ပြည်မြို့တွင် ခွင့်ပြုချက်မရှိ ဆန္ဒပြမှုဖြင့် သတင်းထောက်တဦး တရားစွဲခံရ

ပို့စ်တင်ချိန် - 4/28/2014 03:04:00 PM

ဧပြီ ၂၅ ရက်နေ့ ဆန္ဒပြပွဲအတွင်း သတင်းထောက် ဦးရေခဲ (မျက်မှန်) နှင့် ရဲအရာရှိ ဆွေးနွေးနေစဉ်

ပဲခူးတိုင်း ပြည်မြို့မှာ ခွင့်ပြုချက်မရှိဘဲ ဆန္ဒပြခဲ့တဲ့ သတင်းထောက် ဦးရေခဲကို  ပြည်မြို့မ ရဲစခန်းက ပုဒ်မ ၁၈ နဲ့ တရားစွဲဆိုထားပါတယ်။

ပြီးခဲ့တဲ့ ဧပြီ ၂၅ ရက်နေ့က သတင်းထောက် ၂၀ လောက်နဲ့ ဒေသခံ စုပေါင်း ၁၀၀ လောက်က ဖမ်းဆီးတရားစွဲဆို ထောင် ဒဏ် ကျနေတဲ့ သတင်းထောက် တွေ ပြန် လွှတ်ပေးရေး၊ မီဒီယာလွတ်လပ် ခွင့်ရရှိရေးနဲ့ ပြည်သူပိုင် အဆောက်အဦနဲ့ ရုံးတွေမှာ လွတ်လပ်စွာ သတင်းရယူခွင့် ရရှိရေး တောင်းဆို ဆန္ဒပြခဲ့ကြတာ ဖြစ်ပါတယ်။

ဆန္ဒပြခွင့်ရဖို့ သတင်းထောက်တွေက ခွင့်ပြုချက် တောင်းခံခဲ့ပေမယ့်  ခွင့်မပြုခဲ့တဲ့အတွက် အစီအစဉ်အတိုင်း ဆန္ဒပြခဲ့တာကြောင့် ဆန္ဒပြခေါင်းဆောင် ဦးရေခဲကို မြို့မစခန်းမှူး ဦးမျိုးမြင့်က တရားလို ပြုလုပ်ပြီး တရားစွဲဆိုတာလို့ ဆိုပါတယ်။

အခု ဧပြီ ၂၆ ရက်နေ့က တရားစွဲဆိုပြီး မဇ္ဈိမ ဂျာနယ်သတင်းထောက် ဦးရေခဲ ကိုယ်တိုင် လျှောက်လဲပြီး အာမခံနဲ့ ပြန်လွှတ်ပေးထားပါတယ်။

DVB Burmese