ကျိုင်းတုံ မိုးသက်လေပြင်း အဆောက်အအုံ ၂၀ ကျော်ပျက်စီး၊ တစ်ဦးဒဏ်ရာရ

ပို့စ်တင်ချိန် - 5/30/2014 05:04:00 PM


ကျိုင်းတုံ၊ မေ ၂၈

ရှမ်းပြည်နယ် အရှေ့ပိုင်း ကျိုင်းတုံမြို့တွင် မေလ ၂၇ ရက် ညနေ ၄ နာရီခန့်က မိုးသည်းထန်စွာ ရွာသွန်းပြီး လေပြင်းများ တိုက်ခတ်မှုကြောင့် အဆောက်အအုံနှင့် လျှပ်စစ်မီးတိုင်များအပေါ် သစ်ပင်ကြီးများ ပြိုကျကာ စာသင်ကျောင်းတစ်ခု အပါအဝင် အဆောက်အအုံ ၂၀ ကျော် ပျက်စီးခဲ့ပြီး လူတစ်ဦး ဒဏ်ရာရရှိခဲ့ကာ နွားကိုးကောင် သေဆုံးခဲ့ကြောင်း မြို့နယ် ဒေသခံများနှင့် အထွေထွေအုပ်ချုပ်ရေး ဦးစီးဌာနတို့ထံမှ သိရသည်။

ယင်းနေ့ညနေ ၄ နာရီခန့်က မိုးစတင် ရွာသွန်းပြီးနောက် လေပြင်းများ တိုက်ခတ်ခဲ့ကြောင်း၊ ယင်းမိုးသက် လေပြင်းကြောင့် ကျိုင်းတုံမြို့ အမှတ် (၂) အခြေခံပညာ အထက်တန်းကျောင်း ခန်းမဆောင် အပါအဝင် မြို့ပေါ်ငါးရပ်ကွက်ရှိ နေအိမ်နှင့် ဈေးဆိုင်ခန်းပေါင်း ၂၀ ကျော် ထိခိုက်ပျက်စီးခဲ့ပြီး ကျိုင်းတုံ-တာချီလိတ်လမ်း၊ ကျိုင်းတုံ-တောင်ကြီးလမ်း၊ ကျိုင်းတုံ-လွိုင်မွေလမ်းနှင့် ကျိုင်းတုံ-လေယာဉ်ကွင်းလမ်းတို့တွင် လျှပ်စစ်မီးတိုင်နှင့် ဖုန်းတိုင်များ အပေါ်သို့ သစ်ပင်ကြီးများ လဲပြိုကျသဖြင့် လမ်းပိတ်ဆို့မှုများနှင့် လျှပ်စစ်ဓာတ်အား ပြတ်တောက်မှုများ ဖြစ်ပေါ်ခဲ့ကြောင်း ယင်းမြို့နယ် အထွေထွေ အုပ်ချုပ်ရေးမှူး ဦးလှမြင့်က ပြောကြားသည်။

“ပျက်စီးဆုံးရှုံးမှု တန်ဖိုးကတော့ တွက်ချက်နေဆဲပါ။ လမ်းတွေပေါ်မှာ သစ်ပင်ကြီးတွေ ပိတ်ဆို့နေတာကိုတော့ မနေ့ညနေကတည်းက ရှင်းလင်းထားပါတယ်။ ကျန်တဲ့ လဲနေတဲ့ သစ်ပင်တွေကိုလည်း ဒီနေ့ ရှင်းလင်းနေပါတယ်။ မနေ့က ဖြစ်စဉ်မှာတော့ အ.ထ.က (၂) က ဆရာမတစ်ဦးရဲ့ ခေါင်းပေါ်ကို သစ်သားလွင့်စဉ် ထိခိုက်မိလို့ ဆေးရုံတင်ထားရတယ်။ ယန်းခကျေးရွာအုပ်စု၊ ပန်ကုလားရွာမှာတော့ အိမ်ငါးလုံး ပျက်စီးပြီး နွားကိုးကောင် မိုးကြိုးပစ်ခံရလို့ သေသွားတယ်” ဟု ၎င်းကဆိုသည်။

သင်္ကြန်ကာလပြီး နောက်ပိုင်းတွင် မိုးရွာသွန်းမှု မရှိသည့်အတွက် အပူဒဏ်ကို ပြင်းထန်စွာ ခံစားခဲ့ရကြောင်း၊ ယခုကဲ့သို့ မိုးရွာသွန်းပြီး နောက်ပိုင်း အပူချိန် အနည်းငယ် လျော့ကျခဲ့သော်လည်း လေပြင်း တိုက်ခတ်မှုကြောင့် မြို့တွင်းနှင့် မြို့အပြင်ရှိ အရိပ်ရ သစ်ပင်အချို့နှင့် သက်တမ်းရင့် သစ်ပင်ကြီးများ လဲပြိုခဲ့ကြောင်း အမှတ် (၁) ရပ်ကွက်နေ အသက် ၃၀ ကျော်အရွယ် အမျိုးသားတစ်ဦးက ပြောကြားသည်။

“မိုးရွာနေတဲ့အချိန်မှာ စာတိုက်ရှေ့က ဈေးဆိုင်တန်းမှာ ကွမ်းယာ ဝယ်နေတာ။ အဲဒီအချိန်မှာ ညောင်ပင်ကြီးက တိုက်တန်းပေါ်ကို ဝုန်းဆိုပြီး ကျိုးကျလာတယ်။ ကံကောင်းတာက တိုက်တန်းမှာ နေတဲ့လူတွေ တစ်ယောက်မှ မထိခိုက်မိဘူး။ ဒါပေမဲ့ တိုက်တန်းက အခန်းသုံးခန်းတော့ ညောင်ပင်ပိလို့ လုံးဝပျက်စီးသွားတယ်” ဟု ၎င်းကဆိုသည်။

လေပြင်း တိုက်ခတ်မှုကြောင့် လွန်ခဲ့သော နှစ်ပေါင်း ၇၀ ခန့်က ဆောက်လုပ်ထားသည့် အမှတ် (၂) အခြေခံပညာ အထက်တန်းကျောင်းမှ ပေ ၁၅၅၊ ပေ ၅၀ ရှိ သံလွင်ခန်းမဆောင် အမိုးများ လွင့်စဉ်ပျက်စီး ဆုံးရှံးခြင်း၊ ပေ ၈၀၊ ပေ၃၀ ဝန်ထမ်းအိမ်ရာ အုတ်ကြွပ်အမိုး ပျက်စီးဆုံးရှုံးခြင်းနှင့် ၂၀ ပေပတ်လည် နှစ်ထပ်ကျောင်းဆောင် သွပ်အမိုးတို့ ပျက်စီးခဲ့သဖြင့် စုစုပေါင်း ပျက်စီးဆုံးရှုံးမှုတန်ဖိုး ၈၂၁ သိန်းခန့် ရှိကြောင်း ယင်းကျောင်းအုပ်ကြီး ဦးခင်မောင်သန်းက ပြောကြားသည်။

မေလ ၂၇ ရက် ညနေ ၃ နာရီ ၄၅ မိနစ်ခန့်တွင် မိုးစတင် ရွာသွန်းခဲ့ပြီး ၃ နာရီ ၅၅ မိနစ်ခန့်တွင် လေပြင်းများ စတင်တိုက်ခတ်ခဲ့ရာ ညနေ ၄ နာရီ ၃၀ မိနစ်ခန့်အထိ ကြာမြင့်ကြောင်း၊ ယင်းလေတိုက်နှုန်းသည် တစ်နာရီလျှင် ၃၀ မိုင်မှ ၃၅ မိုင်အထိရှိပြီး ဘက်ပေါင်းစုံမှ တိုက်ခတ်သည့် စိုက်ဆင်းလေ အမျိုးအစား ဖြစ်ကြောင်းနှင့် မိုးရေချိန်လက်မသည် ၁ ဒသမ ၇၀ လက်မရှိပြီး ယင်း မိုးရေချိန်သည် မိုးဦးကာလ၌ ပုံမှန် ရွာသွန်းသည့် မိုးရေချိန်သာ ဖြစ်ကြောင်း ကျိုင်းတုံခရိုင် မိုးလေဝသနှင့် ဇလဗေဒ ဦးစီးဌာန ခရိုင်ဦးစီးအရာရှိ ဦးအောင်ကိုကိုက ပြောကြားသည်။

The Voice Weekly