တရုတ်သမ္မတ ရှီကျင်းဖျင်နှင့် ရုပ်ချင်းဆင်သည့် ပေါင်မုန့် ဆိုင်ရှင်တစ်ဦး ပေါ်လာ

ပို့စ်တင်ချိန် - 6/26/2014 01:24:00 PM


သန်းထိုက်စိုး

ချန်ရှား ၊ ဇွန် ၆

တရုတ်သမ္မတ ရှိကျင်းဖျင်သည် ၂၀၁၂ ခုနှစ်၌ သမ္မတဖြစ်ပြီးနောက် ပေကျင်းမြို့ထဲရှိ မုန့်ဆိုင် တစ်ဆိုင်တွင် ပြည်သူများ အကြားတန်းစီ ၀ယ်ယူပြီးနောက် ဆိုင်မှာပင် ထိုင်စားပြခဲ့သဖြင့် ထိုလုပ်ရပ်အတွက် ရေပန်းစားခဲ့သည်။ ယခုအခါ စားသောက်စရာ နှင့် ပတ်သက်ပြီး တရုတ်သမ္မတရှီသည် ထပ်မံနာမည်ကြီး လာပြန်ပြီဖြစ်သည်။

ယခုအခေါက်တွင်ကား သမ္မတရှီနှင့် ရုပ်ချင်းဆင်တူသည့် ပေါင်မုန့်ဆိုင်ရှင် တစ်ဦး တရုတ်နိုင်ငံ ဟူနန်ပြည်နယ် ချန်ရှားမြို့တွင် ပေါ်ပေါက် လာခြင်းဖြစ်သည်။ သမ္မတရှီနှင့် ရုပ်ချင်းလွန်စွာ ဆင်တူသူ ရောင်းချသည့် ပေါင်မုန့်ကို စားချင်သူများ သည် ပေါင်မုန့် ဆိုင်ငယ်ရှေ့တွင် လူတန်းကြီး ဖြစ်အောင်တန်းစီ စောင့်ဆိုင်း နေကြရကြောင်း သိရသည်။

ပေါင်မုန့်ဆိုင်ရှင် ရှကျင်းဟွာသည် ချန်ရှားမြို့ တက္ကသိုလ်အနီး အသီးအရွက်နှင့် အသားများ ညှပ်ထားသော ပေါင်မုန့်များကို ဆိုင်ငယ်လေးဖြင့် ရောင်းချနေသူဖြစ်သည်။ ပေါင်မုန့် ဆိုင်လာသူများသည် ပေါင်မုန့် ၀ယ်စားချင်ရုံ သက်သက် မဟုတ်ဘဲ သမ္မတ ရှီနှင့် ရုပ်ချင်းဆင်သော ပေါင်မုန့်ဆိုင်ရှင်နှင့် ဓာတ်ပုံ တွဲရိုက် သောကြောင့်လည်း ပါသည်။

ရှကျင်းဟွာနှင့်  ပေါင်မုန့်ဝယ်သူများ တွဲရိုက်ထားသည့် ဓာတ်ပုံများ တရုတ်ဆိုရှယ် မီဒီယာများတွင် ပြီးခဲ့သည့် ရက်ပိုင်းက တက်လာပြီးနောက် ၄င်း၏ သတင်းသည် ဟိုးလေး တစ်ကျော်ကျော် ဖြစ်သွားခဲ့ပြီး ၄င်းကို မြင်ချင်သောကြောင့် ပေါင်မုန့် လာဝယ်သူလည်း အလွန်များပြား ခဲ့သည်။ ရှကျင်းဟွာကမူ ၄င်း၏ ပေါင်မုန့်ကို ကြိုက်ကြခြင်း ကြောင့်သာ လာကြခြင်း ဖြစ်သည်ဟု ဆိုသည်။ တစ်ရက်ကို ပေါင်မုန့် အလုံး ၁၆၀၀ ခန့် ရောင်းချရကြောင်း သိရသည်။ ရှကျင်းဟွာ၏ ပေါင်မုန့်များ အရည်အသွေး ကောင်းကြောင်းကို စားသုံးသူများက အမှတ် ကောင်းကောင်း ပေးကြကြောင်း လည်း အစားအစာ လမ်းညွှန် Dianping.com ၏ ဖော်ပြချက်အရ သိရသည်။

 Source: BBC
the messenger