သိကြားမင်း ဝရဇိန်က လက်ထဲမှာချိန်တုန်း

ပို့စ်တင်ချိန် - 6/24/2014 05:39:00 PM



ဒီရက်ပိုင်း မဟာသန္တိသုခကျောင်းကို ညအမှောင်မှာ ဗြောင် လာပြီး အင်အားသုံးချိပ်ပိတ်ခဲ့တဲ့ အမှုရဲ့နောက်ဆက်တွဲသတင်း တွေက ဖတ်ရတာ တရုတ်သိုင်း ကားကြည့်ရသလိုပါပဲဗျာ။ တစ် ယောက်နဲ့တစ်ယောက် တိုက် ခိုက်တာ၊ တစ်ယောက်တိုက် ကွက်ကို တစ်ယောက်က လက်မတင်လေးပွတ်ရှောင်ထွက်သွား တာတွေဟာ မြန်လွန်းတော့ ကြည့်ကောင်းပေတဲ့ မျက်စိလည်ရသဗျ။ ဒီကြားထဲမှာ လက်နက်ပုန်းထုတ်သုံးတာတွေကလည်း ပါသေးကိုး။
‘‘ဆန်စဉ်ရာကျည်ပွေ့လိုက်’ သလိုလို့ပဲပြောရလေမလား။ အနှီ မဟာသန္တိသုခအဖြစ်အပျက်နဲ့ ဆက်စပ်ပြီးဖြစ်လာတာတွေက အခုထိ အတောမသတ်သေးဘူး ခင်ဗျ။ ပထမကျောင်းတိုက်ချိပ် ပိတ်တဲ့ကိစ္စနဲ့ သာသနာရေးဘက် က သတင်းစာရှင်းပွဲလုပ်တော့မကျေနပ်ရင်ကြိုက်တဲ့ တရားရုံးသွားဆိုပြီး ခပ်မိုက်မိုက်ကြွေးကြော်ခဲ့တဲ့ လူကြီးကနေစတာပဲ။ သူက သမ္မတအကြံပေးလား၊ သမ္မတရုံးအကြံပေးလားတောင်မှ ပဟေဠိဖြစ်လိုက်သေးတာ ကိုယ့်လူတို့မှတ်မိမှာပေါ့။

နောက် သိပ်မကြာပါဘူး။ မဟာသန္တိသုခကျောင်းတိုက်မှာ တည်းခိုနေတဲ့သံဃာတော်ငါးပါး ကို အတင်းလူဝတ်လဲပြီး အင်းစိန် ထောင်ကို  ပို့လိုက်တယ်ဖြစ်က ရော။ ကျုပ်တို့တွေကလည်း အမျိုးဘာသာ သာသနာဆိုတဲ့ခေါင်းစဉ် အောက်မှာ တစ်ဖက်သတ်တက် ထောင်မောင်းနင်း ပြောနေတဲ့ ပုဂ္ဂိုလ်အချို့ကိုသာကြည့်မရတာ။ ကန့်ကွက်တာပါ။ အခုလိုသံဃာ အစစ်အမှန်တွေမတရားခံရတဲ့ ကိစ္စမျိုးကျ ရင်ထုမနာဖြစ်ရတယ် ဗျ။ ခံလည်းမခံစားနိုင်ဘူး။ ဒါကြောင့်ပဲ ဒီရက်ပိုင်းမှာ တစ်တိုင်းပြည်လုံးဟာ  မဟာသန္တိသုခနောက်ဆက်တွဲဖြစ်ရပ်တွေနဲ့ ပတ်သက်ပြီးယူကျုံးမရအပူလုံးကြွကာ စိတ်ဝင်စားမှုမြင့်တက်နေရတာပဲဖြစ်ပါသဗျာ။

ပိုပြီးရုပ်ဆိုးအကျည်းတန် သွားတာက ဗုဒ္ဓဘာသာတိုင်းပြည် လည်းဖြစ်တယ်။ ပြီးတော့ အခု ကာလအမျိုးကိုစောင့်မယ်၊ ဘာသာကိုစောင့်ပါမယ်တကဲကဲ နဲ့ ရွာလွန်ရွက်တိုက်လုပ်နေကြတဲ့ အခါသမယမျိုးကြီးမှာ ဘုန်းကြီး တွေကိုအစစ်အမေးသိပ်မရှိဘဲ ထောင်ထဲထည့်လိုက်တဲ့ကိစ္စပဲ။ ဘုန်းကြီးကိုထောင်ထဲထည့်တာထက် ပိုဆိုးသွားတာက အတင်းအဓမ္မလူဝတ်လဲလိုက်တာပဲဗျ။ အဲဒါကတော့ အရုပ်ဆိုးတယ်။ ခွင့်လွှတ်စရာလည်းမရှိတဲ့ အမည်းစက်ပဲ။ အဲဒီအကျည်းတန် တဲ့အမည်းစက်ကို အခုအရေးမှာ တာဝန်ရှိသူတွေအနေနဲ့ ဘယ်လို ချေဖျက်မလဲဆိုတာ ကျုပ်တို့ စောင့်ကြည့်နေတယ်ဗျာ။

အနှာတင်မက အခုလိုလူ ဝတ်လဲရခြင်းဟာ ဝိနည်းတော်နဲ့ အညီ မကျင့်ကြံလို့ဆိုပြီးလည်း ပြောတယ်။ လူဝတ်အလဲခံလိုက် ရတဲ့ သံဃာငါးပါးစလုံးဟာ ‘ငယ် ဖြူ’ကိုယ်တော်တွေပါ။ ပြီးတော့ ဆိုင်ရာပရိယတ္တိစာပေမှာလည်း နှံ့စပ်ကြတဲ့  ဆရာတော်တွေဖြစ် တယ်။ ဒါကို အတင်းအဓမ္မစွပ်စွဲ အပြစ်တင်လူဝတ်လဲပြီး ထောင် ထဲထည့်လိုက်ခြင်းဟာ သံသရာ မှာဘယ်လောက်အပြစ်ကြီးတယ်။ အကုသိုလ်များတယ်ဆိုတာ ကျူး လွန်လိုက်ကြတဲ့သူတွေမသိဘဲ နေမှာမဟုတ်ပါဘူး။  သိပေတဲ့ လောဘ၊  ဒေါသ၊  မောဟတရား ကကြီးမားရင်လည်း သတိချွတ် ယွင်း၊ အသိလစ်ဟင်းပြီး အလွဲအမှား လုပ်မိမှားတတ်တာလည်း ရှိသားကလား။ ခံရတဲ့ကာယကံရှင်တွေက ဘယ်သူ့ကိုမှ ဗွေမယူအမျက်မထားဘဲ သစ္စာတရားလက်ကိုင်ထားပြီး  ခွင့်လွှတ်ပေသိ အပြစ်ရှိရင်တော့ ပြုလုပ်သူဟာ ခံရမှာမလွဲဧကန်ပါပဲဗျ။

‘ကာလဝိပါက်နောက်ပိုး တက်’လို့အဆိုရှိသလိုပါပဲ။ ဝဋ်ဆို တာလည်စမြဲပဲဟာ။ အခုလို အကျင့်စရဏမှာ  ဘာမှဖောက် ဖောက်ပြားပြားမရှိတဲ့သံဃာတွေ ကို အတင်းလူဝတ်လဲထောင်ထဲ ထည့်ပြီးတဲ့နောက် ဆိုင်ရာသံဃ မဟာနာယကအဖွဲ့၊ သာသနာ ရေးဦးစီးဌာန၊ ပြည်ထဲရေးနဲ့သမ္မတအမှူးပြုတဲ့ အစိုးရတစ်ဖွဲ့လုံးဟာ လူထုရဲ့မေတ္တာတုံးတွေဖြစ်ကုန် တာ ကိုယ့်လူများတွေ့မှာပဲ။ ပြုပြင်ပြောင်းလဲရေးတွေလုပ်ပြီး အများက သဘောကောင်းသူ အဖြစ်မှတ်ထင်ခြင်းခံရတဲ့သမ္မတလည်းဒီအရေးမှာ စက်ကွင်းမလွတ်ခဲ့ပါဘူး။

သို့ပေတဲ့ လုပ်ရပ်တစ်ခုက လူပြောစရာဖြစ်လာပြီဆိုရင် အာဏာရှင်တွေလုပ်လေ့ရှိတဲ့ ထုံးဟောင်းတစ်ခုက  ပြန်ပေါ်လာ တယ်။ အဲဒါကတော့ အစိုးရအဖွဲ့ ထဲက တစ်ယောက်ယောက်ကို ‘ထိုးကျွေး’တာပဲခင်ဗျာ။   အခု မဟာသန္တိသုခကျောင်းတိုက်ကို လူခြေတိတ်မှာဝင်ကာ ချိပ်ပိတ် တဲ့ကိစ္စ၊ သံဃာငါးပါးကိုမတရား စွပ်စွဲ လူဝတ်လဲပြီး ထောင်ထဲ ထည့်တဲ့ကိစ္စတွေနဲ့ပတ်သက်လို့ ပြည်သူတွေကြားမှာ အစိုးရအပေါ်ဝေဖန်စောကြောပြောဆိုလာတော့ ခမျာတို့မှာ ‘ကံဆိုးသူ မောင်ရှင်’ကို ရှာပုံတော်ဖွင့်ပုံပဲဗျ။ အနှီကံဆိုးသူမောင်ရှင်ဟာ ‘ကြားထဲကငဝက်ကကျခံ’ရမယ့်သူပေါ့ ခင်ဗျာ။

သိပ်မကြာပါဘူး။ သာသနာ ရေးဝန်ကြီးဟာ ဘုရားတည်ရာ မှာ နိုင်ငံတော်ငွေကို အလွဲသုံးစား လုပ်တယ်ဆိုကာ တရားစွဲတာခံရပါတော့တယ်။ အနှီဝန်ကြီးဟာ နေပြည်တော်လယ်ဝေးမြို့နယ်ထဲက ယက္ကန်းတောင်ရွာမှ နှစ်ကျိပ်ရှစ်ဆူဘုရားပွဲမှာ မိသားစုအလှူဒါနပြုစဉ်အခါတုန်းက ဝန်ကြီးဌာနပိုင်ငွေအချို့ကို အလွဲသုံးခဲ့တယ်ဆိုပဲ။ ငွေပမာဏကတော့ သိပ်မများပါဘူး။ မြန်မာငွေကျပ်သိန်းတစ်ရာတည်းပါရယ်။ နို့ပေတဲ့  ‘ဝိပါက်ကြမ္မာ’ငင်ပြီဆိုမှတော့ တစ်ကျပ်တစ်ပြားလည်း ခိုးရာပါဖြစ်တော့တာ ဘာဆန်းတာမှတ်လို့။

ဒါနဲ့ပတ်သက်ပြီး ကျုပ်တို့ အရပ်ထဲမှာဆွေးနွေးပြောဆိုနေ တာကတော့ ဒါဟာ မဟာသန္တိ သုခအရေးနဲ့ပတ်သက်ပြီး အစိုးရ အဖွဲ့ဟာ တမင်သက်သက် ထမင်းရည်ပူလာ လျှာလွှဲလုပ်တာပါတဲ့။ ဟုတ်၊ မဟုတ်တော့ကျုပ်လည်း မသိဘူးဗျို့။ လူထုထဲကထွက်လာ တဲ့စကားကတော့ အဲဒီအတိုင်းပဲ။ အရပ်ကထင်လည်းထင်စရာကိုး ခင်ဗျ။ ဒီလိုအကွက်တွေက အာဏာရှင်လက်ထက်တော် အခါတုန်းက အသုံးပြုခဲ့တဲ့ လှည့်ကွက်ကလေးတွေပဲဟာ။ လက်ရှိ အစိုးရကလည်း အနှီအာဏာရှင် လက်ထွက်တွေဆိုတော့ကာ ရိုးရာမပျက်ဆက်ခံတာနေမှာပေါ့ဗျာ။

ဘာပဲဖြစ်ဖြစ် သာသနာရေး ဝန်ကြီးခမျာ အစားမတော်တော့ တစ်လုတ်ဆိုတာလို ကျပ်သိန်း တစ်ရာလောက်နဲ့ ထောင်ချောက် ထဲရောက်တော့တာပဲ။ တကယ် တော့ သာသနာရေးဝန်ကြီးမှရယ် မဟုတ်ပါဘူး။ အခုလက်ရှိဝန်ကြီး အများစုဟာ ငွေကြေးအရှုပ်တော် ပုံတွေနဲ့မကင်းရာမကင်းကြောင်း တွေဖြစ်တယ်ဆိုတာ တစ်တိုင်း ပြည်လုံးသိထားကြပြီးသားပါ။ ဒါ ကြောင့်ပဲ အစိုးရဝန်ကြီးများပိုင် ဆိုင်ခွင့်ကို လူသိရှင်ကြားမပြရဲ ကြတာပေါ့။ အခု သာသနာရေး ဝန်ကြီး‘ဂိ’သွားတဲ့သိန်းတစ်ရာဆို တာ ကလေးမုန့်ဖိုး တစ်ခါပေး သလောက်တောင်မှမရှိပါဘူး။

ပြီးတော့ တစ်ခါရှိပါသေးရဲ့။ သာသနာရေးဝန်ကြီးဟာ ဘုရား ဆီလှူတဲ့မိသားစု အလှူထဲမှာ ဌာနငွေကိုအလွဲသုံးလိုက်လို့တဲ့။ ပြောကြကြေးဆိုရင် အစိုးရအဖွဲ့ ဝင်ဝန်ကြီး၊ ဝန်ကလေးများရဲ့ အလှူဒါနပြုသမျှအစုစုဟာ မိမိ တို့ရဲ့ချွေးနှဲစာတွေမှဟုတ်ပါရဲ့ လားဗျာ။ ‘သူကြီးဘုရား ရွာသား ကောင်းမှု’ဆိုတဲ့စကားရှိသား မဟုတ်လား။ အာဏာရှင်တွေ အုပ်စိုးစဉ်အခါက သာသနာပြု ထီးဆောင်းမင်းတွေရယ်လို့ လူတကာအမှတ်သညာပြုတာခံချင်တဲ့ရောဂါနဲ့ ဘုရားတွေတည်၊ကျောင်းတွေဆောက်ပြီး အလှူဒါယကာ၊ ဒါယိကာမအမည်ခံခဲ့ကြတာကို ကျုပ်တို့မမေ့သေးပါဘူးခင်ဗျ။ ဆိုချင်တာက အဲဒီ ကျောင်းတွေဆောက်ခဲ့၊ ဘုရား တွေတည်ခဲ့စဉ်က အသုံးပြုခဲ့တဲ့ ငွေအသပြာဟာ ပြည်သူ့ဘဏ္ဍာတွေပဲဥစ္စာ။ အခုထိမြန်မာပြည် အနှံ့ဘုရားဖူးထွက်တဲ့အခါ ဗိုလ်ချုပ်မှူးကြီးဘယ်သူဘယ်ဝါနဲ့ မိသားစုတို့ရဲ့ကောင်းမှူအလှူဆိုတာ ဆိုင်းဘုတ်တွေနဲ့အထင်အရှားရှိနေတုန်းပါ။ အဲဒီလိုလှူဖို့ရာငွေတွေဘယ်ကရပါသလဲဗျာ။  အစိုးရအမှုထမ်းတစ်ယောက်ရဲ့ လစာဟာ ဘုရားတည်နိုင်လောက်တဲ့အထိမှ ကျုပ်တို့တိုင်းပြည်မှာ မများတာလူတကာသိပြီးသားပဲဟာ။

အနှီလိုနောက်ကြောင်း ရာဇဝင်တွေရှိပေသိ အခုတော့ သာသနာရေးဝန်ကြီးဟာ သံကန့်လန့်ကာနောက်မှာ ရောက်နေပါပြီ။ ကျုပ်တို့ဖြင့် မနက်မိုးလင်း သတင်းစာဖတ်တဲ့အခါ  တရားသံဝေဂလည်းရမိပါတယ်။  ဘာဖြစ်လို့ဆို သတင်းထူးနှစ်ပုဒ်မှာ မျက်နှာဖုံးမှာယှဉ်တွဲပြီးပါလာလို့ ခင်ဗျ။ တစ်ပုဒ်ကလည်း ဝိနည်းနဲ့ မညီလို့ဆိုပြီး မတရားစွပ်စွဲလူဝတ်လဲပြီးထောင်ထဲအပို့ခံရတဲ့ သံဃာငါးပါးဟာ အာမခံနဲ့ပြန်လွတ်လာတယ်။ အဲ. . .သာသနာရေးဝန်ကြီး ခမျာတော့ ငွေကြေးအလွဲသုံးစားမှုနဲ့ရမည်းသင်းထောင်ထဲမှာ ရောက်ပြီး မိသားစုဟာလည်း နေအိမ်အကျယ်ချုပ်နဲ့ ဖြစ်နေပါသတဲ့။ ဒါကြောင့်ပြောတာ ‘ကာလဝိပါက်နောက်ပိုးတက်’တယ်ဆိုတာ။

ဒါပေသိ ဇာတ်လမ်းကတော့အရှင်းကြီးပါ။ မဟာသန္တိသုခ အဖြစ်အပျက်နဲ့ဆက်စပ်ပြီး အာဏာပိုင်တွေအပေါ် လူထုရဲ့ အမြင်ဟာ သိပ်မကောင်းချိန်မှာ စာရေးဆရာတင့်တယ်ရဲ့စကား လုံးငှားပြောရရင်တော့ ‘ဖြေလျှော့ ခွေ’လုပ်လိုက်တာပေါ့ခင်ဗျာ။ လူထုရဲ့မကျေနပ်မှုကို တစ်စုံတစ် ရာဖြေလျှော့နိုင်ဖို့ရာ ကိုယ့်ဘက် ကတစ်စုံတစ်ယောက်ကို  ‘ခွေ’ လိုက်ပုံပါပဲ။ ဆိုင်ရာသာသနာရေးဌာနမှာ အလုပ်လုပ်ကြတဲ့ အောက်ခြေဝန်ထမ်းတွေကတော့ သူတို့ရဲ့ဝန်ကြီးဟာ လူရိုးတစ်ဦးပါ။ အခုဟာက အမှုဆင်ခံရတာပါဆိုပြီးသတင်းထောက်တွေကို ပြောတာလည်း သတင်းစာထဲမှာ ဖတ်လိုက်ရပါသဗျ။

သမ္မတရဲ့ပြောရေးဆိုခွင့်ရ သူကြီးကတော့ သူတို့ဟာ သာသ နာရေးဝန်ကြီးကို မလွှဲမရှောင်သာ အရေးယူဆောင်ရွက်လိုက်ရတာ ပါခင်ဗျ။ သူဟာ သမ္မတရဲ့အကြိမ် ကြိမ်ဆိုဆုံးမပြုပြင်ပေးမှုတွေကို မနာခံတာကြောင်မို့ လုပ်လိုက်ရ တာပါတဲ့။ အခု ကျုပ်တို့ကြားနေ ရတဲ့ငွေကြေးအရှုပ်တော်ပုံကိစ္စ ဟာ ဝန်ကြီးကိုဖြုတ်ပစ်ရတဲ့ အကြောင်းခြင်းရာများစွာထဲက တစ်ခုမျှသာဖြစ်ပါသတဲ့။ ခက် တာက ကျုပ်တို့မှာလည်း တစ်ဖက်သားထောင်ထဲရောက်သွားမှ ဖြေရှင်းလာတဲ့ စကားတွေဟာ တစ်ဖက်သတ်လား၊ ဘယ်လောက်မျှတမှုရှိသလဲဆိုတာ ဝေခွဲလို့မရ ဘူးခင်ဗျ။ ကာယကံရှင်ဘက်က ဖြေရှင်းမှုကိုလည်း ကြားလိုလှပါ သေးတယ်။

‘ယိုသမျှအဝှာဟာ ပုစွန် ဆိတ်ရဲ့ခေါင်းမှာသွားစု’ဆိုတဲ့ စကားပမာလိုပါပဲ။  မဟာသန္တိ သုခကိစ္စနဲ့ သံဃာအချို့အဖမ်း ခံခဲ့ရတဲ့ကိစ္စတွေနဲ့ပတ်သက်ပြီး သံဃာနဲ့လူထုအင်အားစုတွေ အကြားမှာမကျေမနပ်ဖြစ်နေတာကိုအခုအဖြုတ်ခံလိုက်ရတဲ့ သာသနာရေးဝန်ကြီးမှာပဲ တာဝန်ရှိတယ်ဆိုပြီး အထုပ်လိုက်ပစ်တင်ပေးလိုက်တဲ့ လုပ်ပုံလုပ်နည်းကတော့ ဖြေရှင်းပုံစံမမှန်သေးဘူးလို့သာ ကျုပ်တို့သတ်မှတ်ရမှာပဲဗျာ။ အခုဖြစ်သွားတဲ့ကိစ္စတွေမှာ အစိုးရဟာ တာဝန်မကင်းပါဘူး။ အလားတူ သံဃမဟာနာယက အဖွဲ့ကတာဝန်ရှိသူများအနေနဲ့လည်း တိုင်းပြည်က ဒါယကာ၊ ဒါယိကာမအပေါင်းကို ကောင်းစွာရှင်းပြရဦးမယ့်တာဝန်ကလည်း ရှိပါသေးတယ်။

နောက်ပြီးတော့ အစိုးရအဖွဲ့ အတွင်းမှာ အချင်းချင်းဦးရာလူက လက်ညှိုးထိုးပြီး စွပ်စွဲပြစ်တင်နေ တာတွေကလည်း ရပ်တန်းကရပ် သင့်ပြီခင်ဗျ။ ဆိုချင်တာက အစိုး ရအဖွဲ့အနေနဲ့ အခုမဟာသန္တိသုခ နဲ့ သံဃာပါးငါးထောင်ချခဲ့တဲ့ကိစ္စ တင်မကပါဘူး။ ပြည်သူ့ရေးရာ အမှုအခင်းကိစ္စတွေမှာ ပြောစရာ ဖြစ်လာရင် ရဲရဲကြီးတာဝန်ခံပြီး ဖြေရှင်းသင့်တယ်ဗျ။ ဒီမိုကရေ စီအစိုးရ  အမည်ခံထားပြီးကာမှမိဘပြည်သူများခင်ဗျာလို့ အခါခါရေရွတ်နေပြီးမှတော့ဖြင့် ကိစ္စကြီးငယ်ဝေဖန်စောကြောစရာ တိုင်းပြည်မှာဖြစ်လာတဲ့ အခါ တစ်ယောက်ကိုတစ်ယောက်၊ တစ်ဌာနကိုတစ်ဌာနဦးရာလူက စွပ်စွဲလွှဲချနေတာကြီးကတော့ လုံးဝမလှပဘူးဗျ။

ဘာပဲဖြစ်ဖြစ်ပါဗျာ။ သံဃာ အများစုဝေးရာ ကျောင်းတိုက် တွေနဲ့ သံဃာတွေကိုမဟားတရား အကြမ်းဖက်အမှုဆင်ထားတဲ့ဖြစ် စဉ်အပါဝင် မသမာမှုအစုစုဟာ တစ်နေ့မှာ ဘူးပေါ်သလို ပေါ်လာ မှာပဲဆိုတာ အရပ်ထဲက ပြည်သူ တွေဟာ လွှတ်ပြီးယုံကြည်တယ် ဗျာ။ တရားကိုနတ်စောင့်တယ်ဆို သမို့လား။ မြတ်စွာဘုရားမရှိတော့ တဲ့နောက် သာသနာဖျက်ဆီးသူ ကို သိကြားမင်းကကြီးမှူးပြီး နှိမ် နင်းမယ်လို့လည်း အဌာကထာဆရာများရဲ့  စာထဲမှာတွေ့ရ တယ်။နို့ပေတဲ့ သိကြားမင်းက  သာသနာမှာ ဖျက်လိုဖျက်ဆီး လုပ်သူများကို နှိမ်နင်းချိန်မှာ မနှိမ်နင်းလေတော့ ခွကျတယ်။ ဒါနဲ့ ပတ်သက်ပြီး စလေဦးပုညက သကြားမင်းကို လှောင်ပြောင်ပြီး အခုလိုစာချိုးခဲ့ ဖူးတယ်။

နန်းမေရု ပြာသာဒ်
လမ်းဖြတ်တဲ့ ဣန္ဒာ
ကမ်းသတ်လို့ နှိမ်ရှာတယ်။
အလိမ္မာ လွန်သား။
ထောက်လှမ်းချက် သုဓမ္မာဝယ်
ခုအခါ လစ်ကြသလား။
ဘုရားက သိကြားကိုမှာတယ်။
ဌကထာ ရှိသား
သာသနာ ငါထားခဲ့
မမှားအောင်စေ့ဆော်
မကောင်းသူ ကောင်းသူတို့ကို
ကြောင်းယူလို့ ဆန်းစစ်ကာမျှော်
ဝိမလ နန်းသစ်ပေါ်မှာ
သန်းရှစ်ဖော်ရွေများနှင့်
ဘုရားကို နှစ်ရစ်လိမ်
ညစ်တဲ့ မာဃိန်
ပစ်ရှာမည့် ဝရဇိန်ငယ်
ပန်းထိမ်မှာပြင်တုန်းထင့်လေး။  …. ပါတဲ့ခင်ဗျာ။

ဘစီတို့ ထင်တာကတော့  ခုအချိန်လောက်ဆိုရင် သိကြား မင်းလည်း သာသနာမှာမှားယွင်း ကြသူ ရှင်လူတွေကို နှိမ်နင်းဖို့ပန်း ထိမ်မှာ   ဝရဇိန်ပြင်နေတာပြီး လောက်ပြီဗျ။ အဲ… ဝရဇိန်နဲ့ မပစ် သေးပုံထောက်တာတော့ ဒီနေ့ လူ့ရပ်ရွာသာသနာမှာ မကောင်းသူရှင်လူပရိသတ်တွေဟာ များပြားနေတော့ကာ ဘယ်သူ့ကိုအရင်ဦး အောင်ဆော်ရမယ်ဆို တာ ချိန်နေထင်ပါရဲ့။‘‘ပစ်ရှာမည့် ဝရဇိန်ငယ်လက်ထဲမှာ ချိန်တုန်းထင့်လေး’’ ဆိုရမှာပလေ။ နို့ပေ တဲ့ သိကြားကိုကျုပ်တို့ တောင်း ပန်ချင်ပါတယ်။ ဒီ့ထက်ဒီအခြေ အနေတွေမဆိုးခင်မှာ ပစ်စရာရှိ တာပစ်သာပစ်လိုက်ပါ။ အရေးကြီးတာက ပစ်ရင်မိုး ပေါ်ထောင်မပစ်နဲ့။ အသူရာတို့ခေါင်းပေါ်ကျ သွားလို့ သိကြားနဲ့သူရာစစ်ခင်း ကြရင် ငြိမ်းချမ်းရေးပွဲစားတွေ အလုပ်ဖြစ်နေဦးမယ်။ ပစ်ရင် လူ့ပြည်က‘အလဇ္ဇီ’တွေကို  မှန် အောင်ပစ်ပါ။ သိကြားမင်းကြီးရာ။

(ဖော်ပြပါ သရော်စာသည် စာရေးသူ ဘစီ၏ အာဘော်သာဖြစ်သည်)

7day