မြစ်ဆုံ လမ်းလျှောက် အဖွဲ့ဝင်များ အကြား ငွေကြေးနှင့် ပတ်သက်၍ အငြင်းပွားမှု ဖြစ်ပေါ်

ပို့စ်တင်ချိန် - 5/30/2014 05:59:00 PM

photo credit: RFA


မြစ်ဆုံစီမံကိန်း ဖျက်သိမ်းပေးရန် ရန်ကုန်မှ မြစ်ဆုံသို့ လမ်းလျှောက် ရာတွင် လမ်းလျှောက် အဖွဲ့ဝင်များ အကြား ငွေကြေးနှင့် ပတ်သက်၍ အငြင်းပွားမှု ဖြစ်ပေါ်ခဲ့သည်။
အဆိုပါ အငြင်းပွားမှု ဖြစ်စဉ်မှာ ယမန် နေ့က Central Hotel တွင် ပြုလုပ်ခဲ့သော မြစ်ဆုံစီမံကိန်း ဖျက်သိမ်းပေးရေး သတင်းစာ ရှင်းလင်းပွဲတွင် လမ်းလျှောက် အဖွဲ့ဝင် အချို့နှင့် ခေါင်းဆောင်ပိုင်းတို့ အကြား အလှူငွေ သုံးစွဲရာတွင် ပွင့်လင်း မြင်သာမှု မရှိခဲ့ခြင်းမှ စတင်ဖြစ်ပွား ခဲ့ခြင်းဖြစ်သည်။
““ကျွန်မတို့ လမ်းလျှောက် အဖွဲ့တွေ ပုဂံ မှာ အဖွဲ့နှစ်ဖွဲ့ ကွဲသွားတယ်။ ကိုမောင်မောင်သန်းရဲ့ ပြောပြချက် အရ ကိုသီဟကို လမ်းလျှောက် အဖွဲ့အတွက်ဆိုပြီး မန္တလေးမှာ (၂၅) သိန်း၊ မြစ်ကြီးနားမှာ (၂၅) သိန်း ထုတ်ပေးတယ်လို့ သိရပါတယ်။ ဒါပေမဲ့ အဲဒီ ထောက်ပံ့မှုကို ကျွန်မတို့ အနေနဲ့ ဘာမှ မရသလိုပါပဲ””ဟု လမ်းလျှောက် အဖွဲ့တွင် ပါဝင်သူ ဒေါ်သက်သက်မာက ပြောသည်။
ထို့အပြင် လမ်းခရီး တစ်လျှောက်တွင် ကြိုဆိုကြသော ပြည်သူများက လှူဒါန်းသော သောက်ရေ၊ အစားအစာများ ကိုသာ စားသောက်ခဲ့ရပြီး၊ ရန်ကုန်သို့ အပြန်လမ်း ခရီးတွင် ငွေကြေး အခက်အခဲများ ကြုံတွေ့ ရသော် လည်း ကူညီ ဖြေရှင်းမှုလည်း မရှိကြောင်း ၎င်းက ဆက်ပြောသည်။
““ပထမ ကျွန်တော်တို့ အဖွဲ့ မကွဲသေးတဲ့ အချိန်မှာ အဲဒီထောက်ပံ့ငွေ တွေကို နိုင်ကျဉ်းအဖွဲ့ချုပ်က တစ်ဦးက တာဝန်ယူထား ပါတယ်။ ကိုသီဟ အနေနဲ့ ဘာလို့ (၂၅) သိန်းကုန်လဲ ဆိုတာတော့ မော်တော်ယာဉ် ငှားခတွေ၊ တခြားစရိတ်တွေ ရှိလို့ဖြစ်မှာပါ။ ဒါပေမဲ့ သူ့ကို ပေးတာက ငွေသားကြီး သက်သက် ခုနစ်သိန်းပဲ ပေးလိုက်တာပါ””ဟု မြစ်ဆုံ လမ်းလျှောက်ရာတွင် ဦးဆောင်သူ နိုင်ငံရေး အကျဉ်းသားဟောင်းများ အစည်းအရုံးမှ အထွေထွေ အတွင်းရေးမှူး ဦးရဲထွဋ်ခေါင် ကပြောသည်။
အဆိုပါ ငွေကြေး အငြင်းပွားမှုနှင့် ပတ်သက်သူ နိုင်ငံရေး အကျဉ်းသားဟောင်များ အဖွဲ့ချုပ်မှ တာဝန်ရှိသူထံ တယ်လီဖုန်းဖြင့် နှစ်ကြိမ် ဆက်သွယ် ခဲ့သော်လည်း ၎င်း၏ မိသားစုဝင်များ နှင့်သာ တွေ့ဆုံခဲ့ပြီး ဖြေရှင်းချက် တစ်စုံတစ်ရာ ရရှိခဲ့ခြင်း မရှိပေ။
မြစ်ဆုံ စီမံကိန်း ဖျက်သိမ်းပေးရန် ရန်ကုန်မှ မြစ်ဆုံသို့ ၂၀၁၄ ခုနှစ်၊ မတ်လ (၂၃) ရက်နေ့တွင် စတင် လမ်းလျှောက်ခဲ့ပြီး၊ ဧပြီလဆန်း ပိုင်းတွင် ပုဂံမြို့ ၌ အဖွဲ့ဝင်များ အကြား သဘောထား ကွဲလွဲကာ တစ်ဖွဲ့တစ်လမ်းဆီဖြင့် မြစ်ဆုံသို့ ဆက်လက် ချီတက်ခဲ့ ကြသည်။



messenger news journal