Showroomများက ၀ယ်ရောင်းသမားများအပေါ် သက်ရောက်မှုဖြစ်စေ

ပို့စ်တင်ချိန် - 3/17/2014 09:18:00 PM


လက်ရှိ ပြည်တွင်း ကားဈေးကွက်ရဲ့ ကြီးမား ကျယ်ပြန့်လာမှု အခြေအနေဟာ အရင်နှစ်တွေကနဲ့ စာရင် ပမာဏ များများစားစား တိုးတက်ကောင်းမွန်လာတာ ဖြစ်ပြီး အဲဒီလို တိုးတက်ကောင်းမွန်လာတဲ့ ကားဈေးကွက်ကြောင့်လည်း နောက်ပိုင်းမှာ Brand New Car Showroomတွေရော Used Car Showroomတွေပါ ဖွင့်လှစ်ရောင်းချလာတာ တွေ့နိုင်ပါတယ်။ အရင်က ကားရောင်းဝယ်လောကမှာ Showroomဖွင့်လှစ်လုပ်ကိုင်တဲ့ သူတွေထက် အရေးပါတဲ့ သူတွေက ကားဝယ်ရောင်းသမားတွေ ဖြစ်ပြီးတော့ ဈေးကွက်ကားဝယ်ရောင်း ကဏ္ဍတစ်ခုလုံးရဲ့ ရာခိုင်နှုန်း ၈၀လောက်ထိအောင် ၀ယ်ရောင်းသမားတွေ လက်ထဲမှာ ပွဲဖြစ်ခဲ့ပေမယ့် အခုနောက်ပိုင်းမှာတော့ ပြည်တွင်း ကားဈေးကွက်အတွင်းကို Branded Showroomတွေ အပါအ၀င် Used Car Showroomတွေ အများအပြား ဖွင့်လှစ်ရောင်းချလာတာကြောင့် ၀ယ်ရောင်းသမားတွေ အတွက် အရောင်းအ၀ယ်ပိုင်း ဆိုင်ရာ သက်ရောက်မှုတွေ ဖြစ်လာစေတယ်လို့ မင်းရဲကျော်စွာ ကားရောင်းဝယ်ရေး စခန်းက ကားဝယ်ရောင်းသမား တစ်ဦး ဖြစ်တဲ့ ကိုမျိုးက ပြောပါတယ်။

“အရင်က ကားဝယ်ချင်တယ်ပဲ ဖြစ်ဖြစ်၊ ရောင်းချင်တယ်ပဲ ဖြစ်ဖြစ်၊ သေချာတာက ပွဲစား ဒါမှမဟုတ် ၀ယ်ရောင်းသမား တစ်ယောက်ယောက်နဲ့ ချိတ်ကို ချိတ်ပြီး လုပ်ရတယ်၊ ဒီတော့ ဈေးကွက်တစ်ခုလုံးက ကျွန်တော်တို့လက်ထဲမှာပဲ ရှိနေတာ၊ အခုနောက်ပိုင်းကျတော့ Used Carတွေ ရောင်းတဲ့ Showroomတွေကလည်း အများကြီး ဖြစ်လာနေသလို Brand Newတွေလည်း တရားဝင် တင်သွင်းရောင်းချလာတော့ ကျွန်တော်တို့လို ၀ယ်ရောင်းသမားတွေ အတွက် အရင်ကလောက် ဈေးကွက် မရတော့သလို အဆင်မပြေတော့ဘူး။ အလွယ်ပြောရမယ် ဆိုရင် အရင်က ကျွန်တော် သိသလောက် ဒီပတ်ဝန်းကျင်မှာ တစ်ပတ်ကို ကားဆယ်စီးကနေ အစီးနှစ်ဆယ်လောက်ထိအောင် အရောင်းအ၀ယ် ဖြစ်ပေမယ့် အခုနောက်ပိုင်းမှာက အရောင်းအ၀ယ် တော်တော်လေး အေးသွားတယ်၊ ဒါက ကျွန်တော် သိသလောက်ကို ပြောတာနော်၊ ကားရောင်းဝယ်ရေး စခန်းကြီး တစ်ခုလုံးကိုတော့ မဆိုလိုဘူး၊ ဒါပေမယ့် သေချာတာက ၀ယ်ရောင်းသမားတွေရဲ့ ဈေးကွက်တစ်ခုလုံး အေးသွားတာတော့ အမှန်ပဲ”လို့ ဆိုပါတယ်။

ဒါ့အပြင် အခုနောက်ပိုင်း ၀ယ်ရောင်းလောကမှာတင် မဟုတ်ပဲ ပွဲစားလောကမှာပါ အရောင်းအ၀ယ် အေးလာကြောင်း ဗဟန်းမြို့နယ်အတွင်း နေထိုင်တဲ့ ကားပွဲစားတစ်ယောက်ဖြစ်တဲ့ ကိုအောင်သူက ဆိုပါတယ်။ “၀ယ်ရောင်းဆိုတာက ငွေရင်းစိုက်ထုတ်ပြီး ချိုချိုချောင်ချောင်ရမယ့် ကားကို ရှာဝယ်၊ ပြန်ရောင်းဆိုတာမျိုး လုပ်နေရသေးတယ်၊ ပွဲစားဆိုတာက ဘယ်သူက ဘယ်ကားရောင်းချင်တယ်၊ ဘယ်သူက ဘယ်ကားဝယ်ချင်တယ် ဆိုတာမျိုး သိထားရုံနဲ့ အလုပ်ဖြစ်နိုင်တဲ့ သဘောပါ၊ ဒါပေမယ့် အခုနောက်ပိုင်းမှာက ကားဝယ်လက်တိုင်းလိုလို Showroomတွေဘက်ပဲ ခြေဦးလှည့်ချင်နေကြတယ်၊ ဈေးကွက်မှာ ပွဲစားနဲ့ ဖြစ်ဖြစ်၊ ၀ယ်ရောင်းနဲ့ ဖြစ်ဖြစ် အရောင်းအ၀ယ် သိပ်မလုပ်ချင်တော့ဘူး၊ အဲ..တစ်ခုတော့ ရှိတယ်၊ မော်ဒယ်နိမ့်သွားလို့ ဖြစ်ဖြစ်၊ အကြောင်းတစ်ခုခုနဲ့ ပြန်ထုတ်ချင်တဲ့ ကားတွေကိုတော့ ပွဲစားတွေနဲ့ ချိတ်ပြီး ပြန်ရောင်းကြတယ်၊ ဒါပေမယ့် ၀ယ်လက်က ရှားတော့ ပွဲမဖြစ်ချင်ဘူး”လို့ ကိုအောင်သူက ရှင်းပြပါတယ်။

အခုနောက်ပိုင်း ကာလတွေမှာ ကားဝယ်ရောင်းသမားတွေ အပါအ၀င် ကားပွဲစားများ အနေနဲ့ အရောင်းအ၀ယ်ဖြစ်ဖို့ရာ နယ်ဈေးကွက်ကို အားကိုးနေရကြောင်းလည်း သီရိမင်္ဂလာကားရောင်းဝယ်ရေး စခန်းက ကားဝယ်ရောင်းသမား တစ်ဦး ဖြစ်တဲ့ ကိုညီညီက ဆိုပါတယ်။ “ရန်ကုန်လို အတိုင်းအတာမှာက ကားဝယ်ချင်သူတွေ၊ ရောင်းချင်သူတွေ ပေါပေမယ့် Showroomတွေဘက်ကိုပဲ ဦးတည်နေကြတော့ ကျွန်တော်တို့လို ကားဝယ်ရောင်းသမားတွေက နယ်ဘက်က ၀ယ်လက်ကိုပဲ အားကိုးနေရတယ်။ နယ်ဝယ်လက်တွေက Showroomတွေဘက် အသွားနည်းတယ်၊ နောက်ပြီး ကိုယ့်မိတ်နဲ့ ကိုယ် ချိတ်ထားမယ် ဆိုရင် နယ်ဝယ်လက်တစ်ယောက် ကားဝယ်မယ် ဆိုတာနဲ့ ကိုယ့်ဆီကို ရောက်လာတာပဲ၊ တကယ်တမ်းလည်း အခုနောက်ပိုင်း ပြင်ပ ကားဝယ်ရောင်းလောကမှာ နယ်ဝယ်လက်တွေနဲ့ပဲ အရောင်းအ၀ယ် အဖြစ်များတယ်”လို့ ပြောပါတယ်။ လက်ရှိ ဈေးကွက်အတွင်းမှာ Showroomတွေ နေရာရလာမှုကြောင့် နောက်ပိုင်းမှာ ကားဝယ်ရောင်းသမားများရဲ့ ကဏ္ဍနဲ့ ပွဲစားများရဲ့ နေရာရမှု လျော့နည်းပျောက်ဆုံးသွားနိုင်ကြောင်းလည်း သုံးသပ်ပြောဆိုပါတယ်။

လင်းလင်း (IA)
TechSpace Journal