ဘော်ဆိုင်းသတ္တုတွင်း တရားမ၀င်နိုင်ငံခြားသားများ ၀င်ရောက်မှုထုတ်ဖော်သူ ခြိမ်းခြောက်ခံရဟုဆို

ပို့စ်တင်ချိန် - 5/15/2014 07:56:00 PM

ဂျွန်ချစ်ငြိမ်း| ကြာသာပတေးနေ့၊ မေလ ၁၅ ရက် ၂၀၁၄ ခုနှစ်

ရှမ်းပြည်နယ်၊ ကလောမြို့နယ်အတွင်းရှိ ဘော်ဆိုင်းသတ္တုတွင်းတူးဖော်ရေးလုပ်ငန်းခွင်တွင် တရားမ၀င် ၀င်ရောက်လုပ်ကိုင်နေသည့် နိုင်ငံခြားသားများရှိနေသည်ဟု ပြည်သူ့လွှတ်တော်ဥက္ကဋ္ဌထံ တင်ပြခဲ့သည့် EITI ဖော်ဆောင်ရေး (ရှမ်းပြည်နယ် အရပ်ဖက် ကိုယ်စားလှယ်) ကိုဣန္ဒကို ဒေသခံ ရပ်ကွက်အုပ်ချုပ်ရေးမှူးက ခြိမ်းခြောက်ခဲ့သည်ဟု ခြိမ်းခြောက်ခံရသူ ကာယကံရှင်က မဇ္ဈိမကို ပြောသည်။

မေ၈ရက်က ကလောမြို့နယ်ခန်းမတွင် ပြည်သူ့လွှတ်တော်ဥက္ကဋ္ဌ သူရဦးရွှေမန်းနှင့် ဒေသခံများတွေ့ဆုံစဉ် ဘော်ဆိုင်းသတ္တုတွင်းလုပ်ငန်းခွင်နှင့် ပတ်သက်ပြီး ကိုဣန္ဒက အသေးစိတ်တင်ပြဆွေးနွေးခဲ့ရာ ပွဲအပြီးတွင် ဘော်ဆိုင်း ကျေးရွာအုပ်စု အုပ်ချုပ်ရေးမှူးက ကြိမ်းမောင်းခြိမ်းခြောက်ခဲ့ခြင်းဖြစ်သည်ဟု ဆိုသည်။

“ဘော်ဆိုင်းသတ္တုတွင်းတွင် နိုင်ငံခြားသားပညာရှင်များသာ လုပ်ကိုင်လျက်ရှိကြောင်း၊ အမှန်တကယ်တွင်မူ အနီးပတ်ဝန်းကျင် ကျေးရွာလူထု၏ သတင်းပေးချက်အရ ထိုလုပ်ငန်းခွင်တွင် နိုင်ငံခြားသားပညာရှင်များ သာမက ပတ်စပို့မပါဘဲ နိုင်ငံခြားသားအလုပ်သမားများကိုပါ တွေ့ရှိနေရကြောင်း၊ အဘယ်ကြောင့် ထိုသို့ဖြစ်ရပါသနည်းဆိုတဲ့ မေးခွန်းကို ကျွန်တော်က လွှတ်တော် ဥက်္ကဋ္ဌကြီးကို မေးတယ်။ မေးတော့ ဥက္ကဋ္ဌကြီးက ဒီသတင်းအချက်လက်သာ ခိုင်လုံလျင် ကျေးရွာအုပ်ချုပ်ရေးမှူး ပေါ့လျော့လို့ဖြစ်တာ အုပ်ချုပ်ရေးမှူးမှာ တာဝန်ရှိတယ်ဆိုပြီး ပြန်ဖြေပေးခဲ့တာပါ”ဟု ကိုဣန္ဒက ပြောသည်။

အဆိုပါ သတင်းအချက်လက်များသည် လက်ရှိအဆိုပါသတ္တုတွင်းတွင် လုပ်ငန်းလုပ်ကိုင်နေသည့် ကုမ္ပဏီတစ်ခုမှ ရရှိထားသည့် အချက်အလက်များကို ကိုးကားပြောဆိုခဲ့ခြင်းဖြစ်သည်ဟုဆိုသည်။

ဘော်ဆိုင်းကျေးရွာအုပ်စု အုပ်ချုပ်ရေးမှူး ဦးအောင်သန်းက “ဘာကိစ္စ ကိုယ်နဲ့မဆိုင်ဘဲ ဒီလိုတွေဝင်ပြောရတာလဲ။ လ၀ကက လုပ်ရမဲ့အလုပ်ကို မင်းက ဘာကြောင့် ၀င်လုပ်နေရတာလဲ။ ငါ အုပ်ချုပ်ရေးမှူးတောင် ဘာမှမတင်ပြဘူး။ မင်းက ပြောတော့ ငါခွေးဖြစ်သွားတာပေါ့ကွ”ဟု ပြောဆိုခဲ့ကြောင်း ကိုဣန္ဒက ပြောသည်။

အဆိုပါဖြစ်စဉ်များနှင့် ပတ်သက်၍ ကျေးရွာအုပ်ချုပ်ရေးမှူး ဦးအောင်သန်းကို မဇ္ဈိမက ဆက်သွယ်မေးမြန်းခဲ့သော်လည်း တယ်လီဖုန်းလိုင်း ခေါ်ဆိုမရခဲ့သည့်အတွက် မှတ်ချက်တစ်စုံတစ်ရာ ရရှိခဲ့ခြင်း မရှိပေ။

လက်ရှိ လုပ်ငန်းခွင်အတွင်း နိုင်ငံခြားသားများ ၀င်ရောက်နေမှုနှင့် ပတ်သက်ပြီး နိုင်ငံခြားသားဝင်ထွက်မှု စာရင်း
အတိအကျလုပ်ထားကြောင်း၊ ဥက္ကဋ္ဌကြီး ပြောသည့်အတိုင်း တာဝန်ကျေစေရမည်ဖြစ်ကြောင်း ကျေးရွာအုပ်ချုပ်ရေးမှူးက
ပြောဆိုထားသည်ဟုဆိုသည်။

ခြိမ်းခြောက်ခံရမှုအတွက် ကလောမြို့နယ်အုပ်ချုပ်ရေးမှူးထံ စာတင်ပြသွားမည့်အပြင် သဘာဝသယံဇာတအရင်းအမြစ် တူးဖော်ထုတ်လုပ်ရေးလုပ်ငန်းများ ပွင့်လင်းမြင်သာမှု ဖော်ဆောင်နိုင်ရေး (EITI)သို့ အသိပေးအကြောင်းကြားသွားမည်ဟု ကိုဣန္ဒက ပြောသည်။

EITI တွင် အစိုးရ၊ ကုမ်္ပဏီနှင့်အရပ်ဘက်အဖွဲ့အစည်းသုံးပွင့်ဆိုင်ညွန့်ပေါင်းအဖွဲ့ကို အကောင်အထည်ဖော်နိုင်လျှင် စီမံကိန်းများတွင် ပွင့်လင်းမြင်သာမှုရှိခြင်း၊ တာဝန်ခံမှုရှိခြင်းအပေါ် နိုင်ငံတကာ၏ ထောက်ခံမှုကိုရရှိခြင်း၊ အစိုးရ၏
သယံဇာတဆိုင်ရာ အခွန်ကောက်ယူမှု အရည်အချင်းနှင့် လူထုအခြေပြုအဖွဲ့အစည်းများအကြား ယုံကြည်မှုတည်ဆောက်ရန် အထောက်အကူပြုစေမည်ဟု EITI အဖွဲ့က ထုတ်ပြန်သည်။

Mizzima Burmese