ဧရာဝတီ မြစ်ကြောင်း သဲသောင် ပိုထွန်း

ပို့စ်တင်ချိန် - 1/20/2014 06:08:00 PM


ညောင်ဦးမြို့နယ် ပုဂံမြို့နားက ဧရာဝတီ မြစ်ပေါ်မှာ သောင်တွေ ပိုထွန်းလာတဲ့အတွက် ရေကြောင်း သွားလာရေးမှာ အခက်အခဲဖြစ်ရတယ်လို့ စက်လှေမောင်းတဲ့သူတွေက ပြောပါတယ်။

တနှစ်ထက်တနှစ်ပိုမို သောင်တွေပိုထွန်းလာတဲ့အတွက် ဧရာဝတီမြစ်ပေါ်မှာ မြစ်ပြင်ပေါ်မှာ ရေလမ်းကြောင်းနဲ့ ပတ်သက်ပြီး လမ်းပြမောင်းနှင်ဖို့ ၀ါးလုံးရှည်ရှည်တွေကို ထိုးစိုက်ပြီး အမှတ် အသားအတိုင်း မောင်းနှင်ရတာဖြစ်ပါတယ်။

ညောင်ဦးမြို့နယ် ကျားပါးစပ်နဲ့ ပုလင်းရွာအနီးက မြစ်ပြင်မှာ သောင်ထွန်းတာ ပိုမိုဆိုးဝါးသလို ခရီးသွားလာရာမှာ ရေတိမ်ပိုင်းကို ရှောင်ကွင်း သွားလာရပြီး အချိန်ပိုပေးရတယ်လို့ ပုဂံ ဗူးဘုရား မြစ်ဆိပ်က စက်လှေဆရာတွေက ပြောပါတယ်။

သဲသောင်တွေ ပိုထွန်းလာတဲ့အတွက် မြစ်ကြောင်းတွေ ကျဉ်းသွားပြီး ခရီးသွားလာရာမှာ အခက်အခဲ ဖြစ်ရကြောင်း စက်လှေဆရာ တဦးဖြစ်တဲ့ ကိုသီဟက အခုလို ရှင်းပြပါတယ်။

“အရင်ဆို ဒီဘက်တည့်တည့်သွားလို့ရတယ်။ အခု နွေရာသီဆို ပိုဆိုးပြီ။ နွေရာသီဆို အကုန်လုံး သောင်တွေ ဖြစ်ပြီ။ အခုနောက်ပိုင်း ပိုပိုဆိုးလာတယ်။ မြစ်ကြောင်းရှင်းတာ ပုဂံမှာ တခါမှ လုပ်ပေးတာ မတွေ့ဖူးဘူး။”

ဒီလိုဖြစ်ရတာဟာ သစ်တောပြုန်းတီးမှုကြောင့် ပို့ချတဲ့ နှုန်းတွေ ပိုမိုများပြားလာရတာ ဖြစ်သလို ဒီပုဂံ အနီးတ၀ိုက်မှာ ပို့ချလာတဲ့ နှုန်းတွေကို တူးဖော်တာမရှိတဲ့အကြောင်း၊ သင်္ဘောတွေက ခရီးသွားလာရာမှာ ပိုမို အခက်အခဲ ဖြစ်ရတယ်လို့ သူက ပြောပါတယ်။

ညောင်ဦးမြို့နယ် ရေအရင်းအမြစ်နဲ့ မြစ်ကြောင်းများ ဖွံ့ဖြိုးတိုးတက်ရေးဌာနက အရာရှိတဦးကတော့ သောင်ထွန်းတာ ပိုများလာတာ မှန်ကန်သလို တိုင်းက အသုံးပြုဖို့ ငွေကြေး မပေးတဲ့အတွက် ဘာမှ ဆောင်ရွက်နိုင်ခြင်း မရှိဘူးလို့ အခုလို ပြောပါတယ်။

“လုပ်ဖို့အစီအစဉ်ရှိပါတယ်။ ဒါပေမယ့် တိုင်းရုံးတို့၊ မန္တလေးတိုင်းရုံးတို့၊ အစိုးရအဖွဲ့က ချပေးမှ လုပ်လို့ရမှာ။  စဥ့်ကူအထိ ရေးကြောင်းကောင်းပါတယ်။ ရေကြောင်းကြပ်တယ်ဆိုတာက ရေးနည်းလာတဲ့အခါ တစီးကိုတစီး ကျော်တက်တာတို့၊ အပြိုင်ဖြစ်လာမှသာ ရေကြောင်းပိတ်ဆို့မှုတွေ ဖြစ်တတ်တယ်။ မဟုတ်ရင်တော့ ၇ ပေ၊ ၈ ပေ အနက်တော့ ရှိပါတယ်။”

သဲသောင်ပြင်မှာ လာရောက်ပြီး နေ၀င်ချိန်ကို လာကြည့်တဲ့ နိုင်ငံခြား ဧည့်သည်တဦးကတော့ နှုန်းပို့ချတဲ့အကြောင်းအရင်းကို သိရှိရခြင်း မရှိပေမယ့် ဒီလို အနေအထားက စိုးရိမ်စရာကောင်းတယ်လို့ ပြောပါတယ်။

“ဒါဟာ သဘာဝ အစိတ်အပိုင်းတခုဖြစ်ပေမယ့် မထိန်းချုပ်နိုင်ပါဘူး။ အနယ်တွေ ဘယ်က လာသလဲဆိုတာကို ခရီးသွားတယောက်အနေနဲ့ မသိနားမလည်ပါဘူး။ ဒါပေမယ့် လူတွေနဲ့ ရင်းနှီးနေတဲ့ မြစ်ပြင်ကို ထိန်းသိမ်းမှုကို အသေချာမြင်ချင်ပါတယ်။”
DVB Burmese