ရိုးမရန်ကုန် မာရသွန်အပြေးပြိုင်ပွဲ ရန်ကုန်တွင် ကျင်းပ၊ ပါဝင်သူ ၂ဆကျော် တိုးမြင့်ခဲ့

ပို့စ်တင်ချိန် - 1/19/2014 09:30:00 PM

ရိုးမရန်ကုန် နိုင်ငံတကာ မာရသွန်အပြေးပြိုင်ပွဲကို ဇန်နဝါရီ ၁၉ရက်နေ့မနက်မှာ ရန်ကုန်မြို့မှာ ကျင်းပခဲ့ပြီး မနှစ်ထက်က မာရသွန်ပြိုင်ပွဲမှာပါဝင်သူ ၂ဆကျော်လာခဲ့တယ်လို့ ဆိုပါတယ်။

လူ ၂၅ဝဝကျော် ပါဝင်တဲ့ ဒီမာရသွန်ပြိုင်ပွဲကို ရန်ကုန်စည်ပင်နဲ့ FMI ကုမ္ပဏီတို့ ပူးပေါင်းစီစဉ်တာဖြစ်ပြီး အားကစားစိတ်ဓာတ်နဲ့ ကျန်းမာရေးလိုက်စားစေချင်တာကြောင့် စီစဉ်တာဖြစ်တယ်လို့ ဒေါ်ခင်စန္ဒာဝင်းက ဆိုပါတယ်။

နိုင်ငံပေါင်းစုံက နိုင်ငံခြားသား ၅ဝဝကျော်ပါဝင်ခဲ့ ၂ဝ၁၄ မာရသွန်ပြိုင်ပွဲမှာ ၅ကီလိုမီတာ၊ ၂၁ ကီလိုမီတာနဲ့ ၄၂ ကီလိုမီတာဆိုပြီး ၃မျိုး ခွဲထားပြီး ကျောင်းသားကျောင်းသူတွေလည်း ပါဝင်ဆင်နွှဲခဲ့ကြပါတယ်။ ပြီးခဲ့တဲ့ ၂ဝ၁၃ မာရသွန်မှာတော့ ပါဝင်သူ တစ်ထောင်ကျော်ပဲ ရှိခဲ့တယ်လို့ ဆိုပါတယ်။

၄၂ ကီလိုမီတာ အပြေးပြိုင်ပွဲမှာ ဒုတိယဆုရခဲ့တဲ့ ကိုဝေလင်းထွန်းက နိုင်ငံခြားသားတွေ ပါဝင်မယ်ဆိုတာ သိတာကြောင့် နှစ်လလောက် ကြိုတင်လေ့ကျင့်ခဲ့တယ်လို့ ဆိုပါတယ်။

မာရသွန်ပြိုင်ပွဲကို ရန်ကုန်မြို့တော်ဝန် ဦးလှမြင့်ကိုယ်တိုင် တက်ရောက်ခဲ့ပြီး ဆု ၂ဝကျော်ကို ချီးမြှင့်ခဲ့သလို ကံစမ်းမဲနဲ့ ဖျော်ဖြေပွဲတွေကိုလည်း သုဝဏ္ဏအားကစားကွင်းမှာ ကျင်းပခဲ့ပါတယ်။
Kamayut Media