ပေါက်တောမြို့က အန်ဂျီအိုတွေ ထွက်ခွာ

ပို့စ်တင်ချိန် - 11/07/2013 01:10:00 PM


ရခိုင်ပြည်နယ် ပေါက်တောမြို့တွင် အခြေစိုက် လှုပ်ရှားနေကြသည့် နိုင်ငံတကာ အန်ဂျီအို (၃) အဖွဲ့  ထွက်ခွာသွားကြပြီ ဖြစ်ကြောင်း ပေါက်တောမြို့နယ် ပြည်နယ်လွှတ်တော် ကိုယ်စားလှယ် ဦးတက်ထွန်းအောင်က ပြောသည်။

ထွက်ခွာသွားကြသော နိုင်ငံတကာ အန်ဂျီအိုများမှာ မာတေဇာ၊ Save the children နှင့် နိုင်ငံတကာ ကြက်ခြေနီ အဖွဲ့ဖြစ်ကြောင်း ဦးတက်ထွန်းအောင်က အတည်ပြု ပြောကြားသည်။

“ သူတို့ရုံးတွေကို ပြန်အပ်ပြီး မနေ့ကတည်းက ထွက်သွားကြတာ ဖြစ်တဲ့ အတွက် အပြီးအပိုင် ထွက်သွားကြတာ ဖြစ်တယ်လို့ ယူဆလို့ ရပါတယ်” ဟု ၎င်းက ဆက်ပြောသည်။

ယခုကဲ့သို့ ထွက်ခွာသွားကြသည်မှာ ပေါက်တောမြို့ခံများက အန်ဂျီအိုများကို လက်မခံကြောင်း ကြေငြာချက် ထုတ်ပြန်သည့်အတွက် ဖြစ်နိုင်ကြောင်း ပေါက်တောမြို့ခံ တစ်ဦးက ယခုကဲ့သို့ ပြောသည်။

“ ကျွန်တော်တို့ ပေါက်တောမှာ မြို့သူ မြို့သားတွေက အောက်တိုဘာလ ၃ ရက်နေ့ကတည်းက အန်ဂျီအိုတွေ ကို မြို့ပေါ်မှာ ရုံးစိုက်ပြီး လှုပ်ရှားတာကို လက်မခံတော့ဘူးလို့ စာထုတ်တယ်။ ပေါက်တောမှာရှိတဲ့ အန်ဂျီအို တွေ ၂ ရက်အတွင်း ထွက်သွားကြဖို့တောင်းဆိုတဲ့အတွက် သူတို့ ထွက်သွားကြတာ ဖြစ်နိုင်ပါတယ်” ဟု ဆိုသည်။

နိုဝင်ဘာလ ၃ ရက်နေ့က ပေါက်တောမြို့ သာသနာ့ဗိမာန်တော်ကြီးတွင် ပေါက်တော မြို့သူ မြို့သားများက လူထုအစည်းအဝေးတရပ်ကျင်းပပြီး အချက် ၉ ချက်ပါ ကြေငြာချက်တစ်စောင် ထုတ်ပြန်ခဲ့သည်။

အဆိုပါ ထုတ်ပြန်ချက်များထဲတွင် ပေါက်တောမြို့နယ်အတွင်း ဒေသခံများမဟုတ်သော NGO- INGO များအတွက် အိမ်းငှားရမ်းမှုကို ကန့်ကွက်ကြောင်း၊ ဒေသအတွင်း ဒေသခံများမဟုတ်သော နိုင်ငံတကာ အန်ဂျီအိုများ (၂) ရက်အတွင်း ထွက်ခွာသွားကြရန် တောင်းဆိုကြောင်း၊ ယင်းပြင် လတ်တလော ဖြစ်ပွားခဲ့သော ဆင်တက်မော်ပြဿနာတွင် ရက်စက်စွာသတ်ဖြတ်ခံရသည့် ဌာနေ ရခိုင်လူနာများအား ICRC မှ ခွဲခြားပစ်ပယ် ဆက်ဆံမှုကို လုံးဝကန့်ကွက်ကြောင်း ဖေါ်ပြသည့် အချက်များ ပါဝင်သည်။
(နိရဉ္စရာ- ၆ နိုဝင်္ဘာ ၂၀၁၃) / မောင်အေး