မီးသတ်ရေကန်ကို မြေဖို့ကြလေတော့မလား

ပို့စ်တင်ချိန် - 2/12/2014 11:03:00 AM

တောင်ဒဂုံမြို့နယ် စက်မှုဇုန် (၂) စီမံခန့်ခွဲမှုကော်မတီသို့

ရန်ကုန်တိုင်းဒေသကြီး၊ တောင်ဒဂုံမြို့နယ်  စက်မှုဇုန် (၂)၊ မြကန်လမ်း၌ ‘မြကန်‘ ဟုခေါ်သော မီးသတ် ရေကန်ကြီးတစ်ခုရှိပါသည်။ မီးသတ်ရေကန်ဆိုသည်မှာ စက်မှုဇုန် စတင် တည်ဆောက်စဉ် ကတည်းက လိုအပ်ချက်အရ ပါဝင်ပြီးသား၊ မရှိမဖြစ်ရှိရမည့် အရာပင် ဖြစ်ပါသည်။ ယခုအခါ စက်မှုဇုန် စီမံ ခန့်ခွဲရေးကော်မတီ၏ လျစ်လျူရှုမှုကြောင့် အဆိုပါရေကန်ကြီးမှာ ဒိုက်များ၊ အမှိုက်များဖြင့် ကောလုနီးနီး အခြေအနေ ဖြစ်နေပါသည်။

၂၀၀၀ခုနှစ်ကတည်းကဖွဲ့စည်းခဲ့သော မြကန်မီးသတ်ကန်သာယာရေးကော်မတီ ရှိနေကြောင်းကို ၂၀၁၃ ခုနှစ်၊ နှစ်လယ်ခန့်တွင် ‘မီးသတ်ကန်‘ ဟူသော ဆိုင်းဘုတ်ကို လာရောက်တပ်ဆင်ထားမှသာ သိကြရ ပါသည်။ ယခု ၂၀၁၄၊ ဖေဖော်ဝါရီလဆန်းခန့်တွင် တာဝန်ရှိသူများမှ ကန်၏ ခြောက်ပုံတစ်ပုံခန့်သာ ဒိုက်များဆယ်ယူပြီး၊ ကွန်ကရစ် မီးသတ်ရေငုတ်တစ်ခုသာ လာရောက်စိုက်ထူထားသည်ကို တွေ့ရပါသည်။
ယင်းကန်ကြီးအား ယခင်က ဇုန်စီမံခန့်ခွဲရေးကော်မတီမှ ပန်းခြံအဖြစ်သို့ ပြောင်းလဲ ပြုလုပ်မည် ဟူသောသတင်းများထွက်ပေါ်လာခဲ့ဖူးပြီးနောက်တွင် ရေကန်ကြီးနှင့် စပ်လျဉ်းသော ထိန်းသိမ်း စောင့်ရှောက်မှုများကို လျစ်လျူရှုခဲ့ပါသည်။ သာဓကအားဖြင့် သံလွင်လမ်းမဘေး၊ အောင်မင်္ဂလာလမ်းနှင့်  ချောင်းသာလမ်းတို့ဆုံရာ၌ တြိဂံပုံမြေကွက်အား ဇုန်ကော်မတီမှ ပန်းခြံလုပ်မည်ဟု ဆိုပြီးနောက်တွင် သုံးထပ်တိုက်တစ်လုံး ပေါ်ပေါက်လာဖူးပါသည်။ စက်မှုဇုန်တစ်ခု၏ အမှန်တကယ် လိုအပ်ချက်အရ အရေးပေါ် မီးသတ်ကန်သာ ဖြစ်သင့်ပါသည်။
လွန်ခဲ့သောကာလများတွင် ကန်အတွင်းရှိ ဒိုက်များ၊ အမှိုက်များကို ရေကန်ရှေ့ရှိ စက်ရုံတရုံမှ ကိုယ်ထူ ကိုယ်ထအစီအစဉ်ဖြင့် ပုံမှန်ဆယ်ယူ ရှင်းလင်းခဲ့ပါသည်။ သို့သော် အဆိုပါ စက်ရုံမှ အကြောင်းမညီညွတ်၍ ဆယ်ယူနိုင်ခြင်း မရှိတော့သည့်အချိန်၌ ရေကန်ကြီးမှာ ပုံပါအတိုင်း ကောလုနီးပါး ဖြစ်နေပါသည်။ အကယ်၍ ရေကန်ကြီး ကောသွားပါက ပန်းခြံ (သို့မဟုတ်) စက်ရုံကြီးများ ပေါ်ပေါက်လာနိုင်သည့်အပြင်၊ မီးဘေး အန္တရာယ်ဖြစ်ပွားပါကလည်း အရေးပေါ် ရေလိုအပ်ချက်အတွက် မီးသတ်ရေကန် ပျောက်ပျက် သွားမည်ကို စိုးရိမ်ရပါသည်။

ယခုအခါ (၈.၂.၂၀၁၄)ရက်နေ့၊ ကြေးမုံသတင်းစာတွင် မြေအလှူခံသော ကြော်ငြာတစ်ခုကြောင့် စက်မှု ဇုန် (၂)အတွင်းရှိ လုပ်သားပြည်သူများမှာ များစွာ စိုးရိမ် ပူပန်လျက် ရှိနေကြပါသည်။ သို့ပါသောကြောင့် မီးသတ်ကန်ကြီး၊ မပျက်စီး၊ မပျောက်ဆုံးစေရန် တာဝန်ရှိသူများမှ သိရှိပြီး အရေးတယူ ဆောင်ရွက် ပေးနိုင်ပါရန် တင်ပြအပ်ပါသည်။

မီးဘေးအန္တရာယ်စိုးရိမ်သူတစ်ဦး