တနင်္သာရီ မြစ်ကြောင်းရှိ ရွာတချို့တွင် ကမ်းပြိုမှုများ ဖြစ်ပေါ်နေပြီး အိမ်များပြောင်းရွှေ့နေရ

ပို့စ်တင်ချိန် - 10/30/2013 12:43:00 PM


အနောက်သာရဖုံ ကျေးရွာရှိ ကမ်းပါးပြိုကျမှု မြင်ကွင်း


တနင်္သာရီ မြစ်ကြောင်းတစ်လျှောက်ရှိ ကျေးရွာတချို့တွင် ပြီးခဲ့သည့် ရက်ပိုင်းအတွင်း ကမ်းပါးပြိုကျမှုများ ဖြစ်ပေါ်လာနေကာ လူနေအိမ်များ ပြောင်းရွှေ့နေရကြောင်း သိရသည်။

တနင်္သာရီ မြစ်ကြောင်းတစ်လျှောက်ရှိ မြစ်ကမ်းဘေးများတွင် တည်ထားသော ကျေးရွာများမှာ တစ်နှစ်ကျော်အတွင်း ကမ်းပါးပြိုကျမှုများ တဖြည်းဖြည်း ကြုံတွေ့လာရခြင်းဖြစ်ပြီး နေအိမ်များအပြင် ဘုန်းကြီးကျောင်းများလည်း ပြောင်းရွှေ့ရတော့မည့် အနေအထားများ ကြုံတွေ့လာနေရကြောင်း သိရသည်။

"ကျွန်တော်တို့ သာရဖုံရွာမှာ မြစ်ကမ်းရဲ့ တစ်ဖက်တစ်ချက်မှာ အရှေ့သာရဖုံနှင့် အနောက်သာရဖုံဆိုပြီး ရှိပါတယ်။ အခု အရှေ့သာရဖုံက ဓမ္မမဉ္ဖူကျောင်းတိုက် သိမ်ကျောင်းဟောင်းကို တောင်ပေါ်ကို ပြောင်းရွှေ့လိုက်ရပါပြီ။ အလားတူပါပဲ အနောက်သာရဖုံက ရွှေမော်တင်ကျောင်းတိုက်၊ ဓမ္မလင်္ကာရ ကျောင်းတိုက်တို့လည်း ကမ်းပါးတွေ ပြိုကျလာနေလို့ ပြောင်းရွှေ့ရမယ့် အနေအထားကို ကြုံတွေ့လာနေ ရပါပြီ။ ကမ်းပါးနှင့် ကျောင်းဝင်းကြားမှာ လူသွားလမ်းလေးက ခုနစ်ပေလောက်ပဲ ကျန်ပါတော့တယ်" လို့ အနောက်သာရဖုံ ကျေးရွာသား တစ်ဦးက ပြောကြားခဲ့သည်။

မြစ်ကမ်းပါး ပြိုကျမှုများမှာ မိုးရာသီအတွင်း အများဆုံး ဖြစ်ပေါ်ခဲ့ကာ ယခုလက်ရှိ တနင်္သာရီမြစ်ကြောင်း တစ်လျှောက်ရှိ အနောက်သာရဖုံ၊ အရှေ့သာရဖုံ၊ ကျွန်းရှည်၊ ပ၀ရွာမ၊ စန်းသစ်၊ ၀ါရစ်၊ သထာ၊ သပြေပင်တို့၌ အများဆုံး ကြုံတွေ့နေရကြောင်း သိရသည်။ အဆိုပါ ကျေးရွာများတွင် ကမ်းပါးပြိုကျမှုများကြောင့် နေအိမ် ၁၀ လုံးစီ ပြောင်းရွှေ့ထားရပြီးဖြစ်ကြောင်း ဒေသခံများက ပြောကြားခဲ့သည်။

"သထာကျေးရွာနှင့် သပြေပင်ကျေးရွာတွေမှာလည်း ဘုန်းကြီးကျောင်းက ကမ်းပါးပြိုကျနေတဲ့ နေရာနှင့် ကပ်နေပါပြီ။ ကမ်းပါးပြိုရတဲ့ အကြောင်းရင်းက လွန်ခဲ့တဲ့ နှစ်နှစ်လောက်က မြစ်ကြောင်းထဲကို သဲစုပ်သင်္ဘောကြီးတွေ ၀င်ရောက်လာပြီး သဲတွေစုပ်ပါတယ်။ သဲတင် သင်္ဘောကြီးတွေ ၀င်လာပြီး သဲတွေတင်ကြပါတယ်။ အဲဒီနောက်ပိုင်းမှာ ကမ်းပါးတွေ ပြိုကျမှု ဖြစ်ပွားလာတာပဲ။ ကမ်းပါးတွေ ပြိုကျတာ ဖြစ်လာတော့ သဲသင်္ဘောကြီးတွေလည်း ဒီနားကို မလာတော့တာ တွေ့ရတယ်" လို့ ဒေသခံတစ်ဦးက ပြောကြားခဲ့သည်။

ယခင်က ယခုကဲ့သို့ ပြိုကျလာမှုများ မကြုံဖူးကြောင်း ဆက်လက်ပြိုကျ နေပါက လူနေအိမ်များ တဖြည်းဖြည်းပြောင်းရွှေ့ သွားရနိုင်သောကြောင့် မြေကတုတ်များ တည်ဆောက်ပေးသင့်ကြောင်း ဒေသခံများက ပြောကြားခဲ့သည်။


Eleven Media Group