ဗဟန်းမြို့နယ်တွင် ဓာတ်ကြိုးပြတ်ကျသဖြင့် နှစ်နှစ်သားအရွယ် ကလေးတစ်ဦးအပါအ၀င် လူလေးဦး ဓာတ်လိုက်ဒဏ်ရာရ

ပို့စ်တင်ချိန် - 5/25/2014 12:31:00 PM



(အခင်းဖြစ်ပွားခဲ့သည့်လမ်းအတွင်းရှိ ဟောင်းနွမ်းနေသော ဓာတ်ကြိုးများနှင့် အခင်းဖြစ်ပွားရာအိမ်အနီးရှိ ပြတ်ကျခဲ့သော ဓာတ်ကြိုးအား ပြန်လည်လဲလှယ်နေမှုကို တွေ့ရစဉ် (ဓာတ်ပုံ-မြင့်သူ))

ဗဟန်းမြို့နယ်တွင် ဓာတ်ကြိုးတစ်ကြိုး ပြတ်ကျသဖြင့် နှစ်နှစ်သားအရွယ် ကလေးတစ်ဦးအပါအဝင် လူလေးဦး ဓာတ်လိုက်ကာ ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ မေ ၂၃ ရက် ညနေ ၆ နာရီ ခန့်တွင် ဗဟန်းမြို့နယ်၊ ဆရာစံမြောက် အနောက်ရပ်ကွက်၊ မော်လမြိုင်လမ်းရှိ နေအိမ်တစ်အိမ်အတွင်း အသက် (၂ဝ) ကျော်အရွယ် မိန်းကလေးတစ်ဦးမှ နှစ်နှစ်သားအရွယ်က လေးအားချီလျက် နေအိမ်အပြင်သို့ ထွက်လာစဉ် အဆိုပါလမ်းတွင်း သွယ်တန်းထားသော ဓာတ်ကြိုးမှာ ကလေးချီထားသော အမျိုးသမီး၏လက်ပေါ်သို့ ပြုတ်ကျခဲ့ကြောင်း သိရသည်။

ယင်းသို့ ဓာတ်ကြိုးပြုတ်ကျခဲ့သဖြင့် ထိုအမျိုးသမီးမှာ ဓာတ်လိုက်ခဲ့ပြီး ကလေးမှာ ဓာတ်ကြိုးပေါ်သို့ ပြုတ်ကျသွားခဲ့ကြောင်း၊ ယင်းနောက်ကလေး၏ အဘိုးဖြစ်သူနှင့် အဘွားဖြစ်သူမှ ကလေးအား ဝင်ဆွဲစဉ် ယင်းတို့နှစ်ဦးအား ထပ်မံဓာတ်လိုက်ခဲ့ကြောင်း သိရသည်။

ယင်းသို့ ဓာတ်လိုက်ခဲ့သဖြင့် နှစ်နှစ်သားအရွယ်ကလေးမှာ ခန္ဓာကိုယ်တွင် အပူလောင်ဒဏ်ရာများရရှိကာ ရန်ကင်းကလေးဆေးရုံကြီးသို့ တင်ပို့ကုသထားရပြီး အဘိုးဖြစ်သူတွင်လည်း အပူလောင်ဒဏ်ရာများရရှိကာ ရန်ကုန်ဆေးရုံကြီးသို့ တင်ပို့ကုသထားရကြောင်းလည်း သိရသည်။

“ကောင်မလေးက သူ့တူလေးကို ချီပြီး အိမ်ရှေ့ကို ထွက်လာတဲ့အချိန်မှာ ဓာတ်ကြိုးက ကောင်မလေးရဲ့ လက်ပေါ်ကို ပြတ်ကျ တယ်။ နောက်ပြီး ကလေးက ဓာတ်ကြိုးပေါ်ကို လွတ်ကျသွားတယ်။ အဲဒီမှာ ကလေးရဲ့ အဘိုးနဲ့အဘွားက ကလေးကိုဝင်ဆွဲတာမှာ လေးယောက်စလုံးကိုဓာတ်လိုက်တယ်။ ဒါနဲ့လမ်းထဲက ကောင်လေးတစ်ယောက်က လမ်းထိပ်မှာရှိတဲ့ ထရမ်စဖော်မာပုံးက မိန်းခလုတ်ကိုပြေးချလို့ တော်တော်လေး သက်သာသွားတာ။ ကလေးနဲ့ သူ့အဘိုးကတော့ ဒဏ်ရာတော်တော်လေးပြင်းတယ်။ ကောင်မလေး နဲ့ အဘွားဖြစ်သူကတော့ နည်းနည်းပါးပါးပဲ ဒဏ်ရာရသွားတယ်” ဟု အခင်းဖြစ်စဉ်အား မျက်မြင်ကြုံတွေ့ခဲ့သော ကိုအောင်ကျော်ဦး က ပြောကြားသည်။

အဆိုပါ အခင်းဖြစ်ပွားရာလမ်းအတွင်းရှိ ဓာတ်ကြိုးများမှာ နှစ်ကာလကြာနေပြီဖြစ်သောကြောင့် လူတွေကို အန္တရာယ်ဖြစ်နိုင်တဲ့အထိ ဟောင်းနွမ်းနေသဖြင့် လွန်ခဲ့သောတစ်နှစ်ခန့်မှစ၍ ဓာတ်ကြိုးများအား လဲလှယ်ပေးရန် လျှပ်စစ်ဓာတ်အားပေးရေးအဖွဲ့သို့စာဖြင့် တင်ပြထားခဲ့သော်လည်း လာရောက်လဲလှယ်ပေးခြင်း မရှိခဲ့ကြောင်း သိရသည်။

“ဒီလိုဖြစ်တာကတော့ ဓာတ်ကြိုးတွေက ဟောင်းနွမ်းနေတယ်။ မကြာခဏလည်း ပြတ်ကျတယ်။ ကျွန်တော်တို့ လျှပ်စစ်ဓာတ်အားပေးရေးအဖွဲ့ကိုလည်း ပြုပြင်ပေးဖို့ လွန်ခဲ့တဲ့နှစ်ကတည်းက စာတင်ထားတယ်။
လာရောက်ပြင်ဆင်ပေးခြင်း မရှိခဲ့ပါဘူး။ ခုလိုဖြစ်သွားတော့ လျှပ်စစ်ဓာတ်အားပေးရေးအဖွဲ့က ဒုတိယမြို့နယ် လျှပ်စစ်အင်ဂျင်နီယာရောက်လာပြီးတော့ ပြတ်ကျတဲ့ဓာတ်ကြိုးကိုလည်း လာလဲသွားတယ်။ နောက်ပြီး ဓာတ်လိုက်ခံခဲ့ရတဲ့ မိသားစုကို ငွေကြေးထောက်ပံ့ပေးပါမယ်လို့ ပြောသွားတယ်။ ဒါပေမယ့် ကျွန်တော်တို့က ဟောင်းနွမ်းနေတဲ့ ဓာတ်ကြိုးတွေအကုန်လုံးကို အမြန်ဆုံး လဲပေးစေချင်ပါတယ်” ဟု ဓာတ်လိုက်ခံခဲ့ရသူများ၏ မိသားစုဝင်တစ်ဦးက ပြောကြားသည်။

ထို့အပြင် ယင်းကဲ့သို့ ထပ်မံဖြစ်ပွားမည်ကိုလည်း စိုးရိမ်နေရကြောင်း အဆိုပါ လမ်းအတွင် နေထိုင်သူများ၏ ပြောပြချက်များ အရသိရသည်။


Eleven Media Group