တာချီလိတ်၌ ဆိုင်ကယ် TAXI သမားတစ်ဦး အသတ်ခံရ (ရုပ်သံ)

ပို့စ်တင်ချိန် - 5/15/2014 01:45:00 AM


ရှမ်းပြည်နယ် အရှေ့ပိုင်းဒေသ နယ်စပ်
မြို့ဖြစ်သည့် တာချီလိတ်မြို့နယ်တွင် ခရီး
တိုပို့ဆောင်မှုအဖြစ် အခြေခံလူတန်းစား
အသီးသီးများမှ အငှားဆိုင်ကယ်ပြေးဆွဲမှု


များဖြင့် အသက်မွေးဝမ်းကြောင်း ပြုနေလျက်ရှိရာ မသမာသူ ခရီးသည်များမှ အသက်အန္တရာယ်ပြု၍ လူသတ်ကာ ဆိုင်ကယ်လုယူသွားမှုများ ဖြစ်ပွားလေ့ရှိရာ ၂၀၁၄ခုနှစ် မေလ(၁၂)ရက်နေ့ ညနေပိုင်းက အသက်(၂၄)နှစ်ရှိ
အငှားဆိုင်ကယ်သမားတစ်ဦးအား သတ်ကာ ဆိုင်ကယ်လုယူသွားသည့် ဖြစ်စဉ်တစ်ခု ဖြစ်ပွားခဲ့ကြောင်း သိရသည်။

ဖြစ်စဉ်မှာ တာချီလိတ်မြို့ ဆန်ဆိုင်းဈေးထိပ်တွင် အငှားဆိုင်ကယ်ပြေးဆွဲနေသူ ရွှေတာချီခရီးသွားလုပ်ငန်းမှ ကျောနံပါတ် (၆၄၀) အင်္ကျီကို ၀တ်ဆင်၍ ခရီးသည်များအား ပို့ဆောင်ပေးနေသည့် အသက်(၂၄)နှစ်ရှိ မောင်လှိုင်မင်းထွန်းအား မေလ(၁၂)ရက်နေ့က လူတစ်ဦးမှ ရေပူစမ်းသို့ လိုက်ပါပို့ဆောင်ပေးဖို့ အသွားအပြန်အဖြစ် ဘတ်ငွေ (၉၀၀)ဖြင့် ငှားရာ ၎င်းမှ သဘောတူညီစွာဖြင့် လိုက်ပါပို့ဆောင်ပေးရာမှ ဖတ်ဟိရွာအဆင်း၏ ချောက်ထဲ၌ လည်ပင်းတွင် ထိုးဖောက်ခံထားရသည့် ဒဏ်ရာ အပြင် အခြားဒဏ်ရာတို့ဖြင့် သေဆုံးနေကြောင်း သိရသည်။


ထိုသို့ သေဆုံးနေသည့် အလောင်းအား ကားမောင်သမားတစ်ဦးမှ မေလ(၁၃)ရက် နံနက်ပိုင်းတွင် တွေ့ရရှိရ၍ တာချီလိတ်မြို့မှ သက်ဆိုင်ရာသို့ အကြောင်းကြားရာ နံနက် (၁၀)နာရီခန့်က တာချီလိတ်မြို့မရဲစခန်းမှ တာဝန်ရှိသူများနှင့် တာချီလိတ်နာရေးကူညီမှုအသင်းတို့မှ သွားရောက်၍ အလောင်းအား ရှာဖွေသယ်ဆောင်ခဲ့ကြပြီး တာချီလိတ်မြို့ ပြည်သူ့ဆေးရုံရှိ ရင်ခွဲရုံသို့ ပို့ဆောင်ကာ တာချီလိတ်မြို့နယ်ရဲတပ်ဖွဲ့မှ သေမှုသေခင်းအရ စစ်ဆေးခဲ့ကြကြောင်း သိရသည်။


ယင်းဖြစ်စဉ်ကဲ့သို့ပင် တာချီလိတ်မြို့၌ လွန်ခဲ့သော ရက်ပေါင်း (၁၃၀)ကျော်ခန့်ဖြစ်သည့် ၂၀၁၄ခုနှစ် ဇန်န၀ါရီလ(၄)ရက်နေ့ သန်းခေါင်ယံအချိန်က ဆိုင်ကယ်Taxi သမားတစ်ဦး အသတ်ခံရပြီး အလောင်းအား ရေတွင်းထဲ၌ ဇောက်ထိုးထည့်ထားခဲ့ကာ ဆိုင်ကယ်လုယူသွားသည့် ဖြစ်စဉ်လည်း ဖြစ်ပွားခဲ့ကြောင်း သိရှိရသည်။

ယခု သေဆုံးသူ၏ ရုပ်အလောင်းအား ယနေ့ မေလ(၁၄)ရက် မွန်းလွှဲပိုင်းတွင် ရွှေတာချီခရီးသွားလုပ်ငန်း ဥက္ကဌ ဦးစိုင်းကျော်စံ နှင့် အဖွဲ့ဝင်များ၊ ဆိုင်ကယ်ပြေးဆွဲသူများ နှင့် တာချီလိတ်နာရေးကူညီမှုအသင်း ဥက္ကဌ ဦးလှမိုးနှင့် အသင်းသူ၊ အသင်းသားများ အပါအ၀င် သေဆုံးသူ၏ မိသားစုဝင်များမှ မြို့မသုဿန်သို့ လိုက်ပါပို့ဆောင်ပေးခဲ့ကြကြောင်း သိရသည်။



သတင်း။ ။ ကိုဇောင်း
ဓါတ်ပုံ/ဗီဒီယို။ ။ တာချီလိတ်နာရေးကူညီမှုအသင်း
Tachileik Online TV News