Mister And Miss University ပြိုင်ပွဲဝင် ကောင်းမြတ်ဟိန်း ရေကူးကန်တွင် ရုတ်တရက်သေဆုံး
ပို့စ်တင်ချိန်
-
1/23/2014 05:49:00 PM
ရန်ကုန်၊ ဇန်နဝါရီ ၂၂
မြန်မာနိုင်ငံအတွင်းရှိ တက္ကသိုလ် အသီးသီးမှ စံပြမောင်မယ်များ ပေါ်ထွက်လာစေရေးကို ရည်ရွယ်၍ စီစဉ်ပြုလုပ်မည့် Mister And Miss University ပြိုင်ပွဲ၏ နောက်ဆုံးအဆင့်တွင် ဝင်ရောက် ယှဉ်ပြိုင်ရန် ရွေးချယ်ခံထားရသည့် ရန်ကုန် အနောက်ပိုင်းတက္ကသိုလ် ကိုယ်စားပြု ဒုတိယနှစ် တက္ကသိုလ် ကျောင်းသား ကောင်းမြတ်ဟိန်းသည် ပြိုင်ပွဲအတွက် စခန်းသွင်း လေ့ကျင့်နေသည့် City Golf Resort ဟိုတယ်၏ ရေကူးကန်တွင် ရုတ်တရက် ကွယ်လွန်သွားခဲ့ကြောင်း August Myanmar Media Group မှ CEO ဦးရဲမြန်မာအောင်က The Voice သို့ ပြောကြားသည်။
ဇန်နဝါရီလ ၂၂ ရက် ည ၁၂ နာရီကျော်အချိန်၌ ကောင်းမြတ်ဟိန်း၏ အလောင်းကို City Golf Resort ဟိုတယ်၏ ရေကူးကန်တွင် ဟိုတယ် လုံခြုံရေးများက တွေ့ရှိခဲ့ခြင်း ဖြစ်ကြောင်း၊ ယင်းနေ့ညမှာ စခန်းသွင်း လေ့ကျင့်သည့် နောက်ဆုံးည ဖြစ်သည့်အတွက် ပြိုင်ပွဲဝင်များကို ပါတီတစ်ခု ကျင်းပပေးခဲ့ပြီး ယင်းပါတီသို့လည်း ကောင်းမြတ်ဟိန်း ပါမလာခဲ့ကြောင်း၊ ယခင်နေ့များတွင်မူ ညစဉ် ၁၀ နာရီတွင် ပြိုင်ပွဲဝင်များကို စစ်ဆေးလေ့ ရှိသော်လည်း ယင်းနေ့တွင်မူ ပါတီပွဲမှာ ညဥ့်နက်မှ ပြီးဆုံးသည့်အတွက် မစစ်ဆေးဖြစ်ခဲ့ခြင်း ဖြစ်ကြောင်း၊ ကောင်းမြတ်ဟိန်း သေဆုံးမှုကို CID မှ တာဝန်ရှိသူများက စစ်ဆေးနေဆဲ ဖြစ်သည့်အတွက် သေဆုံးရသည့် အကြောင်းအရင်းကို မသိရသေးကြောင်း ၎င်းက ထပ်လောင်းပြောကြားသည်။
“ကောင်းမြတ်တဲ့ ရည်ရွယ်ချက်တွေနဲ့ ကျင်းပမယ့် ပြိုင်ပွဲတစ်ခုမှာ မမျှော်လင့်တဲ့ ကံကြမ္မာဆိုး တစ်ခုကြောင့် ဒီလိုအဖြစ်အပျက် မျိုးဖြစ်ပွားလာတဲ့အတွက် ပြိုင်ပွဲဝင် ကောင်းမြတ်ဟိန်းရဲ့ မိသားစုနဲ့ ထပ်တူ ကျွန်တော်တို့တွေလည်း အရမ်းဝမ်းနည်းရပါတယ်။ ပြိုင်ပွဲရဲ့ နောက်ဆုံး Final ပွဲစဉ်ကို ဇန်နဝါရီလ ၂၄ ရက်နေ့ အမျိုးသားကဇာတ်ရုံမှာ ပြုလုပ်ဖို့ စီစဉ်ထားပေမယ့် ပြိုင်ပွဲဝင်တွေ အားလုံးရဲ့ သဘောတူညီချက်နဲ့ ပြိုင်ပွဲကို ရက်ရွှေ့လိုက်ပါတယ်” ဟု ဦးရဲမြန်မာအောင်က ဆိုသည်။
အနောက်ပိုင်း တက္ကသိုလ်တွင်၊ ဒုတိယနှစ် အင်္ဂလိပ်စာမေဂျာ အထူးပြုနှင့် ပညာသင်ကြားနေသူ Mister And Miss University ပြိုင်ပွဲဝင် ကောင်းမြတ်ဟိန်း (အမည်ရင်း ကျော်ဇောဟိန်း) သည် အသက် ၂၀ အရွယ်တွင် ကွယ်လွန်ခဲ့ခြင်း ဖြစ်ပြီး ၎င်း၏ ရုပ်အလောင်းကို ဇန်နဝါရီလ ၂၅ ရက်နေ့၊ မွန်းလွဲ၂ နာရီအချိန်တွင် ရေဝေး သုသာန်၌ မီးသင်္ဂြိုဟ်မည် ဖြစ်ကြောင်း၊ ကောင်းမြတ်ဟိန်းသည် တက္ကသိုလ်ဝင်တန်း အောင်ပြီးကတည်းက မော်ဒယ်လ်လောကသို့ ဝင်ရောက်ပြီး အနုပညာ အလုပ်များကို လုပ်ကိုင်ခဲ့ကြောင်း ကောင်းမြတ်ဟိန်း၏ အစ်မဖြစ်သူ မစိုးယုမော်က ပြောကြားသည်။
The Voice Weekly
