ဘာကြောင့်သာဓုခေါ်ကြတယ်
ပို့စ်တင်ချိန်
-
5/17/2014 10:57:00 PM
သာဓုခေါ်ဆိုခြင်းကို ပတ္တာနုမောဒနာ ကုသိုလ် ဟုခေါ်ပါသည်။
သူများပေးဝေသော ကောင်းမှုကို နှုတ်မြွက်သံချို သာဓုခေါ်ဆိုကြရခြင်းကြောင့် အလှူရှင်တို့နှင့်ထပ် တူ ကောင်းကျိုးတရားများ ဖြစ်ပွါးခံစားနိုင်ခွင့်ရှိကြ၍ (သာဓု) ခေါ်ဆိုကြသည်ဟု မှတ်သားသင့်ပါသည်။
သာဓုခေါ်ဆိုရကျိုးသူများပေးဝေသော ကောင်းမှု ကို နှုတ်မြွက်သံချို သာဓုခေါ်ဆိုကြရခြင်းကြောင့် အလှူရှင်တို့နှင့်ထပ်တူ ကောင်းကျိုးတရားများ ရရှိခံစားနိုင်ပါသည်။
ဤနေရာ၌ စဉ်းစားစရာအချက်အတော်များများရှိပါသည်။ ရှေးဦးစွာ ဗိမ္ဗိသာရမင်းကြီး နှင့်ပြိတ္တာများ အကြောင်းကိုအနည်းငယ်စဉ်းစားကြည့်ကြပါမည်။
ဗိမ္ဗိသာရမင်းကြီးသည် ဝေဠုဝန်ဥယျာဉ်တော်ကို ဘုရားမြတ်စွာ သာသနာတော်အတွက် ပေးလှူလိုက်ပြီး သည့်ညတွင်ပြိတ္တာအပေါင်း၏ ခြောက်လှန့်မှုမျိုးစုံကို ကြုံတွေ့ခဲ့ရသည်။
ဘုရားရှင်ထံလျှောက်ထားအပြီးတွင်မှ အတိတ်ဘ၀က ဆွေမျိုးတော်စပ်ခဲ့ကြသောပြိတ္တာများဖြစ်ကြောင်း သိရသည်။ သူတို့သည် ကဿပဘုရားလက်ထက်တော်မှသည် ဂေါတမဘုရားရှင် ရွှေလက်တော်အထိ
ဗိမ္ဗိသာရမင်းကြီးကောင်းမှုပြုအမျှပေးဝေမည့်နေ့ကို မျှော်လင့်ချက်ကြီးစွာဖြင့်စောင့်မျှော်နေခဲ့ကြသူ များဖြစ်ကြသည်။
ဗိမ္ဗိသာရမင်းသည် ကောင်းမှုကိုပြုကားပြုခဲ့ပါ၏။ သို့သော်သူတို့ကိုရည်စူး၍ အမျှပေးဝေမှုကိုကားမပြုခဲ့။ ထို့ကြောင့် သာဓုခေါ်ခွင့်၊ ကောင်းမှု၏အဖို့ကို ခံစားခွင့်မရခဲ့ကြပေ။ ( ဤနေရာ၌ ပထမဆုံးအချက် ကို ကောက်ချက်ချ မှတ်သားကြပါစို့)။
ကောင်းမှုရှင်က ရည်စူး၍ အမျှပေးဝေခြင်းမခံရလျှင် သာဓုခေါ်ခွင့်၊ ကောင်းမှု၏အဖို့ကို ခံစားခွင့်မရနိုင်။
နောက်တစ်နေ့ ကောင်းမှုပြုအမျှပေးဝေသောအခါ သာဓုခေါ်နိုင်ကြ၍ ပြိတ္တာများ စားနေ၀တ် အဆင်ပြေသွားခဲ့ကြပါသည်။
မိမိတို့ကိုရည်စူး၍ပြုသော ကောင်းမှုကို ကောင်းမှုရှင်တို့က နှုတ်မြွက်သံခြွေ အမျှပေးဝေသည့်အခါ သာဓုခေါ်နိုင်ပါလျှင် ကောင်းမှု၏အဖို့ကို ခံစားကြရသည်။
တစ်ဆင့်တက်၍စဉ်းစားဖွယ်သာဓုခေါ်က ကောင်းမှုရှင်တို့နှင့်ထပ်တူ ကုသိုလ်ရသည်ဆိုပါ က ကောင်းမှုပြု အပြီးတွင် ၄င်းပြိတ္တာတို့သာ သာဓုခေါ်ဆိုကြလိမ့်မည်မဟုတ်။ လူသားစစ်စစ်ဖြစ်သော မင်းကြီး၏အခြွေအရံများလည်း သာဓုခေါ်ဆိုကြမည်သာဖြစ်ပါ၏။
ထိုတွင် ကောင်းမှုရှင်ဖြစ်သော မင်းကြီး၌လည်းကောင်း၊ သာဓုခေါ်ဆိုကြသူ လူအပေါင်းတို့၌ လည်းကောင်း ကောင်းမှု၏အကျိုးဂုဏ်အင် အာနိသင်တစ်စုံတစ်ခုမျှကို ဒိဋ္ဌထင်ထင် မတွေ့မမြင်ကြရပါဘဲလျှက် အဘယ့်ကြောင့် သာဓုခေါ်ရှာ ထိုပြိတ္တာတို့ဆီမှာမှ ကောင်းမှု ၏အကျိုးကိုတွေ့မြင်ကြရပါသနည်း။ ( ကောင်းမှုရှင်ဖြစ်သော မင်းကြီး၌ ထိုကောင်းမှုကြောင့် မည်သည့် အ၀တ်တန်ဆာ၊ ရေတွင်းရေကန်။ ခြွေရံသင်းပင်း၊ ဆင်မြင်းရထား၊ စားသောက်ဖွယ်ရာမျှ တိုးပွါး၍ မလာပါဘဲလျှက် အဘယ့်ကြောင့် လက်ဝေခံသာဓုခေါ်ကြရသူပြိတ္တာတို့မှာမှ နတ်ဝတ်တန်ဆာ၊ စားစရာတို့ ဖြစ်ပေါ်၍လာရပါသနည်း။ ပြိတ္တာမဟုတ်သူ သာဓုခေါ်ဆိုကြသူ ထိုထိုလူတို့၌လည်း အဘယ်ကြောင့် ထိုအကျိုးပေးများထင်ရှားစွာ မရရှိကြပါသနည်း ဟုဆိုလိုပါသည်။)
( စာကြွင်းအဖြစ် သီရိလင်္ကာနိုင်ငံမှ အမျှပေးဝေပုံကို ဗဟုသုတမျှဝေလိုပါသည်)
ဦးဇင်းတို့ မြန်မာပြည်တွင် အမျှပေးဝေကြသောအခါ-----
( ၁) ကြားကြားသမျှ အမျှ၊ အမျှ၊ အမျှ ---ဟူ၍လည်းကောင်း၊
(၂) ကုသိုလ်---------- အမျှ၊ အမျှ၊ အမျှ ---ဟူ၍လည်းကောင်း၊
အမျှပေးဝေလေ့ရှိကြပါသည်။
သီရိလင်္ကာ၌ အမျှပေးဝေကြပုံမှာ-----
ဣဒံမေ ဉာတီနံဟောတု ၊ သုခိတာ ဟောန္တု ဉာတယော---ဟူ၍ အမျှပေးဝေကြပါသည်။
(အဓိပ္ပါယ်မှာ--"ဤကောင်းမှုသည် ဆွေမျိုးတို့အတွက် ဖြစ်ပါစေ၊ ဆွေမျိုးအပေါင်းတို့ ချမ်းသာကြပါစေ"
ဟူ၍ဖြစ်ပါသည်)
ကျေးဇူးတင်လျှက်.....
ဦးဇင်း (သီရိလင်္ကာ)
မေတ္တာဖြင့်ဝေမျှသူ
အနှိုင်းမဲ့စာတိုပေစများ
