ့ နှလုံးသားထဲမှာ "မနက်ဖြန်" ရှိသည်။ စာမေးပွဲဖြေဖို့ စာကျက်နေသော ကျောင်းသားတစ်ယောက်ရဲ့ စိတ်ထဲမှာ "မနက်ဖြန်" ရှိသည်။ ကျွန်တော်တို့ အားလုံးမှာ မနက်ဖြန်တွေ ကိုယ်စီရှိကြပါသည်။
"မနက်ဖြန်" သာ မရှိတော့ဘူးဆိုရင် ဒီနေ့ကျွန်တော်တို့ အသက်ရှင်နေတာဟာ သေတာနဲ့ ဘာမှမခြားတော့ပါဘူး။

(၃)
ကျွန်တော်တို့ လက်ရှိရောက်နေတဲ့ "ဒီနေ့" ဆိုတဲ့ အချိန်ကာလဟာ သူ့ချည်းသက်သက် ရပ်တည်လို့ မရပါဘူး။ သူ့ကို ချိတ်ဆက်ထားတဲ့ စကားလုံးနှစ်လုံး ရှိပါသည်။ "မနေ့က" ဆိုတဲ့ စကားလုံးနဲ့ "မနက်ဖြန်" ဆိုတဲ့ စကားလုံးတွေပါပဲ။ "ဒီနေ့" ဆိုတဲ့ အချိန်ကာလကို ရောက်ဖို့ "မနေ့က" ဆိုတဲ့ အချိန်ကာလကို ဖြတ်သန်းခဲ့ရ ပါသည်။ ပြီးတော့ "မနက်ဖြန်" ဆိုတဲ့ အချိန်ကာလကလည်း "ဒီနေ့" ဆိုတဲ့ အချိန်ကာလကို ဖြတ်ကျော်ဖို့ စောင့်ကြိုနေပါသည်။

တကယ်တော့ "ဒီနေ့" ဟာ "မနေ့က" ရဲ့ သမိုင်းပါ။ ဒါကြောင့် "ဒီနေ့" ဟာလည်း "မနက်ဖြန်" ရဲ့သမိုင်း ဖြစ်လာဦးမှာပါ။ "မနေ့က" ကောင်းမှ "ဒီနေ့" ကောင်းမည်။ "ဒီနေ့" ကောင်းမှ "မနက်ဖြန်" ကောင်းမည် မဟုတ်ပါလား။ မနက်ဖြန်ပေါင်းများစွာ လှပဖို့ အရေးကြီးပါတယ်။

(၄)
"မနက်ဖြန်" မှာ နာမည်တွေ အများကြီး ရှိပါသည်။ တချို့က မနက်ဖြန်ကို "အနာဂတ်" လို့ ပြောသည်။ တချို့က "မျှော်လင့်ချက်" လို့ ပြောသည်။ တချို့က "အိပ်မက်" လို့ ပြောသည်။ တချို့က "စိတ်ကူး" လို့ ပြောသည်။ တချို့က "ရည်မှန်းချက်လို့ ပြောသည်။ တချို့က "ပန်းတိုင်" လို့ ပြောသည်။

ဗုဒ္ဓမြတ်စွာက ပစ္စုပ္ပန်မှာ သတိနဲ့နေဖို့ ဆုံးမတော် မူခဲ့ပါသည်။ ပစ္စုပ္ပန်ကို ကောင်းကောင်းနေခိုင်းတာ အနာဂတ်ကို ပိုကောင်းစေချင်လို့ပါ။ ဒီနေ့ကို ကောင်းကောင်းနေခိုင်းတာ မနက်ဖြန်ကို ပိုကောင်းစေချင်လို့ပါ။ "မနက်ဖြန်" ကို မျှော်တွေးပြီး "ဒီနေ့" ကို ကောင်းကောင်းနေခိုင်းတဲ့ သဘောပါပဲ။ တစ်ရက်ကို တစ်ဘ၀နဲ့ နှိုင်းယှဉ်ပြီး ပြောရလျှင် "မနေ့က" ဆိုတာ ကျွန်တော်တို့ လာခဲ့တဲ့ အတိတ်ဘ၀။ ဒီနေ့က ယခုရောက်ရှိနေတဲ့ ပစ္စုပ္ပန်ဘ၀။ မနက်ဖြန်ကတော့ နောင်လာမယ့် အနာဂတ် ဘ၀ပေါ့။ မြတ်စွာဘုရားက "မနက်ဖြန်" ဆိုတဲ့ နောင်ဘ၀ကောင်းဖို့ ယခုဘ၀မှာ ကောင်းကောင်းလေး နေခိုင်းတဲ့ သဘောပါပဲ။

ကျွန်တော်တို့ ဒီနေ့ဘာလုပ်နေလဲ ဆိုတာကို မနက်ဖြန်က ပြောပြပါလိမ့်မည်။

(၅)
"ဒီနေ့ ရောင်းရငွေသည် မနက်ဖြန်အတွက် အရင်းဖြစ်သည်" ဆိုတဲ့ ဆိုင်းဘုတ်လေးကို တချို့ဈေးဆိုင်တွေမှာ တွေ့ဖူးကြပါလိမ့်မည်။ ၎င်းစာတန်းလေးမှာ တွေးစရာတွေ သတိပြု ဆင်ခြင်စရာတွေ ပါသည်ဟု ကျွန်တော်ထင်ပါသည်။ ဒီနေ့ကို "အကြောင်း"၊ မနက်ဖြန်ကို "အကျိုး" လို့ သဘောထားပြီး ချိတ်ဆက်ထားခြင်း ဖြစ်ပါသည်။ အကြောင်းကောင်းမှ အကျိုးကောင်းမည်။ ထို့ကြောင့် ဒီနေ့ကောင်းမှ မနက်ဖြန် ကောင်းမည်ဟု ၎င်းဆိုင်းဘုတ်လေးက သတိပေးနေသလို ဖြစ်နေပါသည်။

ထိုဆိုင်းဘုတ်လေးနှင့် ဆက်စပ်ပြီး လက်ရှိကျွန်တော်တို့ မြန်မာနိုင်ငံရဲ့ အရေးကိုလည်း တွေးတောနေမိပါသည်။ နှစ်ပေါင်း ၅၀ ခန့် အာဏာရှင်တွေ ဖန်တီးခဲ့တဲ့ အတိတ်သမိုင်းဆိုးရဲ့ အမွေကို ဒီနေ့ ယခုလက်ရှိ ကျွန်တော်တို့ ပြည်သူတွေ ကောင်းကောင်းခံစား နေရပြီ မဟုတ်ပါလား။ "မနေ့က" ရဲ့ အကျိုးဆက်ကို "ဒီနေ့" မှာ ပြည်သူတွေ အလူးအလဲ ခံစားနေကြရပါသည်။ ပျိုးပင်ပေါက် စိုက်ပျိုးနေတဲ့ အဘိုးအိုလို မဟုတ်ဘဲ "မနက်ဖြန်" ကို ထည့်မတွက်ခဲ့သူ တစ်စုကြောင့် အနာဂတ် မျိုးဆက်တွေရဲ့ ဘ၀ဟာ အရိပ်မဲ့ ကွင်းပြင်ထဲမှာ နေပူပူ ကျောပူပူနဲ့ ဘ၀တွေ မွဲတေဆင်းရဲ ခဲ့ကြရပါသည်။

တိုင်းပြည်တစ်ခုကို ပဲ့ကိုင်ကာ မောင်းနှင်နေသူတို့သည် "မနက်ဖြန်" ကို ကြိုမတွေးထားသမျှ ကာလပတ်လုံး ကျွန်တော်တို့ ပြည်သူတွေရဲ့ ဘ၀ဟာ ဒီကနေ့ ခံစားနေရသလိုမျိုး ခေတ်အဆက်ဆက်မှာ ခံစားနေကြရ ဦးမှာပါ။ ထို့ကြောင့် ယခု "ပစ္စုပ္ပန်" အချိန်ကာလမှာ အတိတ်ရဲ့ အမှားအယွင်းတွေကို သတိပြု ဆင်ခြင်ကာ ပြန်လည်ပြုပြင်ပြီး ခရီးဆက်ကြမှသာ ပြည်သူတွေရဲ့ "မနက်ဖြန်" ပေါင်းများစွာ သာယာလှပ လာကြလိမ့်မည်ဟု ယုံကြည်မိပါသည်။
Eleven Media Group