ကယား စစ်ဘေးရှောင် ဒုက္ခသည်များ ပြန်လည် ခေါ်ယူမည်

ပို့စ်တင်ချိန် - 12/30/2013 11:15:00 PM


ပြီးခဲ့သည့် မတ်လအတွင်းက မီးလောင်ပြီးနောက် တွေ့ရသည့် ထိုင်းနိုင်ငံ မယ်ဟောင်ဆောင် ခရိုင်ရှိ ကရင်နီ ဒုက္ခသည် စခန်း အမှတ် ၂ မှ ဒုက္ခသည် တချို့ (ဓာတ်ပုံ – know)

ထိုင်းနိုင်ငံနယ်စပ်နှင့် ပြည်တွင်း ဒုက္ခသည် စခန်းများရှိ ကယား (ကရင်နီ) စစ်ဘေးရှောင် ဒုက္ခသည်များကို ပြန်လည်နေရာ ချထား ပေးရန် ကရင်နီ အမျိုးသား တိုးတက်ရေး ပါတီ (KNPP) နှင့် ပြည်နယ် အစိုးရတို့ စီစဉ်နေကြကြောင်း သိရသည်။

“ဒုက္ခသည်တွေ အတွက် အိမ်ခြေ ၅၀ ဆောက်ပေးဖို့ လျာထားပါတယ်။ ၃ နှစ်စာ ထောက်ပံ့ကြေး ပေးဖို့တွေ၊ မိုင်း ရှင်းလင်းရေး ကိစ္စတွေ လုပ်ဆောင်နေ ပါတယ်။ အဲ့ဒါတွေ အားလုံး လုပ်ပြီးမှပဲ ပြန်ခေါ်ပါမယ်”ဟု ကရင်နီ အမျိုးသား တိုးတက်ရေး ပါတီ (KNPP) ၏ စစ်ရေးချုပ် ဗိုလ်မှူးကြီး ဘုန်းနိုင်က ပြောသည်။

လက်ရှိ အချိန်တွင် ပြည်တွင်း စစ်ဘေးရှောင် (IDPs) များအတွက် ကယားပြည်နယ် ရှားတောမြို့နယ် မယ်လယု စံပြကျေးရွာတွင် ဦးစွာ ပြန်လည် နေရာ ချပေးမည်ဖြစ်ပြီး ပြန်လာသူများကို ကူညီ ထောက်ပံ့မည်ဟု ၄င်းက ပြောဆိုသည်။

ထိုင်းနိုင်ငံ နယ်စပ်သို့ ရောက်ရှိနေသည့် ဒုက္ခသည်များကို ပြန်ခေါ်ရန် အတွက်ကိုမူ အစိုးရက တရားဝင် ခွင့်ပြုမိန့် မကျလာသေးကြောင်းနှင့် ယခု စစ်ဘေးရှောင် ပြည်တွင်း ဒုက္ခသည်များ (IDPs) ကို ထားရှိမည့် မယ်လယု စံပြကျေးရွာတွင် လမ်းများ မဖောက် လုပ်ရ သေးကြောင်းလည်း ဗိုလ်မှူးကြီး ဘုန်းနိုင် က ပြောသည်။

ကယား ဒေသတွင် ၁၉၈၄ ခုနှစ်မှစပြီး အစိုးရတပ်နှင့် တိုင်းရင်းသား လက်နက်ကိုင်များ အကြား ဖြစ်ပွားသည့် စစ်ပွဲများကြောင့် ဒုက္ခသည်များသည် ထိုင်း-မြန်မာ နယ်စပ်သို့ ထွက်ပြေးခဲ့ကြရသည်။ နယ်စပ် တလျှောက် ကူညီ စောင့်ရှောက်ရေး ညွန့်ပေါင်း အဖွဲ့ (TBC) ၏ စားနပ်ရိက္ခာ ထောက်ပံ့မှု အကူအညီဖြင့် ထိုင်းနိုင်ငံ မြောက်ပိုင်း မယ်ဟောင်ဆောင် ခရိုင်ရှိ ဒုက္ခသည် စခန်း ၂ ခုတွင် ခိုလှုံနေထိုင် နေကြသည်။

ထိုင်းနိုင်ငံမယ်ဟောင်ဆောင်ခရိုင် အမှတ် ၁ နှင့်အမှတ် ၂  ဒုက္ခသည် စခန်း၂ ခုတွင် ယခင်က ဒုက္ခသည် ဦးရေ ၃၀,၀၀၀ နီးပါး နေ ထိုင်ခဲ့ရာ ကုလသမဂ္ဂ ဒုက္ခသည်များဆိုင်ရာ မဟာမင်းကြီးများရုံး(UNHCR) အစီအစဉ်ဖြင့် တတိယ နိုင်ငံသို့ ၁၀၀၀၀ ကျော် သွားရောက် အခြေချ နေထိုင်နေကြောင်း၊ ယခု လက်ရှိ စုစုပေါင်း ဒုက္ခသည် ဦးရေ ၁၆,၀၀၀ ခန့် ကျန်ရှိနေကြောင်း သိရသည်။

ထိုင်းနိုင်ငံ နယ်စပ်ရှိ ဒုက္ခသည် စခန်းများတွင် ခိုလှုံနေသည့် ဒုက္ခသည် (Refugee) များ နှင့် ပြည်တွင်း စစ်ဘေးရှောင် (IDPs)များ အားလုံးကို ပြန်လည် ခေါ်ဆောင်နိုင်ရန် ကယား ပြည်နယ် အစိုးရနှင့် ကရင်နီ အမျိုးသား တိုးတက်ရေး ပါတီ(KNPP)တို့ ညှိနှိုင်း နေ ဆဲ ဖြစ်သည်ဟုလည်း ဗိုလ်မှူးကြီး ဘုန်းနိုင်က ဆိုသည်။

ဧရာဝတီ သတင်း