ပြည်ပ ဆက်သွယ်ရေးကုမ္ပဏီများမှ မိုဘိုင်းဆင်းမ်ကတ်များ ရောင်းချမည့်အတွက် တန်ဖိုးနည်းဆင်းမ်ကတ် ပြင်ပပေါက်ဈေး ကျပ်သုံးသောင်းဝန်ကျင်အောက် ကျဆင်းလာ

ပို့စ်တင်ချိန် - 3/17/2014 05:37:00 PM


ပြည်ပဆက်သွယ်ရေးကုမ္ပဏီများမှ မိုဘိုင်းဆင်းမ်ကတ်များကို ရောင်းချမည့်အတွက် မြန်မာ့စီးပွားရေးကော်ပိုရေးရှင်းနှင့် မြန်မာ့ဆက်သွယ်ရေးလုပ်ငန်းများမှ ရောင်းချပေးသည့် ၁၅၀၀ တန် မိုဘိုင်းဆင်းမ်ကတ်များမှာ လက်ရှိတွင် ပြင်ပပေါက်ဈေး ကျပ်သုံးသောင်း ၀န်းကျင်ခန့်သာ ရှိကြောင်း မိုဘိုင်းအရောင်းဆိုင်များ၏ ပြောကြားချက်အရ သိရသည်။

၁၅၀၀ တန် မိုဘိုင်းဆင်းကတ်များမှာ ယခင်ပြင်ပပေါက်ဈေး တစ်သိန်းနီးပါးအထိရှိခဲ့ပြီး လက်ရှိတွင် ပြင်ပပေါက်ဈေး သုံးသောင်းဝန်းကျင်သာ ရှိပြီး အ၀ယ်ဈေးကွက် မရှိတော့ဘဲ အရောင်းဈေးကွက်သာ ရှိကြောင်း မိုဘိုင်းအရောင်းဆိုင်များနှင့် ဖုန်းပွဲစားများက ပြောကြားသည်။
“အခုဆိုရင် ပြည်ပကုမ္ပဏီတွေက ဆင်းကတ်တွေ ရောင်းတော့မှာဆိုပြီး ၁၅၀၀ ဆင်းကတ်ဈေးနှုန်းတွေ တော်တော်လေး ကျလာတယ်။ ၀ယ်တဲ့သူတွေလည်း မရှိသလောက်ကို နည်းလာတယ်။ အခုဈေးကွက်က အရောင်းဈေးကွက်ပဲ ရှိတော့တယ်။ အ၀ယ်ဈေးကွက် ကတော့ မရှိတော့ဘူး။ ကတ်တွေက လိုချင်ရင် လိုသလောက်ရတယ်။ ဆိုင်တိုင်းမှာ ကတ်တွေ ပုံနေတာပဲ”ဟု လသာမြို့နယ်ရှိ မိုဘိုင်းအရောင်းဆိုင်မှ တာဝန်ရှိသူတစ်ဦးက ပြောသည်။

မြန်မာ့ဆက်သွယ်ရေးလုပ်ငန်းမှ လစဉ်ရောင်းချသည့် ၁၅၀၀ တန် မိုဘိုင်းဆင်းမ်ကတ် ၃၅၀၀၀၀ ခွဲတွင် ဂျီအက်စ်အမ်မိုဘိုင်းဆင်းမ်ကတ်များ ပါဝင်ခြင်းမရှိဘဲ CDMA 800MHz ဆင်းမ်ကတ်များကိုသာ အများဆုံးရောင်းချပြီး ယင်းဆင်းမ်ကတ်များကို လိုင်းဆွဲအား မကောင်းသည့်အတွက် သုံးစွဲသူများအနေဖြင့် အဆင်မပြေမှုများရှိကြောင်း သိရသည်။
“ဆင်းမ်ကတ်တွေက အ၀ယ်မရှိတော့ဘူး။ အရောင်းပဲ ရှိတော့တယ်။ ရောင်းရင်လည်း အရင်လိုဈေးကောင်းမှ မရတာ။ ဈေးကောင်းလည်း မပေးကြတော့ဘူး။ အခုဆိုရင် ဟန်းဆက်ဈေးကွက်တောင် အ၀ယ်အေးတယ်။ ပြည်ပကုမ္ပဏီတွေက ဟန်းဆက်တွေပါ ရောင်းမယ်ဆိုတော့ ဟန်းဆက်တွေတောင် မ၀ယ်ကြတော့ဘူး။ သူတို့ကိုပဲ စောင့်နေကြတယ်။ အခုဆိုရင် မိုဘိုင်းဖုန်းအရောင်းဆိုင်တိုင်းမှာလည်း ကြော်ငြာထားတယ်။ သူတို့ဘယ်အချိန်မှာ စရောင်းမှာ ဘယ်လိုပုံစံနဲ ဘယ်လိုအရည်အသွေးကောင်းတယ် ဆိုတာတွေကိုပါ ကြော်ငြာထားတဲ့အတွက် လူတိုင်းက သူတို့ကို စောင့်နေကြတယ်။ ဒါကြောင့် မိုဘိုင်းဈေးကွက် အေးနေတာပါ”ဟု တာမွေမြို့နယ် မိုဘိုင်းအရောင်းဆိုင်မှ တာဝန်ရှိသူတစ်ဦးက ပြောကြားသည်။
Ooredoo ကုမ္ပဏီအနေဖြင့် မိုဘိုင်းဆင်းမ်ကတ်များကို လိုင်စင်ရရှိသည့်နေ့မှ စတင်ကာ ခြောက်လအတွင်း ရောင်းချပေးသွားမည်ဖြစ်ပြီး တယ်လီနော်ကုမ္ပဏီအနေဖြင့် လိုင်စင်ရရှိပြီး ရှစ်လအကြာတွင် ဆင်းမ်ကတ်များကို ရောင်းချပေးသွားမည် ဖြစ်သည်။ ထို့ ပြင် ဟန်းဆက်များကိုပါ ရောင်းချပေးသွားမည်ဖြစ်ပြီး ဟန်းဆက်များ ၀ယ်ယူလျှင် မိုဘိုင်းဆင်းမ်ကတ်များကို အခမဲ့လက်ဆောင် ပေးသွားမည်ဖြစ်ကြောင်း သိရသည်။

Today Myanmar