ချစ်သူနဲ့ အိမ်ထောင်ဖက် တစ်ထပ်တည်းဖြစ်ချင်တဲ့ နေတိုး
ပို့စ်တင်ချိန်
-
6/27/2014 01:47:00 PM
"အိမ်ထောင်ရေးနဲ့ ပတ်သက်ပြီး မေးလာတဲ့အခါ အိမ်ထောင်ပြုသင့်တဲ့ အနေအထား တစ်ခုကို ရောက်နေပြီဆိုတာ သိပါတယ်။ ဒါပေမဲ့ ကျွန်တော့်မှာ ချပြစရာမရှိဘူး။ ကျွန်တော် အိမ်ထောင်တော့ပြု မှာပါ။ အချိန်သတ် မှတ်ထား တာတော့ မရှိပါဘူး။ ဖူးစာပါလာတဲ့ အချိန်ပေါ့။ အချစ်ရှိခဲ့ဖူးလား ဆိုရင် ရှိခဲ့ဖူး တယ်။ အခုရှိလားဆိုရင် ရှိနေတယ်။ ကျွန်တော် အိမ်ထောင်ပြုတာနဲ့ အချစ်ရေး ချပြမှုက တစ်ကြိမ် တည်းဖြစ်ချင်တယ်။ ကိုယ့်ရဲ့ချစ်သူနဲ့ အိမ်ထောင်ဖက်က တစ်ထပ်တည်းဖြစ်ချင်တယ်"လို့ အချစ်ရေးနဲ့ပတ်သက်ပြီး မေးမြန်းမှု ကို နေတိုး က ပြန်လည်ဖြေကြားခဲ့ပါတယ်။
အခု လက်ရှိမှာတော့ နေတိုးက ခင်ဝင့်ဝါနဲ့ "အိုလင်းတစ္ဆေ" ဆိုတဲ့ ဇာတ်ကားကို ရိုက်ကူးနေပါ တယ်။ ဒီဇာတ်ကား ကတော့ သရဲ အကြောင်းကို အခြေခံပြီး လူငယ် ဟာသဇာတ်လမ်း ပုံစံလေး ရိုက်ကူး ထားတာ ဖြစ်ပါတယ်။ "သရဲ ဝတ္ထုလေးတွေ ရေးပြီး အောင်မြင်စပြုနေတဲ့ စာရေးဆရာ တစ်ယောက် ပုံစံ မျိုးလေးကို ရိုမန့်နဲ့ ဟာသပုံစံလေး ရိုက်ထားတာ။ သရဲကို ပြချင် တာတော့ မဟုတ်ဘူး။ လူတွေရဲ့ ကြောက်စိတ်ကနေ ဖြစ်လာတာမျိုးကို ပြချင်တာ။ ဇာတ်က "အိုလင်းတစ္ဆေ"ဆိုတဲ့ ခေါင်းစဉ်ကို ဖတ်ကတည်းက စိတ်ဝင်စား ခဲ့တာ။ ဗီဒီယိုတွေက ခေတ်နဲ့အလိုက် ပတ်ဝန်း ကျင်မှာ လူတွေနဲ့ ဆက်နွှယ်နေတဲ့ အခြေခံအပေါ် မူတည်ပြီး ဇာတ်လမ်းမျိုး ကို ရိုက်ဖြစ်လာ တယ်။ ပရိသတ်တွေ ရဲ့ စိတ်ဝင်စားမှုတွေ ရှိတဲ့ လူမှု ပတ်ဝန်းကျင်က ပုံစံတွေ ကို ဇာတ်တည် ဆောက်ပြီး ရိုက်ဖို့ လုပ်ထားတာတွေရှိတယ်"လို့ ရိုက်ကူးနေတဲ့ ဇာတ်ကားနဲ့ပတ်သက်ပြီး နေတိုးက ပြောပြပါတယ်။
၁၇ နှစ်ပြည့် ပေါ်ပြူလာဂျာနယ် အတွက် အမှတ်တရ စကားအနေ နဲ့ လည်း နေတိုးက "ပေါ်ပြူလာ ဂျာနယ် ဆိုတာ ကျွန်တော့် ရဲ့အနုပညာ သက် တမ်းလောက်ရှိတယ်။ ကျွန်တော် အနုပညာလောကကို စရောက်ကတည်းက ပရိသတ်တွေ နဲ့ ထိတွေ့ခွင့်ရခဲ့တယ်။ ပေါ်ပြူလာ ဂျာနယ်ရဲ့ စာမျက်နှာတွေ ကနေ ပရိသတ်တွေကို ပြောချင်တာတွေ ပြောခွင့်ရ ခဲ့တယ်။ ကျွန်တော်တို့ရဲ့ အနုပညာ ဘဝဖြတ်သန်းမှု တစ်စိတ်တစ်ဒေသ ကနေ အရေးကြီးတဲ့ အခန်း ကဏ္ဍ ကနေ ပါဝင်ခဲ့တဲ့ ဂျာနယ် တစ်စောင်ဖြစ်တယ်လို့လည်း ယူဆမိတယ်။ အခုလို ၁၇ နှစ်ပြည့်သွားပြီ ဆိုတော့ တအား အံ့သြသွားတယ်။ ၁၇ နှစ်ဆိုတဲ့ အတိုင်းအတာက အချိန်တော်တော် ကြာခဲ့ပြီး ဒီ ၁၇ နှစ်တိုင်အောင် ထိပ်ဆုံးနေရာ မှာ ရှိနေနိုင်တဲ့ အတွက်လည်း အနုပညာရှင် တစ်ယောက် အနေနဲ့ ဂုဏ်ယူ မိသလို ပေါ်ပြူလာရဲ့ စာဖတ် ပရိသတ်တစ် ယောက် အနေ နဲ့လည်း ကျေနပ်မိတယ်။ ဒီထက်မက ပေါ်ပြူလာရဲ့ သက်တမ်း၊ ပေါ်ပြူလာရဲ့ လုပ်ဆောင်ချက်တွေ ဆန်းသစ်ပြီး ပြည်သူ ပရိသတ်တွေ အတွက် အကျိုးရှိတဲ့ ကဏ္ဍတွေ လုပ်နိုင်ပါစေလို့ ဆုတောင်းပေးပါတယ်"လို့ ဆုတောင်းစကား ဆိုပါတယ်။
မေမွန်မောင်၊
ဓာတ်ပုံ-မင်းမင်းထွန်း
Popular Journal
